Iakopo 7

Folasaga

Sa faalagolago Iakopo i lana molimau ma le Alii e faatoilalo ai manatu ma finauga sese a Serema, se aneti-Keriso. O se aneti-Keriso o se tasi e tetee malosi pe matuai tetee ia Keriso ma taumafai e faaleaga faatuatua o isi tagata ia te Ia, Lana Ekalesia moni, Lana talalelei, po o le ata o le faaolataga.

Ina ia faatoilaloina taumafaiga a Serema, sa maua mai le malosi o Iakopo mai aafiaga ua mavae na faapea ona faateleina ai lona faatuatua ia Iesu Keriso. Sa faalagolago foi o ia i le taitaiga a le Agaga Paia, lona malamalama i tusitusiga paia ma upu a perofeta, ma lana molimau ia Iesu Keriso. Ina ua poloai Serema mo se faailoga e faamaonia ai e moni upu a Iakopo, sa faapea ona taia o ia e le Atua. Sa faaiuina e Iakopo ana faamaumauga i le faamatalaina o le ala na faalagolago ai sa Nifae i le Alii a o latou puipuia i latou lava mai ia sa Lamana. A o le’i maliu Iakopo, sa ia tuuina atu papatusi laiti i lona atalii o Enosa.

Iakopo 7:1–14

Ua faalagolago Iakopo i le Alii a o ia faafetaiaia Serema, o se aneti-Keriso

Na aoao mai Elder Robert D. Hales o le Korama a Aposetolo e Toasefululua: “O se tasi o tofotofoga tele o le olaga nei e oo mai pe a fesiligia pe faitioina o tatou talitonuga. I taimi faapena, tatou te mananao ai e tali atu ma le faatautee. … Ae o avanoa taua nei tatou te toe laa ai i tua, tatalo, ma mulimuli i le faataitaiga a le Faaola. Ia manatua o Iesu lava Ia sa inosia ma teena e le lalolagi. … A tatou tali atu ia i e e tuuaia i tatou e pei ona sa faia e le Faaola, e le gata ina avea atili i tatou e faapei o Keriso, tatou te valaaulia isi ia lagona Lona alofa ma mulimuli foi ia te Ia” (“Christian Courage: The Price of Discipleship,” Ensign po o le Liahona, Nov. 2008, 72).

Mafaufau i se taimi na fesiligia pe faitioina ai ou talitonuga. A o e suesue i le Iakopo 7 o le a e iloa ai le ala na maua ai e Iakopo le faitioina o ona talitonuga mai se tagata e igoa ia Serema ma le ala na faamanuiaina ai lana tali atu i lenei luitau.

Faitau le Iakopo 7:1–5, ma vaai mo upu ma fasifuaitau e faaalia ai (1) le mea sa taumafai Serema e fai ma le (2) ala na ia sailia e ausia ai ana sini. Atonu e te manao e faailoga nei mea i au tusitusiga paia.

E tusa ai ma le Iakopo 7:3, o le a le aafiaga o Serema i tagata?

Ia matau i le Iakopo 7:4 o Serema “sa aoaoina” ma sa i ai “le mana tele o le tautala.” Tusi i lau api talaaga mo le suesueina o tusitusiga paia pe aisea e faigata ai i nisi o taimi ona puipui lou faatuatua mai se tagata e pei o Serema.

Ia manatua e le o tagata uma e fesiliga pe faitioina o tatou talitonuga e faapea e tutusa o latou faamoemoega ma Serema. E ui o nisi tagata, e pei o Serema, e saili ma le loto i ai e faaleaga le faatuatuaga, o isi e ono fesiligia o tatou faatuatuaga ona o lo latou fia iloa, pe atonu foi sa sese ni faamatalaga na latou faalogo i ai e uiga i o tatou talitonuga.

A o e faitau i le Iakopo 7:5–14, mafaufau pe o le a faapefea ona e tali atu i se tagata e pei o Serema. A o e suesue i le tali a Iakopo, o le a e iloa ai a tatou faalagolago i le Alii e mafai ona tatou faatoilaloina luitau i lo tatou faatuatua. Atonu e te manao e tusi lenei mataupu faavae i le autafa o au tusitusiga paia i talane o nei fuaiupu. Vaavaai mo auala na faaalia ai e Iakopo lenei mataupu faavae i le la feiloaiga ma Serema.

I le siata o loo i lalo, faitau le fuaiupu po o fuaiupu mai le Iakopo 7:5–14 i le koluma muamua ma faafetaui le mau lena i le faamatalaga i le koluma lona lua e sili ona faamatalaina ai le ala na faalagolago ai Iakopo i le Atua i lena mau. Tusi le mataitusi o le faamatalaga i luga o le laina e soo ma le mau.

O le a le Mea Na Fai e Iakopo e Faalagolago ai i le Alii
Iakopo 7:5 Iakopo 7:8 Iakopo 7:10–11 Iakopo 7:12 Iakopo 7:13–14	Sa molimau atu o ia e uiga i tusitusiga paia ma upu a perofeta. Sa ia tuu le taunuuga i aao o le Atua. Sa faalagolago o ia i le taitaiga ma le malosi mai le Agaga Paia. Sa ia manatuaina aafiaga ua mavae na faamalosia ai lona faatuatua. Sa ia faasoa mai le molimau na ia mauaina e ala i le Agaga Paia.

E mafai ona e siakia au tali i lenei gaoioiga faafetaui e ala i le faatatau atu i tali sa’o o loo maua i le faaiuga o le lesona lenei.

E mafai faapefea ona e faamalosia lau molimau ina ia le mafai ona maluelue pe afai e fesiligia pe faitioina ou talitonuga. Ia matau i le Iakopo 7:5 na faailoa mai ai e Iakopo ia upumoni nei: E le mafai ona maluelue o tatou faatuatua pe afai e faavae a tatou molimau i luga o faaaliga ma aafiaga moni faaleagaga. Mafaufau loloto i le malosi o lau molumau ia Iesu Keriso ma o le a foi se mea e mafai ona e faia e faamalosia ai.

O le tali atu a Iakopo ia Serema ua tuuina mai ai se faataitaiga mo i tatou e mulimuli ai a o tatou tali atu i tagata e fesiliga pe faitioina lo tatou faatuatuaga.

Tali fesili e tolu o loo i lalo i lau api talaaga mo le suesueina o tusitusiga paia e fesoasoani e te mafaufau ai i mea na fai e Iakopo e faalagolago ai i le Alii, ma le auala na fesoasoani ai pe e mafai ona fesoasoani ai nei lava gaoioiga e tasi ia te oe pe a luiina e isi lou faatuatua:
1. Ia matau i le Iakopo 7:5 ona o aafiaga muamua faaleagaga a Iakopo na iu ina le maluelue ai lona faatuatua. O a nisi o aafiaga ua faamalosia ai lou faatuatua? E mafai faapefea e le manatuaina po o le tusia o nei aafiaga ona fesoasoani ia te oe pe a fesiligia pe faitioina e se tasi lou faatuatua?
2. I le Iakopo 7:8, na fai mai ai Iakopo e faapea “sa sasaa mai e le Alii le Atua lona Agaga i totonu o lo’u agaga.” O le a le mea e tatau ona e faia ina ia mafai ona sasaaina mai le Agaga i totonu o lou agaga? Na faapefea ona fesoasoani le Agaga Paia ia te oe ao e taulimaina fesili po o faitioga e uiga i lou faatuatua?
3. E mafai faapefea e se mausa o le suesueina o tusitusiga paia ma saunoaga a perofeta o aso e gata ai ona fesoasoani ia te oe pe a fesiligia pe faitioina e isi lou faatuatuaga? (tagai Iakopo 7:10–11).
4. O le a se taimi na e faasoa atu ai lau molimau i se tasi na fesiligia pe faitioaina lou faatuatuaga? (tagai i le Iakopo 7:12). O le a lona taunuuga?
5. Nai lo o le saili e faamaonia le moni o lana molimau ina ua saili Serema mo se faailoga, sa tuu e Iakopo le taunuuga i aao o le Alii (tagai Iakopo 7:14). E mafai faapefea ona fesoasoani ia te oe ia iloa e le manaomia ona e faamaonia le moni o lau molimau ia i latou e luiina lou faatuatua?

Iakopo 7:15–23

Ua taia, tautino, ma oti Serema, ma oo ai ina liliu atu le motu o tagata sa Nifae e liliu atu i le Alii

Ua aoao mai Elder Robert D. Hales:

“Pe a tatou le taui ma sui—pe a tatou liliu atu le isi alafau ma teena ia lagona o le ita—ua tatou … tutu faatasi foi ma le Faaola. Tatou te faaali atu Lona alofa, lea ua na o le pau lena o le mana e taofia ai le fili ma tali atu i e agaleaga mai, e aunoa ma le toe agaleaga atu ia i latou. E le o se vaivaiga lena. O Le Lototele Faakerisiano lena.

“I le gasologa o tausaga ua tatou aoao ai e le fou ia luitau o lo tatou faatuatua, e le faapea foi e ono mou vave atu. Peitai, o soo moni o Keriso e vaai i avanoa i le lotolotoi o mea faafeagai. …

“… O le mea e lelei ai, ua silafia e le Alii loto o e tuuaia i tatou, ma le ala e mafai ona tatou tali lelei atu ai ia te i latou. A o saili e soo moni le taitaiga mai le Agaga, latou te mauaina musumusuga e talafeagai lelei ma mea taitasi latou te feagai. Ma o mea uma lava tou te fetaiai, o soo moni e tali atu i auala e valaaulia ai le Agaga o le Alii” (“Lototele Faakerisiano: O Le Tulaga Manaomia o se Soo,” 72–73).

O le a lou manatu o le uiga o le “vaai i avanoa i le lotolotoi o mea faafeagai”?

E mafai ona iu i le lelei a o tatou tali atu ia i latou e luiina lo tatou faatuatua i auala e valaaulia ai le Agaga o le Alii. Faitau le Iakopo 7:15–23, ma vaai mo le lelei na taunuu i ai mai le feiloaiga a Iakopo ma Serema.

O le a le faamaoniga ua e vaaia i le Iakopo 7:21–22 na manao i ai Iakopo i lana aafiaga ma Serema e fesoasoani ai i isi?

E tusa ma le Iakopo 7:23, na faapefea e le fetaiaiga a Iakopo ma Serema ona iu ina aafia ai le motu o tagata?

O le mataupu faavae e tasi ua tatou aoao mai le feiloaiga a Iakopo ma Serema o le a o tatou tali atu i fesili po o faitioaga e uiga i lo tatou faatuatuaga i aua la e valaaulia ai le Agaga, e mafai ona tatou fesoasoani i isi ia liliu atu i le Alii. Tusi tali i fesili o loo i lalo e uiga i lenei mataupu faavae i lau api talaaga mo le suesueina o tusitusiga paia:
1. E mafai faapefea e le iloaina o lenei mataupu faavae ona mafai ona e fesoasoani atu i isi e liliu atu i le Alii?
2. E mafai faapefea ona e taumafai e faaaoga lenei mataupu faavae?

Iakopo 7:24–27

Na faamatala e Iakopo ia fegalegaleaiga a sa Nifae ma sa Lamana ma faaiu ai lana faamaumauga

Faitau le Iakopo 7:24–27. Faailoga se fasifuaiupu i le Iakopo 7:25 o loo faamamafa mai ai le savali a Iakopo e faatatau i le taua o le faalagolago i le Alii a o tatou fetaiai ma luitau.

Tali ia fesili nei i lau api talaaga mo le suesueina o tusitusiga paia: O le a se mea e tasi o le a e faia e saunia ai mo se taimi e luiina ai e se tasi lou faatuatua?

Afai e i ai ni ou popolega e uiga i le auala e taulima ai ni fesili po o ni faitioga faapitoa e uiga i lou faatuatua, suesue i le tusi lesona Faamaoni i le Faatuatua: O Se Tusi Taiala o le Talalelei, Elder Robert D. Hales lauga i le konafesi aoao “Christian Courage: The Price of Discipleship” (Ensign po o le Liahona, Nov. 2008, 72–75), ma isi punaoa o loo maua i le LDS.org ma le youth.lds.org.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina Iakopo 7 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga:

Tali i le gaoioiga faafetaui i le amataga o le lesona lenei: 1) o, 2) i, 3) a, 4) u, 5) e.