Iunite 24, Aso 3: Kalatia

Iunite 24: Aso 3

Kalatia

Folasaga

Sa aoaiina e le Aposetolo o Paulo le Au Paia i Kalatia mo le mulimuli atu i aoaoga sese, ma sa ia aoaiina faiaoga sese o e sa taitaieseina i latou. Sa ia aoao atu foi, e pei lava ona avea Aperaamo ma suli o le Atua, e mafai foi ona avea le Au Paia i Kalatia ma suli o le Atua e ala i le faatuatua ma le mulimuli ia Iesu Keriso, nai lo o le usitai i faiga masani o le tulafono a Mose.

Kalatia 1–2

Ua aoai e Paulo le Au Paia mo le mulimuli i faiaoga sese ma uunaia i latou e toe foi mai i le talalelei

Vaai faalemafaufau e faapea, na tau atu e se tasi o nai ou tei po o ni uo ua na le toe mautinoa pe moni aoaoga o le Ekalesia. O se taunuuga, ua le toe alu ai lenei tagata i le Lotu ma ua le toe ola i le talalelei.

Tusi i lau api talaaga mo le suesueina o tusitusiga paia, le mea o le a e tau atu i si ou tei po o le uo, e fesoasoani ia toe foi mai ai i le talitonu i aoaoga a le Ekalesia.

Ao e suesue i le Kalatia 1 ma aoao ai le mafuaaga na liliuese ai le Au Paia i Kalatia mai le talalelei moni, vaavaai mo se upumoni e mafai ona fesoasoani i lou tei po o le uo e toe maua ai lona faatuatua.

O Kalatia o se vaega i matu-tutotonu o Asia Itiiti lea e aofia ai le tele o aai sa asiasi i ai le Aposetolo o Paulo i le taimi o ana malaga faafaifeautalai lona lua ma lona tolu (tagai Galuega 16:6; 18:23; tagai foi Faafanua o le Tusi Paia, nu. 13, “O Malaga Faafaifeautalai a le Aposetolo o Paulo”). Faitau le Kalatia 1:6–7, ma vaavaai mo se faafitauli sa i ai i tagata o le Ekalesia i Kalatia.

O i latou o e sa fai ma faasoesa i le Au Paia i Kalatia ma faapiopioina aoaoga o le talalelei sa faatupuina le masalosalo (tagai Kalatia 1:7, vaefaamatalaga a) e uiga i aoaoga a Paulo e faapea, o le faaolataga e na o Iesu Keriso lava e oo mai ai. O nei faiaoga pepelo o ni Kerisiano Iutaia o e sa taua o le au sa Iuta. Sa latou faapea mai, e tatau i le Au Paia i Kalatia ona peritomeina ma usitai i faiga masani o le tulafono a Mose ina ia mafai ona faaolaina.

Faitau le Kalatia 1:8–9, ma vaavaai mo le mea na fai mai ai Paulo e uiga ia i latou o e talaiina se talalelei e ese mai, nai lo le talalelei sa ia talaiina atu ao avea o se Aposetolo a le Alii.

Faitau le Kalatia 1:10–12, ma vaavaai mo le punavai o aoaoga a Paulo. Atonu e te manao e faailoga pe faailoa i au tusitusiga paia mea e te maua.

Mai aoaoga a Paulo, ua tatou aoao ai e faaali mai e Iesu Keriso aoaoga faavae moni i Ana perofeta.

Tali ni fesili se lua po o fesili uma nei i lau api talaaga mo le suesueina o tusitusiga paia:
1. E mafai faapefea e le manatua o le Atua o le punavai o aoaoga faavae moni, ona fesoasoani ia i tatou pe a i ai ni a tatou fesili e uiga i aoaoga a perofeta?
2. O a ni mea e mafai ona tatou faia e maua ai ni faaaliga mai le Atua ina ia mafai ona tatou iloa mo i tatou lava e moni aoaoga a perofeta?
3. E mafai faapefea ona fesoasoani lenei upumoni i se tasi o loo tauivi ma le talitonu i aoaoga a perofeta?

E pei ona tusia i le Kalatia 1:13–2:21, na tau atu e Paulo i le Au Paia e uiga i lona liliuga ma lana malaga muamua faafaifeautalai. Sa ia faamalamalama mai foi le mafuaaga sa le manaomia ai e Kerisiano nuuese ona faalagolago i uputuu e faapea, o le faaolataga sa i ai lea i le tulafono a Mose, ae e ala i le faatuatua ia Iesu Keriso e faamagaloina (tauamiotonuina) ai i tatou. Na molimau mai Paulo e faapea, sa ola o ia “i le faatuatua i le Alo o le Atua, o le na alofa mai ia te au, ma foaiina mai o ia e ia e fai mou sui” (Kalatia 2:20).

Kalatia 3–4

Ua valaaulia e Paulo ia tagata Kalatia ia maua uma faamanuiaga na folafolaina ia Aperaamo e ala ia Iesu Keriso

Aisea e ono lagona ai e tagata taitoatasi nei se faalogona le lelei i le mauaina o faamanuiaga uma a le Alii, e faatusa atu i isi i le Ekalesia o e sa iloaina ma sa faamaoni i le talalelei mai lava ao laiti?

O se alii talavou sa ola ae i se aiga e le toaaga i le ekalesia, ma sa lei aoaoina i le talalelei ao laitiiti o ia. Ua toe foi mai ma toaaga lona aiga i le Ekalesia ma ua amata ona aoao ma ola i le talalelei.
O se tamaitai sa faalumaina ma faitioina le Ekalesia mo le tele o tausaga. Sa ia lagonaina lata mai nei se suiga o le loto ma sa papatisoina.

Ao e suesue i le Kalatia 3–4, vaavaai mo se upumoni e mafai ona fesoasoani e te malamalama ai i faamanuiaga o loo avanoa i tagata uma, e tusa lava po o a ona tulaga ma filifiliga sa i ai muamua.

Talu ai o le toatele o le Au Paia i Kalatia o tagata nuuese ua liliu mai i le faaKerisiano, sa le o i latou o ni fanau moni o Aperaamo, o e na folafola atu i ai faamanuiaga uma a le Atua.

Faitau le Kalatia 3:7–9, ma vaavaai mo le mea na aoao mai e Paulo e uiga ia i latou o “e faatuatua” (Kalatia 3:7), po o e talitonu ia Iesu Keriso.

E tusa ai ma le fuaiupu 8, o le a le mea na folafola atu e le Alii ia Aperaamo?

E tusa ai ma le fuaiupu 9, o le a le mea o le a tupu ia i latou o e faatuatua ia Iesu Keriso?

Ina ia “manuia [e] ua faatuatua faatasi ma Aperaamo” (Kalatia 3:9) e faatatau i le mafai ona maua faamanuiaga o le feagaiga sa faia e le Atua ma Aperaamo, e ala atu ia te ia o le a mafai ai e tagata uma ona olioli i faamanuiaga o le perisitua maualuga atu, faaipoipoga faaselesitila, ma le faaeaga (tagai Taiala i Tusitusiga Paia, “Abrahamic Covenant,” scriptures.lds.org).

Ua tatou faitau i le Kalatia 3:10–25 o le tulafono a Mose sa lei fuafuaina ia avea ma auala e mafai ona “tauamiotonuina” (Kalatia 3:11) ai tagata, o lona uiga sa faamagaloina i latou mai agasala ma taua ai e mama. Sa fuafuaina e avea ma se taiala po o se “taitaitama” (Kalatia 3:24) e fesoasoani i le fanauga a Isaraelu ia o mai ia Iesu Keriso ma ia tauamiotonuina e ala i lo latou faatuatua ia te Ia. Ia manatua ina ia tauamiotonuina o lona uiga “ia faamagaloina mai agasala ma tautino atu e le tausalaina” (Guide to the Scriptures, “Justification, Justify,” scriptures.lds.org).

Faatumu le siata lenei i le faitauina o fuaitau o mau ma tali fesili:

Kalatia 3:26–27. O le a le mea e tatau ona tatou faia e maua ai faamanuiaga na folafolaina ia Aperaamo?	Kalatia 3:28–29; 4:7. E le afaina po o ai po o le a foi sa avea muamua ai i tatou, o le a le mea e avea ai i tatou pe a tatou ulu atu i le feagaiga o le talalelei e ala i le papatisoga?

Mai le Kalatia 3:26–29; 4:7 tatou te aoao ai, o i latou uma o e faaali atu le faatuatua ia Iesu Keriso ma ulu atu i le feagaiga o le talalelei o le a tasi ia Keriso ma suli o le Atua.

Aisea e taua ai le iloa ua folafola mai e le Atua nei faamanuiaga i tagata uma o e ulu atu i le feagaiga, e tusa lava po o a ona tulaga ma filifiliga sa i ai muamua?

Tatou te faitau i le Kalatia 4:8–31 na valaaulia e Paulo le Au Paia i Kalatia e toe foi ia Iesu Keriso ma ia sosola ese mai le faapologaina lea e oo mai i le taumafai e ola i le tele o uputuu o le tulafono a Mose.

Kalatia 5–6

Ua uunaia e Paulo le Au Paia i Kalatia e toe faaali o latou faatuatua ia Iesu Keriso.

O a nisi o faaosoosoga e sili ona faigata o feagai ma oe? E mafai faapefea ona e faatoilaloina nei faaosoosoga?

Ao e suesue i le Kalatia 5–6, vaavaai mo mataupu faavae e fesoasoani e te faatoilalo ai faaosoosoga.

Faitau le Kalatia 5:16–17, ma vaavaai mo malosiaga faatautava e lua na faamatalaina e Paulo.

O le “savavali i la le Agaga” (Kalatia 5:16) o lona uiga ia ola agavaa mo le, ma mulimuli i uunaiga a le Agaga Paia. O le “faia lea [e outou] o le tuinanau o le tino” (Kalatia 5:16) o lona uiga o le gauai atu i faaosoosoga ia agasala.

Faauma le mataupu faavae lenei e faavae i mea ua e aoaoina mai le Kalatia 5:16: Ao tatou savavali i le Agaga, o le a tatou faatoilaloina .

Mafaufau pe mafai faapefea e le savavali i le Agaga ona fesoasoani e te faatoilalo ai faaosoosoga.

Faitau le Kalatia 5:22–23, ma vaavaai mo isi taunuuga o le savavali i le Agaga. (Ia manatua o le Kalatia 5:22–23 o se fuaitau o le mau tauloto. Atonu e te manao e faailoga i se auala e iloagofie ai ina ia mafai ona e mauaina i le lumanai.)

Mau Tauloto—Kalatia 5:22–23

Ina ia fesoasoani ia te oe i le taulotoina o le Kalatia 5:22–23, i lau api talaaga mo le suesueina o tusitusiga paia, tusi se ata o se laau e i ai ni ona fua se iva—e tolu laina e i ai ni fua taitolu. I luga ae o le laau, tusi ai le Ao fua o le Agaga o le … I lalo ifo o le laau, tusi ai le e le faatulafonoina mea faapena. E amata mai i le laina pito i luga, tusi ai le mataitusi muamua o fua taitasi na lisiina e Paulo. Faataitai ona tauloto le mau tauloto e ala i le tilotilo atu i le ata lenei ma faatatau atu i le fuaitau o le mau pe a manaomia. Faaauau ona tauloto seia oo ina mafai ona e faia le mau e aunoa ma le tilotilo i le ata po o au tusitusiga paia. Tauloto atu le mau i se tasi o lou aiga po o le vasega seminare.
Tali le fesili lenei i lau api talaaga mo le suesueina o tusitusiga paia: E mafai faapefea e le mauaina o nei meaalofa ona faateleina lou gafatia e fesoasoani ai i tagata?

Faitau le Kalatia 6:1–2, ma vaavaai mo le mea na aoao mai e Paulo e uiga i le ala e tatau ona tali atu ai tagata o le Ekalesia i se tasi ua agasala. O le “maua …i se tasi agasala” (Kalatia 6:1) o lona uiga ia agasala.

Aisea e taua ai le i ai “o le loto o le agamalu” (Kalatia 6:1) ao tatou taumafai e fesoasoani i se tasi e toe foi mai i le ala o le talalelei?

E pei ona tusia i le Kalatia 6:3–5, na aoao mai Paulo e le tatau ona tatou faasausili ma faafia-amiotonu ma o tagata uma o le a “ave i lana lava avega” (Kalatia 6:5), po o le faamasinoina mo ana lava filifiliga.

O a laau e tutupu mai pe a e totoina ituaiga fatu taitasi nei? Tusi au matega i avanoa e fetaui i ai. (O tali o loo i le faaiuga o le lesona lenei.)

a.
e.
i.

Sa faaaoga e Paulo le manatu e uiga i fatu e aoao mai ai upumoni faaleagaga. Faitau le Kalatia 6:7–8, ma vaavaai mo le mea na aoao mai e Paulo, i mea e mafai ona tatou faamoemoeina pe a tatou faasalalauina pe totoina ia fatu. O aoaoga a Paulo i fuaiupu nei e masani ona taua o le tulafono o le seleselega.

Faitau le Kalatia 6:9–10, ma vaavaai mo le mafuaaga na aoao atu ai e Paulo le tulafono o le seleselega ina ua uma ona ia valaaulia tagata Kalatia ia fesoasoani le tasi i le isi ia tumau pe toe foi mai i le ala o le talalelei.

Mai nei fuaiupu ua tatou aoao ai, afai tatou te maelega i le amio lelei, o le a tatou selesele i faamanuiaga o a tatou galuega.

Tali i le le itiiti ifo ma le lua o galuega faatino nei, i lau api talaaga mo le suesueina o tusitusiga paia:
1. E mafai faapefea ona fesoasoani le folafolaga o le a tatou selesele “i ona po e tatau ai” ina ia tatou le “faavaivai” (Kalatia 6:9), pe fati i a tatou taumafaiga e auauna atu i isi ma ia ola i le talalelei i o tatou lava olaga?
2. O le a se taimi sa e maelega ai, pe sa maelega ai se tasi e te iloa i le amio lelei, e ui lava sa lei vave oo mai faamanuiaga?
3. Ia mafaufau ma le agaga tatalo po o ai e mafai ona e fesoasoani e toe foi mai i le ala o le talalelei. Ao e mafaufau i lenei tagata, tusi se sini e uiga i le ala o le a e maelega ai i mea lelei ao e saili e fesoasoani ia te ia, e ui lava ina e le vaai vave i ni taunuuga o au taumafaiga.

E pei ona tusia i le Kalatia 6:11–18, na faaiuina e Paulo lana tusi i le Au Paia i Kalatia e ala i le molimau atu, o le filemu ma le alofa mutimutivale o Iesu Keriso o loo i luga o i latou uma o e o le a avea ma tagata fou e ala i le faatuatua i Lona suafa.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Kalatia 1–6 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lou faiaoga: