I se tasi po na alu ane ai se tasi o Faresaio e igoa ia Nikotemo ma talanoa ma Ia. Sa aoao atu e Iesu ia Nikotemo e faapea, e tatau i tagata uma ona toe fanau ia ulu atu ai i le malo o le Atua. Mulimuli ane, sa faamatala atu e Ioane le Papatiso i ona soo o lana matafaioi o le saunia lea o le ala mo Iesu Keriso
Ua aoao atu e Iesu ia Nikotemo i upumoni faaleagaga
Mafaufau faapea i se tasi aso a’o oulua talanoaina ma ni nai uo ia tapuaiga, ua fai mai se tasi, “Pau lava le mea a avea au o se tagata lelei, e mafai ona ou alu i le lagi.” Mafaufau pe o le a faapefea ona e tali atu i lau uo.
Ao e suesueina le Ioane 3, vaavaai mo mea na aoao mai e Iesu e tatau ona tatou faia ina ia ulu atu ai i le malo o le Atua.
Ina ua lata i le amataga o Lana galuega, sa maliu atu ai le Faaola i Ierusalema mo le faamanatuina o le Paseka. E toatele tagata i Ierusalema sa talitonu ia Iesu ina ua latou vaai i vavega sa Ia faatinoina (tagai Ioane 2:23–25).
Faitau le Ioane 3:1–2, ma vaavaai po o ai na sau e asiasi i le Faaola a o i ai o Ia i Ierusalema.
Ata
Iesu ma Nikotemo
O Iesu o loo talanoa ma Nikotemo
O “se faipule o Iutaia”(Ioane 3:1), o Nikotemo o se sui o le au Saneterini. O Saneterini o se aufono o le pulega e aofia ai le au Faresaio ma le au Satukaio e pulea le tele o mataupu faalemalo ma faalelotu a tagata Iutaia.
O le a sou manatu aisea na sau ai Nikotemo e talanoa ma Iesu i le po?
O le faailoaga e Nikotemo faapea o Iesu o “se aoao e maliu mai mai le Atua” (Ioane 3:2) ua ta’u mai ai na manao o ia e aoao mai ia Iesu.
Faitau le Ioane 3:3–5, ma vaavaai mo mea na aoao atu e le Faaola ia Nikotemo. O le (Ioane 3:5 o se fasifuaitau o se mau tauloto. Atonu e te manao e faailoga i se auala e iloagofie ai ina ia fesoasoani i lou sueina i le lumanai.)
Na aoao atu e Iesu ia Nikotemo e manaomia e tagata uma ona toe fanauina. O le a se mea na mafaufau i ai Nikotemo i le uiga o le fetalaiga a le Faaola “toe fanau” (Ioane 3:3)?
O le toe fanauina o le “faamatua’ia lea e le Agaga o le Alii se suigatele i le loto o se tagata ina ia le toe i ai se manao e fai le leaga, ae ia manao e sailii mea a le Atua” (Taiala i Tusitusiga Paia, “Toe Fanau, Fanau i le Atua,” scriptures.lds.org; tagai Mosaea 5:2; 27:25–26).
Ata
Perofeta o Iosefa Samita
Na aoao mai e le Perofeta o Iosefa Samita, “O le toe fanauina, e mai i le Agaga o le Atua e ala i sauniga” (Aoaoga a Peresitene o le Ekalesia: Iosefa Samita [2007], 95).
Atonu e te manao e maka ia mea e lua i le Ioane 3:5 na aoao mai e Iesu e tatau ai e ulu atu ai i le malo o le Atua.
O le fanau i le vai o lona uiga o le papatisoina, ma o le fanauina i le agaga o lona uiga o le taliaina lea o le meaalofa o le Agaga Paia.
Faauma faamatalaga o upumoni nei e faavae i luga o mea ua e aoaoina mai le Ioane 3:5: e tatau ai mo le toefanauina faaleagaga ma le mauaina o le faaeaga i le malo selesitila. Fuafua e tusi le upumoni lenei i au tusitusiga paia i autafa o le Ioane 3:5.
Ata
Peresitene Boyd K. Packer
Na saunoa Peresitene Boyd K. Packer o le Korama a Aposetolo e Toasefululua e faapea: “O le amio lelei e aunoa ma sauniga o le talalelei o le a le togiolaina ai pe faaeaina ai le tagata; o feagaiga ma sauniga e tatau ona fai” (“O Le Ekalesia Moni e Tasi,” Ensign, Nov. 1985, 82).
I lau api talaaga mo le suesueina o tusitusiga paia, tusi ai se tali i se uo sa fai mai ua lava lava le avea ma tagata lelei e ulu atu ai i le malo o le Atua. Manatua e faaaoga le mea na fetalai ai Iesu i le Ioane 3:5 i lau tali.
I le Ioane 3:6–12 tatou te faitau ai e faapea, ina ua uma ona aoao e Iesu ia Nikotemo faapea e tatau i tagata uma ona fanaua faaleagaga, sa fesili Nikotemo pe mafai faapefea e se tasi ona toe fanau mai. Sa tali atu Iesu e ala i le fesili atu ia Nikotemo pe mafai faapefea e se taitai faalelotu o tagata ona le malamalama i le mea o Ia aoao atu.
Faitau le Ioane 3:13–15, ma vaavaai pe na faapefea e Iesu ona tali atu i le fesili a Nikotemo pe mafai faapefea ona fanauina faaleagaga. Matau i le Ioane 3:13 na tautino atu ai e Iesu o Ia lava o le Alo o le Atua na afio mai mai le lagi.
I le Ioane 3:13, na aoao ai e Iesu ia Nikotemo e faapea, e leai se tasi e mafai ona alu ae i le lagi e ala i a latou lava taumafaiga. O Keriso ua na o le pau lea o le tagata e mafai ona afio ae i le lagi na o Ia lava.
Ata
O Mose ma le Gata Apamemea
I le taimi na feofeoai ai Mose ma le fanauga a Isaraelu i le vao, sa auina ifo e le Alii gata uogo, po o gata oona, o le taunuuga o le agasala o Isaraelu i le Atua. Sa ’ona tagata Isaraelu pe a u i latou e gata. Sa faatonuina Mose e le Alii e faia se gata i le apamemea ia pei o gata uogo ma tuu i luga o se pou. Sa Ia folafola atu soo se Isaraelu e vaai atu i le gata i luga o le pou o le a faamaloloina. (Tagai Numera 21:4–9.)
E faapefea ona faatusa le aafiaga o le sii ae e Mose o le gata apamemea i le mea o le a faia e Iesu Keriso mo tagata uma?
Ata
O Le Faasatauroga
Manatua le faamanuiaga o loo ta’ua i le Ioane 3:15 e maua e i latou o e vaavaai atu i le Faaola.
Na aoao atu e Iesu ia Nikotemo e faapea, e mafai e tagata uma ona maua le ola e faavavau e ala o le Togiola a Iesu Keriso.
Na aoao foi Nikotemo e le Faaola i se aoaoga faavae taua e uiga i le Tama Faalelagi. Faitau le Ioane 3:16–17, ma vaavaai mo se aoaoga faavae e mafai ona tatou aoao ai e uiga i le Tama Faalelagi.
O le Ioane 3:16–17 o loo aoao mai ai i le alofa tele naua o le Tama Faalelagi i Ana fanau ua Ia auina mai ai Lona Alo Pele e Toatasi na Fanaua e mafatia mo a latou agasala.
Mafaufau pe faapefea ona faaalia le alofa o le Tama Faalelagi ia i tatou taitoatasi e ala i le auina mai o Lona Alo, o Iesu Keriso, i le lalolagi.
Ata
Elder Dallin H. Oaks
A o e faitauina le saunoaga lea a Elder Dallin H.Oaks o le Korama a Aposetolo e Toasefululua, mafaufau pe o a ou lagona ina ua e iloaina le tele o le alofa o le Tama Faalelagi ia te oe: “E leai se isi faamaoniga sili atu o le mana e le i’u ma le atoatoa o le alofa o le Atua nai lo lea na ta’utino mai e le Aposetolo o Ioane: ’Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi’ (Ioane 3:16). … Mafaufau i le tiga na oo i lo tatou Tama Faalelagi i le auina mai o Lona Alo e onosaia puapuaga e le mafaamatalaina mo a tatou agasala. O le faamaoniga silisili lena o Lona alofa mo i tatou taitoatasi!” “O Le Alofa ma le Tulafono,” Ensign po o le Liahona, Nov. 2009, 26–29.
Faitau le Ioane 3:16 ma le Mataupu Faavae ma Feagaiga 34:3, ma vaavaai mo mea e mafai ona tatou aoao ai e uiga i le alofa o le Tama ma le alofa o Iesu Keriso. Ona tusi lea i lau api talaaga mo le suesueina o tusitusiga paia pe o a ou lagona i le iloaina lea e alofa tele le Tama Faalelagi ia te oe, na Ia auina mai ai Lona Alo Pele e Toatasi na Fanaua e mafatia ma maliu mo oe.
O se isi mataupu faavae e mafai ona tatou aoao mai le Ioane 3:16–17 o le, afai tatou te talitonu ia Iesu Keriso, lea e aofia ai le salamo i a tatou agasala ma le usitai i Lana upu, e mafai ona tatou maua le ola e faavavau e ala Lana Togiola.
Toe iloilo ia upumoni o loo lisi atu i lenei lesona na aoao atu e Iesu ia Nikotemo. Tusi i lau api talaaga mo le suesueina o tusitusiga paia pe feaiaa’i faapefea nei upumoni. Ona tusi lea o le fasifuaitau lea: O le a ou faaali lo’u talitonu ia Iesu Keriso i le … Faauma le fuaitau lea i le tusia o mea o le a e faia e faaalia ai lou talitonuga ia Iesu Keriso.
O fuaitau o le mau tauloto i le Ioane 3:5ua aoao mai ai se aoaoga faavae taua e manaomia e fanau uma a le Tama Faalelagi. O le taulotoina o le a fesoasoani e te faasoa atu ai i isi i lou olaga atoa. Tusi le fuaiupu atoa i lau api talaaga mo le suesueina o tusitusiga paia. Faitau ma saga faitau faafia le fuaiupu, ma kolosi ese ni nai upu i taimi taitasi e te faitauina ai. Fai le mea lena seia iu ina mafai ona e taulotoina. Atonu e te manao e tauloto atu mo se tagata o le aiga po o se uo ia mautinoa ua e iloaina.
Afai e mafai, faatumu se ipu inu malamalama po o se koneteina i vai ma tuu i ai se mataua se tasi pe lua o se faalanu meaai i le vai. Matau le lanu a o taape i le koneteina. Mafaufau pe faatusa faapefea le faalanu meaai i a tatou faatosinaga i isi tagata.
Faitau le saunoaga lea a Peresitene Tavita O. MaKei, ma vaavaai mo mea e mafai ona e aoao mai e uiga i lau faatosinaga i olaga o isi:
Ata
Peresitene Tavita O. MaKei
“O tagata uma e ola i lenei lalolagi e i ai se faatosinaga, pe mo le lelei po o le leaga. E le na o le mea e fai mai ai, e le na o le mea foi na te faia. O le tagata e i ai o ia” (Aoaoga a Peresitene o le Ekalesia: Tavita O. MaKei [2003], 227).
“O le aafiaga o a tatou upu ma taga e tele naua i le lalolagi. O minute uma o le olaga ua suia i sina tikeri o olaga o le lalolagi atoa” Aoaoga: Tavita O. MaKei,227).
E pei ona tusia i le Ioane 3:22–26, o nisi o soo o Ioane le Papatiso sa popole. Sa latou ta’u atu ia Ioane sa papatisoina Iesu ma ua Ia “taliaina tagata uma o e o atu ia te ia” (Faaliliuga a Iosefa Samita, Ioane 3:27 [i le Ioane 3:26, vaefaamatalaga a]). Sa popole i latou ua toatele tagata sa mulimuli atu ia Iesu nai lo Ioane le Papatiso.
Faitau le Ioane 3:27–30, ma vaavaai pe na faapefea ona faamatala atu e Ioane le Papatiso ma le lotomaualalo lana matafaioi e tusa ai ma Iesu Keriso.
I le talafaatatau a Ioane le Papatiso, o le faatoafaiava e faatusa ia Iesu, o le faatoanofotane e mafai ona faatusa ia i latou o e o mai ia Keriso, ma le uo a le faatoafaiava e faatusa ia Ioane le Papatiso. O le a le mea na malamalama i ai Ioane le Papatiso i lana matafaioi i le sootaga ma Iesu Keriso? O le a le ituaiga o faatosinaga e te manatu o le a faia e upu a Ioane ia te oe pe ana faapea o oe o se tasi o soo o Ioane?
O se upumoni e tasi e mafai ona tatou aoao mai le faataitaiga a Ioane le Papatiso o le, e mafai ona tatou faatosinaina isi mo le lelei e ala i le taitaia o i latou ia Iesu Keriso.
Aisea e taua tele ai lo tatou faaaogaina o la tatou faatosinaga e taitai ai isi ia Iesu Keriso?
Mafaufau i se tagata na e vaai o taitaia isi ia Iesu Keriso. I lau api talaaga mo le suesueina o tusitusiga paia, faamatala ai uiga o lenei tagata na saofaga i lona gafatia e faatosina ai isi e alolofa ma talia le Faaola.
Mafaufau i ni auala e mafai ona e taitaia ai isi i le Faaola. E mafai ona e sailia le taitaiga a le Agaga Paia i au taumafaiga e faia.
I le Ioane 3:31–36, na tautino atu ai e Ioane le Papatiso e faapea, na auina mai Iesu e le Atua ma o i latou uma o e talitonu ia te Ia e mafai ona maua le ola e faavavau.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Ioane 3 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: