Faatomuaga i le 2 Timoteo
Aisea e Suesue ai Lenei Tusi?
O le Tusi Lona Lua a Paulo ia Timoteo o loo faamamafa atu ai le mana lea e sau mai le i ai o se molimau ia Iesu Keriso (tagai 2 Timoteo 1:7–8). O loo i ai foi se valoaga o “taimi faigata” o le a i ai i aso o Paulo ma Timoteo faapea foi i aso amuli (tagai 2 Timoteo 3:1–7). Ina ia fesoasoani ia Timoteo ma luitau sa feagai ma ia, sa faamalosiau atu ai Paulo ia te ia ina ia faatuatua i tusitusiga ma i taitai o le Ekalesia (tagai 2 Timoteo 3:14–17) ma ia faatuatua i aoaoga faavae moni (tagai 2 Timoteo 4:2). E ala i le suesueina o lenei tusi, o le a e aoao ai i aoaoga faavae ma mataupu faavae e mafai ona fesosaoani e te ola faamaoni ai ao e aafia i taimi faigata o aso amuli.
O Ai na Tusia Lenei Tusi?
O le Aposetolo o Paulo na tusia le 2 Timoteo (tagai 2 Timoteo 1:1).
O Anafea ma o Fea na Tusia ai?
O le Tusi Lona Lua a Paulo ia Timoteo atonu sa tusia i se vaitaimi o le va o le T.A. 64 ma le 65 (tagai Taiala i Tusitusiga Paia, “Pauline Epistles,” scriptures.lds.org). Sa tusia e Paulo le tusi i le taimi o lona faafalepuipuiga lona lua i Roma, ae lei leva lava ae faamaturoina (tagai Bible Dictionary, “Pauline Epistles”).
Ao faafalepuipuiina sa saisai Paulo i uamea (tagai 2 Timoteo 1:16; 2:9), atonu sa i ai o ia i se sela po o se ana ma aliali atu i elemene (tagai 2 Timoteo 4:13, 21), ma sa tauivi ana uo e sue o ia (tagai 2 Timoteo 1:17). E mautinoa lava o Luka sa masani ona asiasi atu ia te ia (tagai 2 Timoteo 4:11), ma sa iloa e Paulo o le a lata ina iu lona ola (tagai 2 Timoteo 4:6–8).
O Ai Na Tusia i Ai ma Aisea?
I le tusi lenei sa faamalosiau ai Paulo ia Timoteo ma ofo atu le malosiaga e fesosaoani e taumafai ai pea pe a mavae le maliu lea na faamalumalu ifo o Paulo. Sa iloa e Paulo sa le toe umi lona taimi, ma sa manao ai ia vaai ia Timoteo, o le sa taua faafaatusa e Paulo “lou atalii pele” (2 Timoteo 1:2).
I le faaiuga o lana tusi, sa talosagaina ai e Paulo ia asiasi atu Timoteo ma Mareko ia te ia ma aumai ni nai mea sa ia tuua (tagai 2 Timoteo 4:9–13). E ui lava o le tusi a Paulo sa tusia faapitoa ia Timoteo, ae o ona fautuaga e mafai ona faatatau ia i latou o e ola “i aso e gata ai” (2 Timoteo 3:1) aua sa aoao atu Paulo e uiga i luitau ma fofo e talafeagai ma o tatou aso faapena foi i ona aso.
O A Nisi o Vaaiga Iloga o Lenei Tusi?
O lenei tusi o se tasi o tusi o taitaiga faaleagaga, faatasi ai ma le 1 Timoteo ma le Tito, ma “o loo i ai upu faaiu a le Aposetolo ma faaalia ai le matagofie o le lototele ma le faatuatua lea sa ia faafetaiaia ai le oti” (tagai Bible Dictionary, “Pauline Epistles”). I le faasologa o mea na tutupu, o le 2 Timoteo e foliga mai o le tusi mulimuli lea a Paulo i le Feagaiga Fou (tagai 2 Timoteo 4:6).
O lenei tusi o loo i ai nisi o manatunatuga a Paulo i faamanuiaga ma faigata o le auauna atu o “se talai, ma se aposetolo, ma se aoao i Nuuese” (2 Timoteo 1:11). Na tautino mai e Paulo, “Ua ou tau le taua lelei, ua iu ia te au le tausinioga, ua ou taofi i le upu o le faatuatua: O lenei ua teuina mo au le pale o le amiotonu” (2 Timoteo 4:7–8), e faailoa ai na ia maua se faamautinoaga patino o le a ia maua le ola e faavavau. I le avea ai ma se tasi sa auauna atu mo Iesu Keriso i le silia ma le 30 tausaga, sa i ai Paulo i se tulaga sili ona lelei e aoao ai Timoteo i auala e auauna lelei atu ai i le faamalosia o le faatuatua o isi (tagai 2 Timoteo 2:15–17, 22–26; 4:1–2, 5).
Otootoga
2 Timoteo 1. Ua tautala Paulo e uiga i le meaalofa ma le mana o le Atua, lea e maua e ala i le faauuina i le perisitua. Ua ia aoao mai o “le agaga e matau ai” (2 Timoteo 1:7) e le sau mai le Atua ma e le tatau ona tatou mama i la tatou molimau ia Iesu Keriso. Ua molimau mai Paulo na valaauina o ia e Iesu Keriso e talai atu le talalelei (tagai 2 Timoteo 1:11).
2 Timoteo 2. Ua faaaoga e Paulo le faatusa o se fitafita lelei, se tagata taalo manumalo, ma se faifaatoaga galue malosi e faamatala mai ai le manaomia o le onosai i mea faigata ina ia mafai ona maua le mamalu e faavavau. Ua ia faatusatusaina faiaoga moni ma pepelo ma ipu e tauleleia ma tauleagaina. Ua ia lapatai atu ia Timoteo e aloese mai talanoaga faafinau ma ia aoao atu ma le onosai i latou o e manaomia ona salamo.
2 Timoteo 3–4. Ua faamatala e Paulo ia tulaga leaga o aso e gata ai, ma uunaia Timoteo e faaaoga tusitusiga paia i lona matafaioi o se taitai perisitua. Ua ia tusi e uiga i lona maliu sa faamalumalu mai, ma tautino mai, “ua ou taofi i le upu o le faatuatua” (2 Timoteo 4:7). Ua molimau mai Paulo o le a laveai o ia e le Alii i “lona malo i le lagi” (2 Timoteo 4:18).