Iunite 24: Aso 4
Efeso 1
Folasaga
Sa tusi e Paulo se tusi i le Au Paia i Efeso e uiga i lo latou muai faauuina e maua le talalelei. Sa ia tusi e uiga i le tisipenisione faaiu—le tisipenisione lea o loo tatou ola ai nei—lea o le a “faaopoopoina [ai e le Atua] ia Keriso” (Efeso 1:10). Na aoao atu Paulo e mafai ona tatou iloa le Tama Faalelagi ma Iesu Keriso e ala i faaaliga.
Efeso 1:1–8
Ua aoao e Paulo le Au Paia e faapea, sa muai faauuina i latou e maua le talalelei
Mafaufau i se taimi o lou olaga sa e ioe ai e talia se tiutetauave faapitoa. Ina ua faasolo luitauina le galuega, sa faapefea ona lagolagoina oe e ala i le iloa sa e malie i le tofiga ma sa faatuatuaina oe e se tasi e te faataunuuina? Na faapefea ona faamanuiaina pe tauia oe ona o le faataunuuina o lou tiutetauave?
Sa faanofo vaavaaia le Aposetolo o Paulo i Roma.
I le tusi lenei sa saili ai le Aposetolo o Paulo e faamalosi atu ia i latou o e sa avea ma tagata o le Ekalesia ma fesoasoani i tagata fou liliu mai ia tuputupu ae i lo latou malamalama faaleagaga ma tumau faamaoni i a latou feagaiga.
Faitau le Efeso 1:3–8, ma vaavaai mo upumoni na aoao atu e Paulo i le Au Paia ia fesoasoani ia i latou ia tumau faamaoni i a latou feagaiga.
-
Tali fesili nei i lau api talaaga mo le suesueina o tusitusiga paia:
-
O a ni aoaoga faavae autu se lua pe tolu o le a e aoao atu e fesoasoani ai i se tagata o le Ekalesia ia tumau faamaoni i ana feagaiga ma tumau i le toaga i le Ekalesia?
-
E mafai faapefea e le malamalama i na upumoni ona fesoasoani i se tasi ia filifili e tumau faamaoni?
-
O le fuaitau “a o lei faavaeina le lalolagi” i le Efeso 1:4 e faatatau i le muai olaga, ae o le fuaitau “ia avea ma tamafai mana ona o Iesu Keriso” ae o le upu tofia [i tatou] anamua i le Efeso 1:5 e faatatau ia i latou o e sa filifilia pe muai faauuina ina ia maua le talalelei i le olaga lenei. O se upumoni e tasi ua tatou aoao mai nei fuaiupu o le, sa muai faauuina le fanau a le Atua e maua faamanuiaga o le talalelei. O le mauaina o nei faamanuiaga e faalagolago i luga o lo latou faamaoni i lenei olaga.
Ao e faitau i le faamatalaga lenei mai le Faamaoni i le Faatuatua, mafaufau i le auala e fesoasoani ai le malamalama i le aoaoga faavae o le muai faauuina i se tasi e filifili ia tumau faamaoni i ana feagaiga ma malosi i le Ekalesia:
“I le muai olaga o agaga, sa tofia ai e le Atua ni agaga e faataunuuina ni misiona patino i le taimi e soifua ai i le olaga nei. O lenei mea ua taua o le muai faauuina.
“O le muai faauuina e le faapea ua mautinoa ai o ia tagata o le a maua ni valaauga po o ni tiutetauave faapitoa. O nei avanoa e oo mai i lenei olaga o se taunuuga o le faaaogaina ma le amiotonu o le saolotoga, e pei lava o le oo mai o le muai faauuina o se taunuuga o le amiotonu i le muai olaga. …
“O le aoaoga faavae o le muai faauuina e faatatau i tagata uma o le Ekalesia, e le na o le Faaola, ma Ana perofeta. Ao lei foafoaina le lalolagi, sa tuuina atu ni tiutetauave faapitoa i ni tamaitai faamaoni ma sa muai faauuina foi ni alii i ni tiute faapitoa o le Perisitua. E ui lava e te le o manatuaina lena taimi, ae e mautinoa lava na e malie atoatoa e faataunuuina feau faapitoa i le galuega a lou Tama. A e faailoa atu lou lava agavaa, o le a tuuina atu ia te oe avanoa e faataunuuina ai tofiga na e mauaina i lea taimi” (Faamaoni i le Faatuatua: O Se Tusitaiala o le Talalelei [2004], 181).
E mafai faapefea ona fesoasoani le malamalama sa muai faauuina i tatou ia maua le talalelei ma le tele o ona faamanuiaga ina ia mafai ona ausia galuega iinei i le olaga faitino, ia tatou tumau faamaoni ai i a tatou feagaiga?
Efeso 1:9–12
Ua talanoa atu Paulo i le tisipenisione o le atoaga o taimi
Sue le uiga o le tisipenisione i le vaega o Aoaoga Faavae Autu i le amataga o le tusi lesona lenei po o le Bible Dictionary. Faitau ia parakalafa o loo faamalamalama mai ai po o le a le tisipenisione. Ao e faitau, vaavaai po o le fea le tisipenisione o loo tatou ola ai.
Mai mea sa e faitauina, o anafea na amata ai le tisipenisione o loo tatou ola ai?
Faitau le Efeso 1:9–10, ma vaavaai mo le mea na tusia e paulo o le a tupu i la tatou tisipenisione, o le “faaatoaga o tausaga.” (O le fuaitau “mea lilo sa i lona finagalo” e faatatau i fuafuaga ma faamoemoega a le Atua.)
Ina ua tusia e Paulo e faapea “[o mea uma] ia Keriso,” i le lagi ma le lalolagi, o le a “faaopoopoina” (Efeso 1:10), sa ia faatatau i le Toefuataiga ma le aumaia faatasi o ki, mana, folafolaga uma ua faaalia mai e le Atua i Lana fanau talu mai le amataga o le lalolagi, faapea ma isi malamalamaaga e lei faaalia muamua mai lava (tagai MF&F 128:18).
Mai le Efeso 1:10, ua tatou aoao ai le upumoni lenei: I le taimi o le tisipenisione o le atoaga o taimi, o le a toefuataiina mai ai mea uma mai tisipenisione sa i ai muamua.
Na faamalamalama mai e Elder B. H. Roberts o le Fitugafulu le ala e fesootai ai tisipenisione taitasi ua mavae i le tisipenisione o le atoaga o taimi: “O le tisipenisione lenei o le atoaga o taimi, ma ua tatou vaaia le taufetuli atu i ai, e pei o le tatafe atu o auvai malolosi i le vasa, o tisipenisione uma sa i ai muamua, ua tatou fesootai atu ia i latou, ua fesootai mai i latou ia i tatou; ma ua tatou vaaia ai ua i ai le faamoemoega tele e tasi o le Atua mai lava i le amataga, ma o lena mea o le faaolataga o Lana fanau. Ma o lenei la ua oo mai aso mulimuli, le tisipenisione faaiu, lea e ao ai ona lolo le lalolagi i le upumoni ma le malamalama ma le amiotonu” (i le Conference Report, Oct. 1904, 73).
-
-
-
Tali fesili nei i lau api talaaga mo le suesueina o tusitusiga paia: E faapefea ona avea le ola ai i le tisipenisione o le atoaga o taimi o se faamanuiaga ia te oe? O a ni punaoa i lo tatou tisipenisione e mafai ai ona faalolovaia le lalolagi i le upumoni ma le malamalama o le talalelei?
-
I se uepisaite o faasalalauga faaagafesootai e mafai ai ona e faaaogaina le, tuu ai i luga se faamalamalamaga o tisipenisione ma le mafuaaga e te faafetai ai i le ola i lenei tisipenisione. A uma, tusi i lau api talaaga mo le suesueina o tusitusiga paia ou lagona e uiga i le tuuina i luga o lau savali.
-
Na saunoa mai Elder David A. Bednar o le Korama a Aposetolo e Toasefululua e faapea: “Ou uso e ma tuafafine peleina, o mea ua ausia o le taimi nei i lenei tisipenisione i le fesootai atu o savali o le talalelei e ala i faasalalauga faaleagafesootai o se amataga lelei—ae ua na o se faatulutulu laitiiti. Ou te tuuina atu nei ia te outou le valaaulia e fesoasoani ina ia suia le faatulutulu i se lolovai. … Ou te uunaia outou ia faatafea le lalolagi i savali e tutumu i le amiotonu ma le upumoni—o savali e moni, faagaeetia, ma tauleleia—ma faatafea moni ai le lalolagi i se lolo” (“To Sweep the Earth as with a Flood” [Brigham Young University Campus Education Week devotional, Aug. 19, 2014], LDS.org).
O le a se mea o e faia e fesoasoani ai e faalolovaia le lalolagi i savali e tutumu i le amiotonu ma le upumoni? Mafaufau pe mafai faapefea ona e faasoa atu upumoni anoa ua toe fuataiina mai i lenei tisipenisione ia i latou e latalata atu ia te oe ma i latou e mamao mea e nonofo ai.
I le Efeso 1:11–12 na aoao mai ai Paulo, na ala mai ia Iesu Keriso ona maua e le Au Paia se tofi i le malo o le Atua.
Efeso 1:13–23
Ua aoao mai Paulo e uiga i le Agaga Paia o le Folafolaga
Faitau le Efeso 1:13–14, ma vaavaai mo se faamanuiaga na maua e le Au Paia ona o lo latou faamaoni ma lo latou faalagolago ma talitonu ia Iesu Keriso.
O le “faamauina [e ala i le] Agaga paia o le folafolaga” o lona uiga, o le Agaga Paia e “molimau atu i le Tamā sauniga e faaolaina ai ua saʼo ona faia ma feagaiga e o faatasi ma ia sauniga ua tausia” (Taiala i Tusitusiga Paia, “Agaga Paia o le Folafolaga,”scriptures.lds.org). O le fuaitau “o le faamaoni o ia o lo tatou tofi” i le Efeso 1:14 ua faaalia ai, pe a faamauina le Au Paia e ala i le Agaga Paia o Folafolaga, o le a latou maua le faamautinoaga paitno o le a iu ina latou mautofi i le malo selesitila. (Mo nisi faamatalaga i le valaauina ma le filifiliaina, faitau le 2 Peteru 1 ma le faamatalaga na tuuina mai mo lena mataupu i le lesona Iunite 30: Aso 1.)
E pei ona tusia i le Efeso 1:15–16, na tau atu e Paulo i le Au Paia, e faaauau pea ona ia faafetai i le Atua ona o lo latou faamaoni. Faitau le Efeso 1:17–18, ma vaavaai mo le mea na tatalo Paulo ia tuuina atu e le Atua i le Au Paia.
Mafaufau i mea ua aoao mai e nei fuaiupu ia i tatou e uiga i auala e mafai ona tatou iloa ai le Tama Faalelagi.
O se tasi o upumoni e mafai ona tatou iloa i nei fuaiupu o le, e mafai ona tatou iloa le Tama Faalelagi e ala i le agaga o faaaliga.
Ao e faitau i le saunoaga lenei a Elder David A. Bednar, faailoga mea na ia aoao mai e uiga i le agaga o faaaliga:
“O faaaliga o se fesootaiga mai le Atua i Ana fanau i le lalolagi, ma o se tasi o faamanuiaga sili e vaavaalua ma le meaalofa ma le mafutaga faifai pea ma le Agaga Paia. Sa aoao mai e le Perofeta o Iosefa Samita, ‘O le Agaga Paia o se fai faaaliga,’ ma ‘e leai se tagata e mafai ona maua le Agaga Paia e aunoa ma le maua o faaaliga’ (Aoaoga a Peresitene o le Ekalesia: Iosefa Samita [2007], 140).
“E avanoa le agaga o faaaliga mo tagata uma o ē mauaina e ala i le pule e tatau ai o le perisitua ia sauniga faaola o le papatisoga, i le faatofuina mo le faamagaloina o agasala ma le faaee atu o lima mo le meaalofa o le Agaga Paia—ma o lē foi o loo galue i le faatuatua e faataunuu le poloaiga faaleperisitua ia ‘talia le Agaga Paia.’ O lenei faamanuiaga e le o faatapulaaina i taitai pulefaamalumalu o le Ekalesia; ae, e tatau ona i ai i olaga o alii, tamaitai, ma tamaiti uma o ē ausia le tausaga e tatau ai ma ulu atu ai i feagaiga paia. O le naunautai faamaoni ma le agavaa e valaaulia ai le agaga o faaaliga i o tatou olaga” (“O le Agaga o Faaaliga,” Ensign po o le Liahona, Me 2011, 87).
Mafaufau e uiga i auala e mafai ai e faaaliga e ala mai i le Agaga Paia ona fesoasoani tatou te iloa ai le Tama Faalelagi.
-
O le ola agavaa i le mafutaga a le Agaga Paia e mafai ona fesoasoani e te iloa lelei ai le Tama Faalelagi.
I le Efeso 1:19–23 sa faaauau ona aoao mai Paulo e uiga i le tofi o le Au Paia ma le tulaga o Iesu Keriso o le faaao o Lana Ekalesia.
-
Ua ou suesueina le Efeso 1 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lou faiaoga: