2 Korinito 1–3

Folasaga

Na tusi atu le Aposetolo o Paulo i le Au Paia i Korinito ma faamatala atu i ai le ala e mafai ai ona latou faamafanafana atu i isi. Sa ia apoapoai atu foi ia i latou e faamagalo le tagata agasala sa i ai i le latou potopotoga. Na aoao atu e Paulo i le Au Paia a latou liliu atu i le Alii, o le a avea atili i latou e faapei o le Atua.

2 Korinito 1

Ua aoao atu Paulo i le Au Paia i Korinito le ala e faamafanafana ai i isi

Mafaufau i se taimi na oo ai se tasi e te iloa i se tofotofoga faigata po o se mafatiaga. O le a le mea na e faia e fesoasoani ai ia i latou?

Pe i ai se taimi na e manao ai e faamafanafana i se tasi sa feagai ma se tofotofoga faigata i lona olaga, ae e te lei iloa pe faapefea?

Ao e suesueina le 2 Korinito 1, vaavaai mo se upumoni e mafai ona fesoasoani ia te oe e iloa ai pe faapefea ona faamafanafana i isi i o latou tofotofoga ma mafatiaga.

Sa i Efeso le Aposetolo o Paulo ina ua ia tusia le 1 Korinito i tagata o le Ekalesia i Korinito. Na aliae mai se vevesi i Efeso i le tali atu i aoaoga a Paulo iina (tagai Galuega 19:23–41; o le Asia o loo taua i nei fuaiupu o se itumalo o Roma i Take i aso nei). Na tuua e Paulo ia Efeso ae alu i Maketonia, lea na aumai ai e Tito le tala faapea o le tusi muamua a Paulo sa talia lelei lava e le Au Paia i Korinito. Sa aoaoina foi e Paulo faapea na feagai le Au Paia ma mafatiaga ma o nisi o aoao pepelo i Korinito sa faapiopioina le mataupu moni a Keriso. Na tusia e Paulo le 2 Korinito e faamafanafana ai le Au Paia ma talanoaina ai faafitauli na matuaia e aoao pepelo.

Faitau le 2 Korinito 1:1–5, ma vaavaai mo mea na tau atu e Paulo i le Au Paia i Korinito e uiga i o latou mafatiaga. Fuafua e maka pe faailoga i au tusi paia mea sa fai mai ai Paulo i le fuaiupu 3–4e mafai ona fesoasoani e faamafanafanaina ai i latou.

Mai le 2 Korinito 1:4ua tatou aoao ai le upumoni lea: Ona ua faamafanafanaina i tatou e le Tama Faalelagi i o tatou mafatiaga, o lea ua mafai ai ona tatou fesoasoani i isi e maua Lana faamafanafanaga.

I lau api talaaga mo le suesueina o tusitusiga paia, tusi ai e uiga ise taimi na e maua ai le faamafanafanaga a le Atua i le taimi o se tofotofoga. E te manatu na faapefea ona fesoasoani lena aafiaga ia te oe e te fesoasoani ai i se isi tagata ia maua Lana faamafanafanaga?

I le 2 Korinito 1:6–8 tatou te aoao ai na tau atu e Paulo i le Au Paia i Korinito e uiga i mafatiaga matuia taufaamatau na oo i ai ia ma ana soa a o folafola atu le talalelei i Efeso.

Faitau le 2 Korinito 1:9–11, ma vaavaai mo mea na fesoasoani ia Paulo ma ana soa i taimi o o latou tofotofoga.

E faavae i le fuaiupu 11, faamaea le upumoni lenei pe mafai faapefea ona e fesoasoani i tagata o loo feagai ma tofotofoga: mafai ona fesoasoani i e o loo feagai ma tofotofoga.

Tali se fesili se tasi po o fesili uma nei i lau api talaaga mo le suesueina o tusitusiga paia:
1. E mafai faapefea ona fesoasoani au tatalo i se tasi o loo feagai ma tofotofoga?
2. Na faapefea ona fesoasoani tatalo a isi ia te oe i se taimi o tofotofoga na e oo i ai?

I le 2 Korinito 1:12–24ua tatou aoao ai na olioli Paulo i e sa taliaina le fautuaga na ia tuua atu iai i lana uluai tusi. Ifuaiupu 15–20na ia tali atu ai ia i latou o e sa saili masei ia te ia ina ua ia suia ana fuafuaga e asiasi atu ia i latou. O nisi o e na faitio ia Paulo na foliga na fai mai ona ua suia e Paulo ana fuafuaga o lana asiasiga, ua le mafai ai ona latou toe talitonuina o ia po o ana aoaoga. Na tautino atu e Paulo o le savali o le talalelei e moni, tusa lava pe sui ana fuafuaga.

2 Korinito 2

Ua apoapoai atu Paulo i le Au Paia i Korinito e faamagalo i se tagata agasala

Mafaufau i se taimi na faatiga ai se tagata ia te oe po o se tasi e te alofa i ai. Mafaufau pe faigata i se a ona faamagalo lena tagata.

A o e suesueina le 2 Korinito 2, vaavaai mo upumoni o le a fesoasoani ia te oe e malamalama ai pe aisea e taua ai le faamagalo atu i tagata uma.

I le tusi muamua a le Aposetolo o Paulo i Korinito, sa ia aoaia ai i latou i lo latou le usitai ma le le lava o le faatuatua. Faitau le 2 Korinito 2:1–4,ma vaavaai mo mea na faamoemoe Paulo i le Au Paia i Korinito ia latou iloa e uiga i lana aoaiga. Fuafua e maka pe faailoga i le fuaiupu 4le mafuaaga na avatu e Paulo mo le aoaiga.

E mafai faapefea e le aoaiga po o le faasaoga ona avea ma faamaoniga o le alofa o se tasi mo i tatou?

Pei ona tusia i le 2 Korinito 2:5–6, na tusia e Paulo e uiga i se tagata o le Ekalesia sa agasala i isi tagata o le Ekalesia ma sa afua ai ona latou faanoanoa. O le taunuuga, sa faia le fono aoai o lenei tagata e le Ekalesia.

Faitau le 2 Korinito 2:7–8, ma vaavaai mo mea na tau atu e Paulo pe faapefea e le Au Paia ona taulima lenei tagata. O le upu i se tulaga e ese ai ile fuaiupu 7 o lona uiga o le faafeagai o le po o le auese ai.

E ui o lenei tagata na agasala, o le taua o lona agaga e sili lea i le silafaga a le Atua (tagai MF&F 18:10). Na apoapoai atu Paulo i le Au Paia e faamagalo, faamafanafana, ma alolofa i lenei tagata ma fesoasoani ia te ia ia salamo.

Faitau le 2 Korinito 2:9–11, ma vaavaai mo se isi mafuaaga na fai atu ai Paulo i le Au Paia e faamagalo atu i isi.

E tusa ai ma mea na aoao atu e Paulo i le Au Paia i le fuaiupu 11, e mafai ona tatou faailoa mai le upumoni lenei: Afai tatou te le faamagalo atu i isi, ona maua lea e Satani le avanoa e pulea ai i tatou. Fuafua e maka pe faailoga lenei upumoni i le 2 Korinito 2:11. I faaaliga i ona po nei sa poloaiina ai i tatou e le Alii e faamagalo atu i tagata uma (tagai MF&F 64:8–11).

O le faamagalo atu o se tasi e le faapea ua le tatau ai i le tagata agasala ona faamasinoina i ana mea na fai. E le faapea foi e tuu ai i tatou lava i ni tulaga e mafai ai e tagata ona soona fai pea i tatou. Ae, o le faamagalo atu o isi o lona uiga o le faia ma le alofa faa-Keriso o i latou na soona faia i tatou ma aua nei i ai se le fiafia po o se ita ia i latou, lea e aafia ai lo tatou lava alualu i luma faaleagaga (tagai Taiala i Tusitusiga Paia, “Faamagalo,” scriptures.lds.org).

“Afai na afaina fua oe i le sauaina, ia e iloa o loo taumamaina oe ma e alofa le Atua ia te oe. Talanoa i ou matua po o se isi tagata matua faatuatuaina ma saili vave se fautuaga mai lou epikopo. E mafai ona latou lagolagoina oe faaleagaga ma fesoasoani ia te oe i le mauaina o le puipuiga ma le fesoasoaniga e te manaomia. O le faagasologa o le faamaloloina e ono umi se taimi. Faalagolago i le Faaola. O le a Ia faamalolo oe ma avatu ia te oe le filemu” (Mo Le Malosi o le Autalavou [tamaitusi, 2011], 36–37).

Tali le fesili lenei, i lau api talaaga mo le suesueina o tusitusiga paia: O le a sou manatu e faapefea ona maua e Satani se avanoa e pulea ai i tatou pe a tatou le faamagalo atu i isi?

Mafaufau i se tasi atonu e manaomia ona e faamagalo i ai. (Manatua o le faamagalo atu e le faapea e faatagaina ai oe lava ia soona fai. O le uiga o le faamagalo o le tagata e sese ina ia mafai ai ona e agai i luma i lou lava alualu i luma faaleagaga.) Faatu se sini e faamagalo atu i se tagata ina ia le maua ai e Satani se avanoa e pulea ai oe. Ole atu i le Tama Faalelagi e fesoasoani ia te oe e saili e faamagalo atu i isi.

Pei ona tusia i le 2 Korinito 2:12–17, na tau atu e Paulo i le Au Paia sa ia faafetai atu i le Atua, o le “ua matou manumalo ai pea lava ona o Keriso” (fuaiupu 14), e oo lava i taimi faigata.

2 Korinito 3

Ua aoao atu e Paulo le Au Paia i Korinito a latou liliu atu i le Alii, o le a avea atili i latou e faapei o le Atua

Ina ua tuua e le Aposetolo o Paulo ia Korinito, na amata e nisi aoao pepelo ona tetee i ana aoaoga ma sa taumafai e tauleagaina o ia e ala i le tau atu i tagata liliu mai e manaomia pea lava lo latou mulimuli i le tulafono a Mose. I le 2 Korinito 3:1, i le tali atu ia i latou sa taumafai e faaleaga ia te ia, sa fai atu e Paulo i tagata o le Ekalesia i Korinito se fesili faavaogagana maotua—o se fesili na ia fesili ai i le aafiaga o le aoaiga ia i latou, e lei faamoemoe latou te tali maia—e uiga pe manaomia ona ia avatu ia i latou pe maua mai ia i latou se “[tusi] o le tauleleia” lea e molimauina ai lana amio ma le aloaia o ia o se Aposetolo moni a Iesu Keriso. (I ona po o Paulo, o tagata fou e o mai i nuu latou te tauaveina ni tusi o le tauleleia ma i latou. O nei tusi e faailoa mai ai tagata fou ma avatu ai le faamautinoaga o a latou amio lelei.)

Faitau le 2 Korinito 3:2–3, ma vaavaai mo mea na fai mai Paulo sa avea o sana tusi o le tauleleia.

Sa aoao atu e Paulo na suia olaga o le Au Paia ma ua pei lea o se tusi mai ia Keriso lava Ia e avea o se tusi o le tauleleia o le amio a Paulo. O le fasifuaitau “ua iloa ma faitaulia e tagata uma” i le fuaiupu 2o lona uiga e toatele tagata o le a muamua iloa le Ekalesia ma faamasinoina lona moni e ala i amio a tagata ma faataitaiga a tagata o le Ekalesia.

Ata

O Mose ma papamaa

Fuafua e maka pe faailoga le fasifuaitau “ua le tusia i papatusi maa, ao papatusi aano o le loto” i le 2 Korinito 3:3. I ona po o Mose na tusia poloaiga i luga o papa maa. Sa faaaoga e Paulo le fasituaitau e fesoasoani ai i le Au Paia i Korinito ia malamalama e ala le mana o le Agaga Paia na tusia i o latou loto.

I le 2 Korinito 3:5–13 na taua ai e Paulo le tala o le Feagaiga Tuai e fesoasoani ai i le Au Paia ia malamalama i le tulaga faaleagaga i o latou aso. Sa ia faamanatu atu i le Au Paia i Korinito na faia se ufimata o Mose ina ua ia sau i lalo mai le talanoaga ma le Alii i le Mauga o Sinai aua sa fefefe le fanauga a Isaraelu i le mamalu na susulu mai i ona foliga.

Faitau le 2 Korinito 3:14–15, ma vaavaai pe na faapefea ona faatusatusa e Paulo ia Isaraelu o e na fefefe i le mamalu na susulu ai foliga o Mose i Iutaia i ona taimi. Fuafua e maka pe faailoga mea e te maua i au tusi paia.

O le a sou mafaufau o le a le uiga o le “sa faatauasoina o latou manatu” (fuaiupu 14) ma ua i ai se “ufiufi … i o latou loto” (fuaiupu 15)?

E faapei ona le mafai e Isaraelu i ona po o Mose ona tatalia le mamalu na sau mai foliga o Mose ona o lo latou le agavaa, sa le mafai foi e Iutaia i ona po o Paulo ona malamalama i valoaga o le Feagaiga Tuai ia Iesu Keriso ona o lo latou amioleaga.

Faitau le2 Korinito 3:16–18, ma vaavaai mo mea na folafola atu e Paulo o le a aveesea le ufimata o le le malamalama mai loto ma mafaufau o tagata.

O le Faaliliuga a Iosefa Samita o le fasifuaitau “pe a liliu atu i le Alii” i le fuaiupu 16 i le “pe a liliu atu o latou loto i le Alii” (Faaliliuga Iosefa Samita, 2 Korinito 3:16; faaopoopo faatusilima).

E tusa ai ma le2 Korinito 3:18, o le a le mea e tupu ia i latou o e liliu atu i le Alii ma aveesea ai le ufimata o le le malamalama? Fuafua e maka pe faailoga le tali e te maua i tusi paia.

O le fasifuaitau “ua liua ai i tatou ua foliga i ai nai le pupula e oo i le pupula”(fuaiupu 18)e faasino i le suiga faifai malie tatou te maua e ala i le Agaga lea e fesoasoani tatou te avea atili ai faapei o le Atua. Mai nei fuaiupu ua tatou aoao ai e faapea a o tatou liliu atu o tatou loto i le Alii, o le a tatou maua le Agaga, lea e suia malie ai i tatou e avea atili e faapei o le Atua.

Faauma le vaega lenei i lau api talaaga mo le suesueina o tusitusiga paia:
1. Faamatala pe o le a sou manatu i le uiga o le liliu atu o outou loto ia Iesu Keriso.
2. Fai se lisi o auala e mafai ona e liliu atu ai lou loto ia Iesu Keriso.

Mafaufau pe na faapefea ona suia oe e le Agaga talu mai le taimi na amata ai ona e suesue i le Feagaiga Fou i lenei tausaga. I lau api talaaga patino, tusi ai se sini o le a fesoasoani e te matuai liliu atu atoa ai i le Alii ina ia mafai ai ona e maua le Agaga ma avea atili ai e faapei o le Atua.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le 2 Korinito 1–3 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lou faiaoga: