Galuega 15

Folasaga

Sa faimalaga tagata o le Ekalesia i Iutaia i Anetioka ma aoao atu ai tagata Nuuese ua liliu mai e faapea e le manaomia ona peritomeina i latou ina ia faaolaina ai. Na aveina e Paulo ma Panapa le mataupu i le Au Aposetolo i Ierusalema. O lenei mea, sa faaigoa i nisi taimi o le fonotaga i Ierusalema, sa faia pe tusa o le T.A. 49–50. I lea fonotaga sa molimau atu ai Peteru o le a faasaoina e le Atua tagata faamaoni o Iutaia ma Nuuese, e le afaina pe na peritomeina pe leai. Sa faamaonia e Iakopo ia upu a Peteru i le faaaogaina o upu o tusi paia. Sa auina atu e Aposetolo ia tusi i tagata o le Ekalesia i Anetioka, Suria, ma Kilikia e faamatala atu ai e le o se mea e tatau ai le peritomeina mo le faaolataga. Na filifilia e Paulo ia Sila e fai ma ana soa faifeautalai ma sa tuuvaa atu i lana misiona lona lua.

Galuega 15:1–29

E ala i fautuaga musuia, sa tonu ai ia Peteru ma isi Aposetolo ua le toe moomia ona peritomeina

Tusi i lalo ia le itiiti ifo i le lima faaiuga ua tatau ona e faia nei ma le lumanai:

Mafaufau pe o le a faapefea ona e tali i fesili nei:

Ua atamai i se a le sailia o le fesoasoani a le Atua pe a faia faaiuga taua?
O le a se mea e mafai ona e faia ia iloa ai le finagalo o le Atua mo oe?

A o e suesue i le Galuega 15, vaavaai mo upumoni e mafai ona taialaina oe a o e saili ia iloa le finagalo o le Atua mo oe.

Ina ia malamalama atili i le Galuega 15, e taua ona iloa sa asiasi atu Paulo ma Panapa i le Au Paia i Anetioka, na faia e nisi o Iutaia mai Iutaia o e na faaliliu mai i le faa-Kerisiano, ni faaupuga patino e faatatau i mea e manaomia e tagata o Nuuese ua liliu mai ona fai ina ia faaolaina ai. O nei tagata, ma isi e faapei o i latou, na lauiloa o “sa Iutaia” aua sa latou tauanau pea e tatau foi i tagata o nuuese ua liliu mai ona faaliliu i le faa-Iutaia.

Faitau le Galuega 15:1, ma vaavaai mo mea na fai mai e nei tagata mai Iutaia e tatau i tagata uma o nuuese ua liliu mai ona faia ina ia faaolaina.

E avea o se vaega o le feagaiga na faia e Aperaamo, na poloaiina ai e le Atua ia tamatane uma o e ulu atu i le feagaiga ma Ia ina ia peritomeina. Peritomeina “sa faia i le tipi ese o ‘pa’u o le tino’ o tamatane meamea ma tagata matutua foi. O i latou na mauaina sa olioli i avanoa ma sa taliaina ia tiutetauave o le feagaiga (tagai Taiala i Tusitusiga Paia, “Peritomeina,” scriptures.lds.org). Na avea le peritomeina o se faailoga po o se faamanatu o le feagaiga na faia e tagata ma le Atua. O lena faiga na toe faatuina i ona po o Mose ma sa faaauau ai ona faia e le aiga ua talitonu o Isaraelu seia oo mai i le taimi o le Faaola.

Faitau le Galuega 15:2–3, ma vaavaai mo mea na tutupu ina ua faalogo Paulo ma Panapa i nei tagata o fai mai e manaomia ona peritomeina ia tagata o nuuese ua liliu mai. O le fasifuaitau “sa tele le upu ese ma le fefinauai o i latou” (Galuega 15:2) o lona uiga sa fefinauai tagata o le Ekalesia ma Paulo ma Panapa ma fai mai e tatau ona peritomeina tagata o Nuuese.

E tusa ai ma le fuaiupu 2, o le a le mea na tonu ia i latou e tatau ona fai?

Faitau le Galuega 15:4–6, ma vaavaai po o le a le mea na tupu ina ua taunuu ia Paulo i Ierusalema. O le fasifuaitau “filifili i lenei mea” fuaiupu 6 e faasino i le fefautuaai faatasi.

Faitau le Galuega 15:7–11ma vaavaai po o le a le mea na tau atu e Peteru i le aufono. O le fasifuaitau “ua tele le fefinauai” i le fuaiupu 7 o lona uiga sa vevela le felafolafoaiga a le au Aposetolo i le mataupu o le peritomeina.

Tali le fesili lenei, i lau api talaaga mo le suesueina o tusitusiga paia: O le a sou manatu o le a le uiga o le tala a Peteru e faapea “ua le faaeseeseina [e le Atua] i tatou [Iutaia ua liliu mai] ma i latou [Nuuese ua liliu mai]” (Galuega 15:9)?

O Peteru o le Aposetolosinia i le lalolagi ma, o le mea lea, na faatagaina ai e tautala mo le Alii. O le tautinoga musuia a Peteru e faapea e lei manaomia ona peritomeina ia Nuuese, o se faataitaiga o le Alii o loo taialaina Lana Ekalesia i le faaalia o Lona finagalo i Ana Aposetolo (tagai Galuega 1:2).

Mai i nei fuaiupu e mafai ai ona tatou aoao i upumoni nei: E mafai ona tatou iloa le finagalo o le Alii e ala i Ana perofeta ma aposetolo soifua. Fuafua e tusi pe faamanatu le upumoni lea i au tusi paia i autafa o le Galuega 15:6–7.

I o tatou aso, o a ni nai auala ua fesoasoani ai Aposetolo soifua ia tatou iloa ia faaaliga sa latou mauaina?

Faitau le Galuega 15:12–15, vaavaai pe na faapefea e le motu o tagata ona tali atu i le tautinoga a Peteru e faapea o le peritomeina ua le o se mea e tatau ai mo le faaolataga.

Sa pulefaamalumalu Peteru i lenei fonotaga, ma e foliga mai o Iakopo na taitai i le fonotaga. O Iakopo e tina faatasi ma Iesu Keriso ma o le uluai epikopo o le faapotopotoga a le Ekalesia i Ierusalema. Pei ona tusia i le Galuega 15:16–18, sa sii mai e Iakopo le perofeta o Amosa (tagai Amosa 9:11–12) e faaalia mai ai o le tautinoga a Peteru e ogatusa ma upu a perofeta, e pei ona tusia i tusitusiga paia.

E faavae i mea na aoao atu e Iakopo, ua tatou aoao ai le upumoni lenei: E mafai ona tatou iloa le finagalo o le Alii e ala i le suesue i tusitusiga paia. Fuafua e tusi pe faamanatu lenei upumoni i au tusi paia i autafa o le Galuega 15:15–18.

Faitau le Galuega 15:19–20, ma vaavaai mo mea na fautuaina e Iakopo ia taitai o le Ekalesia e fai.

O le upu manatu i le fuaiupu 19 o lona uiga o se lafo po o se fautuaga. Sa faaleo atu e Iakopo lana lagolago i le aiaiga faavae sa fofoga atu e Peteru, o le sa pulefaamalumalu i le Ekalesia, i le Galuega 15:7–11 (tagai Bruce R. McConkie, Doctrinal New Testament Commentary, 3. vols. [1965–73], 2:143). I le Galuega 15:20, matau pe o a vaega o le tulafono a Mose na taua e Iakopo e tatau pea ona tausisia e tagata ua liliu mai.

Faitau le Galuega 15:22–27, ma vaavaai mo le faaiuga a le aufono.

Na tonu i le aufono e auina atu ni tusi i tagata o le Ekalesia e tau atu ai ua le o toe manaomia le peritomeina mo le faaolataga, ma o le faaiuga lea ua autasia e Aposetolo. O loo mulimulitaia foi e le Au Peresitene Sili ma le Korama a Aposetolo e Toasefululua ia lava faiga i o tatou taimi, e avatu ai le taitaiga musuia i tagata o le Ekalesia.

Mai i lenei tala i le Galuega 15, ua tatou aoao ai i le upumoni lenei: O le fefautuaai faatasi ma le sailia o faaaliga mai le Atua, e maua ai e taitai o le Ekalesia ia musumusuga e uiga i faafitauli faigata.

Ina ia malamalama atili pe faapefea ona fesootai lenei upumoni i le Ekalesia i ona po nei, mafaufau i le saunoaga lea a Elder D. Todd Christofferson o le Korama a Aposetolo a Aposetolo e Toasefululua. Ina ua uma ona faaaoga ia faataitaiga o i le Galuega 10 ma le Galuega 15 e faapupula ai le auala a le Faaola e “faafesootai atu ai Ia lava i Ana auauna taitasi pe faatino i se aufono,” na saunoa ai Elder Christofferson: “O mamanu lava ia e tasi o loo mulimulitaia i le Ekalesia toefuataiina a Iesu Keriso. “… Atonu e faasilasila mai pe faaliliu e le Peresitene o le Ekalesia ni aoaoga faavae e tusa ai ma faaaliga e oo atu ia te ia (tagai, mo se faataitaiga, i le, MF&F 138). O faaliliuga faaleaoaoga faavae atonu e oo mai foi e ala i le aufono tuufaatasi a le Au Peresitene Sili ma le Korama a Aposetolo e Toasefululua (tagai, mo se faataitaiga, Tautinoga Aloaia 2). O talanoaga a le aufono e tele lava ina aofia ai tusitusiga paia faavae, o aoaoga a taitai o le Ekalesia, ma faiga na fai muamua. Ae i le faaiuga, e pei ona sa i ai i le Ekalesia i le Feagaiga Fou, o le faamoemoega e le faapea ua na o se maliliega i sui o le aufono ae o faaaliga e mai le Atua. O se faiga e aofia ai mafuaaga uma e lua ma le faatuatua mo le mauaina mai o le mafaufau ma le finagalo o le Alii” (“O Le Mataupu a Keriso,” Ensign po o le Liahona, Me 2012, 87–88).

Faitau le Galuega 15:28–29, ma vaavaai mo mea na tusia e le Au Aposetolo ma toeaina i a latou tusi i tagata o le Ekalesia. O le fasifuaitau “ia le faaee atu se isi avega ia te outou” i le fuaiupu 28 o lona uiga sa lei manaomia ona toe usitai atu tagata i nisi tulaga manaomia na aumaia e tagata ae le o le Atua.

E tusa ai ma le Galuega 15:28, na faapefea ona iloa e Aposetolo le finagalo o le Atua e tusa ai ma mea na manaomia mo Nuuese ua liliu mai?

E le gata ina sa musuia e le Agaga Paia le Au Aposetolo a o latou fefautuaai faatasi, ae sa Ia saunia foi se molimau faamautu na sao le latou faaiuga. Mai le Galuega 15:28 ua tatou aoao ai e faapea o se tasi ala e mafai ai ona tatou iloa le finagalo o le Alii e ala lea i musumusuga mai le Agaga Paia.

Toe iloilo lau lisi o faaiuga taua mai le amataga o le lesona. I lau api talaaga mo le suesueina o tusitusiga paia, faamatala pe faapefea ona e faaoagaina upu a perofeta o ona po nei ma tusitusiga paia ia maua ai le taitaiga a le Alii i tulaga o le taimi nei faapea le lumanai.

Galuega 15:30–41

Na auina tiliva atu e Paulo ma isi le tusi a le Au Aposetolo i tagata o le Ekalesia i Anetioka

Galuega 15:30–41o loo faamatala ai ia taitai o le Ekalesia na latou tilivaina atu le tusi a le Au Aposetolo i tagata o le Ekalesia i Anetioka. Ona uma lea o le talaiga i Anetioka, ae talosagaina e Paulo ia Panapa la te o e asiasi i nofoaga sa la talai ai i la laua uluai misiona. Sa manao Panapa la te o ma ave Mareko, ae sa musu Paulo ona sa tuua i laua e Mareko i le taimi o la laua uluai misiona. Ina ua maea ni nai finauga i le va o nei taitai tamalii e toalua o le Ekalesia, sa foia ina ua tonu ia Panapa e ave ia Mareko la te o i Kuperu ae filifili e Paulo ia Sila e fai ma ana soa faamisiona ma o ai i la laua misiona lona lua.

E le o se agasala le ese o ou manatu. Pei ona faapupula mai e lenei tala, nai lo le fefinauai, e ao ona tatou saili ia maua faatasi ni vaifofo o mea tatou te le o malilie i ai.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Galuega 15 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lou faiaoga: