Luka 16

Folasaga

Sa aoao atu e Iesu le faataoto i le auauna le faamaoni. Na faalogo le au Faresaio ma aamu ia te Ia. Ona aoai ai lea e Iesu o le au Faresaio ma aoao atu i latou i le faataoto i le alii mauoa ma Lasalo.

Luka 16:1–12

Ua tuu atu e Iesu le faataoto i le auauna le faamaoni

I le avanoa o loo tuuina atu, lisi ai ni nai mea faalelalolagi e tele ina tuu ai e tagata o latou loto ma taumafai ia maua:

Lisi nei ni nai ’oa faalelagi e finagalo le Tama Faalelagi tatou te sailia (e pei o aiga e faavavau ma le filemu):

E mafai ona tatou olioli i nisi o oa e faavavau i lenei olaga. Li’o se tasi pe lua o ’oa faavavau na e lisiina e sili ona taua ia te oe. A o e suesueina le Luka 16, vaavaai mo upumoni ia e mafai ona fesoasoani ia te oe e maua ai oa o le faavavau.

Ina ua uma ona aoao atu ia faataoto i le mamoe na leiloa, o le tupe na leiloa, ma le atalii faamaumau oa, sa aoao atu e le Faaola i Ona soo le faataoto e uiga i le auauna le faamaoni. O se auauna o se tasi e pulea mea faapisinisi a se tasi tagata, tupe, po o meatotino.

Faitau le Luka 16:1–2, vaavaai mo mea na aoaoina e le alii mauoa e uiga i lana auauna.

Matau mea na tuuaina ai le auauna na ia faia i oloa a le alii mauoa. Na avea o se taunuuga le faamaumau a le auauna, o le a ia le toe mauaina lona tulaga o se auauna.

I le Luka 16:3–7, ua tatou aoao ai e faapea sa popole le auauna e uiga i le mea na te faia ina ua te’a ma lana galuega aua sa lei manatu o ia e mafai ona ia faia ni galuega leipa ma sa matua maasiasi o ia e aisi. Sa ia fuafuaina se fuafuaga faapea e ono tau atu ai i ni avanoa i isi aiga. Sa talanoa o ia i e sa nofo aitalafu i le alii mauoa ma matuai faaitiitia a la aitalafu, lea sa ia faamoemoe e alolofa ai i la’ua ia te ia.

Faitau le Luka 16:8, ma vaavaai pe na faapefea ona tali atu le mauoa ina ua ia iloa mea na faia e lana auauna. E ono fesoasoani le iloa faapea “o fanau a lenei lalolagi“ o tagata e mafaufau faalelalolagi ma “o fanau o le malamalama“ o e mulimuli i le Atua pe o tagata e mafaufau faaleagaga.

Matau na viia e le alii mauoa le poto o le auauna i lona mauaina o le alofa o e na aitalafu i le alii mauoa. Na te lei viia le le faamaoni o le auauna.

Na faamatala e Elder James E. Talmage o le Korama a Aposetolo e Toasefululua mea na aoao atu e le Faaola e ala i faataoto i le auauna le faamaoni: “O le faamoemoega o le Alii o le faaali mai lea o le eseesega o le faaeteetega, faautauta, ma le tuuto o tagata o loo punouai i pisinisi sue tupe o le lalolagi, ma auala ua na o se vaega o le loto o le toatele o loo faapea o loo taumafai i oa faaleagaga. O tagata ua mafuli mafaufau i le lalolagi e le teenaina mea ua saunia mo o latou tausaga i le lumanai, ma e tele ina naunau ma le agasala e faaputuputu mea e tele; a o ’fanau o le malamalama,’ po o i latou o e talitonu o oa faaleagaga e sili atu i oa uma o le lalolagi, e le malolosi tele, fuafua tatau, pe atamamai“ (Jesus the Christ, 3rd ed. [1916], 463).

Faitau le Luka 16:10–12, ma vaavaai po o le a le fetalaiga a le Faaola i le mea e tatau ona tatou fai ia faamanuiaina ai i oa o le faavavau. Matau o mamone i le fuaiupu 11 e faasino i oa o le lalolagi, e aofia ai tupe ma oa totino. E ono mafai foi ona fesoasoani tele le iloa ia “faamaoni i le mea itiiti“ (Luka 16:10) o lona uiga o le faaaoga ma le amiotonu o oa o le lalolagi.

Mai aoaoga a le Faaola i le Luka 16:1–12, ua tatou aoao ai afai tatou te saunia ma le atamai mo lo tatou lumanai e faavavau, ma faaaoga ma le amiotonu oa o le lalolagi, e mafai ona faamanuiaina i tatou i oa o le faavavau.

Tali se fesili se tasi po o fesili uma nei i lau api talaaga mo le suesueina o tusitusiga paia:
1. E atagia faapefea lo tatou agavaa e faatuatuaina i oa e faavavau ona o lo tatou faaaogaina ma le amiotonu o oa o le lalolagi?
2. E mafai faapefea e oe o se talavou ona e faaaogaina ma le amiotonu oa o le lalolagi? E mafai faapefea ona e faia lea mea o se tagata matua? Tagai Iakopo 2:17–19.)

Luka 16:13–31

Ua aoai e Iesu le au Faresaio ma aoao atu le faataoto i le alii mauoa ma Lasalo

Ao e suesueina le Luka 16:13–26, mafaufau loloto pe mafai faapefea e oa o le lalolagi ona taofia nisi tagata mai le mauaina o oa o le faavavau.

Pei ona tusia i le Luka 16:13–14, na aoao mai le Faaola e faapea “e le mafai ona tatou auauna atu i le Atua atoa ai ma mamone” (Luka 16:13). Na faalogo le au Faresaio i aoaoga a le Faaola ma sa latou “tauemu“ (Luka 16:14), pe aamu ia te Ia. Saili le Luka 16:14 mo le upu o loo faamatala ai le au Faresaio ma ta’u mai se faamalamalamaga se tasi pe aisea sa latou aamu ai i le Faaola ona o Ana aoaoga.

Sa lotomatau’a le au Faresaio, o lona uiga sa latou mananao ma le matapeapea i nisi oa aemaise lava o meatotino a isi. Sa latou matapeapea i oa ma le pule i le lalolagi (tagai Mataio 23:2–6, 14). Aisea e te manatu ai sa saofaga lo latou matapeapea i lo latou aamu i le Faaola?

Faitau le Faaliliuga a Iosefa Samita, Luka 16:16–23 (i le faaopoopoga i le Tusi Paia), e vaavaai atili ai i le talatalanoaga i le va o le au faresaio ma le Faaola.

Mai nei fuaiupu ua tatou aoao ai faapea na faumalo le au Faresaio faapea o le tulafono a Mose o la latou tulafono, o le mea lea, sa latou teena ai Iesu o so latou faamasino. Sa faamatala e Iesu e faapea o le tulafono a Mose, ma perofeta na molimau mai ia te Ia. Sa fesiligia le au Faresaio i le faafitia o mea sa tusia ma sa a’oa’iina i latou i le “faapiopio[ina] o le ala sa’o“ (Faaliliuga Iosefa Samita, Luka 16:21). Ina ia fesoasoani ia malamalama nei Faresaio matapeapea i la latou amio ma taunuuga, sa faatusa e le Faaola i latou i le tagata mauoa i le faataoto o loo tusia i le Luka 16:19–31.

A o e faitauina le Luka 16:19–31, vaai faalemafaufaui tagata o lenei faataoto ma a latou fegalegaleaiga. Mafaufau e faitau leotele ia fuaiupu nei, e peiseai o e i luma o se aofia, ma sii atu upu a le Faaola (Luka 16:19–23), o le alii mauoa (Luka 16:24, 27, 28, 30), ma le Aperaamo (Luka 16:25, 26, 29, 31). E ono fesoasoani le iloa faapea o le “fatafata o Aperaamo“ (Luka 16:22) e faatusa i le parataiso i le lalolagi o agaga ma o “seoli“ (Luka 16:23) e faasino i le falepuipui o agaga (tagai Bible Dictionary, “Abraham’s Bosom,” “Hell”).

Na eseese faapefea olaga faitino o le alii mauoa ma Lasalo?

Na faapefea e le matapeapea o le alii mauoa; po o le fiafia i oa o le lalolagi ona aafia ai o ia ina ua maliu?

O le a sou manatu o le a se mea o aoao ai le au Faresaio i lenei faataoto?

O se mataupu faavae e tasi e mafai ona tatou aoao mai i lenei faataoto o leafai tatou te matapeapea ma le faaaogaina ma le amiotonu a tatou oa faalelalolagi, o le a iu ina tatou feagai ma mafatiaga ma faanoanoaga (tagai foi MF&F 104:18).

tagata aisi ma uli — Sa etoeto e uli ia papala o Lasalo, le tagata mativa sa taoto i le faitotoa o le mauoa.

E mafai ona tatou aoao mai se upumoni faaopoopo mai lenei faataoto. E tusa ai ma le Luka 16:30, o le a le mea na talitonu le mauoa o le a tupu pe afai e alu atu Lasalo i uso o le mauoa?

Sa talitonu le tagata mauoa o le a salamo ona uso ma liua i le upumoni pe afai e alu atu Lasalo ia i latou. O le liua o le “suiga o talitonuga o se tagata, loto, ma le ola e talia ma gauai atu i le finagalo o le Atua“ (Taiala i Tusitusiga Paia, “Conversion, Convert,” scriptures.lds.org).

E tusa ai ma le Luka 16:29, 31, aisea na lei auina atu ai e Aperaamo ia Lasalo i uso o le mauoa?

O le ta’ua o “Mose ma perofeta,“ na toe ta’ua ai e le Faaola ia tusitusiga paia ia na fai mai le au Faresaio ua talitonu i ai ma ola ai ae o le mea moni sa latou teenaina.

Mai i lenei faataoto ua tatou aoao ai faapea o le liua e maua mai i le talitonu ma usitai i upu a perofeta, ae le o le molimauina o vavega po o le vaai i agelu.

Tali fesili nei i lau api talaaga mo le suesueina o tusitusiga paia:
1. Aisea e te manatu ai na muai oo mai lou liuaina e ala i le talitonu ma usitaia upu a perofeta ae le o le molimauina o vavega po o le vaai i agelu?
2. O a ni aoaoga patino mai perofeta na tosina i ai ou liliuga?

I se isi fasipepa tusi ai se sini pe mafai faapefea ona e talitonu atili pe usitaia aoaoga patino po o fautuaga mai perofeta ina ia mafai ai ona faamalosia ou liliuga. Mo ni aitia, mafaufau e toe iloilo le tamaitusi o le Mo Le Malosi o le Autalavou Tuu le fasipepa lenei i se mea e te vaai i ai i aso taitasi e faamanatu atu ai ia te oe lau sini, atonu o totonu o au tusitusiga paia.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Luka 16 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: