Iunite 5: Aso 1
Mataio 18–20
Folasaga
Sa aoao atu e Iesu Keriso Ona soo i mataupu faavae lea o le a fesoasoani ia i latou e taitai le Ekalesia pe a mavae Lona Afio Ae. Na Ia tuu atu foi le faataoto i le auauna le alofa e tali ai le fesili a Peteru i le faamagalo atu, ma sa Ia aoao atu e uiga i le paia o le faaipoipoga. Sa faamamafa e le Faaola le taua o le filifilia o le ola e faavavau nai lo oa o le lalolagi, ma sa Ia tuuina atu le faataoto i le aufaigaluega i le tovine.
Mataio 18
Ua aoao e Iesu Keriso Ona soo i mataupu faavae o le a fesoasoani ia i latou e taitai le Ekalesia, ma ua Ia tuu atu foi le faataoto i le auauna le alofa
O le tala lea, na faamatala e Peresitene Thomas S. Monson, o loo ta’u mai ai se aiga na oti se pepe e tasi le masina le matua: “[O le] tama o se tagata fau meafale ma sa ia faia se pusa maliu matagofie mo le tamaitiiti pele. O se aso pogisa le aso o le falelauasiga, na atagia mai ai le lagona faavauvau sa la lagonaina. A o savavali atu le aiga i le falesa, faatasi ma le Tama o loo tauaveina atu lena tamai pusa maliu, sa faapotopoto atu nisi o uo. Ae peitai, sa loka le faitotoa o le falesa. Sa matuai galo lava i le epikopo pisi le maliu. Sa le manuia taumafaiga ina ia maua mai o ia. I le leiloa po o le a le mea o le a fai, o lea sa afisi e le tama le pusa maliu i lalo o lona lima, faatasi ma lona aiga i ona autafa, ma toe sii atu i le fale, ma savavali i le maligi o timuga” (“O Tina Natia,” Ensign, Me 2002, 19)
-
Tali fesili nei i lau api talaaga mo le suesueina o tusitusiga paia:
-
Pe ana faapea o oe o se tagata o lena aiga, mata o a ni ou lagona ina ua le alu atu le epikopo i le maliu?
-
Aisea e ono faigata ai ona faamagalo atu i le epikopo?
-
I le Mataio 18:1–20 ua tatou faitaua ai faapea na aoao atu e Iesu Ona soo i Kalilaia ia lotomaualalo ma avea o ni tamaiti. Sa Ia faamalamalama atu foi o i latou o e “faatausuai” i Ona soo ua faapei o ni tamaiti, pe taitai ese i latou, o le a pagatia (tagai fuaiupu 6–7, e aofia ai le Mataio 18:6, vaefaamatalaga a).
O le lotomaualalo o tamaiti e mafai ona faatusa i le lotomaualalo o tagata fou e liliu mai i le Ekalesia. O a lesona e mafai ona tatou aoaoina mai tagata fou faatoa liliu mai? E mafai faapefea ona tatou faafaileleina tamaiti ma tagata fou faatoa liliu mai i le Ekalesia?
Ona fautuaina lea e le Faaola o Ona soo ia aveesea mai o latou olaga na mea e ono faatausuai ai i latou, pe afua ai ona latou tautevateva (tagai fuaiupu 9). Na Ia aoao atu foi le au Aposetolo afai e solitulafono se tasi, pe agasala, faasaga ia i latou, e tatau ona latou muai saili e foia le faafitauli ma le tagata i se tulaga e le faalauaiteleina. Afai e musu le tagata e salamo, ona mafai lea ona tuu atu o ia i luma o taitai o le Ekalesia. (Manatua: O aoaoga a le Faaola o loo maua i le Mataio 18:1–14 o le a talanoaina auiliili i lesona o le Mareko 9 ma le Luka 15.)
Ina ua uma lea faatonuga, sa fesili Peteru i le Alii e uiga i le faamagalo atu. Faitau le Mataio 18:21, ma vaavaai mo le fesili a Peteru.
Na aoao atu e nisi o taitai faalelotu i ona po o Peteru faapea sa lei manaomia e tagata ona faamagalo atu i se tagata e sili atu i le faatolu. O le fesili atu i le Alii pe tatau ona ia faamagalo faafitu atu, atonu na manatu Peteru ua agalelei tele o ia (tagai Bruce R. McConkie, O le Mesia Soifua i la le Tino: Mai Peteleema i Kalevario, 4 vols. [1979–81], 3:91). Faitau le Mataio 18:22, ma vaavaai mo le tali a le Faaola ia Peteru.
“Faafitugafulu ni fitu” o se auala e fai atu ai e le tatau ona tatou tuua se tapulaa i le aofaiga o taimi e faamagalo atu ai i isi. O le tali atu a le Faaola ia Peteru ua aoao mai ai le upumoni faapea ua poloaiina i tatou e le Alii e faamagalo atu ia i latou o e faatausuai mai pe agasala mai ia i tatou.
O le faamagalo o isi o le faia lea o le tagata na faatausuai mai pe faatiga mai, ma le alofa ma ia leai ni lagona agaleaga ia te ia (tagai Taiala o Tusitusiga Paia, “Faamagalo,” scriptures.lds.org; D&C 64:9–11). O le faamagalo e le o le uiga faapea e te faaauau pea ona tuu atu i isi e faaleaga ia te oe pe faapea foi e le tatau ona faamasinoina le tagata sa faatiga mai, mo ana mea sa fai, i le tulaga faaletulafono.
Ina ua uma ona tali le fesili a Peteru, sa aoao atu e le Faaola Ona soo i se faataoto lea e mafai ona fesoasoani tatou te malamalama ai pe aisea e tatau ai ona tatou faamagalo atu i isi.
Faitau le Mataio 18:23–30, ma vaavaai pe fia tupe na nofo aitalafu ai le auauna ma le uso a auauna.
E fia le tupe na nofo aitalafu ai le auauna i le tupu?
E fia le tupe na nofo aitalafu ai le uso a auauna i le auauna?
Faaaoga le faamatalaga lea e fesoasoani ai i lou tau fuafuaina pe o le a le umi e ono tatau ai ona toe totogi e i la’ua o nofo aitalafu le mea sa ia aitalafua:
I ona po o Iesu “o se fuafaatatau i ai o taleni e 10,000 e tusa ia ma le 100,000,000 tenari [tupe Roma]. O le tenari e tasi o se totogi masani lea o le aso mo se tagata faigaluega leipa (Jay A. Parry and Donald W. Parry, Malamalama i Faataoto a Iesu Keriso [2006], 95). Fuafua pe o le a le umi e toe totogi ai e lenei auauna lea aitalafu i le vaevae o le 100,000,000 tenari i le 365 aso.
Afai e tuu atu uma ona totogi, e fia aso e tatau ona toe totogi ai e le auauna lana aitalafu?
I se faatusatusaga, o le 100 sene e tutusa ma le 100 tenari. (Manatua o le tele o le aufaigaluega leipa e 1 le tenari i le aso na te maua.) Fuafua pe o le a le umi e totogi uma ai e le uso a auauna lana aitalafu.
Afai e avatu uma lona totogi, e fia aso o le a toe totogi ai e le uso a auauna lana aitalafu?
Faitau le Mataio 18:31–35, ma vaavaai pe na faapefea ona tali atu le tupu ina ua ia iloaina le mea na faia e le auauna i le uso a auauna.
E te manatu aisea na ta’u atu ai e le tupu i le auauna ua amioleaga o ia i le le faamagaloina o le aitalafu a lona uso a auauna?
E fua i lau faitauga o le fuaiupu e 35, tusi pe o ai ua e manatu e mafai ona faatusa i ai tagata taitasi o le toatolu:
Tupu =
Auauna =
Uso a auauna =
I le faaaogaina o mea sa aoaoina mai lenei faataoto, faamaea le mataupu faavae lea: Afai tatou te mananao i le Atua e faamagalo i tatou, ona . Fuafua e tusi le mataupu faavae lea i le laina o au tusi paia i autafa o le Mataio 18:24–35.)
O le a se mea e fai e se tagata pe afai o loo ia tauivi e faamagalo se tasi?
Na aoao mai Peresitene James E. Faust o le Au Peresitene Sili:
“E manaomia ona tatou iloa ma faailoa lagona ita. E manaomia ai le lotomaualalo e faia ai, peitai afai tatou te o ifo i o tatou tulivae ma ole atu i le Tama Faalelagi mo se lagona o le faamagaloga, o le a fesoasoani mai o Ia ia te i tatou. E manaomia e le Alii i tatou ’e faamagalo i tagata uma’ [MF&F 64:10] mo lo tatou lava lelei aua ‘o le inoino e faavaatuia ai le tuputupu ae faaleagaga’ [Orson F. Whitney, Mataupu Autu o le Talalelei (1914), 144]. Sei iloga ua tatou faamamaina i tatou lava mai le inoino ma le ita ona mafai lea e le Alii ona tuu le mafanafana lelei i o tatou loto. …
“… A tulai mai mala, e le tatau ona tatou tali atu i ai e ala i le saili atu e tauimasui, ae ia tau lava ina tuu atu le faamasinoga tonu i lona ala, ona faagalo ai lea. E le faigofie ona faagalo ma faamama o tatou loto mai le faateleina o le ita. Ua uma ona ofoina mai e le Faaola ia i tatou uma se filemu taua e ala i Lana Togiola, peitai ua na o lo tatou naunau e lafoai lagona le lelei o le ita, lotovale, po o le tauimasui e mafai ai ona oo mai. Mo i tatou uma o e faamagalo atu ’ia i latou o e ita mai’ [Faaliliuga a Iosefa Samita, Mataio 6:13], e oo foi ia i latou o e na faia solitulafono matuia, e aumaia e le Togiola se fuataga o le filemu ma le mafanafana” (“O Le Mana Faamalolo o le Faamagalo Atu,” Ensign po o le Liahona, Me 2007, 69).
-
O le faaiuga lea o le tala na faasoa mai e Peresitene Monson i le amataga o le lesona lenei: “Pe ana fai o se aiga e faatauvaa, semanu latou te tuuaia le epikopo ma latou teulotoina ni lagona le lelei. Ina ua iloa e le epikopo le faaletonu, sa asiasi o ia i le aiga ma faatoese i ai. Faatasi ai ma le tiga sa iloga mai i ona foliga, ae faatasi ai ma loimata i ona mata, sa talia e le tama le faatoesega, ma sa feopoai le toalua lenei i se agaga o le malamalama” (“O Tina Natia,” 19).
Mafaufau ia i latou atonu o loo e taofia le faamagalo atu i lou olaga. Tatalo mo se naunauga e faamagalo atu ma le tomai e lafoai ai le tiga ma le ita ina ia mafai ai e Iesu Keriso ona fesoasoani ia te oe ia maua le filemu ma le mafanafana e ala i Lana Togiola.
Mataio 19:1–12
Sa aoao atu le Faaola e uiga i le paia o le faaipoipoga
O le aoaoga faavae a le Alii e faatatau i le faaipoipoga ma le tatalaina o faaipoipoga e ese mai le tele o talitonuga o le lalolagi.
O a nisi o talitonuga o le lalolagi e uiga i le faaipoipoga ma le tatalaina o faaipoipoga?
A o e suesueina le Mataio 19:1–12, vaavaai mo aoaoga a le Alii e uiga i faaipoipoga ma le tatalaina o faaipoipoga ma mafaufau i le taua o nei aoaoga mo oe.
Faitau le Mataio 19:1–3, ma vaavaai mo le fesili na tuu atu e le au Faresaio ia Iesu.
O le fasifuaitau “faatea lana ava ona o mea uma” e faasino i se tane e faatea lana ava ona o soo se mafuaaga, tusa lava pe o se mea faavalevalea po o le manatu faapito. (Mataio 19:3)
Faitau i le Mataio 19:4–6, ma vaavaai mo mea na aoao atu e le Faaola e uiga i le faaipoipoga ma le tatalaina o faaipoipoga.
O fuaiupu e tolu ua aoao mai ai faapea o le faaipoipoga i le va o se alii ma se tamaitai o se sootaga paia na mamanuina ma faavae e le Atua. Fuafua e tusi le aoaoga faavae lea i le laina o au tusi paia i autafa o le Mataio 19:6. I faaaliga i ona po nei sa faamautu ai e le Alii faapea “o le feagaiga fou e faavavau o le faaipoipoga” (faaipoipoga i le malumalu) e taua i le faaeaga (tagai MF&F 131:1–4).
Faitau le Mataio 19:7, ma vaavaai mo le isi fesili na tuu atu e le au Faresaio ia Iesu.
Mataio 19:8–9 o loo tusia ai faapea na ta’u atu e le Faaola i le au Faresaio na faatagaina e Mose le tatala o faaipoipoga i ona taimi ona o le maaa o loto o tagata. O le faaupuga “faatea ese” i nei fuaiupu e mafai foi ona faauiga o le tuueseese pe aluese.
O le saunoaga lea a Elder Dallin H. Oaks o le Korama a Aposetolo e Toasefululua e fesoasoani e faamanino ai pe faapefea ona fesootai lenei aoaoga i o tatou aso: “O le ituaiga o faaipoipoga e manaomia mo le faaeaga—e faavavau lona umi ma e faaleatua i lona uiga auaumama—e le mafaufau lava i se tetea. I malumalu sa o le Alii, e faaipoipo ai ulugalii mo le faavavau atoa. Ae o nisi faaipoipoga e le agai i luma i lena tulaga. Talu ai ’le maaa o o [tatou] loto [Mataio 19:8], ua le o faamalosia ai e le Alii i le taimi nei ia taunuuga o le tulaga faaselesitila. “ Ua Ia faatagaina tagata ua tatala faaipoipoga e toe faaipoipo e aunoa ma le pisipisia i le le mama o loo faapatino mai i le tulafono maualuga atu (“Tatalaina o Faaipoipoga,” Ensign po o le Liahona, Me 2007, 70).
-
Mataio 19:13–20:34
Ua aoao mai e Iesu e uiga i le ola e faavavau, ma ua Ia tuuina mai le faataoto i le au galulue i le tovine
Mataio 19:13–30 ua tusia ai faapea sa fautuaina e Iesu Ona soo e saili i le ola e faavavau ae le o oa o le lalolagi. Sa fesili Peteru po o a mea o le a maua e le au soo ona ua latou lafoai a latou oa faalelalolagi ina ia mulimuli i le Faaola. (Manatua: O mea na talanoaina i nei fuaiupu o le a auiliiliina i le lesona mo le Mareko 10.)
I le Mataio 20:1–16 ua tatou faitau ai faapea na aoao atu e le Faaola Ona soo i se faataoto e fesoasoani ai ia latou malamalama e finagalo le Tama Faalelagi e aumai uma i Ana fanau le avanoa e maua ai le ola e faavavau. I lea faataoto ua faafaigaluega ai e se tagata ni tagata galulue i taimi eseese i le aso atoa e galulue ai i lona tovine, ona ia totogia lea o i latou uma i le totogi lava e tasi ina ua uma le aso.
Mataio 20:17–34 o loo tusia ai faapea sa muai tau mai e Iesu Keriso o le a faalataina o Ia ma faasalaina ai i le oti pe a toe foi atu o Ia i Ierusalema. Na Ia aoao atu Ona soo faapea nai lo le taumafai ia maua se tulaga po o le pule, e ao ona latou mulimuli i Lana faataitaiga ma auauna atu i isi.
-
Ua ou suesueina le Mataio 18–20 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: