2 Korinito 4–7

Folasaga

Na aoao atu e le Aposetolo o Paulo e faapea o tofotofoga ma mafatiaga o lenei olaga e mo na o se taimi ma e laiti pe a faatusatusa i faamanuiaga o le faavavau. Na ia aoao atu foi i le Au Paia o le Ekalesia i Korinito e uiga i le Faamasinoga ma sa molimau atu o Iesu Keriso ua mafai ai ona tatou toe faalelei ma le Atua. A o faaauau pea ona puipuia e Paulo lana amio o se auauna a le Atua, sa ia fautuaina le Au Paia e tuueseese i latou lava mai amioletonu uma ma olioli ina ua latou iloa le tiga faaleatua ma salamo.

2 Korinito 4

Ua molimau atu Paulo e ui ina feagai o ia ma mafatiaga ae e le fefe lava pe popole.

Ata

tagata o loo tuleia se isi tagata

O le a se mea o faaali mai i lea ata? Mata o a ni mafaufauga o le tagata lea e tulei e uiga i le tagata o loo tuleia o ia?

O le fatuga lautele o lenei ata o loo faaalia ai o loo tulei ese e le tagata le isi tagata mai le mea o loo agai mai ai se taavale.

Ata

o le tagata o loo tulei eseina se isi tagata mai le auala o loo sau ai se taavale

E faapefea i le vaai atu i le tulaga i se talaaga e tele atu, po o se vaaiga, ona suia ai lau faamasinoga e uiga i le mea o faaalia i le ata muamua?

E pei ona tusia i le 2 Korinito 4, na tusia e le Aposetolo o Paulo i le Au Paia i Korinito e fesoasoani ia i latou ia vaai atu i le talaaga e tele atu o o latou puapuaga. A o e suesue i lenei mataupu, mafaufau pe mafai faapefea ona e faaaogaina le mea na aoao atu e Paulo i le Au Paia e uiga i puapuaga.

I le2 Korinito 4:1–7ua tatou faitau ai le ala na faamautinoa atu ai e Paulo i le Au Paia sa ia folafola atu ma le faamaoni le talalelei ia i latou. Na ia aoao atu o Satani, “o le atua o le lalolagi lenei” 2 Korinito 4:4, e galue e taofia tagata mai le taliaina o le talalelei. Sa faatusatusa e Paulo o ia lava ma ona uso a auauna i ipu omea o loo i ai le “oa” o “le malamalama ia iloa ai le mamalu o le Atua” (2 Korinito 4:6–7).

Faitau le2 Korinito 4:8–9, ma vaavaai pe na faapefea ona faamatala e Paulo ia luitau o lana galuega faafaifeautalai.

Aisea e te manatu na mafai e Paulo ona tausisia se uiga lelei a o feagai o ia ma nei luitau?

Pei ona tusia i le 2 Korinito 4:11–14, na aoao atu e Paulo e ui ina oti nisi mo le talalelei a Iesu Keriso, ae o lo latou oti e mo na o sina taimi.

Faitau le 2 Korinito 4:14–16, ma vaavaai mo mea na iloa e Paulo sa fesoasoani ia ia e faafetaiaia ai tofotofoga ma sauaga.

O le fasifuaitau “aua e ui lava ina tauau ina uma lo matou tagata i fafo, ua faafouina le i totonu i lea aso ma lea aso” (2 Korinito 4:16) o lona uiga e ui ina o le a oti faaletino ia Paulo ma ana soa, ae o o latou agaga sa faamalolosia i aso taitasi.

Faitau le 2 Korinito 4:17–18, ma vaavaai mo upumoni na aoao atu e Paulo i le Au Paia e uiga i tofotofoga ma mafatiaga.

O le upumoni e tasi e mafai ona tatou aoao mai nei fuaiupu o le o o tatou tofotofoga ma mafatiaga i lenei olaga e laiti pe a faatusatusa i faamanuiaga e faavavau ma le tuputupu ae e oo mai a o tatou onosaia ma le faamaoni.

Tali fesili nei i lau api talaaga mo le suesueina o tusitusiga paia:
1. Aisea e taua ai le vaai atu i o tatou mafatiaga i le talaaga e tele atu o le fuafuaga a le Tama Faalelagi?
2. O anafea na e vaaia ai se tasi o tumau malosi i le taimi o tofotofoga ona sa ia vaai i ona mafatiaga i le talaaga e tele atu o le fuafuaga a le Tama Faalelagi?

2 Korinito 5

Ua aoao atu Paulo i le Au Paia e uiga i le Faamasinoga ma le Togiola a Iesu Keriso

Gaulua se fasi pepa. Tatala le pepa. Tusi lou igoa i le tasi afa o le pepa, ona tusi lea o le Tama Faalelagii le isi afa. Ina ua tatou o mai i le lalolagi, sa tatou tuua le afioaga o le Tama Faalelagi. Saelua le pepa, ma tuu eseese ia afa e lua. Mafaufau pe mafai faapefea ona faatusa le pepa ua saelua i le mea na tupu ina ua tatou tuua le afioaga o le Tama Faalelagi ae o mai i le lalolagi ia maua le poto masani i le olaga. I le 2 Korinito 5tatou te faitau ai i ni upumoni sa faasoa mai e Paulo e mafai ona fesoasoani tatou te malamalama ai i mea e tatau ona tatou faia e toe foi atu ai i le afioaga o le Tama Faalelagi.

Faitau le 2 Korinito 5:6–10, ma vaavaai mo upumoni e mafai ona fesoasoani ia i tatou e tumau ai pea le vaai atu i la tatou sootaga ma le Tama Faalelagi. Atonu e te manao e maka pe tusi i au tusipaia ia mea e te maua.

O upumoni nei e mafai ona tatou aoao mai i nei fuaiupu: Ona ua tuueseeseina i tatou mai le Atua i le olaga nei, e tatau ai ona tatou savavali i le faatuatua ae le o le vaaiga. O le a tofu faamasinoina i tatou e Iesu Keriso e tusa ai ma mea tatou te faia i le olaga nei.

Mafaufau pe o le a le uiga o le “faatuatua ua matou savavali ai, ae le o le tino mai o mea” (2 Korinito 5:7). O se tasi e te iloa e savali i le faatuatua a e le o le vaaiga?

Mafaufau pe o le a se mea e ono mafai ona e faia i lou olaga e galue ai ina ia “taliaina e [le Alii]” (2 Korinito 5:9).

Faitau le 2 Korinito 5:15–16, ma vaavaai mo mea e fai e soo o Iesu ona o le Togiola. Faitau foi le Faaliliuga a Iosefa Samita, 2 Korinito 5:16 (in 2 Korinito 5:16, vaefaamatalaga a). O le fasifuaitau “lua le toe ola i matou i la le tino” o lona uiga ua matou lafoaia se olaga faalelalolagi.

I le afa o le pepa o loo i ai lou igoa, tusi ai mea sa e aoaoina e uiga i le ala e tatau ona ola ai soo o Iesu Keriso.

Faitau le 2 Korinito 5:17–19, ma vaavaai pe mafai faapefea e le Togiola a Iesu Keriso ona fesoasoani tatou te toe foi atu ai i le afioaga o le Tama Faalelagi. Atonu e te manao e maka i au tusi paia mea e te maua.

Tusi le upumoni lea i le afa o le pepa o loo tusia ai le “Tama Faalelagi”: E ala i le Togiola a Iesu Keriso, e mafai ai ona avea i tatou ma tagata fou ma toe faalelei ma le Atua.

O le a sou manatu i le uiga o le avea “o se tagata fou” (2 Korinito 5:17)?

Toe tuufaatasi afa e lua o lau pepa. Ina ia toe faaleleia ma le Atua o lona uiga e ala i le Togiola a Iesu Keriso e mafai ai ona tatou suia ma faamamaina, o lona uiga ua avea ma tagata fou, ina ia mafai ai ona tatou toe foi atu e ola i le afioaga o le Tama Faalelagi.

I le 2 Korinito 5:20–21ua tatou faitau ai sa faasino e Paulo ia te ia lava ma i latou o e sa aoao faatasi ma ia o ni “sui o Keriso,” ma sa ia apoapoai atu i le Au Paia ia toe faalelei ma le Atua.

2 Korinito 6

Ua faamatala e Paulo ia uiga o auauna a le Atua ma fautuaina le Au Paia e o ese mai i e amioleaga

Pe i ai se taimi na tauemuina ai oe pe faitioina ina ua e taumafai e auauna atu pe fesosoani i se tasi? I le 2 Korinito 6:1–13tatou te faitau ai i le ala na fautuaina ai e Paulo le Au Paia ia avea ma auauna a le Atua ma ia onosai ma faaeteete aua le faatausuai, tusa lava pe agaleagaina i latou.

I le 2 Korinito 6:14–18 tatou te aoao ai na aoao atu e Paulo le Au Paia e uiga i faamanuiaga o e tuueseeseina mai o i latou lava mai le amioletonu.

Faamaea le siata lea i le faitauina o le 2 Korinito 6:14–18 ma lisi ia fautuaga a Paulo ma folafolaga e o faatasi:

Fautuaga i le Au Paia	Folafolaga mai le Alii

I le 2 Korinito 6:15 o le upu lotogatasi o lona uiga o le ogatusa, o le upu pelialo o lona uiga o le amioleaga (tagai Bible Dictionary, “Belial”), ma le le talitonue faasino i se e le talitonu po o se e talitonu i atua pepelo. I Kerisiano anamua, o i latou e le o ni Kerisano o i latou ia e le talitonu.

O fasifuaitau “ia outou vavae mai” ma le (“aua tou te papai atu i se mea leaga” fuaiupu 17) o ni lapataiga ia aloese mai e tapuai i tupua ma a latou faiga sese ma faaaogaina foi i o tatou aso. “Sa faatusatusa e Paulo le Au Paia i Korinito i ‘le malumalu o le Atua soifua’ (2 Korinito 6:16). Ona ia fautuaina lea o i latou e aua nei faia ni sootaga ma e tapuai i tupua pe auai foi i ni faiga e ‘le mama’ (tagai Isaia 52:11). Faatasi ai ma nei aoaoga, sa toe faamamafa atu ai e Paulo se folafolaga na faia i le nuu anamua o le Atua—e faapea afai latou te ‘o ese mai’ e amioleaga, o le a afio le Atua ma i latou ma avea ma o latou Atua (2 Korinito 6:17; tagai foi … Ieremia 32:38; ma le Esekielu 11:19–20)” (Tusi lesona a le Tagata Aoga o le Feagaiga Fou [Church Educational System manual, 2014], 402). Sa fautuaina patino e Paulo tagata e aloese mai tapuaiga pepelo uma, o tupua, ma faiga pepelo, e faapei foi ona sa aoaoina i le Feagaiga Tuai ia tagata ia tapuai i le Atua ma avea ma Ona nuu filifilia, ma ia teena isi atua uma.

O se mataupu faavae e mafai ona tatou aoao mai le 2 Korinito 6:14–18 e faapea a tatou vavaeeseina mai i tatou mai faiga pepelo ma mea e le mama, o le a taliaina i tatou e le Alii. (O lenei mataupu faavae e le faapea ia tatou soona faia ma le faasausili i latou o isi faatuatuaga pe mumusu e fegalegaleai ma i latou.)

Tali fesili nei i lau api talaaga mo le suesueina o tusitusiga paia:
1. I o tatou taimi, o le a le uiga mo i tatou o le vavaeese mai faiga pepelo ma mea e le mama? (Tagai i le MF&F 1:15–16.)
2. O anafea na e lagonaina ai le faamanuiaina o oe ona ua e vavaeese mai oe lava mai se tulaga semanu e taitai ese atu ai oe mai le Alii?

2 Korinito 7

Ua olioli Paulo i le salamo moni o le Au Paia

I le 2 Korinito 7na faamatala ai e le Aposetolo o Paulo e faapea a o tauivi o ia ma ana soa faifeautalai i puapuaga matuia i Maketonia, sa aumaia e Tito le tala mai Korinito na faatumuina ai Paulo i le olioli ma le mafanafana. Na auina atu talu ai e Paulo se tusi i Korinito e valaau atu ai i nisi o le Au Paia ina ia salamo, ma sa tau atu e Tito ia te ia e uiga i le tali mai o tagata o le Ekalesia.

Faitau le 2 Korinito 7:8–10, ma vaavaai pe na faapefea ona tali atu le Au Paia i Korinito i le tusi a Paulo.

Aisea na fiafia ai Paulo ina ua lagonaina e le Au Paia le faanoanoa ona o lana tusi?

Mafaufau pe o le faanoanoa e te lagonaina mo au agasala o se tiga faaleatua, lea e “tupu ai le salamo e oo i le olataga,” po o le “tiga faalelalolagi”(2 Korinito 7:10), o lona uiga ua e faanoanoa ona ua maua oe pe ona o lou feagai ma taunuuga o au mea sese ua fai.

Faitau le 2 Korinito 7:11, ma vaavaai mo ituaiga o suiga na faia e le Au Paia i o latou olaga ona o lo latou tiga faaleatua sa fesoasoani ai ia latou salamo.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le 2 Korinito 4–7 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo u faiaoga: