Iunite 32: Aso 3

Faaaliga 17–19

Folasaga

Na vaai le Aposetolo o Ioane o le a tau Papelonia faaleagaga, po o le lalolagi amioleaga, e faasaga i le Tamai Mamoe a le Atua ma o le a manumalo le Tamai Mamoe i le leaga. Ua valaauina le Au Paia e o mai mai fafo o Papelonia faaleagaga, ma o le a valaauina e e mama ma amiotonu i le tausamaaga o le faaipoipoga a le Tamai Mamoe. Sa vaaia Ioane i le afio mai o Iesu Keriso i le mana tele e faaumatia i latou o e faasagatau ia te Ia.

Faaaliga 17–18

Ua muai vaai Ioane i le faaumatiaga o Papelonia faaleagaga

Sa aoao mai Elder Lynn G. Robbins o le Fitugafulu, “E faigofie atu ona aloese mai faaosoosoga nai lo o le tetee atu i faaosoosoga” (“Avoid It” [faigalotu a le Iunivesite a Poliga Iaga, Sete. 17, 2013], 1, speeches.byu.edu).

Aisea e te manatu e faigofie ai le aloese mai faaosoosoga nai lo o le tetee atu i ai?

Mafaufau pe o le a se mea e tupu pe afai tatou te tuu i tatou lava i ni tulaga e tatau ai lava ona tatou tetee atu i faaosoosoga i taimi uma.

A o e suesue i le Faaaliga 17–18, vaavaai mo se upumoni o le a fesoasoani e te iloa ai auala e aloese ai mai le tele o faaosoosoga ma agasala a le lalolagi.

I le Faaaliga 16 na tatou aoao ai, na vaai le Aposetolo o Ioane i le faaaliga i agelu e toafitu ia o le a sasaaina mai mala i luga o e amioleaga i aso amuli. Faitau le Faaaliga 17:1, ma sue po o le a le mea na fai mai le tasi o agelu e toafitu o le a ia faaali mai ia Ioane.

E tusa ai ma le Faaaliga 17:15, o “vai e tele” lea e nofo ai i luga le fafine (tagai fuaiupu 1) e faatusa i tagata ma atunuu ua i ai i luga lona mana ma faatosinaga (tagai foi i le 1 Nifae 14:11).

Faitau le Faaaliga 17:2–6, ma vaavaai mo upu ma fuaitau e faamatala ai le fafine ma ana faatosinaga i le lalolagi. O le upu faitaaga i le fuaiupu 2 e faatatau i amioga le mama ma le le amiotonu.

I le fuaiupu 2, o faapefea ona faamatalaina le faatosinaga a le fafine i luga o taitai ma tagata o le lalolagi?

O le a sou manatu i le mea o loo faatusa i ai e le Faaaliga 17:6 le fafine na ona i le toto o le Au Paia ma e ua maliufasia? Matau o le upu matua ofo tele i le fuaiupu lena o lona uiga o le ofo po o le manatunatu.

O le manu feai o loo faamatala mai i le Faaaliga 17:3 e ono faatusa ia Roma i aso o Ioane faapea foi malo ma atunuu piopio i aso amuli (tagai Faaaliga 17:8–13).

Faitau le Faaaliga 17:18, ma vaavaai po o le a le mea e faatusa i ai le fafine.

O le “aai tele” i le fuaiupu 18 e faatatau i le Papelonia faaleagaga (tagai Faaaliga 14:8; MF&F 133:14). Ona o le faalelalolagi ma le piopio o Papelonia anamua, ma ona o se nofoaga na ave faatagataotaua ai le fanauga a Isaraelu, e masani ona faaaoga faafaatusa ai Papelonia i totonu o tusitusiga paia e faatusa i le agasala, faalelalolagi, o faaatosinaga a le tiapolo i le lalolagi, ma le faatagataotauaina faaleagaga (tagai foi 1 Nifae 13:1–9; 14:9–10).

Faitau le Faaaliga 17:14, ma vaavaai po o ai o le a tau faasaga i ai soo o Papelonia.

O le a le iuga o lenei taua?

Mai lenei fuaiupu tatou te aoao mai ai i aso mulimuli, o le a manumalo ai Iesu Keriso i le lalolagi. Mafaufau e maka pe faailoga ia upu i le Faaaliga 17:14 o loo aoao mai ai lenei upumoni.

1. I lau api talaaga mo le suesueina o tusitusiga paia, tusi ai pe mafai faapefea i le iloaina o lenei upumoni ona fesoasoani ia te oe o se soo o Iesu Keriso.

I le Faaaliga 18:1–3 tatou te faitau ai, na folafola mai e le isi agelu le pau o Papelonia amioleaga. Faitau le Faaaliga 18:4, ma vaavaai mo le mea na faatonuina e le Alii Lona nuu e fai.

O a ni mafuaaga na tuuina atu e le Alii mo Lona nuu e o mai ai i fafo o Papelonia?

O se tasi o mataupu faavae tatou te aoao mai le Faaaliga 18:4 o le vavaeese mai o i tatou lava mai le amioleaga o le lalolagi, e mafai ona fesoasoani tatou te aloese ai i agasala ma faamasinoga o le a oo i luga o e amioleaga i aso amuli. Fuafua e tusi pe faailoga le aoaoga faavae lenei i au tusitusiga paia i autafa o le Faaaliga 18:4–9.

2. Tali fesili nei i lau api talaaga mo le suesueina o tusitusiga paia:

   1. E faapefea ona fesoasoani le talalelei toefuataina a Iesu Keriso ia i tatou e vavaeese i tatou lava mai le amioleaga o le lalolagi?

   2. O a nisi o luitau e feagai ma le autalavou a o latou taumafai e vavaeese i latou lava mai le amioleaga o le lalolagi, ae faaauau pea ona ola, alofa, ma fegalegaleai ma i latou e le tutusa o latou tulaga faatauaina?

   3. E faapefea ona fesoasoani le vavaeese mai faatosinaga ma faiga le amiotonu ia te oe faapea ma isi e te iloa, e aloese ai i nisi o faaosoosoga ma agasala o le lalolagi?

Mafaufau po o a ni faatosinaga po o ni faiga le amiotonu e tatau ona vavaeese mai ai oe lava ma pe faapefea ona e faia lea mea. Ole atu i le Tama Faalelagi i le tatalo e fesoasoani ia te oe i au taumafaiga e vavaeese oe lava mai i na faatosinaga ma faiga le amiotonu.

I le Faaaliga 18:5–24 tatou te faitau ai sa vaai Ioane i le pau o Papelonia amioleaga ma le faanoanoa o e e lagolagoina o ia.

Faaaliga 19

Ua vaai Ioane i le afio mai o Iesu Keriso i le mana e faaumatia i latou o e e faasagatau ia te Ia.

Mafaufau i se meaalofa e sili ona manaia e mafai ona e tuuina atu i lou toalua i le lumanai i le aso o le lua faaipoipoga.

Faitau le saunoaga lenei mai ia Elder Jeffrey R. Holland o le Korama a Aposetolo e Toasefululua: “I le aso o lau faaipoipoga, o le meaalofa sili lava e te tuuina atu i lau soa e faavavau o lou tulaga silisili ona lelei—mama ma atoatoa ma agavaa mo le mauaina mai o lena foi mama” (“Personal Purity,” Ensign, Nov. 1998, 77).

Aisea e te manatu ai o lou mama atoatoa o se meaalofa sili lea e te tuuina atu mo lou toalua i le aso o le lua faaipoipoga?

O le Faaaliga 19 o loo iai se talafaatatau o se faaipoipoga e faaaoga e faatusa i ai le Afio Mai Faalua o le Faaola. E tusa ai ma le Faaaliga 19:1–6 sa vaai le Aposetolo o Ioane, o le a viia e e amiotonu le Atua mo Ana faamasinoga e faasaga i e amioleaga.

Faitau le Faaaliga 19:7, ma vaavaai po o ai e ana le faaipoipoga lea na faasilasila atu e le agelu ia Ioane.

O le a se mea na aoaoaina e Ioane e uiga i le faletua o le Tamai Mamoe?

O le “tausamaaga o le Tamai Mamoe” (Faaaliga 19:7) e faatatau i le Afio Mai Faalua o le Faaola.

Faitau le faamatalaga lenei mai ia Elder Bruce R. McConkie o le Korama a Aposetolo e Toasefululua, ma vaavaai po o ai le faletua a le Tamai Mamoe: “I lenei tisipenisione o le Faatoafaiava, o le Tamai Mamoe lea a le Atua, o le a afio mai e avatu lona faletua, o le Ekalesia lea o loo i ai le au paia faamaoni o e sa faatalitali mo lona toe foi mai” (Mormon Doctrine, 2nd ed. [1966], 469).

Mafaufau i nisi o auala ua avea ai le mafutaga faalefaaipoipoga ma se faatusa fetaui lelei mo la tatou mafutaga ma Iesu Keriso. A o e mafaufau loloto, mafaufau e uiga i le auala e avea ai le faaipoipoga o se mafutaga e manaomia ai le faamaoni, ositaulaga, alofa, tuuto, ma le talitonuina.

Mafaufau loloto i Aoaoga Faavae ma Mataupu Faavae

O le mafaufau loloto e aofia ai ma le mafaufau, manatunatu loloto, fai atu fesili, ma le iloiloina o mea ua e iloa ma mea o loo e taumafai e malamalama ai. O le mafaufau loloto e masani ona fesoasoani ia i tatou ia malamalama i mea e tatau ona tatou faia e faaaoga ai mataupu faavae o le talalelei. A o faaauau ona e suesue i le tusi o Faaaliga, mafaufau e faaalu se taimi e mafaufau loloto ai i fuaitau e te manao ia sili atu ona e malamalama loloto i ai.

Faitau le Faaaliga 19:8–9, ma vaavaai mo mea e mafai ona faia e le Au Paia e saunia ai i latou mo le Afio Mai Faalua o le Faaola.

O le ie paepae o loo tau mai i le fuaiupu 8 e mafai ona faatusa i le paia, mama, ma le amiotonu. E pei ona faatusaina i laei o le faletua o le Tamai Mamoe, o a ni mea e ao ona tatou faia e saunia ai i tatou lava mo le afio mai o le Alii o Iesu Keriso?

O se tasi o upumoni tatou te aoaoina mai i nei fuaiupu o le, afai tatou te mama ma amiotonu, o le a faapea ona tatou saunia mo le afio mai o le Alii o Iesu Keriso. Fuafua e maka pe faailoga upu o loo i le Faaaliga 19:8 o loo aoao mai ai lenei upumoni.

O le upu tuuina atu i le Faaaliga 19:8 o lona uiga o le avatu po o le faaeeina atu. Ina ia faamamaina mai agasala ma avea ma [tagata] amiotonu o se meaalofa mai le Atua.

Mafaufau i fesili nei: O le a se mea ua faia e le Atua e saunia ai se ala mo i tatou ina ia faamamaina i agasala ma avea ai ma ni [tagata] amiotonu? Aisea e te manatu ai, o le mama ma le amiotonu o se tasi lea o meaalofa sili ona matagofie tatou te tuuina atu i le Faaola pe a toe afio mai o Ia?

Filifili po o le a se mea e manaomia ona e faia ina ia [e] mama ma amiotonu ai, ina ia e saunia ai mo le afio mai o le Alii o Iesu Keriso. Ia faatino soo se ia uunaiga faaleagaga e te maua.

Faitau le Faaaliga 19:10, ma vaavaai pe na faapei le tali atu a Ioane ina ua uma ona faalogo i le mea na folafola mai e le agelu ia te ia. Sa tuuina atu i lenei agelu le pule mai le Atua e tautala ai mo, ma fai ma sui o Iesu Keriso.

O le a le mea sa folafola atu e le agelu ia Ioane o loo ia te ia (le agelu) ma isi auauna a le Atua?

O le “agaga o valoaga” (Faaaliga 19:10) e faatatau i le meaalofa o faaaliga ma musumusuga mai le Atua, lea e faatagaina ai se tasi e maua ma fofoga atu Lana afioga (tagai i le Guide to the Scriptures, “Prophecy, Prophesy,” scriptures.lds.org).

O a ni auala e te manatu, e pei ai lava le molimau o le valoaga?

E mafai faapefea i le i ai o se molimau ia Iesu ona faaatosina ai au sauniuniga mo le Afio Mai Faalua?

Faitau le Faaaliga 19:11–16, ma vaavaai mo upu ma fuaitau e faamatala ai le Faaola i lona Afio Mai Faalua. Faitau foi le Faaliliuga Iosefa Samita, Faaaliga 19:15 (i le Faaaliga 19:15 vaefaamatalaga a).

O le solofanua paepae o loo taua i le Faaaliga 19:11 o le faailoga o le faatoilalo ma le manumalo. O le a afio mai le Faaola e faatoilalo le agasala ma le amioleaga.

Matau le auala o loo faamatalaina ai laei o le Faaola i le Faaaliga 19:13. O le uiga o le fuaitau “ofu ua fufui i le toto” o Ona laei o le a lanu i le toto. O lenei lanu ua faatusa i le faaumatiaga o e amioleaga i Lona afio mai (tagai Mataupu Faavae ma Feagaiga 133:46–51), ma e mafai foi ona faamanatu mai ai ia i tatou mafatiaga na oo i ai o Ia i le taimi o Lana Togiola.

Na aoao mai Elder Neal A. Maxwell o le Korama a Aposetolo e Toasefululua:

“I le sau o le toto i puafu uma, ai lava se mumu o Lona laei i Ketesemane, ai lava se mumu ulaula o lena ofu talaloa!

“E leitioa la, a afio mai Keriso i le mana ma le mamalu, o le a afio mai o Ia i se laei mumu faamanatu (tagai MF&F 133:48), e le gata ina faatusa i le soligavine o le toasa, ae ina ia tatou manatua ai le ala na Ia tigaina ai mo i tatou taitoatasi i Ketesemane ma i luga o Kalevaria!” (“Overcome … Even As I Also Overcame,” Ensign, Me 1987, 72).

E tusa ai ma le Faaliliuga Iosefa Samita, o le Faaaliga 19:15, sa vaaia e Ioane, pe a afio mai le Faaola o le Tupu o Tupu ma Alii o Alii (tagai Faaaliga 19:16), o le a Ia pulea atunuu i le afioga a le Atua. I le Faaaliga 19:17–21, sa vaaia e Ioane le faaumatiaga o i latou o e na faasagatau i le Tamai Mamoe a le Atua. Matau o le Faaliliuga Iosefa Samita o le Faaaliga 19:18 o loo faamanino mai ai “o tagata uma, o e saoloto ma pologa, o e faatauvaa ma maoae” e faatatau ia i “latou uma o e faasagatau i le Tamai Mamoe” (i le Faaaliga 19:18, vaefaamatalaga a).

3. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Faaaliga 17–19 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga: