Folasaga i le Eperu
Aisea e Suesue ai Lenei Tusi?
O le Tusi a Paulo le Aposetolo i Eperu o loo molimau atu ai i le silisili o Iesu Keriso. E sili atu o ia nai lo o agelu ma i ai se suafa e sili atu ona lelei ma se valaauga e maualuga atu. O agelu o auauna a le Atua, ae o Iesu Keriso o Lona Alo lea. O loo aoao mai foi i lenei tusi, o Iesu e sili atu nai lo o Mose ma o Lana galuega na aumaia ai se feagaiga fou e maualuga atu i le feagaiga tuai i lalo o le tulafono a Mose. I le avea ai ma Faitaulaga Sili Maoae o le Perisitua Mekisateko, o Lona perisitua e sili atu nai lo o le perisitua o faitaulaga sili i lalo o le tulafono a Mose.
E ui ua faatumulia tusitusiga paia i faatatauga i le taulaga togiola a Iesu Keriso, o Lona Toetu, ma Lona Afio A’e i le lagi, ua faamamafa mai i le Eperu le galuega faifaipea a le Togiola i olaga o i latou uma o e liliu atu ia te Ia i le usiusitai ma le faatuatua. O le suesueina o tusi a Eperu e mafai ona fesoasoani e te malamalama lelei ai i le aoaoga faavae o le Togiola ma musuia ai oe ia ola faatuatua i le Tama Faalelagi ma Iesu Keriso.
O Ai na Tusia Lenei Tusi?
O le toatele o le Au Paia o Aso e Gata Ai ua talia o Paulo le tusitala o le Eperu (tagai Bible Dictionary, “Pauline Epistles”). Ae peitai, e i ai nisi ua fesiligia pe na tusia e Paulo lenei tusi ona o lona sitali ma le gagana e ese mai isi ana tusi. Ua tele lava ina talia, e tusa lava pe e le o Paulo na tusia, ae o ona manatu ia aua o aoaoga faavae i le Eperu ua ogatasi ma aoaoga faavae o loo maua i isi ana tusi. Sa viia e le Perofeta o Iosefa Samita ia faamatalaga mai le Eperu i le Aposetolo o Paulo (tagai Teachings of Presidents of the Church: Joseph Smith [2007], 105). Mo faamoemoega o lenei tusi lesona, ua tatou talia ai o Paulo le tusitala.
O Anafea ma o Fea na Tusia ai?
Tatou te le iloa po o fea na tusia ai e Paulo le tusia a Eperu. Tatou te le iloa tonu foi po o anafea na tusia ai. Ae peitai, o le toatele lava o loo masalo sa tusia i se vaitaimi o le T.A. 60–62, e lata i le taimi lava e tasi o tusi a Paulo i Filipi, i Kolose, i Efeso, ma Filemoni (tagai Guide to the Scriptures, “Pauline Epistles,” scriptures.lds.org).
O Ai Na Faatatau i ai ma Pe Aisea Foi?
Sa tusia e Paulo le Tusi i Eperu e uunaia ai tagata Iutaia o le Ekalesia ia tumau lo latou faatuatua ia Iesu Keriso ma ia aua le toe foi atu i o latou ala sa i ai muamua (tagai Eperu 10:32–38). I lalo o uunaiga o puapuaga eseese, o le tele o nei Kerisiano Iutaia na iu ina toe o ese mai le Ekalesia ma toe foi atu i le saogalemu o le tapuaiga faaIutaia i le sunako (tagai Eperu 10:25, 38–39). Sa manao Paulo e faaali atu i nei Kerisiano Iutaia, o le tulafono a Mose lava ia sa faasino atu ia Iesu Keriso ma Lana Togiola o le ala moni o le faaolataga.
O A Nisi o Vaaiga Iloga o Lenei Tusi?
Nai lo o le tautu o se tusi, o le Eperu e matele lava o se lauga faaumiumi lea na ta’ua soo ai tusitusiga paia ma faiga a Isaraelu. O le lauga aupito umi lea i tusitusiga paia e uiga i le mafuaaga ma le auala ua silisili ai Iesu Keriso i mea uma.
Ua aoao mai le Eperu o Iesu Keriso e sili atu nai lo o le tulafono aua o Ia na tuuina mai le tulafono. Ua aoao mai foi le Eperu, e maua e perofeta le mana e ala i le faatuatua ia te Ia, o Ia o le Faitaulaga Sili maoae lea na faataunuuina ai taulaga i taimi o le Feagaiga Tuai, o Ia e sili atu nai lo o agelu, ma e ala mai i Lana taulaga togiola, e mafai ai ona tatou maua se faamagaloga o agasala.
O le tusi o Eperu o se tasi o nofoaga laiti i le Tusi Paia e mafai ona tatou faitau i ai e uiga i le perofeta o Mekisateko (tagai Eperu 7:1–4) ma le perisitua na faaigoa ia te ia (tagai Eperu 5:5–6, 10; 6:20; 7:11-17). Ua aoao mai le Eperu o le Perisitua Mekisateko e sili atu nai lo o le Perisitua Arona, ma ua faaalia ai o le faaolataga e le maua i le tulafono a Mose po o sauniga na faia e faitaulaga sa Levi, ae e ala ia Iesu Keriso ma sauniga o le Perisitua Mekisateko (tagai Eperu 7:5–28). O le Eperu 11:1–12:4 o loo tuuina mai ai se aoaoga taua e uiga i le faatuatua ma aoao mai ai auala e mafai ai e tagata taitasi ona faatuatua ia Iesu Keriso. (Tagai Bible Dictionary, “Pauline Epistles.”)
Otootoga
Eperu 1–6. O Iesu Keriso ua matua tusa lava ma le Tama. E sili atu o Ia nai lo o agelu ma perofeta uma o e na muamua ia te Ia, e aofia ai Mose. O Isaraelu anamua sa aumaia i fafo mai Aikupito, sa le’i mafai ona ulu atu i le malologa o le Alii ona sa faamaaa o latou loto e faasaga ia Iesu Keriso ma Lana auauna o Mose. I le avea ai ma Faitaulaga Sili Maoae, ua silisili ai Iesu i faitaulaga sili uma a Mose. E ala i Lona puapuagatia, na faaatoatoaina ai Keriso. E mafai ona tatou ulu atu i le malologa o le Alii ma “faaoo atu i le faaatoatoaga” e ala i aoaoga faavae ma sauniga o le talalelei (Eperu 6:1).
Eperu 7–13. O le Perisitua Mekisateko e taitaia ai le talalelei ma e sili atu nai lo o le Perisitua Arona. O le falefetafa’i ma sauniga faaMose sa muai faaataataina ai le galuega a Keriso. Na faataunuuina e Iesu Keriso le tulafono a Mose e ala i le faamaligiina o Lona toto, ina ia mafai ai ona tatou maua le faaolataga ma se faamagaloga o a tatou agasala. O le faatuatua, na faataunuuina ai e perofeta ma isi alii ma tamaitai ia galuega amiotonu ma vavega.