Ioane 9

Folasaga

Sa faamalolo e Iesu se tagata na fanau mai o tauaso. Sa fesiligia e le au Faresaio lenei tagata ma tuliese o ia mai le sunako ona sa musu o ia e tausalaina Iesu ona o le faamalolo i le Sapati. Sa saili e le Faaola le tagata ma fesili atu i ai po o le a le mea ua ia talitonu ai, ma sa ifo atu le tagata ia Iesu o le Alo o le Atua.

Ioane 9:1–7

Ua faamalolo e Iesu se tagata na fanau mai o tauaso

Faailoa mai ni faataitaiga o mafatiaga e feagai ma tagata o vagaia oe po o mea na oo i ai tagata na e vaai i ai i a outou talafou:

O nisi tagata e taumanatunatu pe aisea e faataga ai e le Atua mafatiaga e matua aafia ai o latou olaga. A o e suesueina le Ioane 9:1–5, vaavaai mo se upumoni e mafai ona fesoasoani ia i tatou e malamalama atili ai i se mafuaaga se tasi e faatagaina ai e le Atua mafatiaga e aafia ai o tatou olaga.

A o i ai Iesu i Ierusalema, sa fetaiai o Ia ma se tagata sa feagai ma mafatiaga talu ona fanau mai. Faitau le Ioane 9:1–2, ma vaavaai mo mafatiaga na feagai ma lenei tagata.

O le a le mea na fesili ai le au soo e uiga i le mafuaaga o le mafatiaga o lenei tagata?

E toatele tagata i ona po o le Faaola, sa talitonu faapea o mafatiaga e feagai ma tagata o taunuuga o agasala sa latou faia pe faia foi e o latou matua. Pe e te manatu e sa’o lea talitonuga? Aisea pe aisea foi e leai ai?

Faitau le Ioane 9:3–5, ma vaavaai mo aoaoga a le Faaola i Ona soo e uiga i le tauaso o lenei tagata.

O le a sou manatu o le a le uiga o le “ina ia faaalia ai o galuega a le Atua ia te ia”? (Ioane 9:3).

Mai aoaoga a le Faaola i nei fuaiupu, ua tatou aoao ai e mafai e le Atua ona faaaoga mafatiaga e faaalia ai Ana galuega ma le mana. I se isi faaupuga, e ui atonu e tele mafuaaga o mafatiaga i o tatou olaga, e mafai e le Atua ona faaaoga o tatou luitau e fesoasoani ai e faataunuu Ona faamoemoega amiotonu.

Ina ia malamalama atili i lenei upumoni, faitau le saunoaga lea a Elder Dallin H. Oaks o le Korama a Aposetolo e Toasefululua:

Ata
Elder Dallin H. Oaks

“Na auina mai i tatou iinei ina ia tofotofoina. E tatau ona i ai le faafeagai i mea uma. E tatau ona tatou aoao ma alualu i luma e ala i lena faafeagai, e ala i le faafetaiaia o o tatou luitau faapena ma le aoaoina atu o isi ina ia faia foi faapena. … O le a le gata ina faapaiaina e le Alii o tatou puapuaga mo lo tatou manuia, ae o le a Ia faaaogaina foi e faamanuia ai olaga o le toatele o isi.

“Na aoao atu e Iesu lenei lesona ina ua feiloai o Ia ma Ona soo ma se tagata na fanau mai o tauaso. [Ona sii mai lea e Elder Oaks o le Ioane 9:2–3.]

“Afai tatou te vaai atu i le olaga i se vaaiga faaleagaga, e mafai ona tatou iloaina atu ia faataitaiga o galuega a le Atua o loo faalauteleina mai e ala i faigata e oo i Ana fanau. …

“Afai tatou te malamalama i lenei mataupu faavae, e faapea ua ofoina mai e le Atua ia i tatou ia avanoa mo faamanuiaga ma faamanuiaina i tatou lava e ala i o tatou lava faigata faapea ma faigata o isi, ua tatou malamalama foi i le mafuaaga na Ia poloaiina soo ai i tatou ina ia “faafetai atu i le Alii lou Atua i mea uma’ (D&C 59:7)” (“Ia tuuina atu le Faafetai i mea uma,” Ensign or Liahona, Me 2003, 97–98).

Mafaufau i se mafatiaga na oulua feagai pe o feagai ai i le taimi nei. A o e suesue pea i le Ioane 9, mafaufau i auala e mafai e le Atua ona faaalia ai Ana galuega ma le mana e ala ia te oe ona o lena mafatiaga.

Faitau le Ioane 9:6–7, ma vaavaai mo le auala na faaalia ai e le Atua Ana galuega ma le mana e ala i le aafiaga o le tagata tauaso.

O le a se mea o e vaai faalemafaufau i ai i le tulaga na oo i ai lenei tagata ina ua pupula mo se taimi muamua?

Ioane 9:8–41

Ua sailia e le Faaola le tagata sa Ia faamaloloina ina ua uma ona tuliese e le au Faresaio.

Pei ona tusia i le Ioane 9:8–15, ina ua uma ona faamalolo le tagata tauaso, sa fefinauai nisi pe o le tagata moni lenei sa fanau mai o tauaso. Na tau manatunatu nisi pe na faapefea ona faamaloloina o ia, ma sa latou aumaia o ia i le au Faresaio, o e na amata ona fesiligia o ia.

Saili le Ioane 9:14 mo le aso na faamalolo ai e le Faaola le tagata tauaso.

O le a le tali e te manatu na i ai i le au Faresaio i le faamaloloina e Iesu o le tagata i le Sapati?

Faitau le Ioane 9:16, ma vaavaai po o a faaiuga a le au Faresaio e uiga ia Iesu.

Faitau le Ioane 9:17, ma vaavaai po o le a le faaiuga a le tagata tauaso e uiga ia Iesu.

A o e suesue pea i le Ioane 9, matau le faagasologa o le vaaiga a le tagata tauaso i le Faaola.

O le masalosalo pe na tauaso moni le tagata, o lea na aumai ai e le au Faresaio ona matua e suesueina. I le Ioane 9:19–23 ua tatou aoao ai ina ua fesiligia, sa tautino atu e ona matua o la la’ua tama ma sa fanau mai o tauaso, ae sa la fai atu la te lei iloaina pe na faapefea ona faamaloloina o ia. Ona o le fefefe nei faateaeseina mai le sunako ma le nuu, o lea na la le mananao ai e fai atu la te talitonu o Iesu o le Mesia, o lea sa la fautua atu ai e tuu atu e tautala atu la la’ua tama mo ia lava.

Faitau le Ioane 9:24–27, 30–33, ma vaavaai mo le tali a le tagata i le au Faresaio. Fuafua e maka ia upu na ia faaaogaina e puipuia ai Iesu ma molimau atu ai o Ia ’e mai le Atua” (Ioane 9:33).

Tali fesili nei i lau api talaaga mo le suesueina o tusitusiga paia: O le a le mea e tulagaese mai ia te oe e uiga i tali a lenei tagata?

I le Ioane 9:34 ua tatou aoao ai na tuliese lenei tagata (masalo mai le sunako [tagai Ioane 9:22]) ona o le le fefe e puipuia le Faaola.

“O sunako o nofoaga tutotonu faalelotu ma faaleagafesootai mo nuu Iutaia. O sunako e maua ai aoaoga ma tapuaiga faaleagaga, faapea foi avanoa faaleaoaoga ma faaleagafesootai. Talu ai e taua tele le sunako i tagata Iutaia, a tuliese la mai le sunako … o lona uiga e sili atu ona leaga nai lo le tape o le igoa ma le toe faaaumeaina i faiganuu faalelotu. O lona uiga o le faatea foi mai mataupu faaleaganuu ma faaleagafesootai” (Tusi lesona a le Tagata Aoga mo le Feagaiga Fou [Church Educational System manual, 2014], 230).

Aisea e te manatu ai sa naunau lenei tagata e tumau faamaoni i le mea sa ia iloa e uiga ia Iesu Keriso, e ui o lona uiga o le a tuliese ai mai le sunako?

Ina ua uma ona tuliese le tagata mai le sunako, sa maua o ia e le Faaola ma fesili i ai pe “talitonu i le Alo o le Atua” (Ioane 9:35). Faitau le Ioane 9:36–38, ma vaavaai mo le tali a le tagata.

O lana tautinoga “Le Alii e, ua ou talitonu lava ma le mea moni sa “ia ifo atu ia te ia” (Ioane 9:38) e ta’u mai ai sa matala ona mata faaleagaga ma sa ia iloa Iesu Keriso i Lona faasinomaga, o le Mesia na folafola mai ma o le Alo o le Atua.

Mai lenei tala ua tatou aoao ai faapea a tatou tumau faamaoni i mea ua tatou iloa tusa lava po o a mea faafeagai, o le a faamalolosia a tatou molimau. E oo mai le taimi, o le a atili ona malolosi a tatou molimau.

Tali fesili nei i lau api talaaga mo le suesueina o tusitusiga paia:
1. Aisea e te manatu ai ua faamalolosia a tatou molimau pe a uma ona tatalia o mea faafeagai po o tofotofoga o le faatuatua?
2. Pe ua faamalosia lau molimau a o e onosaia ma le faamaoni mea faafeagai?

Ina ia faailoa mai se isi mataupu faavae mai lenei tala, tapuni ou mata ae faapuiti ia mafai ona na o sina mea itiiti e mafai ona e iloa. Ona pupula faaafa lea. Ona pupula tele lea o ou mata. Matau pe faapefea ona suia lau vaaiga i taimi taitasi.

Manatua na oo ina manino le vaaiga a le tagata tauaso i le taimi na faamalolo ai o ia e Iesu. Faitau le Ioane 9:11, 17, 33, 35–38, ma vaavaai mo fasifuaitau o loo faamatala ai le vaaiga faaleagaga ua matua a le tagata po o le malamalama pe o ai Iesu.

Muamua sa ia faasino ia Iesu o “se tagata e igoa ia Iesu” (Ioane 9:11), ma mulimuli ane sa ia faasino ia te Ia o “se perofeta” (Ioane 9:17) ma sa puipuia o Ia faapea “e mai le Atua” (Ioane 9:33). I le gasologa o taimi na manino atili lana vaaiga faaleagaga seia iu ina ia vaai ia Iesu Keriso o le Mesia na folafola mai ma o le Alo o le Atua.

Aisea e te manatu ai na amata ona manino atili lana vaaiga ma le malamalama i le Faaola? O a ni auala na ia faaaoga ai le faatuatua ia Iesu Keriso i lona aafiaga atoa?

Ata
Peresitene Howard W. Hunter

I le ta’ua ai o le aafiaga o lenei tagata, na aoao mai ai Peresitene Howard W. Hunter: “E lua faapupulaga na tuuina atu—o le tasi e faamalolo ai le po o le vaai [o se aafiaga faaletino mai le fanau mai] ma le tasi e vaai ai i le Tupu o Tupu a o lei afio ae o Ia i Lona nofoalii e faavavau. Sa faapupulaina e Iesu lenei tagata faaletino ma le faaleagaga. Sa ia faapupula atu lona malamalama i se mea pouliuli, ma sa talia e lenei tagata, faapei o le toatele o isi sa i ai i lena aso faapea foi ma o tatou ona po, le malamalama, ma ia vaai ai” (“O Le Atua Fai Vavega,” Ensign, Iulai 1989, 16–17).

Mai lenei tala ua tatou aoao ai faapea a o tatou faaaogaina le faatuatua ia Iesu Keriso, ona atili manino ai lea o la tatou vaaiga ma le malamalama faaleagaga.

Aisea e te manatu ai e taua le faaaoga o le faatuatua ina ia mafai ai ona vaai ma malamalama atili i le upumoni faaleagaga?

Sa i ai nisi o Faresaio sa tutu latalata atu ina ua vaai le tagata ma tapuai atu ia Iesu o le Alo o le Atua. Faitau le Ioane 9:39–41, ma vaavai mo mea na aoao mai e le Faaola e uiga i le tauaso.

I le tali atu i le fesili a le au Faresaio, “Ua matou tauaso ea foi?” (Ioane 9:40), “sa faaaoga e le Faaola se upu valiata, e aoao atu ai o tagata o e sa ‘tauaso’—o i latou sa lei iloa pe o ai o Ia—‘ua leai se agasala’ (Ioane 9:41). I se isi itu, o tagata e mafai ona ’vaai’—o i latou ua lava ni molimau sa maua e faatatau i le Faaola ma Lana misiona paia ma sa tatau ona latou iloa pe o ai o Ia—o le a tali atu mo a latou amioga. O le au Faresaio o nisi o i latou sa mafai ona ’vaai,’ ma o lea sa ’tumau ai la latou agasala.’ I le tulaga faaleagaga, sa latou filifili ia tauaso ona sa latou mumusu e faailoa Iesu o le Alo o le Atua, e ui i le toatele o molimau sa latou maua“ (Tusi lesona a le Tagata Aoga o le Feagaiga Fou, 231).

Tagai i mataupu faavae mulimuli e lua sa e aoaoina i lenei lesona, ma mafaufau pe mafai faapefea ona e faaaogaina i lou olaga. Tusi au sini e faaaoga nei mataupu faavae i lau api talaaga mo le suesueina o tusitusiga paia. Tatalo mo se taitaiga ia ausia au sini.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Ioane 9 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: