Iunite 18: Aso 2

Galuega 8

Folasaga

Na afua sauaga e faasaga i le Ekalesia i Ierusalema ona ua faasalalauina ia tagata o le Ekalesia i Iutaia ma Samaria. Na galue Filipo i Samaria, lea sa toatele tagata e taliaina le talalelei a Iesu Keriso. Ina ua uma ona faaee atu e Peteru ma Ioane le meaalofa o le Agaga Paia i tagata fou faatoa liliu mai, sa taumafai se faataulaitu e igoa ia Simona e faatau mai le perisitua. Na taitai mulimuli ane e le Atua ia Filipo i se taitai Aitiope lea sa aoao i ai e Filipo e uiga ia Iesu Keriso ma papatisoina.

I lenei lesona atoa, atonu e te manao e faasino i le Faafanua o le Tusi Paia, nu. 13, “O Malaga Faafaifeautalai a le Aposetolo o Paulo,” ma sue ia aai ma nofoaga eseese e te faitau i ai.

O Mea Faavae o le Aoao Atu ma le Aoaoina Mai o le Talalelei

O lesona taitasi i lenei tusi lesona i le seminare o loo taulai atu i se poloka mau nai lo o se manatu, aoaoga faavae, po o se mataupu faavae patino. O nei lesona ua tuufaatasi ai faavae autu o le talalelei mo le aoao atu ma le aoao mai, ia e aofia ai le malamalama i le matalalaga ma le anotusi o se poloka mau; faailoa, malamalama, ma lagonaina le moni ma le taua o aoaoga faavae ma mataupu faavae o le talalelei; ma le faaaogaina o aoaoga faavae ma mataupu faavae. O le suesue o tusitusiga paia ma nei faamoemoega i le mafaufau e mafai ona fesoasoani e faateleina ai lou malamalama ma le molimau i tusitusiga paia ma upumoni e aoao ai.

Galuega 8:1–25

Ua galue Filipo i Samaria, lea ua taumafai ai Simona le faataulaitu e faatau mai le perisitua

Afai na e mauaina se aofaiga tele o se tupe, o le a se mea o le a e faatauina ai?

E talitonu nisi tagata e mafai ona faatauina soo se mea i tupe. Peitai, o nisi o mea e sili ona taua i le olaga e le mafai ona faatauina. A o e suesueina le Galuega 8, vaavaai mo se meaalofa mai i le Atua e le mafai ona faatauina.

I le Galuega 7 sa e aoaoina ai e uiga i le oti o le soo o Setefano i lima o le au faasaua. Faitau le Galuega 8:1–5, ma vaavaai mo mea na faia e tagata o le Ekalesia ona o se taunuuga o sauaga faasaga i le Ekalesia i Ierusalema. O le upu fetoso i le fuaiupu 3 o lona uiga o le tatoso faamalosi mai.

Matau le igoa Filipo i le fuaiupu 5. O Filipo o se tasi o soo e toafitu na faauuina e fesoasoani i Aposetolo e Toasefululua e auauna atu i manaoga o tagata o le Ekalesia (tagai Galuega 6:5).

Tagai i le kalafi o le “Vaaiga Aoao i Galuega a Aposetolo” i le Iunite 17: Aso 1 lesona, ma faitau le poloaiga a le Faaola i Ana Aposetolo o loo tusia i le Galuega 1:8. E tusa ai ma le Galuega 8:5, na faapefea ona fesoasoani Filipo e faataunuu lenei poloaiga?

Faitau le Galuega 8:6–8, ma vaavaai pe na faapefea ona tali atu Samaria i le talaiga ma vavega na faia e Filipo?

Faitau le Galuega 8:9–11, ma matau pe na faapefea ona faamatalaina ia Simona, o se tagata o le aai.

O le a le faatosinaga o Simona i tagata?

Sa faamatala e Elder Bruce R. McConkie o le Korama a Aposetolo e Toasefululua le faataulaitu o le “faaaogaina o le mana e maua mai i le fesoasoani po o le faafoega a agaga leaga” (Mormon Doctrine, 2nd ed. [1966], 747).

O le upu ofo, e pei ona faaaoga i le Galuega 8:11, o lona uiga ua maofa.

Faitau le Galuega 8:12–13, ma vaavaai pe na faapefea ona tali atu Simona i le talaiga a Filipo.

E tusa ai ma le fuaiupu 13, na faapefea ona aafia Simona i “vavega ma faailoga” sa ia vaai i ai?

I le Galuega 8:14–16 ua tatou aoao ai na o mai Peteru ma Ioane i Samaria ina ua faalogo ua talia e tagata iina le afioga a le Atua. Sa tatalo i laua ia talia e tagata Samaria ua liliu mai le meaalofa o le Agaga Paia.

Faitau le Galuega 8:17, ma vaavaai mo mea na faia e Peteru ma Ioane mo tagata fou o le Ekalesia i le aai o Samaria.

Ua faapupula mai i lenei tala le aoaoga faavae lenei: O le meaalofa o le Agaga Paia e faaee atu pe a uma le papatisoga e ala i le faaee atu o lima e e umia le perisitua ua faatagaina.

Faitau le Galuega 8:18–19, ma vaavaai mo mea na ofo atu e Simona ia Peteru.

Pe ana fai sa e i ai i le tulaga o Simona, mata o le a sau tali atu ia Simona?

Faitau le Galuega 8:20–24, ma vaavaai po o a mea na aoao atu e Peteru ia Simona e uiga i le mauaina o le perisitua.

E le mafai ona faatauina le perisitua i tupe. Ona o le perisitua e a le Atua ia, e mafai ona faaee atu e tusa ai ma na o Lona finagalo. Ua faatuina e le Atua le faatulagaga e mafai ai ona maua le perisitua (tagai Mataupu Faavae o le Faatuatua 1:5).

E tusa ai ma le Galuega 8:21–23, aisea na le mafai ai e Simona ona maua le perisitua? O a ni auala e te manatu e “lei tonu le loto [o Simona] i luma o le Atua” (Galuega 8:21)? Tagai Alema 41:11 mo se malamalamaaga i le uiga o le “ua i ai i le au oona” (Galuega 8:23).

Ua aoao mai e lenei tala le upumoni lea: E faaee atu le perisitua e tusa ai ma le finagalo o le Atua ma le tulaga faatonuina o le agavaa.

1. Tali fesili nei i lau api talaaga mo le suesueina o tusitusiga paia:

   1. Aisea e te manatu ai e taua le iloa o le perisitua e faaee atu i luga o tagata taitoatasi e tusa ai ma na o le finagalo o le Atua ma tulaga faatonuina o le agavaa?

   2. Faitau le Mataupu Faavae ma Feagaiga 121:36–42 O a mataupu faavae e tatau ona faaaogaina ai le perisitua? O le a le mea e tupu i tagata o e taumafai e faaaoga le perisitua “i soo se tikeri o le amioletonu” (MF&F 121:37)?

I le Galuega 8:25 tatou te aoao ai na folafola atu e Peteru ma Ioane le talalelei i le tele o nuu o Samaria.

Galuega 8:26–40

Ua aoao atu ma papatiso e Filipo se taitai Aitiope

2. Mafaufau i tulaga na e manaomia ai pe o le a manaomia ai se tasi e taiala oe. I lau api talaaga mo le suesueina o tusitusiga paia, tusi ai ni nai tulaga e mafai ai ona avea oe o se taiala i se isi tagata. (Mafauau e uiga i taunuuga po o mataupu e te malamalama lelei i ai, po o taleni ua e atinaeina)

A o e suesueina le vaega o totoe o le Galuega 8, vaavaai mo se ala taua e mafai ona avea ai oe o se taiala mo isi.

Faitau le Galuega 8:26, ma vaavaai po o ai na taitaia Filipo e malaga i Kasa. (Atonu e te manao e sue ia Kasa i le Faafanua o le Tusi Paia, nu. 11, “O Le Nuu Paia i le Feagaiga Fou.”)

Faitau le Galuega 8:27–28, ma vaavaai mo le tagata na feiloai i ai Filipo i le ala.

O le a le mea a le tagata Aitiope lea na fai i le kariota? (E mafai ona fesoasoani le iloa e faapea o Esaias o le faa-Eleni o le igoa Isaia.)

Faitau le Galuega 8:29–35, ma vaavaai mo le mea na tupu i le va o Filipo ma le tagata Aitiope.

Fuafua e maka i le fuaiupu 29 pe o ai na uunaia ia Filipo e alu i le kariota a le tagata Aitiope. E mafai foi ona e makaina i le fuaiupu 31 le mea na tau atu e le Aitiope na ia manaomia ina ia malamalama ai i tusiga a Isaia. Fuafua e tusi le Isaia 53:7–8 e fai ma mau fefaasinoai i lau tusi paia i autafa o le Galuega 8:32–33.

Faaaoga upu taiala, uunaiga, ma le avanoa e faamaea ai le mataupu faavae lea e mafai ona tatou aoao mai i le aafiaga o Filipo: A o tatou faalogo ma usitai ____________________ mai le Atua, e mafai ona tatou maua ____________________ e fesoasoani ____________________ i isi ia Iesu Keriso.

Na aoao mai Elder Jeffrey R. Holland o le Korama a Aposetolo e Toasefululua e uiga i le taua o le fesoasoani e taiala isi i le Faaola: “Ma valaau atu i tagata uma, ia o mai ia Keriso’ [MF&F 20:59], ia tausia Ana poloaiga ma faataitai i ana faataitaiga agai atu i le Tama o le faamoemoega maualuga ma paia lea o le olaga faaletagata. Ina ia fesoasoani i isi ia lelei—e aoao, faatauanau, ma taitai atu i le agaga tatalo e savali i le ala lea o le faaolatagata—e mautinoa lava o se tasi lea o feau taua i o tatou olaga. Atonu o le mea lea na saunoa ai Peresitene David O. McKay e faapea , ‘E leai lava se tiute sili e taoto i soo se tama [poo se tamaitai] nai lo le avea ma aoao a fanau a le Atua’ [i le Conference Report, Oct. 1916, 57]” (“O se Aoao mai le Atua,” Ensign, Iulai 1998, 25).

3. Filifili se tasi pe sili atu o tulaga nei.

   Tulaga 1: O se taulealea lua te faauo o se tagata o se tasi ekalesia Kerisiano. I se tasi aso i le malologa, ua musuia oe e talanoa ia te ia e uiga i le Ekalesia.

   Tulaga 2: A o e savali atu i le fale mai le aoga, ua e vaaia se tamaitai talavou o tagi. Ua e iloaina o ia o se tagata o lau uarota ua tele tausaga e te lei toe vaai i ai i sauniga Lotu. Ua uunaia oe e te talanoa ia te ia. A o e taumafai e faamafanafana ia te ia, ua ia faamatala mai ona luitau ma fesili, “Aisea e le mafai ai ona na ona ou fiafia?”

   Tulaga 3: Na maliu talu ai nei le tina o se taulealea o lua fesootai i le upega tafailagi. Ua uunaia oe e tali atu i le tusiga lea na ia faia talu ai: “Ua lagona lava le tuuatoatasi i le taimi nei. Maimau pe ana i ai se tasi e malamalama.”

   I lau api talaaga mo le suesueina o tusitusiga paia, tusi ai mea o le a e fai atu ma faia e fesoasoani e taiala ai lenei tagata ia Iesu Keriso. I lau faamatalaga, faaaofia ai tali i fesili nei.

   1. O a upumoni o le talalelei o le a e faasoa atu e fesoasoani e taiala ai lenei tagata ia Iesu Keriso?

   2. O le a se mau e te ono valaaulia i lenei tagata e suesue?

   3. O le a le mea o le a e valaaulia lea tagata e fai?

Faitau le Galuega 8:36–40, ma vaavaai mo mea na tutupu ona o se taunuuga o le aoao atu e Filipo o le taitai Aitiope e uiga ia Iesu.

4. Tali se fesili e tasi po o fesili uma i lau api talaaga mo le suesueina o tusitusiga paia:

   1. O anafea ma na faapefea foi ona e fesoasoani e taiala se tasi ia Iesu Keriso?

   2. O anafea ma na faapefea foi ona fesoasoani se tasi ia te oe e taiala oe ia Iesu Keriso?

A o amata lou aso i lau lava tatalo, saili mo le taitaiga a le Agaga Paia e uunaia oe. A o e aga atu la i lou aso, faalogologo mo uunaiga mai i le Atua o le a fesoasoani ia te oe e taiala isi ia Iesu Keriso.

5. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia;

   Ua ou suesueina le Galuega 8 ma faamaeaina lenei lesona i le (aso).

   O fesili, mafaufauga, ma manatu faaopoopo ou te fia faasoa atu i lou faiaoga: