Faatomuaga i le 1 Tesalonia
Aisea e Suesue ai Lenei Tusi?
O le Tusi Muamua i Tesalonia ua talitonuina o le tusi aupito muamua lea o loo i ai a le Aposetolo o Paulo ma atonu o le tusi aupito leva lea i le Feagaiga Fou. O aoaoga a Paulo o loo i lenei tusi ua talai faapitoa atu i le Afio Mai Faalua o Iesu Keriso, e aofia ai faafitauli o le a feagai ma soo o Iesu Keriso ao lei oo i Lona toe foi mai (tagai 1 Tesalonia 3:3), o le Toetutu o le Au Kerisiano i le Afio Mai Faalua (tagai 1 Tesalonia 4:13–14), ma le taimi o le afio mai o Keriso (tagai 1 Tesalonia 5:1–2). O lou suesueina o lenei tusi, o le a e aoao ai i le Afio Mai Faalua ma maua le faamalosiauga e tumau faamaoni ai i le Alii.
O Ai na Tusia Lenei Tusi?
O Paulo na tusia le 1 Tesalonia (tagai 1 Tesalonia 1:1; tagai foi 1 Tesalonia 2:18).
O Anafea ma o Fea na Tusia ai?
“O Paulo na tusia le tusi i Tesalonia mai Korinito i le taimi o lana malaga lona lua faafaifeautalai,” po o se mea o le T.A. 50–51 (Guide to the Scriptures, “Pauline Epistles,” scriptures.lds.org).
O Ai na Faatatau i ai le Tusiaina, ma Aisea?
Sa tusia e Paulo le 1 Tesalonia i tagata o le Ekalesia i Tesalonika. O Tesalonika o le aai aupito toatele ma manuia lea i le malo o Maketonia i Eleni anamua, ona o ni vaaiga taua se lua: o le aai sa fausia i luga o le uafu sili ona faanatura i le Sami o Aegean, ma sa tu i luga o se auala fesootai sa sosoo ai Roma ma Asia.
I le malaga lona lua faafaifeautalai a Paulo, sa faatonuina ai e le Agaga ia Paulo ma ana soa o—Sila, Timoteo, ma Luka—e malaga e sopoia le Sami Aegean e agai i Maketonia (tagai Galuega 16:6–12). O lenei mea na taimua i le talaiga o le talalelei i Europa. Ina ua uma ona talai atu i Filipi (tagai Galuega 16:12–40), sa malaga atu Paulo ma Sila i Tesalonika.
Sa galulue Paulo ma Sila i Tesalonika, ae sa tutuli faamalosi ese i laua mai le aai e taitai Iutaia (tagai Galuega 17:1–9). Mulimuli ane, sa lipoti atu e Timoteo ia Paulo e faapea, sa tumau faamaoni le Au Paia i Tesalonia e ui lava i sauaga ma sa salalau atu o latou faatosinaga amiotonu (tagai Galuega 18:5; 1 Tesalonia 1:7–8; 3:6–8).
O tagata Tesalonia liliu mai, sa o nisi o tagata muamua o Europa ua talia le talalelei, ma o le iuga, sa faapea ona latou fetaiai ai ma sauaga. Sa tele foi ni a latou fesili sa i ai e uiga i le Afio Mai Faalua. O le mea lea, i lana tusi i Tesalonia, sa tusia ai e Paulo ni upu faamalosiau ma faamalosi ma taliina a latou fesili e uiga i le Afio Mai Faalua o Iesu Keriso.
O A Nisi o Vaaiga Iloga o Lenei Tusi?
O se tasi o autu faapitoa a Paulo i lana Tusi Muamua i Tesalonia o le Afio Mai Faalua. Sa ia taulai atu i le auai o e amiotonu i mea o le a tutupu o le Afio Mai Faalua, aemaise lava le Au Paia o e na maliliu muamua atu (tagai 1 Tesalonia 2:19; 3:13; 4:13–17; 5:1–10). E le pei o le tele o isi tusi a Paulo, o le 1 Tesalonia e le o i ai ni aoaiga tetele, ae na ona ofo atu o le viia ma le faamalo mo le Au Paia i Tesalonia.
Otootoga
1 Tesalonia 1–3. Ua faaali atu e Paulo le agaga faafetai tele i le Au Paia i Tesalonia. Ua ia faamanatu atu i lana au faitau e uiga i lana galuega agalelei ia i latou ma faailoa atu le olioli ona o lo latou faamaoni. Ua ia uunaia le Au Paia ia ola i le alofa i le tasi ma le isi ma i tagata uma.
1 Tesalonia 4–5. Ua tau atu e Paulo i le Au Paia ia mama ma ia faapaia i latou lava. Ua ia faamalamalama atu, pe a toe afio mai le Alii, o le Au Paia o e sa faamaoni i la latou molimau ia Keriso, i latou o e ua maliliu ma i latou e ola pea, o le a tutulai ae e faafetaiai le Alii. Ua faamanatu atu e le Aposetolo i tagata o le Ekalesia ia saunia ma vaavaai mo le aso e afio mai ai Keriso.