Folasaga i le 1 Korinito
Aisea e Suesue ai Lenei Tusi?
O tagata o le Ekalesia anamua o e sa nonofo i Korinito sa tauivi ma le tele o faafitauli o loo i ai i le lalolagi i ona po nei e pei o le fevaevaeai, aoaoga pepelo, ma le ola le mama. I le 1 Korinito, tatou te aoao ai na aoao atu e le Aposetolo o Paulo nei Au Paia i le ala e siitia ai le lotogatasi i le Ekalesia, le ala e aoao ai i mea a le Atua, o le matafaioi o le tino faaletino o se malumalu mo le Agaga Paia, o le natura o meaalofa faaleagaga, o le taua o le aai ma feinu ma le agavaa i le faamanatuga, ma le moni o le Toetu. E ala i lau suesuega o aoaoga a Paulo o loo tusia i le 1 Korinito, e mafai ai ona e aoaoina aoaoga faavae ma mataupu faavae o le a fesoasoani e te ola amiotonu ai e ui i soo se amioleaga atonu lua te fetaiai.
O Ai na Tusia Lenei Tusi?
O le fuaiupu tatala o le 1 Korinito o loo tau mai ai sa auina atu e le Aposetolo o Paulo se soo e igoa ia Sosene, o le atonu na avea ma tusiupu a Paulo (tagai 1 Korinito 1:1). E ui e le o iloa ia auiliiliga o le matafaioi a Sosene, ae o loo manino o Paulo o le tusitala o le anotusi o le tusi (tagai 1 Korinito 16:21–24).
O Anafea ma o Fea na Tusia ai?
Na tusia e Paulo le tusi ua iloga o le 1 Korinito ina ua lata ina maea lana asiasiga e tolu tausaga i Efeso (i le taimi o lana misiona lona tolu), lea e foliga na maea i se taimi o le va o le T.A. 55 ma le 56 (tagai Galuega 19:10; 20:31; Bible Dictionary, “Pauline Epistles”).
O Ai na Faatatau i ai le Tusiaina o Lenei Tusi, ma Pe Aisea Foi?
O lenei tusi na tusia i tagata o le Ekalesia i le aai o Korinito. Sa folafola atu e Paulo le talalelei i Korinito mo le toeitiiti atoa le lua tausaga (tagai Galuega 18:1–18) ma faatulaga se lala o le Ekalesia iina (tagai Bible Dictionary, “Pauline Epistles”). Mulimuli ane, a o talai atu Paulo i Efeso i le taimi o lana malaga lona tolu faafaifeautalai, sa ia maua se fesootaiga mai tagata o le Ekalesia i Korinito. Na ia tusia se tali atu i le paranesi (tagai 1 Korinito 5:9), ae paga lea na leiloa lenei tusi ma o lea e le o maua ai i a tatou tusi paia. Mulimuli ane, sa maua e Paulo se isi lipoti mai tagata o le Ekalesia i Korinito e faatatau i faafitauli i le Ekalesia iina (tagai 1 Korinito 1:11), lea na ia tali atu i ai i le tusia o se isi tusi, lea ua lauiloa o le 1 Korinito. O lona uiga, o le 1 Korinito o le tusi lona lua moni lea a Paulo i tagata o le Ekalesia i Korinito.
I ona po o Paulo, o Korinito o le taulaga lea o le itumalo Roma o Akaia, lea e aofia ai le tele o Eleni saute Maketonia anamua. I le avea ai o se nofoaga tutotonu maumea, o lea sa tosina atu ai e Korinito ia tagata mai le Malo o Roma, ma avea ai o se tasi o aai aupito ese i lea itulagi. O le tapuai i tupua sa fuaao i le aganuu faalelotu a Korinito, ma sa tele ni malumalu ma faletapuai i le aai atoa. I le taimi o le galuega a Paulo, sa i ai se uiga iloga i Korinito o le matuai ola le mama. Mo se faataitaiga, sa lipotia mai le faia o sauniga faafafine talitane i le malumalu o Aphrodite.
I le tusi lenei, sa faamanino ai e Paulo faapea o tagata o le Ekalesia ua leai se lotogatasi, ma ua amata ona tosina e nisi o talitonuga ma faiga faapaupau lo latou tausiga o mataupu faavae ma sauniga o le talalelei (tagai 1 Korinito 1:11; 6:1–8; 10:20–22; 11:18–22). Na ia tusi atu i tagata o le Ekalesia i Korinito e fesoasoani ia i latou i a latou fesili ma faafitauli ma ia faamalolosia ai tagata liliu mai o e o loo tauivi ma le toe aumaia o o latou talitonuga ma faiga ua tuanai.
O a nisi o vaaiga iloga o lenei tusi?
O le Feagaiga Fou o loo aofia ai nisi fautuaga ma aoaoga mai ia Paulo i tagata o le Ekalesia i Korinito nai lo se isi lava lala o le Ekalesia. O le mea moni, o tusi e lua a Paulo i Korinito o le tasi vaefa lea o tusiga uma a Paulo o loo i ai.
E pei ona tusia i le 1 Korinito, sa faamatala atu e Paulo o Iesu Keriso ua faataunuuina le tulafono a Mose. Sa faamamafa atu e Paulo le taua o le “tausia o poloaiga a le Atua” (1 Korinito 7:19) “i lalo o le tulafono a Keriso” (1 Korinito 9:21)
Otootoga
1 Korinito 1:1–11. Ua lapataia e Paulo le fevaevaeai i le Ekalesia ma faamamafa atu le taua o le lotogatasi i tagata o le Ekalesia. Ua ia lapataia tagata o le au paia mai feusuaiga le mama, aoao atu o le tino o se malumalu mo le Agaga Paia, ma fautuaina le amio pulea o le tagata lava ia. Ua ia talanoaina ni fesili patino e tusa ai ma le faaipoipoga ma le galuega faafaifeautalai, faapea foi sauniga o le faamanatuga ma pe taga ona ai aano o manu o loo ofo atu ai taulaga i tupua faapaupau.
1 Korinito 12–14. Ua aoao mai Paulo e tatau ona tatou saili i meaalofa a le Agaga. Ua ia faamanatu atu i le Au Paia i Korinito le taua o aposetolo, perofeta, ma aoao ma le tausiga e tatau ona faia e le au paia mo le tasi ma le isi. Ua ia faamamafaina le taua o le alofa moni i lo isi meaalofa uma faaleagaga.
1 Korinito 15–16. Ua molimau atu Paulo ua tu o ia faatasi ma le toatele o isi o molimau o le Keriso toetu. Ua ia aoao atu o le a toetutu tagata uma ma o le papatisoga mo e ua maliliu ua faamautu ai le upumoni o le Toetutu i le lumanai. Ua ia faamatala atu o tino toetutu o le a eseese i tikeri o le mamalu ma o le manumalo o Iesu Keriso i le tuugamau ua aveesea ai le tui o le oti. Ua ia faatulagaina se saogamea mo le Au Paia matitiva i Ierusalema.