Sa faamamafa mai e Peresitene Boyd K. Packer o le Korama a Aposetolo e Toasefululua le taua o se vaaiga aoao puupuu o le ata o le faaolataga i le amataga o tausaga taitasi o le seminare:
Ata
Peresitene Boyd K. Packer
“O se aotelega puupuu o le ‘fuafuaga o le fiafia’ … , afai e tuuina atu i le amataga lava ma toe foi faafia i ai, o le a taua tele i tagata o lau vasega. …
“E mafaufau tagata talavou pe ‘aisea?’— Aisea ua poloaiina ai i tatou e fai nisi o mea, ae aisea ua poloaiina ai i tatou e aua le faia isi mea? O se malamalama i le ata o le faaolataga, e tusa lava po o se tulaga otooto, e mafai ona tuuina atu ai i mafaufau talavou se ‘aisea’“ (“O Le Fuafuaga Sili o le Fiafia,” i le Aoaoina o le Seminare: Preservice Readings [Church Educational System manual, 2004], 69–70, LDS.org; see Alma 12:32).
O lenei lesona ua aumaia ai se vaaiga aoao puupuu o le ata o le faaolataga ma taulai atu i le matafaioi tutotonu a Iesu Keriso ma Lana Togiola i lena fuafuaga.
O Le Matafaioi a Iesu Keriso i le Muai Olaga
E faapefea ona e tali atu i se tasi e fesili mai ia te oe pe aisea e taua ai Iesu ia te oe?
I le lesona i le aso o le a outou aoao ai e uiga i le matafaioi a Iesu Keriso i le fuafuaga o le faaolataga a le Tama Faalelagi. A o e suesue, vaavaai mo upumoni e mafai ona fesoasoani e faamalosia ai lou faatuatua ia Iesu Keriso.
Tusi le siata lenei i lau api talaaga mo le suesueina o tusitusiga paia. O le a e tusitusia aoaoga faavae i lau siata a o e suesue i lenei lesona.
O Iesu Keriso o le Totonugalemu o Le Ata o le Faaolataga a le Tama Faalelagi
Muai Olaga
Olaga Faaletino
Pe a Mavae le Olaga Nei
O le fuafuaga a le Tama Faalelagi mo lo tatou faaolataga e aofia ai vaega taua e tolu: o lo tatou muai olaga, lea e muamua i lo tatou fananau mai i le tino; o lo tatou olaga i le tino; ma le ola pe a mavae le oti
Faitau le faamatalaga lea ma maka ia upu po o fasifuaitau o loo faamatala ai ia tuaoi sa tatou feagai i le muai olaga:
“Sa tatou ola o ni fanau agaga a lo tatou Tama i le Lagi ae tatou te lei fananau mai i lenei lalolagi [tagai Galuega 17:28–29; Aperaamo 3:22–26]. Peitai, sa le pei i tatou o lo tatou Tama Faalelagi, ma e le mafai lava ona avea e faapei o Ia ma olioli i faamanuiaga uma o loo Ia olioli ai e aunoa ma le aafiaga o le ola ai i le olaga nei ma se tino faitino.
“O le faamoemoega atoa o le Atua—Lana galuega ma Lona mamalu—o le fai ia mafai e i tatou taitoatasi ona olioli i Ana faamanuiaga uma [tagai Mose 1:39]. Sa Ia saunia se fuafuaga atoatoa e faataunuu ai Lona faamoemoega. Sa tatou malamalama ma talia lenei fuafuaga a e tatou te lei o mai i le lalolagi. …
“Ina ia mafai ona alualu i luma ma avea e faapei o le Atua, e tatau ona maua e i tatou taitoatasi se tino ma ia tofotofoina i se taimi o le olaga faataitai i le lalolagi” (Talai La’u Talalelei: O Se Taiala i le Galuega Faafaifeautalai (2004), 48–49).
Ina ua tuuina mai e le Tama Faalelagi Lana fuafuaga o le fiafia, sa tatou aoaoina ai o le a moomia se faaola e faatinoina lea fuafuaga. Sa foua e Lusifelo, se tasi o fanau agaga a le Tama Faalelagi le fuafuaga a le Tama Faalelagi. Na oo ina iloa o ia o Satani.
Faitau le Mose 4:1–3, ma vaavaai mo mea na manao ai Satani mai le Tama Faalelagi.
O le a le mea na manao ai Satani mai le Tama Faalelagi?
I le Mose 4:2 ua tatou aoao ai faapea o Iesu Keriso o Ia lea na filifilia mai le amataga e faia le finagalo o le Tama Faalelagi. I luga o lau siata, i le koluma o le “Muai Olaga”, tusi ai le aoaoga faavae lenei na tatou aoao mai lenei fuaitau: Na filifilia Iesu Keriso i le muai olaga e avea ma Togiola o tagata.
Ina ua uma ona filifilia Iesu Keriso e faatinoa le fuafuaga o le faaolataga a le Tama Faalelagi, sa manaomia ona foafoaina se lalolagi lea e mafai ai ona maua ni o tatou tino faitino ma maua ai le poto masani.
Faitau le Eperu 1:1–2, ma vaavaai mo le matafaioi a Iesu Keriso i le foafoaga o le lalolagi.
Mai nei fuaiupu ua tatou aoao ai le aoaoga faavae lenei: I lalo o le taitaiga a le Tama Faalelagi, sa foafoaina ai e Iesu Keriso lenei lalolagi. Tusi le aoaoga faavae lenei i le koluma o le “Muai Olaga” i luga o lau siata i lau api talaaga mo le suesueina o tusitusiga paia.
Ata
vaituloto i le mauga
Mafaufau i le matagofie o le lalolagi ma taimi ma nofoaga e te matua talisapaiaina. I lau api talaaga mo le suesueina o tusitusiga paia, tali i le mea lea:
Faamatala se taimi na e talisapaia ai le matagofie o le lalolagi.
E faapefea e le iloaina o Iesu Keriso na foafoaina le lalolagi ona aafia ai ou lagona e uiga ia te Ia?
O Le Matafaioi a Iesu Keriso i le Olaga Faitino
A mavae ona o mai i le lalolagi ma maua ai se tino faitino, tatou te oo i isi mea e taofia ai i tatou mai le avea e faapei o le Tama Faalelagi ma toe foi atu i Lona afioaga. O le lua o na mea o le oti faaletino ma le oti faaleagaga. O le oti faaletino o le tuueseeseina lea o o tatou tino ma o tatou agaga, a o le oti faaleagaga o le tuueseeseina lea mai le Atua. Faitau le faamatalaga lea, ma maka ia upu po o fasifuaitau o loo faamatala mai ai nei mea faalavefau e lua tatou te feagai i lo tatou olaga faitino:
“I le olaga faitino tatou te ola i se tulaga e tatau ai ona tatou oti i le tino ma le agaga. O loo i ai i le Atua se tino mamalu atoatoa o aano ma ivi. Ina ia avea e faapei o le Atua ma toe foi atu i Lona afioaga, e tatau foi ia i tatou ona i ai se tino atoatoa, ola pea o aano ma ivi. Peitai, ona o le Pau o Atamu ma Eva, o lea ua tofu ai tagata uma o i le lalolagi ma se tino e le atoatoa, i le tino ma o le a iu ina oti. Pe ana leai le Faaola o Iesu Keriso, semanu e faamuta e le oti le faamoemoe uma mo se ola i le lumanai faatasi ma le Tama Faalelagi.
“Faatasi ai ma le oti faaletino, o le agasala o se mea faalavefau autu lea e taofia ai i tatou mai le avea ai e faapei o lo tatou Tama i le Lagi ma toe foi atu i Lona afioaga. I lo tatou tulaga faaletino e tele ina tatou gauai atu i tofotofoga, solia poloaiga a le Atua, ma agasala. … E ui o nisi taimi e foliga mai, o le agasala e taitai atu ai pea lava i le le fiafia. O le agasala e afua ai lagona o le tausalaina ma le maasiasi. Ona o a tatou agasala, e le mafai ai ona tatou toe foi atu e ola faatasi ma le Tama Faalelagi sei vagana ai ua muamua faamagaloina i tatou ma faamama.
“… O le oti faaletino, e le mafai ona tatou faatoilaloina aafiaga o le agasala e i tatou lava. E leai so tatou faamoemoe e aunoa ma le Togiola a Iesu Keriso” (Talai La’u Talalelei, 50).
A o lei soifua mai Iesu i le lalolagi, ina ua iloa e Iosefa ua to Maria, sa asiasi atu se agelu ia te ia i se miti. Faitau le Mataio 1:21, ma vaavaai po o le a le mea na ta’u atu e le agelu ia Iosefa.
Mai le mea na ta’u atu e le agelu o le a faia e Iesu, ua tatou aoao ai Na afio mai Iesu Keriso e laveai i tatou mai a tatou agasala. Tusi le aoaoga faavae lea i le koluma o le “Olaga Faitino” i luga o lau siata.
E mafai ona laveaiina i tatou mai a tatou agasala ona o le Togiola a Iesu Keriso. O le Togiola e aofia ai le puapuagatia o Iesu Keriso, maliu, ma le Toetu.
Ata
O Keriso i Ketesemane, Faasatauroga, Keriso toetu
O Le Togiola a Iesu Keriso
Tali fesili nei i lau api talaaga mo le suesueina o tusitusiga paia:
O le a le mea e tatau ona tatou faia ina ia faaolaina ai mai a tatou agasala e ala i le Togiola a Iesu Keriso?
E tusa ai ma le Galuega 2:32, o le a se isi mea e tatau ona tatou faia?
O Le Matafaioi a Iesu Keriso i le Olaga Pe a Mavae le Oti
Pe i ai se tasi o le aiga pele po o se uo ua maliu?
Ona o lo tatou malamalama i le fuafuaga a le Tama Faalelagi o le faaolataga, ua tatou iloa a oti, e ulu atu agaga o tagata uma i le lalolagi o agaga.
Faitau le 1 Peteru 3:18–20 ma le 1 Peteru 4:6, ma vaavaai po o le a le mea na faia loa lava e Iesu ina ua tuanai Lona maliu.
Faitau le Mataupu Faavae ma Feagaiga 138:18–19, 30–32, ma vaavaai po o le a le mea na faia e Iesu ina ia mafai ai ona folafola atu le talalelei i tagata uma i le lalolagi o agaga. O le (Mataupu Faavae ma Feagaiga 138 o se faaaliga lea e uiga i le lalolagi o agaga na maua e Peresitene Iosefa F. Samita a o manatunatu loloto i le asiasiga a le Faaola i agaga o tagata oti a o i ai Lona tino i le tuugamau.)
Otooto mea na faia e Iesu ia mafai ai ona talai atu le talalelei i tagata uma i le lalolagi o agaga:
Na toetu mai le Faaola i le aso lona tolu ina ua mavae Lona maliu (tagai 1 Korinito 15:4). A toetu se tagata, e toe tuufaatasia lona agaga ma le tino faitino, e le toe tuueseesea lava (tagai MF&F 138:17).
Ata
O Iesu Keriso ma Maria
O le Alii toetu
Faitau le 1 Korinito 15:20–22, ma vaavaai pe faapefea ona aafia i tatou taitoatasi i le Toetu o Keriso.
I luga o lau siata, i le koluma o le “Olaga Pe a Mavae le Oti”, tusi ai le aoaoga faavae lea: Ona o le Toetu o Iesu Keriso, o le a toetutu tagata uma.
Faitau le Faaaliga 20:12, ma vaavaai po o le a le mea o le a tupu ia i tatou taitoatasi pe a tatou toetutu.
O le tusi o le ola e mafai ona faatusa i mafaufauga o se tagata ma faatinoga i lenei olaga, faapea foi le faamaumauga na tausia i le lagi o le amiotonu (tagai Bible Dictionary, “Tusi o le Ola”). E faamasinoina i tatou e le gata e tusa ai ma a tatou galuega ae faapea foi mafaufauga, upu, ma manaoga (tagai Mosaea 4:30; Alema 12:14; MF&F 137:9).
Faitau le Ioane 5:22, ma vaavaai po o ai o le a faamasinoina i tatou. Atonu e te manao e tusi le Ioane 5:22 i lau tusi paia i autafa o le Faaaliga 20:12.)
I luga o lau siata i le koluma o le “Olaga Pe a Mavae le Oti”, tusi ai le aoaoga faavae lea: O Iesu Keriso o le a faamasinoina tagata uma.
O le faamoemoega taualuga lava o le fuafuaga a le Tama Faalelagi o le tuuina mai lea i Ana fanau uma o se avanoa e maua ai le ola e faavaau, po o le faaeaga, o lona uiga ia avea e faapei o le Tama Faalelagi ma ola faatasi ma Ia e faavavau i aiga e faavavau. Mafaufau i lou aiga o i ai i le taimi nei ma le aiga ua e faamoemoe i ai i se aso.
I lau api talaaga mo le suesueina o tusitusiga paia, tusi ai pe aisea e taua ai mo oe le mafai ona ola faatasi ma le Tama Faalelagi ma tagata o lou aiga e faavavau.
Faitau le Ioane 3:5, 16–17, ma vaavaai mo mea e tatau ia i tatou taitoatasi ona faia ia maua ai le ola e faavavau.
Ina ia talitonu i le Alo Pele e Toatasi o lona uiga o le faatino lea o le faatuatua ia Iesu Keriso ma ola e tusa ai ma Lana talalelei.
I luga o lau siata, i le koluma o le “Olaga Pe a Mavae le Oti”, tusi ai le mataupu faavae lea: Afai tatou te faatinoina lo tatou faatuatua ia Iesu Keriso ma ola e tusa ai ma Lana talalelei, ona mafai lea ona tatou maua le ola e faavavau.
Toe manatunatu i le fesili na tuu mai i le amataga o le lesona: “E faapefea ona e tali atu pe a fesili se tasi ia te oe pe aisea e taua ai Iesu Keriso ia te oe?” I totonu o lau api talaaga mo le suesueina o tusitusiga paia, tusi ai lau tali i le fesili lea e fua i mea sa e aoaoina ma lagonaina i lau suesuega i le aso.
Fuafua e faaaoga le siata na e amataina i lau api talaaga mo le suesueina o tusitusiga paia e aoao ai lou aiga po isi e uiga i le matafaioi a Iesu Keriso i le fuafuaga a le Tama Faalelagi o le faaolataga.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia
Ua ou suesueina le lesona “O Le Ata o le Faaolataga” ma faamaeaina i le (aso).
O fesili, mafaufauga, ma manatunatuga faaopoopo ou te fia faasoa atu i lou faiaoga: