Iunite 22: Aso 2
1 Korinito 9–10
Folasaga
Sa talanoaina e le Aposetolo o Paulo ia popolega mai le Au Paia i Korinito e uiga i le faaaogaina o punaoa a le Ekalesia e tuu atu ai se tupe faaagaga mo mea na te faaaogaina e ola ai. Sa ia faamatala atu o le faamoemoega o lona talai atu o le aumaia lea o le faaolataga i le fanau a le Atua. Sa ia apoapoai atu ia i latou e aloese mai le agasala faapea foi le faatausuai i isi i o latou talitonuga faalelotu.
1 Korinito 9
Ua folafola atu e Paulo le talalelei ina ia mafai ai ona faaolaina o ia ma e faalogologo ia te ia.
Pe ua i ai se taimi na e tauivi ai e ala i luga i le taeao ma taunuu ai ina misia se mea taua? O le a se faalogoga pe a e iloaina ua e misia se mea pe le ausiaina foi se mea taua ona e te lei saunia?
O le mea e sili ona taua i lenei olaga e tatau ona tatou galulue e ausia o le avanoa lea e agavaa ai mo le ola e faavavau.
-
I lau api talaaga mo le suesueina o tusitusiga paia, tusi ai pe aisea ua avea ai le ola e faavavau o se mea e te manao ai.
E pei lava o le tauivi e ala i luga i le taeao e mafai ona tulai mai ai ua tatou misia pe le ausia ai foi mea taua, e mafai foi e nisi amioga ona afua ai ona tatou le ausiaina le mea aupito sili ona taua o mea uma—ola e faavavau. A o e suesueina le 1 Korinito 9, vaavaai mo se mataupu faavae e mafai ona fesoasoani e te iloa ai pe faapefea ona mautinoa ua e ausia le ola e faavavau.
I le 1 Korinito 9:1–21 sa tali atu ai Paulo i fesili eseese mai le Au Paia i Korinito. Na ia tusia faapea e ui o le a tauamiotonuina atoa o ia i le lagolagoina i ona popolega faaletino e tagata o le Ekalesia, e lei faalagolago lava o ia ia i latou mo mea na ia ola ai. Sa ia faamalamalama atu o le fetuunai i tulaga eseese e aunoa ma le fetuunaia o tulaga faatonuina o le talalelei, sa mafai ai e ia ona fesoasoani i tagata Iutaia, Nuuese, ma soo se isi lava tagata sa vaivai i le talalelei e talia le talalelei.
Faitau le 1 Korinito 9:17, ma vaavaai pe na faapefea e Paulo ona folafola atu le talalelei.
Faitau le 1 Korinito 9:22–23, pe aisea na folafola atu ai e Paulo ma le naunautai le talalelei.
Mafaufau pe a e faataitaia pe koleni mo se faamoemoe. O le a le mamafa o le lisi o au faataitaiga po o le polokalama o koleniga? Na faapefea ona faaosofia oe i le galue agai i se sini?
Sa faamatala e Paulo e mafai e tagata taaalo ona faatoilaloina faaosoosoga e aua le koleni e taulai i a latou sini. Faitau le 1 Korinito 9:24–25, ma vaavaai mo tausinioga faaafeleti sa faaaoga e Paulo e aoao atu ai le Au Paia i Korinito.
O le a le tulaga maualuga po o le uiga na fai mai Paulo e manaomia e le au tausinio ina ia faamanuiaina?
O le fai faatatau i mea uma o lona uiga o le faaaoga o le faautauta, po o le amio pulea. O le palealii e le pala lava o loo faasino i ai Paulo o le a tumau e faavavau i le ola e faavavau.
Mai le 1 Korinito 9:25e mafai ona tatou aoao ai le mataupu faavae lenei: Ina ia maua le ola e faavavau e tatau ona tatou aoao e faaaoga le faautauta i mea uma. Peitai, o le taunuuga, e maua le ola e faavavau i le na “o galuega, ma le alofa mutimutivale, ma le alofa tunoa” o Iesu Keriso (2 Nifae 2:8) nai lo le na o lou lava faautauta.
-
-
Aisea e te manatu ai e tatau ona i ai le faautauta ina ia maua ai le ola e faavavau?
-
O a vaega o o tatou olaga tatou te manaomia uma e faaaoga ai le faautauta ina ia mafai ai ona tatou maua le ola e faavavau?
-
Faitau le 1 Korinito 9:26–27, ma vaavaai pe na faapefea ona faamatala e Paulo ana lava taumafaiga e faaaoga ai le faautauta. O le fasifuaitau “faatoilaloina” i le fuaiupu 27 o lona uiga o le matuai amio pulea lava (tagai 1 Korinito 9:27, vaefaamatalaga a).
O le a sou manatu o le a le uiga o le mea na tusia e Paulo i le fuaiupu 27 e faapea, “Ou te faatoilaloina lou nei tino, ma au fai ai ma pologa: ina nei iu ina le faamaoni au, o au sa talai atu i isi tagata”?
Mafaufau i faamatalaga nei mai ia Peresitene Polika Iaga:
“E le mafai ona outou maua le ola e faavavau, sei vagana ua fai ma pologa o outou naunauga i le agaga o loo nofo i totonu ia te outou, o lena agaga lea na aumai e lo tatou Tama oi le Lagi. O le uiga o lau tala o le Tama o o outou agaga, o na agaga na ia tuu i totonu o nei tapeneko [tino]. O tapeneko e tatau ona fai ma pologa atoatoa i le agaga, a leai e le mafai e o outou tino ona tulai mai e fai mo latou le ola e faavavau. … Saili ma le filiga, seia oo ina outou aumaia o mea uma ia fai ma pologa i le tulafono a Keriso” (Aoaoga a Peresitene o le Ekalesia: Polika Iaga [1997], 204).
“Afai e gauai atu le agaga i le tino, ona pala ai lea [o le tino]; ae afai e gauai atu le tino i le agaga ona mama ai lea ma paia [o le tino] (Aoaoga: Polika Iaga, 205).
-
1 Korinito 10
Ua lapataia e Paulo le Au Paia i Korinito e aloese i le agasala ma le faatausuai i isi
Na lapatai mai Peresitene James E. Faust o le Au Peresitene Sili: “O se tasi o talafatu sili i le olaga o le taimi e mafaufau ai [tagata] o i latou e le mafaatoilaloina. Ua toatele naua ua manatu e [gaosia] i latou i uamea, e lava le malosi e tatalia ai soo se faaosoosoga. Latou te faaseseina i latou lava i mafaufauga, ‘E le mafai ona tupu ia te au’” (“E le Mafai ona Tupu Ia te Au,” Liahona, Me 2002, 46).
Mafaufau i tulaga e ono faataga ai e tagata i latou lava e aliali atu i faaosoosoga, ma le manatu e lava lo latou malolosi e tatalia ai.
E pei ona tusia i le 1 Korinito 10:1–5, na faasino Paulo i ni mea sa oo i ai le fanauga a Isaraelu i le taimi o Mose lea sa tatau ona malolosi faaleagaga ai i latou. E ui ina sa faamanuiaina i latou e le Alii i le vao ma sa molimauina ai le tele o vavega, sa lei fiafia le Alii i le toatele o i latou, ma sa faasalaina i latou.
Faitau le 1 Korinito 10:6–11, ma vaavaai mo mea na manao Paulo i le Au Paia i Korinito e aoao mai le faataitaiga a Isaraelu anamua.
E ui ina sa vaai Isaraelu anamua i faamanuiaga silisili, ae sa latou filifili e faamatuu atu i faaosoosoga. Sa manao Paulo e lapatai le Au Paia i Korinito ia latou aloese ai mai le toe faia o agasala a Isaraelu anamua.
Faitau le 1 Korinito 10:12, ma otooto mai le savali a Paulo i au lava upu:
Faitau le 1 Korinito 10:13, ma vaavaai mo mea na aoao atu e Paulo e uiga i tofotofoga. Atonu e te manao e faailoga mea e te maua.
O le a se mea e mafai ona tatou aoao e uiga i tofotofoga i lenei fuaiupu?
Mafaufau i le fesili lea: Afai o le a le faatagaina e le Atua i tatou ia tofotofoina i luga atu o lo tatou gafatia e teena ai, aisea na faamatuu atu ai Isaraelu anamua i tofotofoga?
Faitau le 1 Korinito 10:14, ma vaavaai mo mea na aoao atu e Paulo le Au Paia i Korinito e fai. Ifo i tupua o se agasala na taufai tauivi ai Isaraelu anamua ma le Au Paia i Korinito.
Mai le 1 Korinito 10:13–14 e mafai ona tatou aoao ai faapea o le a saunia e le Atua se ala mo i tatou e aloese ai i tofotofoga, ae e tatau ona tatou filifili e tuuese mai i tatou lava mai tofotofoga.
Faitau le Alema 13:28, ma vaavaai mo mea e mafai ona tatou faia e tuuese mai ai i tatou lava mai tofotofoga. Fuafua e tusi le mau faasino lea i au tusi paia i autafa o le 1 Korinito 10:13–14.
-
-
Mai mea sa e aoaoina i le 1 Korinito 10:13–14 ma le Alema 13:28, tusi se folamua o se nusipepa po o se faalaeiauga i se laupapa o faasalalauga e tau atu ai i tagata le ala e mafai ona latou sosolaese ai mai tofotofoga.
-
E mafai faapefea e le faalotomaualaloina o i tatou lava ma le mataala ma tatalo e le aunoa ona fesoasoani tatou te tuuesea ai i tatou lava mai tofotofoga?
-
Atonu e te le mafai pea lava pea ona aloese mai tofotofoga. Ona o lena mea, e manaomia ai ona tatou filifili nei pe faapefea ona tatou gaoioi pe a tatou fetaiai ma tofotofoga. Mafaufau i le saunoaga lenei a Peresitene Spencer W. Kimball:
“O faaiuga tonu e faigofie ona faia, pe a tatou faia ae le’i taitai ona o’o mai, i le i ai o faamoemoega i le mafaufau; o lenei mea e faasaoina ai le tele o le atuatuvale [i le taimi e filifili ai], i le taimi ua tatou vaivai ai, ma matua faaosoosoina. …
“… O le taimi e fiifili ai faapea o le a tatou le nofoia i se mea e itiiti ifo nai lo se avanoa e ola ai e faavavau ma lo tatou Tama o le taimi nei lava, ina ia aafia filifiliga uma tatou te fai i lo tatou naunautaiga ia le faatagaina lava se mea e faalavefau i le mauaina o lena sini laualuga” (Aoaoga a Peresitene o le Ekalesia: Spencer W. Kimball[2006], 108–9).
“Atinae lou lava amio pulea ina ia, saga faateleina pea, e te le tau filifili ma toe filifili pe o le a le mea o le a e faia pe a e feagai pea lava pea ma faaosoosoga lava e tasi. E na o ni nai mea lava e tatau ona e faia se faaiuga faa-tasi
“Se faamanuiaga ina a tele o le saoloto mai le mafatia pea lava pea e tusa ai ma tofotofoga. O le faia o lena mea e alu ai le taimi ma e matua lamatia ai lava” (Aoaoga: Spencer W. Kimball, 109).
“O le taimi e taofia ai ala leaga o le taimi a o lei amataina. O le leolilo o le olaga lelei o le puipuiga ma le muai teena. O i latou o e faamatuu atu i le leaga e masani lava o i latou ia e tuuina i latou lava i tulaga (Aoaoga: Spencer W. Kimball, 109).
Mafaufau pe o a tofotofoga o loo sili ona oulua tauivi. O a suiga e mafai ona e faia e aloese ai mai faaosoosoga ae e te lei oo i ai?
Faaalu se taimi e faitau ai se autu se tasi mai le Mo Le Malosi o le Autalavou e mafai ona fesoasoani ia te oe e iloa ai pe faapefea ona tuuesea oe lava mai faaosoosoga. E faavae i mea sa e faitauina, fuafua e tusi se sini ma alu ma feaveai mo se taimi e fesoasoani e faamanatu atu ai ia te oe e solaese mai faaosoosoga.
I le 1 Korinito 10:15–33na fautuaina ai e Paulo le Au Paia i Korinito e faaaloalo i faiga faalelotu a isi e aunoa ma le fetuunaia o o latou lava, ma sa ia toe tusi atu e faapea sa ia talai atu ina ia mafai ai ona fesoasoani i le toatele ia faaolaina.
-
Ua ou suesueina le 1 Korinito 9–10 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lou faiaoga: