Sa faamatala e le Aposetolo o Paulo i le Au Paia i Korinito ia matafaioi a faifeautalai i le fausiaina o le malo o le Atua. Sa ia aoao atu o a latou faapotopotoga o nofoaga ia e mafai ona mau ai le Agaga ma sa uunaia i latou e aua nei mafaufau faapea e sili atu nisi tagata i lo isi. E le gata i lea, sa lapataia e Paulo i latou mai le faatagaina o tagata amioleaga e faatosinaina i latou. Sa ia lapataia foi i latou ia aloese mai filosofia le mama ma faiga o loo tele ina maua i Korinito.
Ua faamatala atu e Paulo ia matafaioi a faifeautalai ma tagata o le Ekalesia i le fausiaina o le malo o le Atua.
Manatu faapea ua lesitala se uo e ave se vasega maotua o le matematika, e pei o le calculus, ae na te lei aveina kosi sauniuni, e pei o numera faavae e tauilo ai fuainumera.
Mafaufau pe o le a le tele o le faamanuiaina o lau uo i le vasega maotua o le matematika. Aisea e taua ai le malamalama i manatu faavae o se mataupu a o lei mafai ona e taulimaina manatu faavae e sili ona maotua?
Faitau le 1 Korinito 3:1–3, ma vaavaai mo le talafaatusa na faaaoga e le Aposetolo o Paulo e faaali ai i le Au Paia i Korinito latou te lei saunia mo upumoni faaopoopo o le talalelei. Atonu e te manao e faailoga le upu suasusu ma le mea aano i le 1 Korinito 3:2.
O le a le mea o fautuaina ai e le fasifuaitau “tama meamea ia Keriso” i le 1 Korinito 3:1e uiga i le matua faaleagaga o le Au Paia i Korinito?
Manatua o le Au Paia i Korinito e lei lotogatasi ma o nisi o i latou sa faaaofia ai talitonuga ma faiga faapaupau (e le faaleatua) i la latou tausiga o le talalelei. Sa latou amata foi ona fevaevaeai i vaega e faavae i faaliliuga eseese o aoaoga faavae a le Ekalesia, ma sa latou lagolagoina o latou manatu e ala i le sii mai o taitai iloga o le Ekalesia (tagai 1 Korinito 1:10–16; 3:4).
Faitau le 1 Korinito 3:5–8, ma vaavaai mo le upu valiata sa faaaoga e Paulo e fesoasoani ai i le Au Paia ia malamalama i matafaioi a faifeautalai sa aumaia le talalelei i Korinito.
I lau api talaaga mo le suesueina o tusitusiga paia, tusi se ata o le upu valiata a Paulo ma tusi ai pe o le a sou manatu o le a le mea sa taumafai ia Paulo e aoao atu i le Au Paia i Korinito i lea upu vali.
Matau i le 1 Korinito 3:6–7 po o ai lea e matuaia ia suiga i loto o tagata e tau atu ai i le liua. E mafai ona tatou aoao mai nei fuaiupu e faapea e ui ina mafai ona tatou fesoasoani i isi e aoao e uiga i le talalelei a Iesu Keriso, o le mana o le Agaga Paia e liua ai tagata.
Mafaufau pe aisea e taua ai mo i tatou ona malamalama o le mana o le Atua, ae le o i tatou, e liua ai.
I le 1 Korinito 3:9–23 tatou te aoao ai sa uunaia e Paulo le Au Paia i Korinito e fausia le faavae o lo latou faatuatua ia Iesu Keriso ma ia tuu atu i le Agaga e mau i le Ekalesia. Sa fautuaina foi e Paulo le Au Paia e aua nei faalagolago i le poto o le lalolagi aua o le “valea” lea(1 Korinito 3:19) pe a faatusatusa i le poto o le Atua.
Ua tau atu e Paulo i le Au Paia i Korinito e aua nei mafaufau faapea e sili atu nisi tagata i lo isi
E faavae i le fautuaga a le Aposetolo o Paulo o loo tusia i le 1 Korinito 4:1–3, e foliga mai o nisi tagata o le Ekalesia i Korinito ua faamasinoina faatinoga a Paulo faapea o se faifeautalai ma se taitai o le Ekalesia. Atonu na latou fesiligia lana faamasinoga pe mafaufau foi e sili atu se mea e faia e se isi tagata.
E pei ona tusia i le 1 Korinito 4:3–5, na aoao atu e Paulo faapea o le Alii o le avea ma ona faamasino ma o le a “faamalamalamaina … mea lilo” ma “faaalia filifiliga o loto” (1 Korinito 4:5). Mai lenei mea e mafai ai ona tatou aoao e ui i faamasinoga a isi o i tatou,o le a le faaituau le faamasinoina o i tatou e le Alii aua Na te silafia mea uma, e aofia ai ma mafaufauga ma faamoemoega o o tatou loto.
I le 1 Korinito 4:6–21 ua tatou aoao ai na tau atu e Paulo i le Au Paia i Korinito ia aua nei fefete loto i se tasi o o latou taitai o le Ekalesia ae faasiasia i le isi. Na ia tau atu foi ia i latou o Aposetolo a Iesu Keriso e valaauina ina ia mafatia ona o le amiolega o le lalolagi. E faamasinoina e le lalolagi ia Aposetolo ma isi taitai o le Ekalesia o “vale” (1 Korinito 4:10) Ona aoao atu ai lea e Paulo o le malo o le Atua e taitai i le mana o le Atua e ala ia i latou o e umia ki o le perisitua.
Ua lapataia e Paulo le Au Paia mai le faaaumeaina o i latou o e filifili ma le loto e fai le agasala
Mafaufau faapea o loo i ai sau pesini o fualaau aina fou ma se fasi fualaau aina pala o i ai.
Ata
pesini mago
O le a le mea e tupu pe afai e te tuu ai pea le fasifualaau aina pala faatasi ma isi fualaau aina i le pesini?
O le a le mea e mafai ona faatusa i ai le fasi fualaau aina pala io tatou olaga?
A o e suesue i le 1 Korinito 5, vaavaai mo upumoni e mafai ona fesoasoani ia te oe e tali lelei atu ai i tosinaga faataumaoi i lou olaga.
Faitau le 1 Korinito 5:1–2, ma vaavaai mo se agasala sa lei faia ai e le Au Paia i Korinito se faaiuga faaleaoaiga.
O le faitaaga e faasino i soo se sootaga feusuai i fafo atu o le faaipoipoga. E foliga mai sa i ai se tagata o le Ekalesia i Korinito sa faia se agasala feusuai ma le ava a lona tama.
O le fasifuaitau “ia tuueseina ia te outou” i le 1 Korinito 5:2o lona uiga e tatau ona tape le igoa o le tagata agasala mai le Ekalesia. E fuafua ma le faaeteete e taitai o le Ekalesia le tele o mea moni a o lei tapeina le igoa pe faia se isi lava aoaiga faale-Ekalesia. E le gata i le fuafua pe o le a le matuia o le solitulafono, ae e fuafua foi e taitai o le Ekalesia ia faamoemoega eseese mo le aoaiga faa le-Ekalesia: e fesoasoani i se tagata ia salamo, ia puipuia i latou o le a le lelei se aafiaga i faatinoga po o talitonuga o se tagata, ma ia puipuia le amiotonu o aoaoga a le Ekalesia (tagai “Aoaiga a le Ekalesia,” mormonnewsroom.org/article/church-discipline).
Faitau le 1 Korinito 5:6–7, ma vaavaai mo le talafaatusa na faaaoga e le Aposetolo o Paulo e faamatala ai pe aisea ua tatau ai ona aveesea le igoa o lenei tagata mai le Ekalesia.
Mea faafefete, po o le fefete, e afua ai ona fefete le falaoa. E afua ai foi ona leaga le falaoa pe legalega. O le potoi o le paluga e faatusa i Le Ekalesia a Iesu Keriso. E faapefea ona e aoteleina le uiga o lenei talafaatusa?
Mai le talafaatusa a Paulo e mafai ona tatou aoao mai ai le upumoni lenei: Afai tatou te filifili e mafuta vavalalata ma i latou e taliaina le agasala, e mafai ona tosina ai i tatou e le amioleaga.
Faitau le 1 Korinito 5:9–11, ma vaavaai mo fautuaga na tuu atu e Paulo i le Au Paia i Korinito e fesoasoani ia latou faaaoga ai le mataupu faavae o loo aoao mai i le fuaiupu 6.
Mafaufau pe faapefea ona fesootai aooaga a Paulo ma le pesini o fualaau aina ma le fasi fualaau aina pala o i ai.
Ata
Elder Neal A. Maxwell
Ina ia malamalama atili i le fautuaga a Paulo e aua nei faaaumea ma le au faitaaga po o isi o e mumusu e salamo mai agasala, faitau le saunoaga lea a Elder Neal A. Maxwell o le Korama a Aposetolo e Toasefululua: “Aua le faaaumea ma le au faitaaga—e le faapea ua lelei tele outou mo i latou ae, e pei ona tusia e [C.S.] Lewis, ona e le o lava lo outou lelei. Manatua o tulaga leaga e mafai ona faavaivaia ai e oo lava i tagata lelei”(“The Stern but Sweet Seventh Commandment,” New Era, June 1979, 42).
Tali le fesili lenei, i lau api talaaga mo le suesueina o tusitusiga paia: O a ni nai faataitaiga o tulaga leaga e mafai ona faavaivaia ai tagata lelei ina ia latou fetuunaia ai o latou tulaga faatonuina ma talia amioga e tumu i le agasala?
E tatau ona tatou saili e fesoasoani ma musuia tagata o loo tauivi ma le agasala e aunoa ma le fetuunaia o o tatou lava tulaga faatonuina. Ia mafaufau ma le agaga tatalo pe o le a le mea e mafai ona outou faatosinaina ai isi i se ala e lelei e aunoa ma le fetuunaia o ou tulaga faatonuina.
I le 1 Korinito 5:12–13ua tatou aoao ai e i ai se tiutetauave o taitai o le Ekalesia e faamasino ai, ma, afai e manaomia, tape igoa o i latou e faia solitulafono matuia.
Ua aoao atu Paulo i le Au Paia e uiga i le lotogatasi ma le tulafono o le legavia.
Sa i ai se uiga na iloga ai Korinito anamua i le ola le mama, ma e toatele tagata Korinito na faalauiloaina le manatu faapea na faia o tatou tino mo le faamalieina. I le 1 Korinito 6:13–17, na aoao atu ai e le Aposetolo o Paulo le Au Paia e faapea o o tatou tino sa faia ina ia faataunuu ai faamoemoega o le Alii, ae le punouai ai i agasala feusuai pe na ona fiafia ai e faamalieina faaletino, e pei o meaai. O i latou o e ua auai i le Ekalesia e tasi ia Keriso o ni “itutino” faaleagaga o Lona tino. O le ola le mama e feteenai ma se sootaga faaleagaga ma Iesu Keriso.
Faitau le 1 Korinito 6:18–20, ma vaavaai mo mea na aoao mai e Paulo e uiga i o tatou tino. (1 Korinito 6:19–20 o se fuaitau o le mau tauloto. Atonu e te manao e faailoga i se auala e iloagofie ai ina ia fesoasoani i lou sueina i le lumanai.)
Faauma galuega atofaina nei i lau api talaaga mo le suesueina o tusitusiga paia:
Aotele le upumoni o loo aoao mai e Paulo i le 1 Korinito 6:19.
Faamatala pe faapefea e le malamalama faapea o o tatou tino o malumalu o le Atua, ona tosina ai le ala tatou te faia ai o tatou tino ma tino o isi.
Na aoao ai e le Aposetolo o Paulo o o tatou tino o malumalu ia o le Atua.
Mafaufau pe mafai faapefea e le malamalama i nei upumoni e uiga i o tatou tino ona fesoasoani ia te oe e tumau ai le mama pe a siosiomia oe e le amioleaga.
Ina ia fesoasoani e tauloto lenei mau tauloto, toe fai ia laina o i lalo, ma ufiufi nisi o upu i se pepa a o amata ona e masani i upu. Faaaauau pea ona faifai pea le fuaitau seia oo ina taulotoina. Ona tauloto lea o le fuaitau i se tagata o le aiga po o se uo ma fai i ai e saini lau api talaaga mo le suesueina o tusitusiga paia.
[19] O le a?
tou te le iloa ea o lo outou tino o le malumalu lea
o le Agaga Paia ua i totonu ia te outou,
o loo ua ia te outou mai le Atua,
e le aia foi outou ia te outou?
[20] Aua ua faatauina outou i le tau:
o lenei,ia outou vivii atu i le Atua i o outou tino,
ma o outou agaga,
o mea a le Atua ia.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le 1 Korinito 3–6 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lou faiaoga: