Iunite 18: Aso 4
Galuega 10–12
Folasaga
Sa faaalia e le Atua ia Peteru i se faaaliga e faapea ua tatau ona folafola atu le talalelei i Nuuese. Na aoao atu e Peteru le talalelei ia Konelio ma lona aiga ma mulimuli ane ai foia le fefinauaiga i le Au Paia Iutaia e uiga i le talalelei ua talai atu i Nuuese. Sa agaigai pea i luma le galuega a le Alii e ui i sauaga. O Herota Akeripa I, le atalii o le atalii o Herota le Sili, na fasiotia le Aposetolo o Iakopo, ona puefaapagotaina ai lea o Peteru ma faafalepuipuiina. O le po a o lumanai le fasiotia o Peteru, sa fesoasoani ai se agelu e faasola o ia mai le falepuipui. Na taia Herota e se agelu a le Atua, ma sa faaauau pea ona agai i luma le talalelei.
Galuega 10
Ua faaali e le Atua ia Peteru se faaaliga e faapea ua tatau ona folafola atu le talalelei i Nuuese
O le a se mea e avatu ai ia te oe le talitonuga mautinoa ma mulimuli ai i se tasi?
Manatu e faapea o loo e faatasi ma se vaega o tagata ua leiloloa. E toatele nisi o le vaega ua ofo atu e toe taitaia tagata uma i le saogalemu, e tofu le tagata ma lana auala na fautuaina mai e ui ai. O le a se mea o le a iloa pe faatosinaina ai pe o le fea tagata e mulimuli i ai?
A o e suesueina le Galuega 10–12, vaavaai mo upumoni e mafai ona fesoasoani e te maua ai le mautinoa e mulimuli ia i latou o e sa valaauina e le Alii e taitai Lana Ekalesia.
E oo mai i le taimi lea i ona po o le Feagaiga Fou, sa folafola atu le talalelei, ma ni nai tuusaunoaga laiti, i tagata Iutaia. E oo lava ia Iesu na folafola atu na o “mamoe na se o le aiga o Isaraelu” ma sa poloaiina foi Ana Aposetolo e faia foi le mea lava lea (tagai Mataio 10:5–6). Peitai, sa tau atu e le Faaola i Ona soo a uma ona latou maua o le Agaga Paia ona latou folafola atu lea o le talalelei “i tuluiga o le lalolagi” Galuega 1:8 I le Galuega 10 tatou te faitau ai i se suiga maoae i le ala na faagaoioiga ai le Ekalesia o le a feosoani ai ia faia lea mea.
Faitau le Galuega 10:1–2, ma vaavaai mo faamatalaga e uiga i se tagata o Nuuese e igoa ia Konelio.
O Konelio o se taitai au. O se taitai au “o se taitai i le vaegaau a Roma e pulea se vaega e limasefulu e oo atu i le selau tane. O lea vaega o se tasi vaeono o le vaega o se autau a Roma” (Taiala i Tusitusiga Pai, “Taitaiau,”scriptures.lds.org).
E tusa ai ma le faiga i le Ekalesia i lena taimi, ona o se Nuuese, o lea e le mafai ai e Konelio ona au faatasi ma le Ekalesia a Keriso e aunoa ma le muai faaliliu atu i le faa-Iutaia. E ui ina sa lei mafai e Konelio ona auai i le Ekalesia o se Nuuese, ae na faapefea ona ia faaalia lona faatuatua i le Atua?
Pei ona tusia i le Galuega 10:3–48, sa maua e Peteru se faaaliga lea na te lei malamalama muamua i ai. Peitai, o le mulimuli i le Agaga, na faafeiloai atu Peteru ia Konelio, o le sa vaaia se faaaliga na tau atu ai e se agelu ua faafofogaina e le Alii tatalo a Konelio. Na ulu atu Peteru i le fale o Konelio ma aoao o ia ma lona aiga i le talalelei. Na oo ifo le Agaga Paia i luga o tagata uma sa i totonu o le fale. Sa iloa e Peteru o lana faaaliga lea na poloaiina ai o ia e ai i manu sa lei faamamaina, o se faatonuga mai i le lagi e folafola atu le talalelei i Nuuese ma tuu atu ia latou papatiso e aunoa ma le muai faaliliu atu i le faa-Iutaia.
-
Faauma le vaega lenei i lau api talaaga mo le suesueina o tusitusiga paia:
-
Faitau le Galuega 10:34–35, ma tusi i lalo soo se mafaufauga po o ni ou lagona e uiga i mea e faapea na aoaoina e Peteru i nei fuaiupu e lua.
-
Faitau le 2 Nifae 26:33, ona tali lea o le fesili lea: O le a le uiga o le “e le faailogaina tagata e le Atua” (Galuega 10:34)?
-
Mafaufau pe o le a le uiga o le faaupuga lea “e le faailogaina tagata” e le Atua:
“O le talalelei a Iesu Keriso e mo tagata uma. O loo tau mai i le Tusi a Mamona, ‘uliuli pe paepae, e pologa pe saoloto, o tane ma fafine; … ua tutusa tagata uma i le Atua’ (2 Nifae 26:33). O le aoaoga aloaia lea a le Ekalesia.
“O tagata o ituaiga uma e talia ma papatisoina i le Ekalesia talu mai lava le amataga. …
“E manino lava le tausalaina e le Ekalesia o le faailoga lanu, e aofia ai soo se faailoga lanu ua mavae e tagata i totonu ma fafo o le Ekalesia. I le 2006, a o avea ma peresitene o le Ekalesia ai ia Gordon B. Hinkley na tautino mai ai ‘e leai se tagata na te faia ni faamatalaga tauvalea e faatatau i a i latou o se isi ituaiga, e mafai ona manatu ia te ia lava o se so’o moni o Keriso. E le mafai foi ona ia manatu ia te ia lava e faapea ua ogatusa ma aoaoga a le Ekalesia. … Ia iloa e tagata uma o i tatou taitoatasi o se atalii po o se afafine o lo tatou Tama o i le Lagi, o le e alofa i Ana fanau uma’ [“O Le Manaomia o le Agalelei Sili Atu,” Ensign po o le Liahona, Me 2006, 58]” (“Race and the Church: All Are Alike unto God,” mormonnewsroom.org/article/race-church).
Galuega 11:1–18
Ua foia e Peteru se finauga i Au Paia Iutaia e uiga i le folafola atu o le talalelei i Nuuese
Mai mea e te faitauina i le Galuega 10:28, o le a sou manatu o a ni lagona o le Au Paia Iutaia ina ua latou faalogo i fegalegaleaiga a Peteru ma se Nuuese?
Faitau le Galuega 11:1–3, ma vaavaai pe na faapefea ona tali atu le au soo i le mea na faia e Peteru.
Pei ona tusia i le Galuega 11:4–15, sa faamatala e Peteru i le au soo ia faaaliga na maua e ia ma Konelio. Na ia tau atu ia i latou sa talia e Konelio ma lona aiga ia aoaoga a Iesu Keriso ona latou maua ai lea o le mana o le Agaga Paia i le ala lava e tasi na maua ai e Peteru ma isi soo.
Faitau le Galuega 11:16–17, ma vaavaai mo le saunoaga faaiu a Peteru i le au soo.
O le a sou manatu o le a le uiga o le tala a Peteru, “O ai ea au nei ou te mafaia ona vavao atu i le Atua?” [Galuega 11:17.
Faitau le Galuega 11:18, ma vaavaai pe na faapefea ona tali atu le au soo i le faamatalaga a Peteru.
Na faapefea ona tali atu le au soo ina ua latou iloa sa taitaia Peteru e le Atua?
O le mataupu faavae lea e mafai ona tatou aoao mai i lenei tala: Pe a tatou iloa o i latou o loo pulefaamalumalu i le Ekalesia e taitaiina e le Atua, e mafai ona tatou lagolagoina ma le mautinoa ma mulimuli ia i latou. O lenei mataupu faavae na faamautuina i le tusitusiga paia o aso e gata ai, lea o loo tusia ai e faapea e faaalia e le Atua Lona finagalo ia i latou o e umia ki o le perisitua e pulefaamalumalu ai i le Ekalesia (tagai MF&F 1:38; 28:2, 7; 42:11; 107:65–66).
-
-
Na faapefea ona e iloa o i latou o pulefaamalumalu i le Ekalesia o loo taitaia e le Atua?
-
O le a le fautuaga mai perofeta ua e filifilia e mulimuli ai ona ua e iloa o loo taitaia ia perofeta e le Atua?
-
-
Galuega 11:19–30
E agai pea i luma le galuega a le Alii e ui lava i sauaga
Galuega 11:19–26 o loo tusia ai e faapea ona o sauaga, o nisi o le au soo sa taapeape i le itulagi atoa ae sa folafola atu lava ma le faamaoni le talalelei a Iesu Keriso i soo se mea sa latou o i ai. Galuega 11:27–30 o loo tusia ai e faapea na o atu perofeta “mai Ierusalema i Anetioka” ma sa valoia ai e se tasi o perofeta, o Akapo, o le a i ai se oge. Ona faia ai lea o taumafaiga e saunia ai se toomaga mo tagata i Iutaia.
Galuega 12:1–17
Ua fasiotia e Herota ia Iakopo ma puefaapagotaina ia Peteru, o le na sola faavavega mai i le falepuipui
O se tapasa e faasino i matu aua e tosina e le maneta o le lalolagi i le Pole i Matu le iu o le maneta o le tapasa. Tusi se X i se mea e lata i le tapasa (ae aua nei lata i le pito i matu o le tapasa), ma manatu faapea o le X e faasino i se maneta o uu.
E faapefea ona tosina e lenei maneta ia aga a le nila o le tapasa?
E faapefea e lenei mea ona aafia ai lo tatou tomai e faia ai le faaiuga sao pe o le fea itu e tatau ona tatou o ai?
A o e suesueina le Galuega 12, vaavaai mo se faatosinaga e mafai ona faalavelaveina ai lo tatou tomai e faia ia faaiuga sao.
Talu mai le faamaturoina o Setefano, na feagai lava tagata o le Ekalesia i Ierusalema ma le siosiomaga ma le faateleina o sauaga. Faitau le Galuega 12:1–4, ma vaavaai pe na faapefea ona saofaga le Tupu o Herota Akeripa i lenei sauaga.
O ai na faatonuina e Herota ia fasiotia?
O Iakopo o loo taua i le fuaiupu 2 o le Aposetolo o Iakopo, le uso o le Aposetolo o Ioane ma le atalii o Sepetaio. E tusa ai ma faamaumauga, o Iakopo o le uluai Aposetolo lea na faamaturoina i le uluai Ekalesia Kerisiano. O ia foi o se uso o le Au Peresitene Sili faatasi ai ma Peteru ma Ioane.
E tusa ai ma le Galuega 12:3, o ai na fiafia i le oti o Iakopo?
O le fasifuaitau “o Iutaia” i le fuaiupu 3 e faasino i taitai faitonu Iutaia i Ierusalema o e sa fautuaina ia sauaga o le Ekalesia a Iesu Keriso. O Herota Akeripa “sa naunau e avea o se tagata talitonu i tapuaiga faa-Iutaia” (Bible Dictionary, “Herota” ma sa saili e faamalie ia taitai Iutaia. I autafa o le X i talaane o le tapasa, tusi ai: Afai tatou te saili e faamalie isi nai lo le Atua, ona …
O le a le mea sa faia e Herota ina ua ia vaai ua faafiafiaina taitai Iutaia ona o le fasiotia o Iakopo? (Manatua o se autau toafa e tasi, e toafa ia fitafita e i ai.)
Mafaufau i le ata o le tapasa ma le X, na faapefea ona aafia le taitaiga o le olaga o Herota ona o lona manao e faamalie isi nai lo le Atua?
E faavae i mea e mafai ona tatou aoao mai i le faataitaiga a Herota, faamaea le mataupu faavae lea: Afai tatou te saili e faamalie isi nai lo le Atua, ona .
-
-
I autafa o le faataitaiga a Herota, o a nisi faataitaiga e faaalia ai le ala e mafai ai ona taitai atu se tasi ia faia le agasala ona o le auala e saili ai e faamalie isi nai lo le Atua?
-
O a ni auala e ono taitaiese ai oe mai i lou Tama i le Lagi ona o se naunau e faamalie isi? O le a se mea e te faia e aloese ai mai le taitai atu i le agasala?
-
Mafaufau i auala e te ono faatagaina ai lou naunau e faamalie isi e taitai ese ai oe mai i lou Tama i le Lagi.
Faitau le Galuega 12:5–6. O a mea na faia e tagata o le Ekalesia i lea taimi?
Faitau le Galuega 12:7–10. O a ni taofiga ma ni papupuni na sao ese mai ai Peteru i le taimi o lana solaaga?
Sa laveaiina e se agelu a le Alii ia Peteru mai i le falepuipui.
Faitau Galuega 12:11–15. O le a le taimi na iloa ai e Peteru o le mea lea sa tupu e moni ae le na o se faaaliga?
O le a le mea na tupu ina ua tuitui Peteru i le faitotoa o le fale o Maria?
Faitau le Galuega 12:16–17. O ai na viia e Peteru mo lona sola ese mai i le falepuipui?
Toe tagai i le Galuega 12:5, ma mafaufau pe fesootai faapefea le fuaiupu lea ma le solaese o Peteru mai i le falepuipui.
O le a sou manatu i le mea o fautuaina mai i le fasifuaitau “tatalo e le aunoa” (Galuega 12:5) e uiga i le faamaoni ma le naunautai a tagata o le Ekalesia?
O loo faapupula mai i lenei tala le upumoni e faapea o a tatou tatalo faamaoni ma le naunautai e valaaulia ai vavega ma faamanuiaga a le Atua i o tatou olaga ma olaga o isi.
O le a le uiga o le tatalo ma le faamaoni ma le naunautai?
O lenei mataupu faavae e le faapea afai e faamaoni ma naunautai a tatou tatalo, o le a otometi ona tatou maua mea o loo tatou tatalo atu ai. O isi mea moni e saofaga i le mauaina o vavega a le Atua ma faamanuiaga e aofia ai le finagalo ma le taimi a le Atua e faapea foi i le faitalia o le tagata lava ia.
Faitau le saunoaga lea, ma vaavaai pe aisea e taua ai le tatalo: “O le tatalo o le taga lea e feutagai ai le finagalo o le Tama ma le manao o le tamaitiiti. O le faamoemoega o le tatalo, e le ina ia suia ai le finagalo o le Atua, ae ia faamautu ai mo i tatou lava ma isi ia faamanuiaga ua naunau le Atua e to mai, ae e faalagolago i lo tatou ole atu mo na faamanuiaga. O faamanuiaga e manaomia ai le galue po o se taumafaiga i la tatou vaega, a o lei mafai ona maua mai. O le tatalo o se ituaiga o galuega, ma o se auala ua atofaina mo le mauaina o faamanuiaga e aupito maualuga i lo faamanuiaga uma”(Bible Dictionary, “Prayer”).
-
-
E tusa ai ma lea faamatalaga mai i le Lomifefiloi o le Tusi Paia, o le a se faamoemoega taua o le tatalo?
-
Aisea e taua ai le manatua o le faamoemoega o le tatalo e le ia suia ai le finagalo o le Atua?
-
O anafea na valaaulia ai e le tatalo ia vavega a le Atua ma faamanuiaga i lou olaga po o olaga o isi na e tatalo ai?
-
Mafaufau pe o ai ma pe o le a foi le mea e te tatalo ai. Mafaufau pe mafai faapefea ona e tatalo faamaoni atili ma le naunautai ina ia aumaia ai faamanuiaga ma vavega o loo naunau le Atua e faaee mai i ou luga ma isi.
Galuega 12:18–25
Ua taia Herota e se agelu a le Atua, ma ua faaauau pea ona agai i luma le talalelei.
Galuega 12:18–25 o loo tusia ai e faapea na iloa e Herota le solaese o Peteru ma sa ia fasiotia ai leoleo na ia manatu na nafa ma le faatagaina o Peteru e sola. I nei fuaiupu ua tatou aoao ai foi na tuu atu e Herota se lauga i tagata, o e sa faaviivii atu ia te ia ma fai mai ua ia tautala e pei o se atua. Ona e lei avatu e Herota le viiga i le Atua, o lea sa taia ai o ia e agelu i se mai na sa ia oti ai.
E taua le malamalama i le faasalaga a le Atua o e amioleaga e tusa ai ma lona finagalo ma lana taimi. E le o tagata amioleaga uma e faasalaina vave (tagai Alema 14:10–11).
E tusa ai ma leGaluega 12:24, o le a le mea na tupu i le galuega faafaifeautalai a le Ekalesia e ui i sauaga na feagai ma tagata o le Ekalesia?
Toe iloilo upumoni na e aoaoina mai i lenei lesona, ma mafaufau pe faapefea ona e faaaogaina i lou olaga.
-
Ua ou suesueina le Galuega 10-12 ma faamaeaina lenei lesona i le (aso).
O fesili, mafaufauga, ma manatu faaopoopo ou te fia faasoa i lou faiaoga: