Ioane 11

Folasaga

Sa auina atu e Maria ma Mareta se feau ia Iesu o loo ma’i lo la’ua tuagane o Lasalo. Na faatuatuai e Iesu Lona afio mai, e taunuu mai ua fa aso talu ona oti Lasalo. Faatasi ai ma le alofa ma le mutimuti alofa, sa faatuina e Iesu ia Lasalo mai le oti. O lenei faaaliga maoae o le mana faalelagi sa faamamafaina ai faapea o Iesu o le Mesia ma sa ia te ia le mana e pulea ai le oti. Ina ua uma ona faalogo i lenei vavega, sa taupulepule le au faitaulaga sili ma le au Faresaio e fasiotia ia Iesu ma Lasalo.

Ioane 11:1–46

Ua faatuina Lasalo e Iesu mai le oti

Mafaufau i se faigata po o se luitau sa oulua feagai (pe o se tasi e te iloa) sa feagai pe o feagai ai i le taimi nei. Ona tali lea o fesili nei i lau api talaaga mo le suesueina o tusitusiga paia:
1. O a ni nai auala e ono aafia ai le faatuatua o tagata i le Atua a o latou feagai ma tofotofoga ma luitau i o latou olaga?
2. Aisea e filifili ai e nisi tagata e lafoai lo latou talitonuga i le Atua ona o tofotofoga po o luitau latou te feagai?

A o e suesueina le Ioane 11, vaavaai mo upumoni ia e mafai ona fesoasoani e faateleina lou faatuatua i le Atua a o e feagai ma tofotofoga ma luitau i lou olaga.

Faitau le Ioane 11:1–3, ma vaavaai mo se tofotofoga sa feagai ma ni nai uo a Iesu.

I sou manatu, aisea na auina atu ai e tuafafine o Lasalo le tala i lona ma’i ia Iesu?

Sa i ai Iesu i Petapara, i Perea (tagai Ioane 1:28; 10:40), lea pe tusa ma le aso e malaga ai i sasae mai Petania. O le mea lea, semanu e le itiiti ifo i le aso e tasi mo se tagata e aumaia lenei feau ia Iesu ma se isi aso mo Iesu e malaga ai i Petania.

Faitau le Ioane 11:4–7, ma vaavaai mo le auala na tali atu ai Iesu ina ua uma ona faalogo i le ma’i o Lasalo.

I le iloa ai e alofa Iesu ia Mareta, Maria, ma Lasalo, atonu na faamoemoe le au soo e alu loa lava Iesu i Petania e faamalolo ia Lasalo. Pe atonu foi e fetalai atu Iesu ma faamalolo ia Lasalo mai se mea mamao, e pei ona sa Ia faia ai i le atalii o se alii (tagai Ioane 4:46–53). Peitai, sa nofo Iesu i Perea mo isi aso e lua.

E tusa ai ma le Ioane 11:4, le a le mea na fetalai ai Iesu o le a faataunuuina e ala i le ma’i o Lasalo.

I le Ioane 11:8–10 ua tatou aoao ai sa fautuaina e nisi o le au soo ia Iesu e aua nei toe foi atu i Iutaia, i le mea lea e i ai Petania, aua ua saili taitai Iutaia i lena itulagi e fasioti o Ia.

Na tuuina mai e Elder Bruce R. McConkie o le Korama a Aposetolo e Toasefululua le faamatalaga lea e uiga i le tali a le Faaola o loo tusia i le Ioane 11:9–10: “E mautinoa lava e alu Iesu i Iutaia tusa lava po o a taufaamatau i le oti e feagai ma ia iina. [Ua aoao mai Iesu i nei fuaiupu:] ’E ui o le sefulu ma le tasi lea o ituaso o lo’u olaga, ae e sefulu ma le lua ituaso o le ao, ma i lena taimi ua atofaina, ou te alu e fai le galuega na tofia ai au e aunoa ma le tautevateva pe faavaatu’ia. O le taimi lenei ua tuuina mai ia te au e fai ai la’u galuega. E le mafai ona ou faatali seia po o le a i ai le taimi e galoma ifo ai le fili. O le e lafoai i ona tiutetauave ma le faia ana galuega seia po o le a tautevateva i le pogisa ma le manuia ana galuega“ (Faamatalaga o Aoaoga Faavae o le Feagaiga Fou, 3 vols. [1965–73], 1:531).

Faitau le Ioane 11:11–15, ma vaavaai mo mea na fetalai ai Iesu e uiga i le tulaga o i ai Lasalo.

Fuafua e maka le fetalaiga a le Faaola e faatatau i le mafuaaga sa fiafia ai o Ia ona sa le i ai iina e faamalolo ia Lasalo i lona ma’i—“ina ia outou talitonu mai’ (Ioane 11:15). Na Ia ta’u atu o le mea o le a Ia faia i Petania o le a fesoasoani i Ona soo e faateleina ai lo latou faatuatua ia te Ia.

I le Ioane 11:16, ua fautuaina ai e le Aposetolo o Toma ona uso a soo ia latou o ma ia ma Iesu i Iutaia tusa lava pe o le a latou oti faatasi ai ma Ia.

Faitau le Ioane 11:17, ma vaavaai pe o le a le umi na oti ai Lasalo ae faatoa oo atu Iesu i Petania.

Na faamatala e Elder Bruce McConkie le taua o le oti o Lasalo mo le fa aso: Ua leva ona pala; ua leva ona oti ma ua matua mautinoa lava. … I tagata Iutaia o le faaupuga ua fa aso e i ai lona tulaga taua faapitoa; o le talitonuga lauiloa o i latou o le aso lona fa e tuua moni ai loa lava e le agaga le mea e i ai le tino maliu“ (Faamatalaga o Aoaoga Faavae o le Fegaiga Fou, 1:533).

Pe ana fai o oe o Mareta po o Maria, mata o a ni ou mafaufauga po o se lagona ina ua le taunuu mai Iesu vagana ai ina ua fa aso talu ona oti Lasalo?

Faitau le Ioane 11:18–27 e iloa ai pe na faapefea ona tali atu Mareta i lenei tofotofoga. Fuafua e maka ia faamatalaga e faaalia ai le filifiliga a Mareta e faaaoga le faatuatua ia Iesu Keriso i le taimi o lenei tofotofoga. Mafaufau i faamatalaga taitasi sa e faailoa maia ma pe o le a le mea e sili ona e fiafia i ai.

Mai le faamatalaga a Mareta ua tatou aoao ai faapea, e mafai ona tatou filifili e faaaoga le faatuatua ia Iesu Keriso i taimi o o tatou tofotofoga.

I le saunoaga lea a Elder Dallin H. Oaks o le Korama a Aposetolo e Toasefululua, vaavaai mo mea e manaomia mai ia i tatou a o tatou faatino le faatuatua ia Iesu Keriso:

“O le muai mataupu faavae o le talalelei o le faatuatua i le Alii o Iesu Keriso. Faatuatua o lona uiga o le faalagolago—faalagolago i le finagalo o le Atua, faalagolago i Lana auala o le faia o mea, ma faalagolago i Lana taimi faatulagaina. E le tatau ona tatou taumafai e uunai atu a tatou taimi i luga atu o Lana. …

“E moni, e le mafai ona i ai lo tatou faatuatuaga moni i le Alii e aunoa ma le faalagolago atoatoa i le finagalo o le Alii ma i le taimi a le Alii“ (“Taimi,” Ensign, Oke. 2003, 12).

Tali fesili nei, i lau api talaaga mo le suesueina o tusitusiga paia:
1. E te manatu aisea e taua ai mo i tatou le faatino o le faatuatua i le finagalo o le Alii ma Lana taimi a o tatou feagai ma tofotofoga?
2. O faapefea ona e filifili e faatino le faatuatua i ou tofotofoga i le taimi nei? (Pe e faapefea ona e filifili e faatino le faatuatua pe a oo mai tofotofoga i lou olaga?)

Toe iloilo le Ioane 11:25–26, ma vaavaai mo upumoni e mafai ona tatou aoao mai mea na aoao atu e le Faaola ia Mareta. E mafai ona fesoasoani le iloa o le fasifuaitau “e le oti lava“ i le fuaiupu 26 e faasino i le le oo lava i le oti faalua, po o le faaaunuua mai le malo ma le afioaga o le Atua.

O upumoni nei e lua ua tatou aoao mai upu a le Faaola: O Iesu Keriso o le toetu ma le ola. Afai tatou te talitonu ia Iesu Keriso, e mafai ona tatou maua le ola e faavavau.

Faitau le Ioane 11:28–37, ma vaavaai mo mea na fai atu ai Maria ia Iesu ma pe na faapefea ona Ia tali atu. Matau o le upu tiga, e pei ona faaaoga i fuaiupu 33 ma le 38, o lona uiga o le tiga alofa po o le faavauvau.

E faapefea ona atagia i le faaupuga a Maria i le fuaiupu 32 lona faatuatua i le Faaola?

Mafaufau i le Ioane 11:35. E te manatu aisea na tagi ai Iesu?

Faitau le Ioane 11:38–46, ma vaavaai mo mea na faia e le Faaola ina ua uma ona tutulu o Ia faatasi ma Maria ma Mareta.

Matau e lei toetu mai Lasalo mai e ua oti i se tulaga o le tino ola pea. Sa toe aumaia lona tino agaga i lona tino faaletino, ae o lona tino faaletino o le tino lava ma o le a toe oti i se taimi.

Na aoao mai e Elder McConkie se faamoemoega taua na faataunuuina e le Faaola e ala i le faatuina mai o Lasalo mai le oti: “Sa Ia faatuina se tulaga, ina ia faatino mai ai mo taimi uma, se tasi o aoaoga silisili: O ia o le toetu ma le ola, o le tino ola pea ma le ola e faavavau e ala mai ia te ia, ma o i latou o e talitonu ma usitai i ana upu e le oti lava faaleagaga“ (Faamatalaga o Aoaoga Faavae o le Feagaiga Fou, 1:531).

Na muai faamalumalu mai faapefea i lenei vavega le Toetu o le Faaola ma faaalia ai Lona mana e pulea ai le oti? E mafai faapefea ona faamanuiaina i tatou e ala i le malamalama o le mana o le Faaola e maua ai le tino ola pea ma le ola e faavavau?

Matau i le Ioane 11:40 na faamanatu e Iesu ia Mareta afai e talitonu o ia, o le a vaai o ia i le mamalu o le Atua. Mafaufau pe faapefea e Mareta ma Maria ona faaalia lo la faatuatua ia Iesu Keriso i le taimi o lenei tofotofoga. Mafaufau na muamua la faaalia le faatuatua ia Iesu Keriso e ala i le aami atu o Ia ina ua ma’i ia Lasalo, ma sa tumau pea lo la talitonu ma le faalagolago ia te Ia e oo lava ina ua maliu Lasalo.

Mai le Ioane 11 ua tatou aoao ai afai tatou te filifili e faatino le faatuatua ia Iesu Keriso i taimi o o tatou tofotofoga, ona faamautuina lea ma faalolotoina lo tatou faatutua ia te Ia. E taua le manatua, e pei o le aafiaga o Mareta ma Maria, o lena faamautuuga o lo tatou faatuatua e maua mai e tusa ma le poto ma le taimi a le Alii.

E faapefea i le toe faafoisia mai o le ola o Lasalo ina ua mavae aso e fa talu ona oti, ona faamautuina ma faamalolosia e le gata i le faatuatua o Mareta ma Maria i le Faaola ae faapea foi le faatuatua o Ona soo?

Tali se fesili e tasi po o fesili uma i lau api talaaga mo le suesueina o tusitusiga paia:
1. O anafea na e filifili ai e faatino le faatuatua ia Iesu Keriso i se taimi o se tofotofoga na afua ai ona faamautuina pe faamalosia lou faatuatua ia te Ia?
2. O le a se mea e te faia e fesoasoani ia te oe e filifili ai e faatino le faatuatua ia Iesu Keriso i taimi o tofotofoga o loo oulua feagai pe e te ono oo i ai?

Ioane 11:47–57

Sa fefautuaai faatasi ia faitaulaga sili ma le au Faresaio e fasiotia Iesu

O le faatuina mai o Lasalo mai le oti sa o se faamaoniga lea ua ia Iesu le mana e pulea ai le oti. Faitau le Ioane 11:47–48, ma vaavaai pe na faapefea ona tali atu faitaulaga sili ma le au Faresaio i lipoti o le faatuina mai o Lasalo e Iesu mai le oti.

Pei ona tusia i le Ioane 11:49–57, sa lagolagoina e Kaiafa, o le faitaulaga sili le fasiotia o Iesu ina ia taofia ai tagata Roma mai le aveesea o a latou “mea ma lo latou nuu” (Ioane 11:48). “Ona o faitaulaga pepelo ma amioletonu“ (2 Nifae 10:5), sa lei mananao ai taitai Iutaia e faoa o latou tulaga o faatosinaga i lo latou malo. Sa latou naunau e fasiotia Iesu, ma sa latou faatonuina i latou e iloa le mea sa i ai o Ia ina ia faailoa atu ia i latou ina ia mafai ona pueina o Ia.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Ioane 11 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: