Eperu 1–4

Folasaga

Na aoao atu le Aposetolo o Paulo i le Au Paia i Eperu, po o Kerisiano Iutaia. Sa ia aoaoina foi i latou e uiga i le Togiola a le Faaola ma nisi o faamanuiaga e oo mai o se taunuuga o le Togiola. Sa faasoa mai e Paulo le aafiaga o Isaraelu anamua o le feofeoai i le vao, ina ia aoao ai le Au Paia i mea e ao ona latou faia e ulu atu ai i le malologa o le Alii.

Eperu 1

Ua aoao mai Paulo e uiga i le natura o Iesu Keriso

Faitau tulaga nei:

Ua lelava se tamaitai talavou i le tauina o ia o se teine “lelei” ona e le auai faatasi ma ana uo i nisi o a latou gaoioiga. Ua mafaufau o ia e tuu ese ona tulaga faatonuina ina ia avea ai o se tasi o le vaega.
Ua iloa e se alii talavou o loo auauna faamisiona, o le galuega faafaifeautalai e sili atu le faigata nai lo le mea na ia mafaufauina, ma ua mafaufau ai e toe foi i le aiga.

O a mea e tutusa ai nei tulaga? O a nisi o mafuaaga e ono mafaufau ai tagata e lafoai a latou taumafaiga e fai le mea ua latou iloa e sa’o?

Sa tusi e le Aposetolo o Paulo lana Tusi i Eperu i se taimi na le toe auai atu ai nisi o tagata Iutaia (po o Eperu) i sauniga a le Ekalesia ona o sauaga ma isi ituaiga o faafitauli. O lea na latou toe foi ai i mea na masani ai ma le saogalemu o tapuaiga masani faa Iutaia, lea sa le’i aofia ai se talitonuga ia Iesu Keriso (tagai Eperu 10:25, 38–39). Sa tusi e Paulo lenei tusi e uunaia ai nei tagata o le Ekalesia ina ia tumau faamaoni ai ia Iesu Keriso.

A’o e suesue i le tusi lenei a Eperu, vaavaai mo ni upumoni e mafai ona fesoasoani e te tumau faamaoni ai ia Keriso pe a oo i se taimi e te lagona ai le fia togi o le solo.

Faitau le Eperu 1:1–3, 10, ma vaavaai mo aoaoga faavae na aoao atu e Paulo i le Au Paia Iutaia e uiga i le Faaola.

I lau api talaaga mo le suesueina o tusitusiga paia, tusi ai ni aoaoga faavae e uiga ia Iesu Keriso e te tau i ai i le Eperu 1:1–3, 10. Mo se faataitaiga, mai le fuaiupu 2 ma le 10 e mafai ona e faailoa mai le aoaoga faavae lenei: Na foafoaina e Iesu Keriso le lagi ma le lalolagi. Pe a e vaavaai toto’a o le a e iloa ai, o nei fuaiupu o loo aoao mai ai ni aoaoga faavae taua faaopoopo e uiga i le Faaola.

Matau le fuaitau “matua tusa lava ma ia” i le Eperu 1:3. O le uiga o le fuaitau lenei, o Iesu Keriso e foliga uma lava i le Tama Faalelagi ma e i ai foi Lona uiga paia. O le fuaitau “faatumauina e ia mea uma lava i lana afioga mana” i le fuaiupu lava lena, o lona uiga o Iesu Keriso e pule aoao.

Mafaufau po o le fea o upumoni na e faailoaina mai i le Eperu 1:1–3, 10 e ono aoga ia te oe pe afai e faaosoosoina oe e alu ese mai i le finagalo o le Alii.

O se autu e masani ona maua i le Eperu o le silisili ese o Iesu Keriso. Mo se faataitaiga, i le Eperu 1:4–14, na faaali mai ai e Paulo o le Faaola e silisili atu nai lo o agelu. I mataupu e sosoo ane ai, sa faaauau ona ia faaali mai le maoae ma le silisili ese o Keriso.

Aisea o le a fesoasoani ai le iloa o Iesu Keriso e silisili nai lo o mea uma, i se tagata o loo tauivi ia tumau le faamaoni ia te Ia?

Faaauau ona vaavaai mo lenei autu a’o e suesue i le vaega o loo totoe o le tusi a Paulo i Eperu.

Eperu 2

Ua aoao mai Paulo o Iesu Keriso o le Kapeteni o lo tatou faaolataga

Mafaufau i le faagasologa o le filifilia o se kapeteni po o se taitai mo ni au po o ni vaega eseese e mafai ona e auai ai (mo se faataitaiga, au afeleti, au falo [i se mataupu], tala faatino, po o kalapu i le aoga] O a ni tomai e te ono vaavaai i ai pe ana faapea o e filifilia se kapeteni po o se taitai?

I le Eperu 2, sa faamalamalama atili mai ai e le Aposetolo o Paulo le natura ma le faasinomaga o Iesu Keriso i tagata Iutaia liliu mai ina ia fesoasoani e malamalama ai i le pogai e tatau ona latou faaauau ai pea ona mulimuli ia te Ia. Faitau le Eperu 2:10, ma vaavaai mo le mea na aoao mai Paulo o loo kapeteni ai Iesu Keriso.

Mai le fuaiupu lenei, e mafai ona tatou iloa ai o Iesu Keriso o le Kapeteni o lo tatou faaolataga.

Tali le fesili lenei i lau api talaaga mo le suesueina o tusitusiga paia: O le a le itu o loo Kapeteni ai e Iesu Keriso lo tatou faaolataga?

Faitau le Eperu 2:8–9, 14–18 ma vaavaai mo fuaitau o loo faamatala ai le pogai ua agavaa ai le Faaola e fai ma Kapeteni o lo tatou faaolataga. Atonu e te manao e faailoga mea e te maua.

I le Eperu 2:9, o le aoaoga a Paulo e faapea o Iesu Keriso “na faamaualaloina teisi i agelu” e faatatau i le afio ifo o le Faaola mai Lona afioaga i le muai olaga ina ia tofo i le olaga nei ma Lona puapuagatia i le maliu, o lea na faapea ai ona Ia “afio ifo …i lalo o mea uma” (MF&F 88:6). O le fuaitau “i ai i le fanau le tino tagata ola” i le Eperu 2:14 o lona uiga o i tatou o tagata e oo i ai le oti. O le fuaitau “ina ia faia [e ia] se togiola mo agasala a le nuu” i le Eperu 2:17 o lona uiga na mafai e Keriso ona togiola a tatou agasala.

E tusa ai ma le fuaiupu 9, o le a le mea na fai e Iesu mo tagata uma? E tusa ai ma le fuaiupu 14, o ai na Ia faatoilaloina e ala i Lana Togiola?

Ia matau, na le gata ina faatatau atu Paulo i le Faaola o le Kapeteni o lo tatou faaolataga, ae sa ia ta’ua foi o Ia “o se faitaulaga sili e alofa ma faamaoni” (Eperu 2:17). Sa faatatau e Paulo ia Iesu Keriso i se faitaulaga sili Iutaia ona o le faitaulaga sili sa manatu i ai o se fautua i le va o le tagata ma le Atua.

E tusa ai ma le Eperu 2:18, aisea e mafai ai e le Faaola ona faamafanafana pe fesoasoani ia i tatou?

Faitau le Eperu 4:14–16, ma vaavaai mo malamalamaaga faaopoopo sa tuuina mai e Paulo i le pogai ua avea ai le Faaola o se faitaulaga sili alofa ma faamaoni.

Mai le Eperu 2:17–18 ma le 4:14–16, e mafai ona tatou iloa ai le upumoni lenei: Ona sa puapuagatia Iesu Keriso ma sa faaosoosoina i mea uma, ua malamalama lelei ai o Ia ia i tatou ma e mafai ona fesoasoani ia i tatou i taimi o puapuaga. (Tagai foi Alema 7:11–13.)

I lau api talaaga mo le suesueina o tusitusiga paia, tusi ai ou lagona pe faapefea ona fesoasoani upumoni na faailoa mai i le Eperu 2 e te maua ai le to’a i lau faaiuga e mulimuli ia Iesu Keriso ua fai ma ou taitai.

Eperu 3–4

Ua aoao mai Paulo i le auala e mafai ona tatou ulu atu ai i le malologa o le Alii

O le a se mea e te ono lagona ai le popole po o le atuatuvale i nisi o taimi? Mafaufau pe mafai faapefea ona e maua le filemu ma le malologa mai lenei puna po o isi puna o vesiga ma le atuatuvale.

I le vaitaimi o Paulo i le Au Paia Iutaia, sa sauaina ai le Au Paia ona o le ola i le talalelei a Iesu Keriso. E pei ona tusia i le Eperu 3–4, sa ta’ua ai e Paulo se aafiaga mai le Feagaiga Tuai e aoao ai le Au Paia i le ala e maua ai le malologa i lenei olaga ma le olaga a sau.

I aso anamua, ina ua uma ona faasaolotoina mai Aikupito, sa faaoso ai e le fanauga a Isaraelu le toasa o le Alii ona o lo latou le usiusitai. O se taunuuga, sa le mafai ai ona latou ulu atu i le malologa o le Alii (tagai Numera 14; Iakopo 1:7–8; Alema 12:33–37; 13:6, 12–13, 28–29).

Mafaufau e faailoga le fuaitau “lo’u malologa” i le Eperu 3:11.

Faitau le Mataupu Faavae ma Feagaiga 84:24, ma vaavaai mo le mea o loo aoao mai e le fuaitau e uiga i le malologa o le Alii.

Na aoao atu Elder Bruce R. McConkie o le Korama a Aposetolo e Toasefululua, “O le aupaia faamaoni e ulufale atu i le malologa o le Alii a o i ai i lenei olaga, ma e ala i le ola ai i le upumoni, latou te faaauau ai i lena tulaga faamanuiaina seia oo ina latou malolo ma le Alii i le lagi. … O le malologa o le Alii, i le tagata i le olaga nei, o le maua lea o se malamalama atoatoa i le paia o le galuega tele o aso e gata ai. … O le malologa o le Alii, i le faavavau, o le maua lea o le ola e faavavau, ia maua le atoatoaga o le mamalu o le Alii” (Mormon Doctrine, 2nd ed. [1966], 633).

Faitau le Eperu 4:1 ma vaavaai mo le mea na popole ai Paulo o le a le faia e nisi o tagata o le Ekalesia.

Faitau ia mau nei: Eperu 3:7–8, 12–15, 18–19; 4:2–3, 6–7, 11. Ia faitau foi le Faaliliuga a Iosefa Samita, o le Eperu 4:3 (i le pito i tua o le Tusi Paia). A’o e faitau i nei mau, vaavaai mo le mea na aoao faafia atu e Paulo, o le auala e mafai ona tatou ulu atu ai i le malologa o le Alii.

Matau le fuaitau “aua tou te faamaaa i o outou loto” (Eperu 3:8, 15; 4:7). O le uiga o le fuaitau lenei, e le tatau ona tapunia o tatou loto i upumoni ma musumusuga; e tatau ona tatala pea o tatou loto, lotomalie, ma usitai i le Atua ma Ana poloaiga.

Mai aoaoga a Paulo ua mafai ona tatou aoao ai, afai tatou te tumau faamoani i le Faaola ma aua le faamaaa o tatou loto, o le a tatou ulu atu i le malologa o le Alii.

O a ni auala e fesoasoani ai le filifili e talitonu i le Faaola ma tatala pea o tatou loto i faamoemoega ma le fuafuaga a le Atua, tatou te tumau faamaoni ai i le Alii? Mafaufau i se tasi e te iloa o se faataitaiga lelei o lenei mataupu faavae? O le a tonu lava le mea o loo fai e lenei tagata e tumau faamaoni ai?

I lau api talaaga mo le suesueina o tusitusiga paia, tusi ai le mea o le a e faia e tumau faamaoni ai ia Iesu Keriso ma tatala ai pea lou loto ia te Ia.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Eperu 1–4 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: