Iunite 21: Aso 3

1 Korinito 1–2

Folasaga

Ina ua uma ona aoao e uiga i ni nai faafitauli sa feagai ma tagata o le Ekalesia i Korinito, sa tusi atu Paulo ia i latou ma apoapoai atu i ai e tuu le fefinauai ma ia lotogatasitasi. Sa ia faamatala atu foi faapea e valaau e le Atua e vaivai ma lotomaualalo e folafola atu Lana talalelei ma o mea a le Atua e na o le Agaga e mafai ona iloa ai ma malamalama ai.

1 Korinito 1:1–16

Ua tusi atu Paulo i le Au Paia i Korinito ma apoapoai atu ia i latou e tuu le fefinauai ma ia lotogatasitasi

Mafaufau i se aiga, se au taaalo, ma se vaega o uo.

O a ni mea e ono afua ai ni fevaevaeaiga ma fefinauaiga i nei vaega taitasi?

E mafai faapefea e na fevaevaeaiga ma fefinauaiga ona aafia ai se aiga, au, po o se vaega o uo?

Mafaufau pe mafai faapefea ona aafia le Ekalesia i fevaevaeaiga ma fefinauaiga a ona tagata.

A o e suesueina le 1 Korinito 1, vaavaai mo se upumoni na aoao atu e Paulo i le Au Paia i Korinito e uiga i fevaevaeaiga ma fefinauaiga.

Sue Korinito i le faafanua lenei:

I lana malaga lona lua faafaifeautalai, sa malaga Paulo i le aai o Korinito i Eleni, lea sa ia folafola atu ai le talalelei. E toatele tagata na papatisoina i le taimi lena (tagai Galuega 18:1–18). Mulimuli ane, a o talai atu Paulo i Efeso, sa ia aoaoina ai o faafitauli sa tulai mai i tagata o le Ekalesia i Korinito na afua ona e toatele tagata liliu mai sa toe foi i o latou talitonuga ua mavae ma faiga o le ifo i tupua. Na tusi atu Paulo i tagata o le Ekalesia i Korinito e faamalolosia ai i latou ma faamanatu atu ia i latou i a latou tautinoga e auauna atu i le Alii.

Ua tatou faitau i le 1 Korinito 1:1–9e faapea na tau atu e Paulo i le Au Paia i Korinito na ia faafetai atu i le Atua e fai ma o latou sui mo le alofa tunoa sa latou maua mai e ala ia Iesu Keriso, lea sa faamanuiaina ai i latou i soo se itu.

Faitau le 1 Korinito 1:10–11, ma vaavaai mo mea na apoapoai atu Paulo i le Au Paia i Korinito e fai.

Ina ia faailoa mai se upumoni o loo tusia i nei fuaiupu, faaaoga ia upu nei e faatutumu ai avanoa i le faamatalaga lea: tutufaatasi, faamoemoe, fefinauai, faaitiitia.

O Le Alii ____________________ i tatou o ni Au Paia ina ia ____________________ ma ia ____________________ fevaevaeaiga ma ____________________.

1. Tali fesili nei i lau api talaaga mo le suesueina o tusitusiga paia:

   1. O a faamanuiaga tatou te maua o ni tagata o le Ekalesia pe a tatou taumafai ina ia tutufaatasi ma faaitiitia ia fevaevaeaiga ma fefinauaiga?

   2. O anafea na faamanuiaina ai oe o se taunuuga o le tutufaatasi ma lou aiga, vasega, korama, po o le uarota po o le paranesi?

   3. O le a se mea e mafai ona tatou faia e faaitiitia ai fevaevaeaiga ma fefinauaiga i le Ekalesia?

E tusa ai ma le 1 Korinito 1:12–16, sa fevaevaeai tagata o le Ekalesia i Korinito i ni vaega e fua i faaliliuga eseese o aoaoga faavae a le Ekalesia, ma sa latou lagolagoina o latou manatu e ala i le sii mai o taitai iloga o le Ekalesia.

1 Korinito 1:17–31

Ua aoao atu e Paulo le Au Paia e faapea e valaau e le Atua e vaivai e talai atu Lana talalelei

I ona po o Paulo, o Eleni sa i lalo o tulafono a Roma, ma e toatele tagata Eleni sa nonofo i Korinito. Sa tuu e Eleni se faataua maualuga i manatu faafilosofia ma le poto o le lalolagi.

Mafaufau pe aisea e faigata ai i se tagata e faatauaina filosofia o le lalolagi ona talia pe ola i le talalelei.

A o e suesueina le 1 Korinito 1:17–31, vaavaai mo se upumoni e mafai ona fesoasoani ia te oe e malamalama ai i le valea o le faalagolago i le poto o le lalolagi.

Faitau le 1 Korinito 1:17–22, ma vaavaai mo mea na aoao atu e Paulo e uiga i le poto o le lalolagi ma le poto o le Atua. O fasifuaitau “poto o e popoto”(1 Korinito 1:19) ma le “poto o le lalolagi” (1 Korinito 1:20) e faasino i tu masani faafilosofia sese o na ona po. E mafai foi ona fesoasoani le iloa na faaaoga e Paulo le fasifuaitau “o le satauro” (1 Korinito 1:17–18) e faasino ai i le soifua o Iesu Keriso, misiona, ma le Togiola.

Aisea e te manatu ai na manatu e le talitonu e faavalevalea le savali i le Togiola a Iesu Keriso?

Faitau le 1 Korinito 1:25, ma vaavaai mo mea na aoao atu e Paulo e uiga i le poto o le tagata pe a faatusatusa i le poto o le Atua. E le valea le Atua, e leai foi ni Ona vaivaiga. Sa faaaoga e Paulo ia fasifuaitau “o le valea o le Atua o le poto lea i tagata” ma “o le vaivai o le Atua o le malosi lea i tagata” e avatu ai le manatu faapea o le poto ma le malosi o le tagata o se meanoa pe a faatusatusa i le poto ma le mana o le Atua.

Lio le upumoni e sili ona faamatala ai mea na aoao atu e Paulo i Korinito e uiga i le poto o le Atua:

• O le poto o le Atua e sili atu i lo le poto o le tagata.

• E malosi le tagata pe a poto o ia.

• O faailoga mai le lagi e silisili atu nai lo le poto o Eleni.

2. Tali le fesili lenei, i lau api talaaga mo le suesueina o tusitusiga paia: E te manatu e faapefea e le malamalama faapea o le poto o le Atua e sili atu nai lo le poto o le tagata ona aafia ai le ala e tilotilo ai le tagata mo vaifofo o ona faafitauli?

Faitau le 1 Korinito 1:26–27, ma vaavaai mo e ua filifilia e le Atua e folafola atu Lana talalelei.

Mafaufau pe aisea ua filifili ai e le Atua i latou o e manatu le lalolagi e valelea ma vaivai e aoao atu Lana talalelei.

Tatou te aoaoina i le 1 Korinito 1:28–31 na aoao atu e Paulo o Iesu Keriso o le faataitaiga atoatoa o le “poto, ma le paia, ma le olataga” (1 Korinito 1:30) ma e ao ina tatou vivii atu, pe olioli ia te Ia.

1 Korinito 2

Ua faamatala mai e Paulo le ala tatou te aoao ai i mea a le Atua

Faitau le tala lea a Peresitene Boyd K. Packer o le Korama a Aposetolo e Toasefululua o loo aumaia ai se aafiaga na ia oo i ai a o lei tofia o ia e avea ma se Pulega Aoao:

“Sa ou nofo i le vaalele i autafa o se tagata faapaupau o le sa vave ona uunaia mai lona le talitonu i le Atua ma o lea na ou tuu atu ai lau molimau ia te ia. ‘E sese oe,’ sa ou fai atu ai, ‘o loo i ai le Atua. Ou teiloa o loo soifua o Ia!’

“Sa ia tetee mai, ‘E te le iloa. E leai se tasi e iloalena mea! E le mafai ona e iloa!’ Ina ua ou le gauai atu ia te ia, na fesili mai le faapaupau, o ia o se loia, atonu o le fesili taualuga i le mataupu o le molimau. ‘Ia ua lelei,’ na ia fai mai ai i se ala e faaamuamu ma vaaimaualalo, ‘ua e fai mai ua e iloa. Tau mai ia te aupe faapefeaona e iloa.’

“A o ou taumafai e tali atu, e ui lava e i ai o’u faailoga maualuluga faaleaoaoga, sa ou le maua se fesoasoani e talanoa ai. …

“Ina ua ou faaaogaina upu Agaga ma le molimau, sa tali mai le faapaupau, ‘Ou te le iloa le mea na e talanoa mai ai.’ O uputatalo, iloatino, ma le faatuatua e matuai leai lava se uiga ia te ia. ‘Ua e vaai la,’ na ia fai mai ai, ‘e te matuai le iloaina lava. Ana fai e te iloa, semanu e mafai ona e tau mai ia te aupe faapefeaona e iloa.’

“Sa ou lagona atonu, sa ou tuuina atu ma le le poto lau molimau ia te ia ma sa ou le iloa se mea e fai.” (“The Candle of the Lord,” Ensign, Jan. 1983, 51).

Pe ana fai sa e iai i lea tulaga, mata o le a lau tala i le tagata lea sa lei talitonu i le Atua?

A o e suesue i le 1 Korinito 2, vaavaai mo se upumoni o le a fesoasoani e te malamalama ai pe aisea na le mafai ai e lenei tagata ona malamalama i upu a Peresitene Packer ma pe aisea e mafai ai ona e mautinoa lou malamalama i mataupu faaleagaga.

