Faatomuaga i le Filemoni
Aisea e Suesue ai Lenei Tusi?
O le Tusi ia Filemoni o loo i ai fautuaga patino mai le Aposetolo o Paulo e uiga i se tulaga i le pologa a Filemoni o Onesemo. Ao e suesue i lenei tusi, e mafai ona e aoao ai, a auai tagata i le Ekalesia a Iesu Keriso, e avea i latou o ni uso ma ni tuafafine i le talalelei (tagai Filemoni 1:16). E mafai foi ona e lagonaina le taua o le tiute o loo i ai o soo o Iesu Keriso, o le faasafua atu o le alofa mutimutivale ma le faamagalo atu i isi (tagai Filemoni 1:16–17).
O Ai na Tusia Lenei Tusi?
O Paulo na tusia le Tusi ia Filemoni (tagai Filemoni 1:1).
O Anafea ma o Fea na Tusia ai?
O le Tusi ia Filemoni sa saunia e Paulo i le taimi o le faafalepuipuiina muamua o le Aposetolo i Roma, i se vaitaimi o le T.A. 60–62 (tagai Filemoni 1:1, 9; Taiala i Tusitusiga Paia, “Pauline Epistles,” scriptures.lds.org).
O Ai Na Tusia i Ai ma Aisea?
“O le tusi o se tusi patino lava e uiga ia Onesemo, o se pologa sa gaoi i lona matai, o Filemoni, ma sola atu ai i Roma” (Bible Dictionary, “Pauline Epistles”). Atonu o Filemoni o se tagata Eleni liliu mai ma sa nofo i Kolose (tagai Kolose 4:9). Sa ia faatagaina se aulotu a le Ekalesia e faapotopoto i lona fale (tagai Filemoni 1:2, 5). Ina ua mavae lana solaaga, sa auai ai Onesemo i le Ekalesia ma avea o “le uso pele … i la le Alii” (Filemoni 1:16; tagai Filemoni 1:10–12).
Sa tusi atu Paulo ia Filemoni e uunaia ai o ia e toe talia atu Onesemo o se uso i le talalelei e aunoa ma ni faasalaga ogaoga lea e masani ona faia i pologa e sosola ese (tagai Filemoni 1:17). Sa faapea ona ofo atu foi Paulo e totogi soo se mea tautupe na aveesea e Onesemo lea na mafua ai ona tigaina Filemoni (tagai Filemoni 1:18–19).
O A Nisi o Vaaiga Iloga o Lenei Tusi?
O Filemoni o le tusi aupito puupuu ma atonu o le tusi aupito patino a Paulo. O se tusi sa auina atu i se tagata patino; o le uiga lava lena, e le o aofia ai se tele o anotusi faaleaoaoga faavae. Ae ui i lea, o le aioiga a Paulo ia Filemoni ina ia faalelei ma le pologa o Onesemo, ua faaalia ai le faatatauga o aoaoga faavae o le talalelei i le olaga i aso taitasi—i le tulaga lenei, ua faaalia ai o la tatou sootaga ma Iesu Keriso e aumaia ai i tatou i se sootaga faaleaiga ma isi soo uma o Keriso ma faamamafa mai ai le taua o le alofa mutimutivale ma le faamagalo atu.
Otootoga
Filemoni 1. Ua faafetaia e Paulo ia Filemoni mo le alofa ua ia faaalia i le Au Paia. Ua ia faamalamalama atu o le pologa a Filemoni na sola ese, o Onesemo, ua liliu mai i le talalelei. Ua talosaga atu Paulo ia Filemoni e toe talia Onesemo o se uso i le Alii. Ua ia ofo atu e toe totogi atu ia Filemoni soo se mea tautupe na leiloa, na mafua ona ia tigaina ai ona o Onesemo.