Tito

Folasaga

I le tusi lenei, na uunaia malosi ai e le Aposetolo o Paulo ia Tito, o le sa avea ma se uso a faifeautalai sa auauna atu i lena taimi i Kereta, e faaaoga aoaoga faavae sao e aoao ma faasao ai isi. Sa fautuaina foi e Paulo ia Tito e aoao le Au Paia ia avea ma ni faataitaiga amiotonu, ia i ai le faamoemoe mo le togiolaina e ala i le Togiola a Iesu Keriso, ma ia faaauau pea i galuega lelei.

Tito 1

Ua uunai malosi e Paulo ia Tito e faaaoga aoaoga faavae talafeagai e aoao ai ma faasao ai le Au Paia ma isi i Kereta

Sue le motu o Kereta i Faafanua o le Tusi Paia, nu. 13, “O Malaga Faafaifeautalai a le Aposetolo o Paulo.” I le lata ai i le iuga o le ola o Paulo, sa tusia ai e Paulo se tusi ia Tito, o le sa auauna atu o se taitai o le Ekalesia i Kereta. Sa faaliliuina mai e Paulo ia Tito i ni nai tausaga na mavae atu, ma ina ua uma ona papatiso, sa auauna atu o ia faatasi ma Paulo i nisi o tofiga. I lana tusi, sa faamalosiau atu ai Paulo ia Tito ma fautuaina o ia e uiga i lona valaauga.

E pei ona tusia i le Tito 1:1–6, sa molimau atu Paulo i le faamoemoe sa ia te ia mo le ola e faavavau, lea na folafola mai e le Atua ao lei amataina le lalolagi (tagai Tito 1:2). Sa ia faamalamalama atu, na ia auina atu Tito e faatulaga lelei le Ekalesia i Kereta ma ia valaau ni alii e auauna atu o ni epikopo.

Faitau le Tito 1:7–8, ma vaavaai mo uiga e tatau ona i ai i se epikopo ma uiga e tatau i se epikopo ona aloese ai. Atonu e te manao e faailoga mea ua e maua.

I le Tito 1:7, o le upu finauvale o lona uiga o le lotomaaa po o le faasausili, ae o le fuaitau “manumanu i oloa” e faatatau i tupe e maua mai e ala i le le faamaoni po o isi auala amioletonu.

Aisea e te manatu ai, o uiga na lisiina e Paulo e tatau i epikopo ona maua pe aloese ai?

Faitau le Tito 1:9, ma vaavaai mo le isi uiga e tatau ona i ai i epikopo. O le “mataupu e ola ai” e faatatau i aoaoga faavae moni.

I le Tito 1:9 ua tatou aoao ai, e taua mo epikopo ona pipii mau i le afioga a le Atua ina ia mafai ona latou faaaogaina aoaoga faavae moni e faamalosiau ai i isi ia ola i le talalelei ma ia “aoai atu i e finau mai.” O se tagata finauvale o se tasi e tautala faasagatau pe teena se manatu (i le tulaga lenei o le moni o le talalelei). O tagata finauvale e mafai ona lavevea ai tagata e le o ni tagata o le Ekalesia ma tagata o le Ekalesia.

O se mataupu faavae e tasi e mafai ona tatou aoao mai aoaoga a Paulo e uiga i epikopo o le ao tatou uumau i le afioga a le Atua, o le a mafai ona tatou faaaogaina aoaoga faavae moni e faamalosiau ai i isi ia ola i le talalelei a Iesu Keriso ma ia teena ai i latou o e tetee i ai.

Mafaufau i le saunoaga a Peresitene Boyd K. Packer o le Korama a Aposetolo e Toasefululua, e uiga i le mana o loo i ai i aoaoga faavae moni e fesoasoani ai i tagata taitoatasi ia ola i le talalelei a Iesu Keriso:

“O aoaoga faavae moni, e malamalama i ai, e suia ai uiga ma amioga.

“O le suesue i mataupu o le talalelei e vave ona faaleleia ai le amio nai lo le suesue i ala e faalelei ai le amio. O le mafaufau i amio leaga e tau atu i le faia o amio leaga. O le ala lea ua matou faamamafa ai le suesue i aoaoga faavae o le talalelei” (“Fanau Iti,” Ensign, Nov. 1986, 17).

Tali fesili nei i lau api talaaga mo le suesueina o Tusitusiga Paia:
1. O le a se mea e mafai ona e faia e te saunia ai e aoao atu aoaoga faavae moni ina ia mafai ona e uunaia ai isi ia ola i le talalelei? (Tagai MF&F 11:21.)
2. O a nisi o faataitaiga mai tusitusiga paia o ni taimi na aoao atu ai e se tasi ni aoaoga faavae moni i se tagata, o le sa faaalia le masalosalo po o le tetee malosi i le Ekalesia po o ona aoaoga faavae? (Ia aofia ai ia le itiiti ifo ma le tasi se faataitaiga o se taimi na salamo ai se tagata ona sa aoaoina o ia i aoaoga faavae moni.)

Mafaufau i se taimi sa fesoasoani ai le aoaoina o aoaoga faavae moni, e uunaia pe tauanau ai oe po o se tasi e te iloa ia faateleina le ola atoatoa i le talalelei a Iesu Keriso.

E ui o aoaoga faavae moni e mafai ona fesoasoani ia i tatou e uunaia ai isi ia ola i le talalelei ma tali ai ma le faatuatua ma le molimau i latou o e tetee i le Ekalesia, ae e le faapea na te taitai atu ai se tasi ia talia le aoaoga faavae a Iesu Keriso. Talu ai e tofu tagata uma ma le faitalia, e mafai ona latou filifili e talia pe teena aoaoga faavae moni.

Tusi le mea lenei i lau api talaaga mo le suesueina o tusitusiga paia:
1. Lisi ia le itiiti ifo ma le tolu ni mau tauloto sa e aoaoina i lenei tausaga e mafai ona fesoasoani faapitoa e uunaia ai isi ia ola i le talalelei. Faamalamalama pe faapefea ona fesoasoani ia mau taitasi.
2. Lisi ia le itiiti ifo ma le tolu ni mau tauloto e mafai ona faaaogaina e fesoasoani e tali atu ai ia i latou o e tetee i se aoaoga po o se faiga masani a le Ekalesia. Faamalamalama pe faapefea ona fesoasoani ia mau taitasi e aoao atu aoaoga faavae moni e taulima ai lo latou tetee.

Ia faaauau ona tauloto ia fuaitau autu o mau ina ia e saunia e aoao atu aoaoga faavae moni i isi.

E pei ona tusia i le Tito 1:10–16, sa aoao e Paulo ia Tito, sa manaomia e le Au Paia i Kereta ona faalagolago i aoaoga faavae moni ona, sa toatele tagata taufaasese ma faiaoga pepelo sa i ai ia i latou. Sa ia fautuaina Tito ia aoai i faiaoga pepelo ina ia lafoai a latou mea sese ma ia “faamaoni i le faatuatua” (Tito 1:13). Sa faamalamalama atu foi e Paulo e faapea, e faaalia e tagata lo latou latalata atu i le Atua e ala i a latou amioga.

Tito 2

Ua fautuaina e Paulo ia Tito e aoao le Au Paia i Kereta ia ola i aoaoga faavae moni

Faitau le Tito 2:1, ma vaavaai po o le a le isi mea na faatonuina e le Aposetolo o Paulo ia Tito e fai i aoaoga faavae moni.

Faitau le Tito 2:3–5, ma vaavaai mo le fautuaga a Paulo i le auala e tatau i tamaitai matutua atu ona ola ai, ma mea e tatau ona latou aoao atu i tamaitai laiti ifo. Ona faitau lea o le Tito 2:2, 6–8, ma vaavaai mo le fautuaga a Paulo i le ala e tatau ona ola ai alii matutua atu ma alii laiti ifo. I le fuaiupu 2, mataala o lona uiga o le toa po o le faamamalu ae o le faautauta o lona uiga o le amio pulea. I le fuaiupu 7, ia faaalia le faatoeaina o lona uiga ia faamamalu ma faaaloalo. O le fuaitau “ia avea oe ma faaaoao o galuega lelei i mea uma lava” i le Tito 2:7 o lona uiga ia avea ma se faataitaiga lelei o le ola i le talalelei. Mafaufau e faailoga pe faailoa soo se fautuaga a Paulo e faatatau ia te oe.

O se tasi o upumoni tatou te aoao mai le fautuaga a Paulo ia Tito o le, e tatau i soo o Iesu Keriso ona avea ma ni faataitaiga lelei i isi.

Mafaufau i se tagata matua atu o lau uarota po o le paranesi ua avea ma se faataitaiga lelei o le ola i le talalelei ma le tuuto atu i ai. I lau api talaaga mo le suesueina o tusitusiga paia, faamatala ai pe na faapefea ona fesoasoani le faataitaiga a lenei tagata ia te oe.

Filifili se tasi o amioga o loo lisiina i le Tito 2:2–8, ma faatu se sini ia faaaoga lelei atu lena amioga i lou olaga, ina ia mafai e lau faataitaiga lelei ona faamanuia ai isi.

O loo tusia i le Tito 2:9–10 e faapea, sa fautuaina e Paulo ia Tito e aoao tagata o le Ekalesia o e galulue o ni auauna ina ia faamaoni ma ia lotomalie i a latou feutagaiga ma o latou matai. E ala i le faamaoni ma le lotomalie, o le a faamamalu ai e nei tagata o le Ekalesia le Alii ma faia se faataitaiga lelei mo o latou pule o galuega.

Faitau le Tito 2:11–15, ma vaavaai mo le mea e faia e le talalelei mo le Au Paia ma le mea sa faia e Keriso mo i tatou uma. Atonu e te manao e faailoga le mea e taitai atu e le talalelei ia tagata ia tulimatai atu i ai. O le Faaliliuga a Iosefa Samita o le, Tito 2:11 e faitauina faapenei, “Aua o le alofa tunoa o le Atua lea e aumaia ai le faaolataga i tagata uma, ua faaalia mai” (i le Tito 2:11, vaefaamatalaga e).

E faavae i aoaoga a Paulo i le Tito 2:14, ua tatou aoao ai, Na tuuina mai e Iesu Keriso o Ia lava mo i tatou, ina ia mafai ona Ia laveai i tatou ma faamama i tatou. O le fuaitau “o lona lava nuu” i le fuaiupu 14 e faatatau i tagata faapelepele o le Alii, o le ua Ia faatauina pe togiolaina (tagai 1 Peteru 1:18–19; 2:9) ma o e ua osifeagaiga e tausi Ana poloaiga (tagai Esoto 19:5–6).

Tito 3

Ua tau mai e Paulo ia i tatou mea e ao ona faia e le Au Paia i Kereta pe a uma ona papatisoina i latou

E pei ona tusia i le Tito 3:1–2, na fautuaina e Paulo ia Tito e aoao le Au Paia i Kereta ia usitai i le tulafono o le laueleele ma ia fai ma se faataitaiga lelei e ala i le agamalu ma le le tautala leaga i isi. Faitau le Tito 3:3–8, ma vaavaai mo le mea na fai mai Paulo o le ala na suia ai e le talalelei a Iesu Keriso o ia, tagata o le Ekalesia i Kereta, ma le Au Paia uma.

Matau le Tito 3:3 i le ala na faamatala ai e Paulo o ia lava ma isi tagata o le Ekalesia ae latou te lei aoao e uiga i le talalelei a Iesu Keriso. Atonu e te manao e faailoga i le Tito 3:4–6 le mea na suia ia tagata. I le Tito 3:5 o le fuaitau “i le faataeleina i le toefuataiina” e faatatau i le papatisoina.

Mafaufau i auala ua e sui ai ona o le talalelei a Iesu Keriso.

Matau i le Tito 3:8 na fautuaina ai e Paulo le Au Paia “ia faia galuega lelei.” I lau api talaaga mo le suesueina o tusitusiga paia, tusi e uiga i au galuega lelei o loo e faia ma o loo e faaauauina pea e faaalia ai lou talitonuga i le Atua.

E pei ona tusia i le Tito 3:9–15, na fautuaina ai e Paulo le Au Paia ia aloese mai finauga, po o tauupuga ma tagata le talitonu. Sa ia tau atu foi ia Tito o le a ia auina atu isi taitai o le Ekalesia e asiasi atu i Kereta.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Tito ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lou faiaoga: