Folasaga i le 2 Ioane

Aisea e Suesue ai Lenei Tusi?

I lana tusi lona lua na faaalia ai e le Aposetolo o Ioane le popole e uiga i aafiaga o le liliuese i totonu o le Ekalesia. I le taimi lava lea e tasi, sa faaalia ai foi lona olioli mo tagata o le Ekalesia o e sa tumau malosi ma faamaoni i le talalelei (tagai 2 Ioane 1:4). O ana upu ua faaalia ai le olioli ma le faafetai e lagonaina e taitai o le Ekalesia mo i latou o e e tumau faamaoni i le Alii. A o e suesue i le 2 Ioane, e mafai ona faamalosia oe i le faamanatu a Ioane ia alofa le tasi i le isi, usitai i poloaiga a le Atua, ma tumau faamaoni i aoaoga faavae a Keriso.

O Ai na Tusia Lenei Tusi?

Na faailoa mai e le tusitala o ia lava “o le toeaina” (2 Ioane 1:1), ma o le taofi mai anamua e faapea, o Ioane o se tasi o le uluai Au Aposetolo e Toasefululua, na tusia lenei tusi (tagai Bible Dictionary, “John, Epistles of”).

O Anafea ma o Fea na Tusia ai?

E le o mailoa tonu po o anafea ma o fea foi na tusia ai le 2 Ioane. Afai e sao le faamatalaga mai anamua e uiga i le umi ona nofo ai o Ioane i Efeso, atonu na ia tusia lenei tusi mai iina i le va o le T.A. 70 ma le 100.

O Ai Na Faatatau i ai le Tusiaina ma Aisea?

O le Tusi lona Lua a Ioane sa tusi atu i “le tamaitai ua filifilia ma ana tama” (2 Ioane 1:1). E le o mailoa pe sa talanoa atu Ioane i lona aiga po o se isi vaega patino o tagata pe sa tautala atu i le Ekalesia atoa i le gagana faatusatusa.

Sa tusia e Elder Bruce R. McConkie o le Korama a Aposetolo e Toasefululua e faapea, o le 2 ma le 3 Ioane atonu o ni tusi na tusi atu e Ioane i tagata o lona lava aiga (tagai Doctrinal New Testament Commentary, 3 vols. [1965–73], 3:409–10, 12–14).

O le isi mea o le fuaitau “o le tamaitai filifilia” e faatatau moni i se faapotopotoga Kerisiano (tagai 2 Ioane 1:13). O le upu Eleni mo le ekalesia e faaletamaitai, ma sa masani ona taua le Ekalesia o se tamaitai (tagai Efeso 5:25–27, 32; Faaliliuga a Iosefa Samita, Faaaliga 12:1–3, 7 [i le pito i tua o le Tusi Paia]; Faaaliga 19:7–8).

E pei o le 1 Ioane, e foliga mai na tusi e Ioane lenei tusi e tali atu ai i aoaoga sese e faapea, sa le i afio moni mai Iesu Keriso i le lalolagi i le tino. Sa ia faamalamalama mai o tagata o le ekalesia na aoao atu o Keriso e leai sona tino faaletino e le tatau ona talia i totonu o le fale o se tagata, po o se faapotopotoga (tagai 2 Ioane 1:7–10).

O A Nisi o Vaaiga Iloga o Lenei Tusi?

I le tusi lenei na lapatai mai ai Ioane e uiga i aoao pepelo o e ulu atu i totonu o le Ekalesia. Sa ia fautuaina tagata o le Ekalesia e aua ne’i ua’i atu pe faamasani i nei tagata.

Otootoga

2 Ioane 1. Ua faamanatu atu e Ioane i le Ekalesia le poloaiga ia alofa le tasi i le isi. Ua ia lapatai mai e uiga i aoao pepelo ma le au taufaasese i totonu o le Ekalesia, ma fautua mai i tagata o le Ekalesia e aua nei faatagaina i latou ia i ai pea ia a latou faapotopotoga.