Ua tatou faitau i le1 Korinito 2:1–8 na tau atu e Paulo i le Au Paia i Korinito na te lei faaaogaina le poto o le lalolagi e faatalitonu ai i latou i le moni o le talalelei. Sa ia faamatala atu na ia aoao atu i latou e ala i le mana o le Agaga ina ia latou faatuatua ai i le Atua. Sa tau atu foi e Paulo ia i latou e le mafai e e le talitonu ona malamalama i mealilo a le Atua.

Faitau le 1 Korinito 2:9–16, ma vaavaai pe aisea na fai mai ai Paulo e mafai e nisi tagata ona iloa ma malamalama i “mea a le Atua” (1 Korinito 2:10–11), ae le mafai e isi.

Saili le Agaga Paia

A oo ina mafai ona faamautu mai e le Agaga Paia le moni ma le taua o aoaoga faavae ma mataupu faavae o le talalelei o loo e aoaoina, o le a foliga mai o le a e faaaogaina i lou olaga. A o e faailoa mai aoaoga faavae ma mataupu faavae, faafesootai i ou aafiaga patino ma saili i le faamautuuga a le Agaga Paia e moni.

3. Tali fesili nei i lau api talaaga mo le suesueina o tusitusiga paia:

   1. E tusa ai ma le 1 Korinito 2:9–10, aisea na mafai ai e Paulo ma isi tagata faamaoni ona malamalama i mea a le Atua?

   2. E tusa ai ma le 1 Korinito 2:14, aisea e le mafai ona malamalama isi tagata i mea a le Atua?

Mai i nei fuaiupu ua tatou aoao ai le upumoni lenei: E na o le Agaga lava tatou te iloa ma malamalama ai i mea a le Atua. Fuafua e maka ia upu po o fasifuaitau i le 1 Korinito 2:10–14o loo aoao mai ai le upumoni lenei.

Sa faaiu e Peresitene Packer lana tala i le faamatala mai na ia lagona le musuia o ia e fesili i le tagata sa nofo i ona autafa i le vaalele pe na te iloa pe faapei le tofo o le masima.

‘“Ioe ou te iloa,’ o lana tali lena.

“‘O anafea na e tofo mulimuli ai i le masima?’

“‘Faatoa uma la’u ‘aiga i luga o le vaalele.’’

“‘O lena e te mafaufau e te iloaina le tofo o le masima,’ sa ou fai atu i ai.

“Sa ia fai mai lava, ‘Ou te iloaina le tofo o le masima e pei ona ou iloaina o soo se mea lava.’ …

“‘Ia,’ ona ou fai atu lea, ‘manatu la e faapea ou te lei tofo lava i le masima, faamatala mai la ia te au pe faapei’ī lona tofo.’ …

“Ina ua mavae ni nai taumafaiga, ioe, sa le mafai ona ia faia. Sa le mafai ona ia tauina mai, i upu lava ia, se mea faatauvaa e pei o le tofoina o le masima. Sa ou toe tuuina atu ia te ia lau molimau ma fai atu, ‘Ou te iloa o loo i ai se Atua. Sa e tauemu i lena molimau ma fai mai afai e moniou te iloa, o le a mafai ona ou tau atu tonu ia te oe pe na faapefea ona ou iloa. Lau uo e, ou te fai atu i le itu faaleagaga, ua ou tofo i le masima. Ua le toe mafai ona ou tauina atu ia te oe i upu pe na faapefea ona oo mai lenei malamalama nai lo lou tau maia ia te au pe faapei le tofo o le masima. Ae ou te toe fai atu ia te oe, o loo i ai se Atua! O loo soifua o Ia! Ma ona e te le iloa, aua la e te taumafai e tau mai ia te au ou te le iloa, aua ou te iloa!’

“A o ma faamavae, sa ou faalogo atu o loo ia tomumu, ‘Ou te le manaomia le tou lotu mo se fesoasoani! Ou te le manaomia.’

“Talu mai lena aafiaga, ou te le i toe matamuli pe ma ona e le o mafai ona ou faamatalaina i upu lava ia mea uma ou te iloaina faaleagaga” (“The Candle of the Lord,” 52).

4. Faauma le vaega lenei i lau api talaaga mo le suesueina o tusitusiga paia:

   1. Lisi ni nai mea a le Atua e na o le Agaga e mafai ai ona iloa ma malamalama ai.

   2. Aisea e taua ai mo i tatou le talitonu na pau le ala tatou te iloa ai ma malamalama i mea a le Atua e ala lea i Lona Agaga?

Mafaufau i se taimi na e iloa ai ma malamalama e ala i le Agaga se mea se tasi o mea a le Atua na e lisiina i lau api talaaga mo le suesueina o tusitusiga paia. Mafaufau po o le a le mea e mafai ona e faia e saili ai le fesoasoani a le Agaga a o e taumafai ia iloa ma malamalama i mea a le Atua.

5. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le 1 Korinito 1–2 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lou faiaoga: