Faatomuaga i le Filipi
Aisea e Suesue ai Lenei Tusi?
I lana Tusi i Filipi, sa tuuina atu ai e le Aposetolo o Paulo i le Au Paia i Filipi le faamalosiauga ma apoapoaiina i latou ia tutumau i le lotogatasi ma galulue faatasi e puipui le faatuatua. Atonu o se tasi o mataupu faavae aupito taua na aoao atu e Paulo i Filipi, o le tatalo i le Atua ma le faatuatuaina o Ia e aumaia ai “le manuia o le Atua, o loo silisili lava i mea uma e manatu i ai” (Filipi 4:7). O le suesueina o savali o faamalosiauga a Paulo i lenei tusi, e mafai ona fesoasoani i au taumafaiga ia tumau faamaoni e oo i le iuga. Ao e taumafai e mulimuli ia Keriso, e mafai foi ona e maua le toa ma, e pei ona tautino mai e Paulo, “Ou te mafaia mea uma lava i le faamalosi mai o Keriso ia te au” (Filipi 4:13).
O Ai na Tusia Lenei Tusi?
E ui o loo taua Timoteo faatasi ma Paulo i le faafeiloaiga a le tusi (tagai Filipi 1:1), o Paulo na tusia le Tusi i Filipi. Na lagolagoina lenei mea i le faaaogaina o le suinauna numera tasi o le Au i le tusi atoa ma le faatatau atu ia Timoteo i le Filipi 2:19. Atonu sa fai Timoteo ma tusiupu a Paulo, e tusia le tusi i lalo o le taitaiga a Paulo.
O Anafea ma o Fea na Tusia ai?
Atonu sa tusia e Paulo le Filipi i se vaitaimi i le va o le T.A. 60 ma le 62, ao falepuipuiina o ia i Roma (tagai Filipi 1:7, 13, 16; tagai foi Galuega 28:16–31; Taiala i Tusitusiga Paia, “Philippians, Epistle to,” scriptures.lds.org).
O Ai Na Tusia i Ai ma Aisea?
O Filipi o le nofoaga muamua lea i Europa sa talai aloaia atu ai e Paulo le talalelei ma faatuina ai se paranesi o le Ekalesia (tagai Galuega 16:11–40; Bible Dictionary, “Pauline Epistles”). O se tasi o faamoemoega o Paulo i le tusiaina o lenei tusi, o le faaali atu o le agaga faafetai mo le alofa ma le fesoasoani tautupe na faasafua ane e le Au Paia i Filipi ia te ia i le taimi o lana malaga lona lua faafaifeautalai ma lona faafalepuipuiina i Roma (tagai Filipi 1:3–11; 4:10–19; tagai foi Bible Dictionary, “Pauline Epistles”).
Sa viia foi e Paulo tagata [o le ekalesia] i Filipi mo lo latou faatuatua ia Iesu Keriso, ma tuu atu ia i latou fautuaga e faavae i faamatalaga e uiga ia i latou lea sa ia maua mai se soo i Filipi na igoa ia Epaferoti (tagai Filipi 4:18). O le fautuaga a Paulo na aofia ai le faamalosiauga ina ia lotomaualalo ma ia lotogatasi (tagai Filipi 2:1–18; 4:2–3) Sa lapataia foi e Paulo ia Filipi ia nofouta i tagata Kerisiano amio piopio, e pei o i latou na aoao atu e faapea, sa manaomia le peritomeina mo le liuaina. O tagata faapena (sa masani ona taua o le Au Faa Iutaia) sa latou folafola sese atu e faapea, na tatau i tagata fou liliu mai ona usitai atu i le tulafono sa i ai o le peritomeina i le Feagaiga Tuai ao lei oo mai le Faa Kerisiano (tagai Filipi 3:2–3).
O A Nisi o Vaaiga Iloga o Lenei Tusi?
O le Filipi e masani ona taua o se tusi i le falepuipui, faatasi ai ma le Efeso, Kolose, ma le Filemoni. E ui lava i le tusia mai le falepuipui, ae o le tusi a Paulo i Filipi na faamatalaina e le au faitofa o le tusitusiga aupito sili ona fiafia o ana tusitusiga. Sa faailoa atu e Paulo le agaga faafetai, alofa, ma le talitonu i tagata o le Ekalesia; faamatalaina osigataulaga sa ia faia ia mulimuli ai ia Iesu Keriso; ma faatonuina le Au Paia i Filipi i mataupu faavae o le ola amiotonu. E ono matau e tamaiti aoga i le Filipi 4:8 nisi o gagana na faaaoga i le mataupu faavae o le faatuatua lona sefulutolu, lea sa tusia e le Perofeta o Iosefa Samita.
Sa faaalia faafatusolo e Paulo le afio ifo o le Faaola mai le paia o le muai olaga i le olaga faitino, lea sa Ia puapuagatia ai “i le maliu i le satauro” (tagai Filipi 2:3–8). O le faataunuuina o Lana misiona paia, ua tu nei Iesu Keriso ua faaeaina, ma o le a oo mai le aso ina “ia tootuli o tulivae uma lava” i Ona luma ma “tautau atu e laulaufaiva uma lava o Iesu Keriso o le Alii” (Filipi 2:10–11). Na faaalia e Paulo o le faapogai o lona toa ma le malosi i totonu sa sau mai ia Iesu Keriso (tagai Filipi 4:13).
Otootoga
Filipi 1. Ua faailoa atu e Paulo le agaga faafetai mo le faaaumea a le Au Paia i Filipi. Ua ia aoao atu, o le tetee sa oo atu ia te ia i le auauna ai i le Alii, e aofia ai lona faafalepuipuiina, sa faalauteleina ai le faamoemoe o le talalelei. Ua ia uunaia tagata o le Ekalesia ia tutumau i le lotogatasi i le puipuia o le faatuatua.
Filipi 2. Sa uunaia atili e Paulo tagata o le Ekalesia ina ia lotogatasi ma faailoa atu le faataitaiga a Iesu Keriso, o le sa afio ifo e sau i le olaga faitino, o se faataitaiga o le alofa, usiusitai, ma le lotomaualalo. O le a i ai se aso e faailoa ai e tagata uma o Iesu Keriso o le Alii. Ua faatonu e Paulo tagata o le Ekalesia ia galulue i o latou lava faaolataga.
Filipi 3. Ua lapatai atu Paulo e uiga i le Faa Iutaia. Ua ia faamatalaina lona olaga na muamua atu o se Faresaio ma le ala na ia lafoaia ai ma le lotomalie mea uma ina ia mulimuli ia Iesu Keriso. Ua ia apoapoai atu i le Au Paia ia mulimuli i lana faataitaiga o le fetaomi atu i luma agai i le faaolataga. Ua faamalamalama mai e Paulo o le a suia e Iesu Keriso o tatou tino faaletino i ni tino mamalu e pei o Ia.
Filipi 4. Ua uunaia e Paulo le Au Paia ia olioli e le aunoa i le Alii. Ua ia apoapoia i latou ia suia o latou popole i le tatalo ma le faafetai, ma folafola atu o le a latou olioli i le manuia o le Atua, lea e silisili i mea uma e manatu i ai. Ua apoapoai atu Paulo i tagata o le Ekalesia ia mafaufau i mea e faamaoni, sao, amiotonu, tonu, logoleleia, e tauleleia, ma mama. Ua ia faailoa mai e mafai ona ia faia mea uma e ala ia Iesu Keriso, o le faamalosia o ia.