3 Nifae 28–30

Folasaga

A o lei maliu ese o Ia, na fesili atu Iesu Keriso i Ona au soo taitasi e toasefululua po o a ni mea e latou te mananao i ai mai ia te Ia O le toaiva o i latou na talosagaina e toe fia foi vave atu ia te Ia pe a maea la latou galuega i luga o le fogaeleele. E toatolu na talosaga e tumau pea i luga o le fogaeleele e faaauau pea ona galulue e aumai agaga ia Keriso seia toe foi mai o Ia. Na faamamaluina e le Alii nei manaoga amiotonu uma e lua. Na tuuina mai e Mamona nisi o auiliiliga e faatatau i le galuega a sa Nifae e Toatolu i le lalolagi.

A o faaiuina e Mamona lana tala o le asiasiga a le Faaola i totonu o sa Nifaē, na ia faamalamalama mai faapea o le o’o mai o le Tusi a Mamona, o le a avea ma faailoga o le faataunuuina e le Alii o Lana feagaiga ma le aiga o Isaraelu. I le faaiuina o le 3 Nifae, na faamaumauina ai e Mamona afioga a Iesu Keriso, ma valaaulia tagata uma e salamo ma ia faitauina faatasi ma le aiga o Isaraelu.

3 Nifae 28:1–11

Ua tuu atu e Iesu Keriso manaoga o Ona au soo e toasefululua

Mafaufau loloto pe faapefea ona e tali atu pe ana fai e afio mai Iesu Keriso ia te oe ma fesili atu, “O le a se mea e te mananao i ai mai ia te au?

Tusi faapuupuu pe o le fea o ou manaoga amiotonu e te manao e faasoa atu ia te Ia.

Faitau le 3 Nifae 28:1–3, ma vaavaai i le auala na tali atu ai le au soo e toaiva o sa Nifae i le Alii ina ua Ia fesiligia i latou, “O le a le mea tou te mananao i ai mai ia te au?” Ia matauina pe faapeī le faalogona o le Faaola i lo latou manaoga.

Faitau le 3 Nifae 28:4–7, ma vaavaai mo le mea na mananao i ai le au soo e toatolu na totoe a le Faaola. Ia matau pe na faapeī faalogona a Iesu Keriso e uiga i manaoga a nei au soo e toatolu. Mafaufau loloto i le mafuaaga e te manatu na fetalai mai ai le Alii na “sili ona amuia” i latou ona o lo latou manao.

Faitau le3 Nifae 28:8–10 e iloa ai le auala na faamatalaina ai e le Faaola faamanuiaga o le a maua e sa Nifae e Toatolu ona o lo latou mananao e galulue ma tagata faaletino. Mafaufau e tusi le upumoni lenei i autafa o lau tusitusiga paia po o i totonu o lau api talaaga mo le suesueina o tusitusiga paia: E faamanuia e le Alii i tatou e tusa ai ma o tatou manaoga amiotonu. Faitau le faamatalaga lenei mai ia Elder Neal A. Maxwell o le Korama a Aposetolo e Toasefululua e iloa ai le taua o manaoga amiotonu:

“O lea, o le mea tatou te mananao pea lava pea i ai, o le mea lena o le a avea ai i tatou, ma tatou maua i le faavavau. …

“O manaoga amiotonu e manaomia ona fesuisuiai, o le mea lea, aua ua faapea mai Peresitene Polika Iaga, ‘o alii ma tamaitai, o e naunau e maua ni nofoaga i le malo selesitila, o le a latou iloa e tatau ona latou tau i aso uma’ (i le Journal of Discourses, 11:14)” (“E Tusa Ma O [Matou] Manao,” Liahona, Ian. 1997, 23–25).

Tali se tasi o fesili nei poo fesili uma e lua, i lau api talaaga mo le suesueina o tusitusiga paia:
1. O anafea na e lagonaina ai le faamanuiaina e le Alii a o e galue i o ou manaoga amiotonu?
2. O le a se mea o le a amata ona e faia i le asō e faafailele ai manaoga amiotonu i lou oe lava olaga ina ia mafai ona e agavaa mo faamanuiaga a le Alii?

3 Nifae 28:12–35

Ua faamatala e Mamona le auaunaga a sa Nifae e Toatolu

E toatele tagata ua faalogo i faagogo, tala faafatusa, ma tala fatu e uiga i asiasiga a sa Nifae e Toatolu. Nai lo le faalagolago i tala o le vavau, saili po o ni mea o tau mai e tusitusiga paia i a latou misiona ma pe o faapefea ona galulue ma le mana e pei “o agelu a le Atua” (3 Nifae 28:30).

Faitau le 3 Nifae 28:12–17 e aoao ai i mea na tutupu i sa Nifae e Toatolu. E tusa ai ma le 3 Nifae 28:15, o le a le mafuaaga e tasi na manaomia ai ona faia e le au soo lenei suiga?

Faitau le 3 Nifae 28:18–23, ma vaavaai pe na faapefea ona faamanuia e le Alii sa Nifae e Toatolu ina ia mafai ona latou faataunuu o latou manaoga amiotonu. Mafaufau i mea ua aoao mai e nei fuaiupu ia i tatou e uiga i le naunautaiga a le Alii e faamanuia i tatou a o tatou ola e tusa ai ma o tatou manaoga amiotonu.

Suesue le 3 Nifae 28:25–31, ma faailoa mai po o ai na faamanuiaina ma o ai foi o le a faamanuiaina mai le galuega a sa Nifae e Toatolu. Atonu e te manao e faailoga mea ua e mauaina.

3 Nifae 28:36–40

Ua aoao Mamona e uiga i le natura o tagata liua

Mafaufau i se taimi na i ai ia te oe se fesili e uiga i le talalelei po o se luitau na feagai ma oe. Faitau le 3 Nifae 28:36, ma vaavaai mo le mea na le’i malamalama i ai Mamona e uiga i le tulaga faaletino o sa Nifae e Toatolu i le maea ai o le suiga na aafia ai i latou. Mafaufau loloto i lau tali i le fesili lenei: O ai e masani ona e liliu atu i ai pe a i ai sau fesili e uiga i le talalelei? Faitau le 3 Nifae 28:36–37 e aoao ai i le mea na faia e Mamona ina ia iloa ai le tali i lana fesili.

Suesue le 3 Nifae 28:37–40, ma vaavaai mo mea na aoaoina e Mamona e uiga i le suiga na tulai mai i tino o sa Nifae e Toatolu. O le tulaga na olioli ai sa Nifae e Toatolu ua taua o le “liuga,” lea e pei o le liuaina (tagai 3 Nifae 28:17) ae e umi atu sina taimi. O tagata ua liuaina o tagata faaletino lava, ae, e pei ona aoao mai le Perofeta o Iosefa Samita, ua suia o latou tino faaletino mai le tulaga faatelesitila i se tulaga faateresitila; ua saoloto i latou mai mafatiaga faaletino o o latou tino faaletino (tagai History of the Church, 4:210). E mafai e tagata ua liua ona faaali mai ma mou ese atu e pei ona latou filifili ai ma e tusa ai ma le finagalo o le Atua (tagai 3 Nifae 28:27–30). Latou te fesoasoani i le aumaia o agaga i le faaolataga, ma e latou te tumau ai i le tulaga o le liua seia oo i le Afio Mai Faalua o Iesu Keriso, lea o le a latou oo ai i se isi suiga e avea ma tagata, toetu, ma faamamaluina (tagai 3 Nifae 28:7–8, 39–40).

Mai le aafiaga a Mamona, ua tatou aoao ai e faapea a tatou saili atu i le Alii mo se malamalamaaga, o le a tatou mauaina faaaliga. Atonu e te manao e tusi lenei mataupu faavae i totonu o lau api talaaga mo le suesueina o tusitusiga paia.

I lau api talaaga mo le suesueina o tusitusiga paia, tusi ai se aafiaga lea na e saili ai po o se tasi e te iloa ia le Alii mo ni tali e ala i le tatalo faatauanau.

3 Nifae 29

Ua molimau mai Mamona faapea o le a faataunuuina e le Alii Lana feagaiga ma le aiga o Isaraelu i aso mulimuli

Ina ua maea ona tusi e Mamona e uiga i le asiasiga a le Faaola i tagata o le Tusi a Mamona, na ia vavalo atu i le faataunuuina o le folafolaga a le Alii i aso mulimuli. Mafaufau loloto i lau tali i le fesili lenei: O anafea na e aoao ai pe na e molimauina ai le faataunuuina o se tasi o folafolaga a le Atua?

Mafaufau e faailoga ia upu o anafea ma le ona a o e suesue i le 3 Nifae 29:1–3. O nei upu o le a fesoasoani e te iloa ai se mea na tupu o loo faaalia ai le tausia e le Alii o Ana folafolaga i le aiga o Isaraelu i aso mulimuli. (O le fasifuaitau “nei upu” i le 3 Nifae 29:1 e faatatau i tusitusiga a le Tusi a Mamona.)

Ua tatou aoao mai le 3 Nifae 29:1–3 e faapea o le oo mai o le Tusi a Mamona o se faailoga ua faataunuuina e le Alii Lana feagaiga ma le aiga o Isaraelu.

E faamautinoa mai e le Tusi a Mamona ia i tatou o loo saunia e le Alii Ona tagata mo Lona afio mai (tagai 3 Nifae 29:2). A o e faitau i le faamatalaga lenei mai ia Elder Russell M. Nelson o le Korama a Aposetolo e Toasefululua, faailoga pe faapefea ona fesoasoani le Tusi a Mamona ia i tatou ina ia saunia ai mo le afio mai o le Faaola:

“O le Tusi a Mamona o se faailoga vaaia na amata ai ona faapotopoto mai e le Alii Lana fanau o le feagaiga o Isaraelu. …

“Ioe, e le’i galo i le Alii! Ua Ia faamanuiaina i tatou ma isi i le lalolagi atoa i le Tusi a Mamona. … E fesoasoani tatou te osia ai feagaiga ma le Atua. E valaaulia ai i tatou ia manatua o Ia ma ia iloa Lona Alo Pele. O se tasi molimau ia Iesu Keriso” (“Feagaiga,” Ensign po o le Liahona, Nov. 2011, 88).

Faitau le 3 Nifae 29:4–6, ma faia se tasi o gaoioiga nei po o gaoioiga uma e lua i lau tusi talaaga mo le suesueina o tusitusiga paia:
1. Faailoa mai ni fuaitau patino se tolu o le Tusi a Mamona e te manatu e mafai ona fesoasoani i se tagata e sau ai ia Iesu Keriso. Mo fuaitau taitasi, tusi se fuaiupu se tasi pe lua e faamalamalama ai le mafuaaga ua e filifilia ai lena fuaitau.
2. Tusi se parakalafa i le ala e te manatu ai e mafai e le Tusi a Mamona ona fesoasoani i se tagata ia malamalama ma taliaina le meaalofa o faaaliga, valoaga, ma le tautala i gagana po o le mana o le Agaga Paia.

3 Nifae 30

Ua apoapoai mai le Alii i tagata o Nuuese ia salamo ma o mai ia te Ia

Na faaiuina e Mamona loina faamaumauga o le galuega a le Faaola e ala i le tusiaina o nisi o faatonuga faapitoa na ia maua mai ia Iesu Keriso e faatatau i Nuuese. Faitau le 3 Nifae 30:1–2, ma mafaufau e faailoga le tele o faatonuga a le Faaola i Nuuese e mafai ona e mauaina. Mafaufau foi e faailoga ia faamanuiaga o loo avanoa mo Nuuese pe afai latou te o mai ia Keriso. E ui lava o le 3 Nifae 30:2 ua faatatau ia i latou i fafo o le Ekalesia, e mafai ona tatou faaaogaina le valaaulia a Iesu Keriso e fua ai lo tatou naunautaiga e ola i tulaga e manaomia mo Lana feagaiga.

Tusi le mataupu faavae lenei i lau api talaaga mo le suesueina o tusitusiga paia: Afai tatou te o mai ia Keriso, e mafai ona faitaulia i tatou i Lona nuu. Tusi i lau api talaaga mo le suesueina o tusitusiga paia le mafuaaga e avea ai o se faamanuiaga a le Alii le “faitauina faatasi ma [Lona] nuu o e o le aiga o Isaraelu” (3 Nifae 30:2).
Tusi le faamatalaga lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le 3 Nifae 28 30 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: