Mataio 8–10

Folasaga

A o femaliuai Iesu i Kalilaia, sa Ia faatinoina le tele o vavega. Sa Ia valaauina foi Aposetolo e Toasefululua, faaee atu ia i latou le mana ma aoaoina i latou, ona auina atu lea o i latou e auauna atu i tagata.

Mataio 8:1–9:34

Ua faatino e Iesu le tele o vavega

Afai e te iloa o le a afio mai le Faaola e asiasi atu i le tou nuu po o le taulaga i le aso, mata o ai e te aumaia ia te Ia ina ia faamaloloina? Aisea?

Faitau poloka mau ia e tolu, ma vaavaai mo ituaiga eseese o vavega na faia e Iesu: Mataio 8:1–4; Mataio 8:5–13; Mataio 8:14–15; Mataio 8:28–32; Mataio 9:1–8; Mataio 9:18–19, 23–26; Mataio 9:20–22; Mataio 9:27–31; Mataio 9:32–33.

Na e matauina le mana tele na ia Iesu? Ua ia te Ia le mana e pulea ai elemene o le lalolagi, e faamalolo ai ma’i, ma tutuliese ai temoni.

Mai nei tala ua tatou aoao ai e mafai e Iesu ona faamalolo i tatou i o tatou mafatiaga ma ma’i.

O se mafatiaga o se ma’i, augavaivai, po o se vaivaiga. Mafaufau pe na mafai faapefea e le Faaola ona faamalolo i tatou pe faamalolosia o tatou vaivaiga e aunoa ma le savali mai ia i tatou i le tino i aso nei.

Mataio 9:35–10:8

Ua valaauina e Iesu ia Aposetolo e toasefululua

Afai e avanoa, asiasi i le LDS.org ma vaavaai mo ata o Aposetolo o i ai nei i le Ekalesia, e aofia ai ma le Au Peresitene Sili (pe sue o latou ata i se lomiga o le Ensign po o le Liahona) o le konafesi.

O le a le mea e tulagaese ai nei tagata i tagata uma o i le lalolagi?

A o e suesueina le Mataio 9:35–10:8, vaavaai mo upumoni e uiga i le matafaioi a Aposetolo ma faamanuiaga e mafai ona latou aumaia i lou olaga.

Faitau le Mataio 9:35, ma vaavaai mo mea na faia e Iesu e faaopoopo i le faamaloloina o tagata. Atonu e te manao e faailoga mea ua e maua.

A o folafola atu e Iesu le talalelei ma faatino ia vavega i Iutaia, sa faateleina le aofai o tagata sa mulimuli ma saili atu ia te Ia.

Faitau le Mataio 9:36–38, ma vaavaai po o ai lea na fetalai le Faaola e manaomia e fesoasoani atu ia te Ia e auauna atu ia i latou uma o e mulimuli ia te Ia.

Faitau le Mataio 10:1–4, ma vaavaai mo mea na faia e Iesu e fesoasoani ai ia faafetaiaia manaoga o tagata. Atonu e te manao e faailoga mea ua e mauaina. Mai lenei tala ua tatou aoao ai ua valaauina e Iesu Keriso ia Aposetolo ma faaee atu i o latou luga Lana pule o se ala lea e auauna atu ai o Ia i tagata i le lalolagi. Atonu e te manao e tusi lenei faamatalaga i totonu o lau tusitusiga paia i talaane o le Mataio 10:1–4.

Manatua o mea na tutupu i le Evagelia a Mataio e le o tuuina mai i taimi uma i le faasologa tonu o le taimi. Na valaauina e Iesu Keriso ia Aposetolo, ona Ia aoaoina lea o i latou i Lana Lauga i luga o le Mauga (Mataio 5–7; tagai Ogatusa o Evagelia).

Faitau le Mataio 10:5–8, ma vaavaai mo mea na poloai atu Iesu Keriso i Ana Aposetolo e fai.

I Eleni o le upu aposetolo o lona uiga o le “o le ua auina atu.” I le taimi muamua na auina atu ai Aposetolo na o i latou o le aiga o Isaraelu (tagai Mataio 10:5–6). Mulimuli ane, sa poloaiina e le Faaola ia talai atu foi le talalelei i Nuuese, po o i latou e le o ni o le aiga o Isaraelu (tagai Mataio 28:19; Galuega 1:8). Na poloaiina foi Aposetolo o le Au Paia o Aso e Gata Ai e folafola atu le talalelei ma ia avea ma molimau ia Iesu Keriso i le lalolagi uma (tagai MF&F 107:23).

O a ni mea o e matauina e tutusa ai mea na faia e Iesu ma galuega na Ia poloaiina Ana Aposetolo e fai? Mai le Mataio 10:5–8 ua tatou aoao ai ua valaauina e le Alii ia Aposetolo e folafola atu Lana talalelei ma faia Lana galuega.

O a ni faataitaiga o le ala o loo talai atu ai e Aposetolo i le taimi nei ma auauna atu e pei ona o le a faia ai e Iesu Keriso pe ana i ai o Ia iinei?

Afai o maua, asiasi i le LDS.org ma matamata pe faitau se lauga o le konafesi aoao na tuuina mai e se Aposetolo o le taimi nei (pe faitau se lauga o le lomiga o le konafesi aoao i le Ensign po o le Liahona).

Tali fesili nei i lau api talaaga mo le suesueina o tusitusiga paia:
1. E mafai faapefea e le malamalama faapea o Aposetolo na tofia e Iesu Keriso e fai Lana galuega, ona aafia ai le ala tatou te tali atu ai i mea latou te aoao mai ma fautuaina i tatou e fai?
2. O a ni auala o aafia ai lou olaga i auaunaga ma savali a Aposetolo o ona po nei?

Mafaufau pe mafai faapefea ona e sailia ma le faamaoni ni avanoa e faalogologo ai, suesue, ma faaaoga ia upu a Aposetolo filifilia a le Alii.

Mataio 10:9–42

Ua faatonu e Iesu ia Aposetolo ae latou te lei o atu e folafola ma auauna atu

I le Mataio 10:9–18 ua tatou faitau ai na faatonuina e le Alii le au Aposetolo e faalagolago i le Tama Faalelagi e saunia mea latou te manaomia a o latou malaga atu e talai le talalelei. Na aoao atu foi e le Faaola i latou e faamanuia i tagata o e taliaina ma faaafe i latou.

Iesu ma Aposetolo — Ua faatonu e Iesu Ana Aposetolo

Mafaufau i se taimi na fai atu ai e se tagata o se isi faatuatuaga se fesili faigata e uiga i le talalelei pe uiga foi i se mea o finau ai e uiga i le Ekalesia. O le a se tele o lou talitonu mautinoa i lou iloa o le mea e tatau ona e fai atu ai i lena tulaga?

A o faaauau pea ona e suesue i le Mataio 10, vaavaai mo se mataupu faavae i aoaoga a Iesu i Ana Aposetolo e mafai ona fesoasoani ia i tatou pe a manaomia ona tatou faamalamalama atu le talalelei pe faasoa atu a tatou molimau.

Faitau le Mataio 10:16–20, ma vaavaai mo ituaiga o luitau na fetalai Iesu o le a feagai ma le au Aposetolo a o latou malaga atu e talai.

E tusa ai ma le fuaiupu 19–20, na faapefea ona iloa e le au Aposetolo mea latou te fai atu ai i nei tulaga faigata? (O le fasifuaitau “aua tou te popole” o lona uiga “aua nei popole ma atuatuvale) [tagai Mataio 10:19, vaefaamatalaga a].)

Mai mea na e aoaoina i le Mataio 10:19–20, faamaea le mataupu faavae lea e uiga i le tautala atu i isi: A tatou i ai i le galuega a le Alii, o le a Ia .

Tali se fesili e tasi po o fesili uma i lau api talaaga mo le suesueina o tusitusiga paia:
1. E mafai faapefea ona fesoasoani le mataupu faavae na e faailoaina mai ia te oe pe a fesili atu se tasi ia te oe i se fesili faigata e uiga i le Ekalesia?
2. O le a se taimi na e lagonaina ai ua musuia oe e le Alii ia iloa le mea e te fai atu ai i se isi tagata?

Mataio 10:21–42 o loo tusia faapea na faauau pea ona tuu atu e Iesu Keriso i Ana Aposetolo ni faatonuga, lapataiga, ma le faamafanafanaga e uiga i luitau o le a latou feagai.

Faitau le Mataio 10:37–38, ma vaavaai mo osigataulaga na fetalai mai le Faaola e tatau ona tatou naunau e faia e faapei o Ona soo. O le fasifuaitau “o lou agavaa” i nei fuaiupu o lona uiga o le avea o se sui agavaa o le Alii ma agavaa mo Ana faamanuiaga.

Mafaufau pe aisea e tatau ai i soo o Iesu Keriso ona alolofa ia te Ia e sili atu i lo isi—e aofia ai tagata o o latou lava aiga.

O le satauro o loo ta’ua i le Mataio 10:38 e faasino i le satauro faaletino na amoina e Iesu Keriso e faataunuu ai le finagalo o le Tama Faalelagi ma aumaia ai le faaolataga i isi.

O le a sou manatu o le a le uiga o le amo o o tatou satauro ma mulimuli atu ia te Ia?

Faitau le Mataio 10:39, ma vaavaai mo mataupu faavae na aoao mai e le Faaola e uiga i le ositaulaga. O le Faaliliuga a Iosefa Samita ua faamanino mai ai le amataga o lenei fuaiupu e faitauina, “O le e saili e faasaoina lona ola …” (Faaliliuga Iosefa Samita, Mataio 10:39 [i le Mataio 10:39, vaefaamatalaga a]). I lea talaaga, o le fasifuaitau “faasaoina lona ola” o lona uiga e ola ma le manatu faapito ae le saili e auauna atu i le Atua ma Ana fanau.

O a ni auala e te manatu o tagata o loo taulai atu o latou lava manao ma naunauga manatu faapito o le a iu ina “maumau” o latou ola? Faamaea le mataupu faavae lea e faaaoga ai au lava upu: Afai tatou te saili e faasao o tatou ola, ona .

Mafaufau e maka le folafolaga i le fuaiupu 39 lea na faia e le Faaola ia i latou o e maumau lo latou ola ona o Ia. O le faamaumau o o tatou ola ona o Ia e sili atu i le na o le naunau e oti mo Ia. O lona uiga o le naunau e ofo atu i tatou lava i aso taitasi e auauna atu ia te Ia ma tagata o loo faatasi ma i tatou.

O le a sou manatu o le a le uiga o le a tatou maua o tatou ola pe a faamaumau ona o Ia?

Faamaea le mataupu faavae lea e faaaoga ai au lava upu: Afai e faamaumau o tatou ola ona o Iesu Keriso, ona .

Faitau atu le faamatalaga lenei mai ia Peresitene Thomas S. Monson. “Ou te talitonu ua tau mai e le Faaola ia i tatou, sei vagana ua tatou faamaumau o tatou ola ona o isi, o le a itiiti se faamoemoega o o tatou lava olaga. O i latou o e ola mo na o i latou lava, e iu ina maanuminumi ma, maumau ai lo latou ola, a o i latou o e faaalu o latou lava ola e auauna atu ai i isi, e ola ma lauusiusi—ma faasaoina ai o latou ola.” (“O le a se mea ua ou faia mo se tasi i le aso?” Ensign po o le Liahona, Nov. 2009, 85).

Tali fesili nei i lau api talaaga mo le suesueina o tusitusiga paia:
1. O ai ua e iloa ua filifili e faamaumau lona ola ona o Iesu Keriso? O faapefea ona faia e lena tagata?
2. O le a le aafiaga o lena tagata ona o lena faaiuga?
3. O a ni mea e mafai ona e faia nei po o se taimi lata mai e faamaumau ai lou ola i le galuega a Iesu Keriso ma isi?
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataio 8–10 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: