Faaaliga 12–13

Folasaga

O le Faaaliga 12–14 o loo i ai se faalavelave i le aluga o le faasologa o le faaaliga vaaia a le Apsoetolo o Ioane. Na vaai Ioane i le faaaliga vaaia o se tarako o taufaamatauina se fafine ma lana tama. Na ia tusi e uiga i le Taua i le Lagi ma e uiga i malo o le lalolagi o le a tau faasaga i e mulimuli i le Atua.

Faaaliga 12

Sa faaali atu ia Ioane sa tau i taimi uma Satani e faasaga i le Alii ma Lana Ekalesia

Tusi ni laina fesootai i le va o taufaamatau taitasi o loo lisiina i le koluma i le itu agavale ma auala e faafetauia ai o loo lisiina i le koluma i le itu taumatau.

Taufaamatau	O auala e faafetauia ai taufaamatau
Mu i le la	Salamo ma faalagolago ia Iesu Keriso
Fitafita a le fili	Vailaau faafomai po o le malolo
Ma’i	[Kulimi] talila po o lavalava
Agasala ma le tausala	Upumoni i le Faaaliga 12
Faatosinaga a Satani	Auupega o le taua

O le fea o nei taufaamatau na e faafetauia talu ai nei? O le fea e aupito sili ona matautia? Aisea?

A o e suesueina le Faaaliga 12, vaavaai mo upumoni e mafai ona fesoasoani ia te oe e faafetauia ai faatosinaga a Satani. O le Faaaliga 12–14 o se faalavelave i le faamatalaga a Ioane o lana faaaliga vaaia o mea e tutupu i le faamaufaailoga lona fitu. Faatasi ai ma lenei toma atonu na fesoasoani ai le Alii ia Ioane ia malamalama i le uiga o fuaitau “o malo o le lalolagi” ma “o malo o lo tatou Alii” (Faaaliga 11:15). O le Faaliliuga a Iosefa Samita o le Faaaliga 12 atoa o loo maua i le pito i tua o le Tusi Paia ma le Taiala i Tusitusiga Paia.

Vaavaai i le ata lenei, ma mafaufau po o a mea e faatusa i ai faailoga o loo i ai.

Faitau le Faaaliga 12:1–2, 5, ma vaavaai po o le a le mea na tupu i le fafine. (O le Faaliliuga a Iosefa Samita ua tuu tonu ai le fuaiupu 5 i le uma ai o le fuaiupu 2.)

Matau mai, o le tama a le fafine o le a “pule i nuu uma i le tootoo uamea” (Faaaliga 12:5).

Faitau le Faaaliga 12:3–4, ma vaavaai po o le se mea na taufaamatau i le fafine ma lana tama.

O lea sou manatu i le mea ua faatusa i ai faailoga o loo faamatalaina i fuaiupu 1–4?

Faitau le Faaliliuga a Iosefa Samita, Faaaliga 12:7–8 (i le faaopoopoga o le Tusi Paia), ma vaavaai po o a faauigaga o le tarako, o le fafine, ma le tamaitiiti. Atonu e te manao e tusi pe faailoga le uiga o ia faatusa taitasi i autafa o le Faaaliga 12:1–5.

O le tarako e faatusa lea ia Satani (tagai Faaliliuga a Iosefa Samita, Faaaliga 12:8), o le fafine e faatusa “i le ekalesia a le Atua,” ae o le tama e faatusa i le “malo a lo tatou Atua ma lana Keriso” (Faaliliuga Iosefa Samita, Faaaliga 12:7). O lenei malo e aofia ai tagata faamaoni o le Ekalesia a le Alii. (Mo nisi faamatalaga o faatusa i nei fuaitau, tagai i le Tusi Lesona o le Feagaiga Fou a le Tagata Aoga [Church Educational System manual, 2014], 550–52.)

E tusa ai ma le Faaaliga 12:4, o le a le faamoemoega o le tarako?

Aisea e te manatu e saili ai ma le filiga ia Satani e faaumatia le malo o le Atua ma Keriso?

Faitau le Faaaliga 12:6, ma vaavaai mo le mea sa faia e le fafine ona o le taufaamatau a le tarako.

O le fafine ua sola i le vao e faatusa i le Ekalesia ua ulu atu i le Liliuese Tele ma le aveesea o le perisitua mai le lalolagi i le mavae ai o le maliliu o Iesu Keriso ma Ona Aposetolo.

Ina ua uma ona vaaia e le Aposetolo o Ioane le faamatauina e le tarako o le fafine ma lana tama, na faaali atu ia te ia se mea na tupu mai i lo tatou muai olaga—ina ua tau Satani ma ana au faasaga i le ata o le faaolataga ma le Au Paia a le Atua.

Faitau le Faaliliuga a Iosefa Samita, Faaaliga 12:6–11 (i le faaopoopoga o le Tusi Paia), ma vaavaai mo le mea na tupu ia Satani i le taimi o le Taua i le Lagi ma le ala na faatoilalo ai e le Au Paia a le Atua ia Satani ma ana au . Atonu e te manao e maka pe faailoga mea ua e maua.

Fai mai le Faaaliga 12:4 o le iu o le tarako “ua toso i lona tolu o vaega o fetu i le lagi.” O le faatusa lenei o le numera tele o fanau agaga a le Tama Faalelagi na filifili e mulimuli ia Satani. O “Mekaeli ma ana agelu” (Faaaliga 12:7) o Atamu ma isi fanau agaga amiotonu a le Atua.

E tusa ai ma le Faaaliga 12:11, na faapefea ona faatoilalo e au amiotonu o le lagi (e aofia ai ma oe) ia Satani?

E tusa ai ma le Faaaliga 12:8–9, o fea na auina atu i ai Satani ma e na mulimuli atu ia te ia ina ua uma le latou fouvalega?

Faitau le Faaliliuga a Iosefa Samita, Faaaliga 12:12, 17 (i le faaopoopoga o le Tusi Paia), ma vaavaai po o ai na faasagatau i ai Satani ina ua tuliesea o ia mai le lagi.

O le malamalama i auala na tatou faatoilalo ai Satani i le tatou muai olaga, e mafai ona fesoasoani ia i tatou e iloa ai auala e faatoilalo ai ana faatosinaga ma osofaiga i le lalolagi. Mai nei fuaitau i le Faaaliga 12 e mafai ona tatou iloa ai le mataupu faavae lenei: E mafai ona tatou manumalo mai i faatosinaga a Satani e ala i le Togiola a le Faaola ma e ala i le tumau faamaoni i a tatou molimau o le talalelei. Atonu e te manao e tusi pe faailoga le mataupu faavae lenei i au tusitusiga paia.

Na aoao mai e Elder James J. Hamula o le Fitugafulu le auala o loo osofaia ai e Satani la outou augatupulaga

“Na faapolopolo ia o mai i nei aso e gata ai ma galulue mo lo tatou Tama ma Lona Alo, ia nisi o atalii ma afafine e sili ona totoa ma tamalii a lo tatou Tama. Sa faaalia lo latou totoa ma le tamalii i le taua ma Satani i le muai olaga. …

“O le i ai o le malo o le Atua ua toefuatai mai i le fogaeleele ma lo outou ulufale mai i le lalolagi, ua iloa ai e Satani ‘ua puupuu lona taimi’ [Faaaliga 12:12]. O le mea lea ua tuufaatasia ai e Satani punaoa uma na te mafaia e faatosina ai outou ina ia solitulafono. Ua ia iloa afai e mafai ona ia tosoina outou ia solitulafono, e ono mafai ona ia taofia outou mai le faia o se misiona, faaipoipo i le malumalu, ma le faamausaliina o a outou fanau i le lumanai i le faatuatua, o ia mea uma e le gata ina faavaivaia ai outou ae faapea foi le Ekalesia. Ua ia iloaina e leai lava se mea e mafai ona faatoilaloina le malo o le Atua ‘vagana ai [o] le solitulafono a [lona] nuu’ [Mosaea 27:13]. Ia outou iloa lelei lenei mea—o le tulimata’iga o lenei taua o outou” (“Manumalo i le Taua ma le Amioleaga,” Ensign po o le Liahona, Nov. 2008, 50–51).

E faapefea ona taumafai Satani ma lana vaega e faavaivaia i tatou?

Mafaufau pe o faapefea ona sii taua atu Satani ia te oe lava ia.

I lau api o talaaga mo le suesueina o tusitusiga paia, lisi ai ni auala e mafai ona faateleina ai lou faatuatua ia Iesu Keriso ma faamalosia ai lau molimau ia te Ia.
Tali i se tasi pe lua o fesili nei, i lau api talaaga mo le suesueina o tusitusiga paia:
1. Tusi e uiga i se aafiaga i se taimi na fesoasoani ai lau molimau ma lou faatuatua i le Togiola a le Faaola e te faafetauia ai faatosinaga a Satani.
2. Tusi lau molimau i le Togiola a Iesu Keriso, ma faamalamalama pe mafai faapefea ona fesoasoani le Togiola ia te oe i le tatou taua ma Satani ma ana au.

Filifili se manatu se tasi pe sili atu na e lisiina, ma faaaoga i au fetauaiga ma Satani ma lana vaega. Atonu e te manao e tusi au sini i se isi pepa ma tuu le pepa i se mea e mafai ona e vaaia ai i taimi uma. Ao e faalagolago i le Togiola a le Faaola, o le a fesoasoani le Alii i lau tauiviga ma Satani.

Faaaliga 13

Na tusi Ioane e uiga i malo o le lalolagi o le a faapea ona maua le mana mai ia Satani

I le Faaaliga 13 tatou te faitau ai e faapea, na vaai Ioane i se faaaliga vaaia o se manu feai ua faatusa i malo amioleaga o le lalolagi na pulea e Satani. Na vaaia foi e Ioane e ala atu i nei malo, o le a faia ai e Satani ni galuega maoae ma ni vavega pepelo e faasese ai tagata o le lalolagi.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Faaaliga 12-13 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu ma lou faiaoga: