1 Nifae 16

Folasaga

O le lagonaina o le mana o upu a Nifae, na faalotomaualaloina ai uso o Nifae i luma o le Atua. A o malaga le aiga i le vao, na tuuina atu e le Alii ia i latou le Liahona e taitaia i latou i la latou malaga. Na aafia le aiga i le tele o puapuaga a o latou malaga, e aofia ai a latou aufana ma ‘aū ua leaga ma le gausia o le aufana a Nifae, lea na faaitiitia ai le mauaina o meaai. A o muimui le toatele o le aiga ona o lenei faaletonu, na fausia e Nifae se aufana fou ma saili atu i le fautuaga a le Alii po o fea e tulimanu ai. O le suesueina o le 1 Nifae 16 e saunia ai se avanoa mo oe e mafaufau ai pe faapefea ona e tali atu i le faasa’oga ma le puapuaga. E pei lava ona taitaia e le Alii le aiga o Liae i o latou puapuaga, o le a Ia taitaia foi oe mai luitau i lou olaga pe afai e te saili atu ma le lotomaualalo ma mulimuli i Ana fautuaga.

1 Nifae 16:1–6

Ua tali atu Nifae i le muimui a ona uso

Pe ua e vaai ea i se tasi o aoaia pe otegia ona o le le usitai? O a uiga na faaalia e lena tagata?

Na lagona e Lamana ma Lemuelu ua otegia i laua e Nifae ina ua ia aoaoina i laua o le a teena e amioleaga ma e le faatagaina ona aai i le laau o le ola (tagai 1 Nifae 15:36–16:1). Faitau 1 Nifae 16:1–2, ma vase lalo o auala na fai mai Nifae e tali atu ai nisi tagata i le faalogoina o le upu moni ae latou te le o ola ai.

O le fuaitau “tuia i latou i le totonugalemu” o lona uiga ua faaalia ai lo latou tausalaina. O le a sou manatu i le uiga o le “e ave e tagata ua sala le upu moni o se mea faigata”?

Lisi i lau api talaaga mo le suesueina o tusitusiga paia, ni nai mea e mafai ona e faia e usitai ai e tusa lava pe faigata le faalogo i se upu moni ma “tuia [oe] i le totonugalemu” (1 Nifae 16:2). Aisea i lou manatu e faigata ai i nisi talavou ona usitai i ni upu moni faapitoa? Faatusatusa lau lisi i mea na tau atu e Nifae ia Lamana ma Lemuelu i le 1 Nifae 16:3–4

E tusa ai ma le 1 Nifae 16:5, na faapefea ona filifili Lamana ma Lemuelu e tali atu i le faatonuga a Nifae? O le a le upu po o le fuaitau i lenei fuaiupu o faamatalaina le mea tatou te faia pe afai ua tuia i tatou i le totonugalemu e se upu moni? Faailoga tali i nei fesili i au tusitusiga paia.

1 Nifae 16:7–33

Ua taitaia le aiga o Liae e le Liahona

Tali fuaitau nei i le sao (Sa) po o le sese (Se) i lenei suega i le lioina o au tali:

Na faaipoipo Nifae i le afafine matua o Isamaeli.
Na tuuina atu ia Liae se tapasa pei se polo e taua o le Liahona.
Sa i ai vae e fa o le polo lapotopoto e tuuina atu le faatonuga ia Liae ma lona aiga.
Ina ua maua e le aiga o Liae le polo, na faigofie le latou malaga i le vao.

A o e suesue 1 Nifae 16:7–10 ma le otootoga o le mataupu, iloilo au tali i fesili muamua e tolu (tagai foi Alema 37:38). Faitau 1 Nifae 16:17–19 e iloa ai pe na e tali saoina le fesili lona fa. (O tali sao o loo maua i le faaiuga o lenei lesona.)

E tusa lava pe o tatou usitai, tatou te aafia lava i faigata. O le tele o faigata tatou te feagai e le o ni taunuuga o le faia o filifiliga sese. Nai lo o lena, e oo mai ia i tatou o ni taunuuga masani o le olaga faaletino, ae latou te tuuina mai ia i tatou le avanoa e aoao ma tuputupu ae ai i la tatou malaga i le olaga, e pei ona faia e le Faaola (tagai MF&F 122:7–8). O se tasi o a tatou suega i le olaga o le ala tatou te tali atu ai i nei faigata.

E tusa ai ma le faamatalaga a Nifae o le polo i le 1 Nifae 16:10, e faapefea ona fesoasoani se meaalofa faapea ia Liae ma lona aiga a o latou malaga atu i le nuu folafolaina? Sue ma faailoga le ala na aoga ai le Liahona i le aiga o Liae i le 1 Nifae 16:16

Suesue 1 Nifae 16:20–22, ma faailoa mai le ala na tali atu ai nisi o le aiga o Liae ina ua gau le aufana a Nifae. Suesue 1 Nifae 16:23–25, 30–32, vaavaai mo uiga faaalia o Nifae i lenei tofotofoga. Na faapefea ona aafia lona aiga i ona uiga faaalia?

Tali le fesili lenei, i lau api talaaga mo le suesueina o tusitusiga paia: O a nisi mea na e aoaoina e ala i le faatusatusaina o uiga faaalia o Nifae ma lona aiga i le tofotofoga lava lea e tasi?

Nai lo le muimui, na fai e Nifae se aufana fou ona sailia lea o le taitaiga e iloa ai po o fea e maua ai meaai. O le faataitaiga a Nifae ua faaalia ai afai tatou te faia mea uma tatou te mafaia ma saili foi le taitaiga a le Alii, ona Ia fesoasoani lea ia i tatou i o tatou faigata.

I taimi o nei mea na tutupu, na faamatala atu e le Alii ia Liae le ala e galue ai le Liahona. I le 1 Nifae 16:26–29, vaavaai mo le mea na manaomia mo le Alii e taitaia le aiga o Liae e ala atu i le Liahona.

Vaai faalemafaufau o loo e aoaoina se tamaitiiti e uiga i le Liahona. Faamatala i lau api talaaga mo le suesueina o tusitusiga paia, i faaupuga faigofie le ala na taitaia ai e le Liahona le aiga o Liae ma le mea e tatau ona latou faia ina ia faaauau ai ona ia taitaia i latou.
Tali le fesili lenei, i lau api talaaga mo le suesueina o tusitusiga paia: E faapefea ona faaalia ia i tatou e le Liahona “e mafai e le Alii ona faataunuu mea tetele i ala faatauvaa”? (1 Nifae 16:29).

E pei o le nuu o Liae, ua saunia e le Alii le tele o meaalofa mo oe e fesoasoani ia te oe ia maua le taitaiga faaletagata. Faitau fuaitau nei e tolu e uiga i nisi o nei meaalofa, ma mafaufau loloto pe faapefea ona tutusa nei meaalofa taitasi mai le Alii ma le Liahona.

Faamanuiaga Faapeteriaka

Na taua e Peresitene Thomas S. Monson faamanuiaga faapeteriaka o se Liahona faaletagata:

“O le Alii lava e tasi o le na saunia le Liahona mo Liae, ua ia saunia mo oe ma au i aso nei, se meaalofa e le taatele ma taua e aumaia le taitaiga i o tatou olaga, e faailoa ai ala faigata i lo tatou saogalemu—e le o se ala i se nuu folafolaina, a o lo tatou aiga i le lagi. O le meaalofa o loo ou faasino i ai o lou faamanuiaga faapeteriaka. E i ai i tagata agavaa uma o le Ekalesia le aia e maua ai lea oa taua patino ma taugata. …

“… E le tatau ona gaugau faalelei lou faamanuiaga ma teuina.E le tatau ona faavaa pe faalauaiteleina.Ae, e tatau ona faitauina.E tatau ona e fiafia i ai.E tatau ona mulimulitaia.O lou faamanuiaga faapeteriaka o le a tauaveina oe i po e sili ona pogisa.O le a faatautaia oe i taimi matautia o le olaga.… O lou faamanuiaga faapeteriaka o se Liahona patino lea ia te oe e faasino ai lou ala ma taitai ai oe” (O Lou Faamanuiaga Faapeteriaka: O se Liahona o le Malamalama,” Liahona, Ian. 1987, 65–67

O Tusitusiga Paia ma Upu a Perofeta

Na faamautinoa mai e Elder W. Rolfe Kerr, a o avea o se Fitugafulu, faapea o afioga a Keriso ma Ana auauna o se Liahona faaleagaga: “E mafai ona avea afioga a Keriso ma Liahona mo i tatou taitoatasi, e faasino mai ia i tatou le ala. Aua nei tatou faapaie ona o le faigofie o le ala. Ia tatou tuuina ma le faatuatua ia afioga a Keriso i totonu o o tatou mafaufau ma loto, e pei ona tusia i tusitusiga paia ma e pei foi ona fofogaina mai e perofeta soifua, tagatavaai ma talifaaaliga. Ia tatou faatuatua ma maelega i le fiafia ai i afioga a Keriso, aua o afioga a Keriso o le a avea ma o tatou Liahona faaleagaga, latou te tau mai ia i tatou mea uma e tatau ona tatou faia,” (“O Afioga a Keriso—O La Tatou Liahona Faaleagaga,” Ensign po o le Liahona, Me 2004, 37

O Le Agaga Paia

Na faatusaina e Elder David A. Bednar o le Korama a Aposetolo e Toasefululua le Agaga Paia i le Liahona: “A o tatou taumafai ina ia ogatasi o tatou uiga faaalia ma faatinoga ma le amiotonu, ona avea lea o le Agaga Paia mo i tatou i aso nei e pei ona faia e le Liahona mo Liae ma lona aiga i o latou taimi. O le mea tonu lava na mafai ai ona galue le Liahona mo Liae o le a faapena foi ona valaaulia ai le Agaga Paia i o tatou olaga. O mea tonu foi na le mafai ai ona galue le Liahona i ona po anamua o le a faapena foi ona tatou aveesea ai i tatou lava mai le Agaga Paia i ona po nei,” Ensign po o Liahona, Me 2006,

Tusi i lau api talaaga mo le suesueina o tusitusiga paia ni auala se lua pe tolu e pei ai le faamanuiaga faapeteriaka, tusitusiga paia ma upu a perofeta, po o le Agaga Paia o le Liahona.
Faamatala i lau api talaaga mo le suesueina o tusitusiga paia, se taimi na e mulimuli ai i faatonuga mai i se tasi o punaoa i luga na taitaia oe i le mauaina o le taitaiga mai le Alii?

1 Nifae 16:34–39

Ua faanoanoa afafine o Isamaeli i lona maliu, ma ua fuafua Lamana e fasioti Liae ma Nifae

I le 1 Nifae 16:34–38 ua tatou aoao na maliu Isamaeli ina ua mavae ni aso se tele o malaga i le vao. Na matua faavauvau ona afafine i le maliu o lo latou tama, ma na muimui nisi o lona aiga ia Liae ma Nifae ma mananao e toe foi i Ierusalema. Na fuafua faalilolilo Lamana e fasioti Nifae ma Liae. Ua toe faaalia foi le vaivaiga ma le leai o se faatuatua o uso o Nifae ona la te lei sailia le finagalo o le Alii. Na la teena le Agaga Paia ma le fesoasoani semanu Na te tuuina ia i laua.

Faitau 1 Nifae 16:39, ma matau le mea na fai e le Alii i lenei tulaga. Mai le mea na e aoaoina i lenei fuaiupu, aisea e aoaia ai i tatou e le Alii?

E taitaia ma aoaia i tatou e le Alii mo lo tatou lelei. Afai tatou te usitai i le taitaiga ma le aoaiga tatou te maua mai le Alii, o le a Ia faamanuia i tatou.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le 1 Nifae 16 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: