Iunite 11: Aso 1
Luka 10:38–12:59
Folasaga
Na aoao e le Faaola ia Maria ma Mareta i le fale o Mareta. Mulimuli ane, sa Ia aoaoina atu le tele o upumoni i Ona so’o e uiga i le tatalo ma lapataia i latou mai le pepelo ma le matapeapea.
Luka 10:38–42
Ua aoao e Iesu ia Maria ma Mareta
-
I lau api talaaga mo le suesueina o tusitusiga paia, ia lisi ai ni filifiliga sa mafai ona e faia ananafi i le minute e tasi. A uma loa, ona vaai lea i le lisi atoa, ma maka ni nai filifiliga lelei sa e faia. O a ni nai tulaga e ono mafai ona tatou faia ai se faaiuga i le va o filifiliga e lua?
A o e suesueina le Luka 10:38–42, vaavaai mo se mataupu faavae na aoao mai e le Faaola e mafai ona taialaina ai oe i au faaiuga—aemaise pe a tatau ona e faia se faaiuga i le va o ni filifiliga lelei se tele.
A o i ai o Ia i Iutaia, sa maliu atu Iesu i Petania, o se mea e le mamao tele mai Ierusalema, ma asiasi atu ai i le aiga o Mareta, Maria, ma Lasalo.
Faitau le Luka 10:38–40, ma vaavaai po o a mea na tofu filifilia e Maria ma Mareta e fai a o i ai le Faaola i le fale.
I ona po o Iesu, sa matuai taua lava le talimalo. Sa taumafai Mareta e fai le mea e masani ona faamoemoeina mai ia te ia pe a talimalo. Sa taulai atu o ia i le itu i le tino, po o le faaletino, o popolega e pei o le tapenaina ma laulau le taumafataga.
Matau i le Luka 10:40 na lagona e Mareta le “tigaina,“ pe ua mamafa, ma sa manao o ia ia Maria e fesoasoani atu ia te ia.
Faitau le Luka 10:41–42, ma vaavaai mo le tali a le Faaola ia Mareta.
Mata o le a le uiga o le fetalaiga a le Faaola ina ua Ia faapea mai, “O le mea lava e tasi e ao ina ia maua: ua filifilia foi e Maria lea mea lelei“ (Luka 10:42)?
Sa faamalamalama mai e Elder Dallin H. Oaks o le Korama a Aposetolo e Toasefululua: “O se mea e viia mo Mareta le ’popole ma pupu i mea e tele’ [Luka 10:41], ae o le aoaoina o le talalelei mai le Faiaoga o Faiaoga e sili atu ona ‘manaomia’” (“Lelei, Lelei Tele, Lelei Silisili,” Ensign po o le Liahona, Nov. 2007, 104).
Ina ua fetalai le Faaola e faapea “o le mea lelei“ lea na filifili e Maria “e le aveeseina ia te ia“ (Luka 10:42), atonu na Ia ta’u mai ai e faapea o le filifili e faalogo i le Faaola nai lo le filifili e taulai i popolega faaletino po o le lalolagi, o le a maua ai e Maria ia faamanuiaga faaleagaga, ia e faavavau.
O se tasi mataupu faavae e mafai ona tatou aoao mai ai upu a le Faaola ia Mareta o le afai tatou te fiifili e tuuto atu i tatou lava i mataupu faaleagaga i lo popolega faaletino, ona tatou maua lea o faamanuiaga e tumau.
I le avanoa ua saunia, tusi ai ni faataitaiga o tulaga e ono filifili ai se tagata e tuuto atu ia lava i mataupu faaleagaga nai lo isi mea, popolega, po o gaoioiga e lelei ae e le taua tele:
Sa aoao mai foi Elder Oaks:
“A o tatou manatunatu i filifiliga eseese, e tatau ona tatou manatua e le lava le na ona lelei o se mea. O nisi mea e lelei tele, ae o isi e silisili ona lelei. …
“Manatunatu i auala tatou te faaaogaina ai o tatou taimi i fiifiliga tatou te faia e matamata ai i le televise, taalo ai i taaloga vitio, asiasi ai i le Inotoneti, po o le faitauina o tusi po o mekasini. E moni e lelei le matamata i faafiafiaga e lelei po o le mauaina o faamatalaga e fiafia i ai. Ae le o mea uma o lena ituaiga e aoga i le vaega o lo tatou olaga tatou te faaaluina ina ia maua ai. O nisi mea e lelei tele, ae o isi e silisili ona lelei. Ina ua fetalai mai le alii ia i tatou ina ia suesue i le atamai, na Ia fetalai mai, ’Ina saili atu ia outou i upu o le poto mai tusi sili ona lelei’ (MF&F 88:118; faaopoopo le faamamafa). …
“O nisi faaaogaaga o taimi taitoatasi ma taimi faaleaiga e lelei tele, ae o isi ua silisili ona lelei. E ao ona tatou tuuese nisi o mea lelei ina ia filifili ai mea e lelei tele pe silisili ona lelei aua latou te atiina ae ai le faatuatua i le Alii o Iesu Keriso ma faamalolosia ai o tatou aiga“ (“Lelei, Lelei Tele, Lelei Silisili,” 104–5, 107).
-
-
Tusi se auala e tasi ua faamanuiaina ai oe i lou faamuamua o mataupu faaleagaga i lo popolega faaletino.
-
Filifili ia le itiiti ifo i le tasi se mataupu faaleagaga e te manao e taulai atili i ai, ma tusi ai se sini e faatatau i le mea o le a e faia i lea mataupu faaleagaga e avea ai o se faamuamua e maualuga atu i lou olaga.
-
Luka 11
Ua aoao atu e Iesu Ona so’o e uiga i le tatalo
Manatu faapea o oe o se faifeautalai faamisiona ma o loo e aoaoina se tagata sailiili sa tatalo soo ma ua lagona e le o tali mai le Tama Faalelagi. Ua tau mafaufau le tagata sailiili pe tatau ona faaauau pea ona tatalo. O le a sau tala e fesoasoani ai i lenei tagata?
Ao e suesueina le Luka 11, vaavaai mo upumoni ia e mafai ona fesoasoani i se tasi ua manatu e le o tali mai le Atua i ana tatalo.
E tusa ai ma le Luka 11:1–4, ina ua uma ona faalogologo i le Faaola o tatalo, sa fesili se tasi o Ona so’o pe mafai ona Ia aoao i latou i le ala e tatalo ai, ma sa faia e le Faaola. Ona faaaoga lea e le Faaola o talafaatusa e aoao atu ai upumoni faaopoopo e uiga i le tatalo. Manatua o le Faaliliuga a Iosefa Samita o le Luka 11:4 e faitauina, “Ma ia le taitaiina i matou i faaosoosoga; a ia laveai i matou ai le leaga” (Faaliliuga a Iosefa Samita, Luka 11:4 [i le Luka 11:4, vaefaamatalaga i]; faaopoopo le faatusilima). O le a le taitaiina lava e le Tama Faalelagi se tasi o Ana fanau i le faaosoosoga.
Suesue le Luka 11:5–13, ma vaavaai mo mea na aoao mai e le Faaola e uiga i le tatalo.
O le Faaliliuga a Iosefa Samita o loo maua ai ni malamalamaaga faaopoopo i aoaoga a le Faaola e uiga i le tatalo. Ua tatou aoao ae na te lei tuuina maia le talafaatusa o loo amata i le Luka 11:5, “ua ia fetalai atu foi ia te i latou, O le a le taofi lava e lo outou Tama Faalelagi se mea tou te ole atu ai ia te ia. Ma sa ia fetalai i se faataoto, e faapea (Faaliliuga a Iosefa Samita, Luka 11:5 [i le Luka 11:5, vaefaamatalaga a]). Ua tatou aoao foi e uiga i “meaalofa lelei“ na Ia fetalai ai: “O lenei, o outou e leaga, afai ua iloa e outou ona avatu o mea lelei ma a outou fanau; e le sili ea ona foaiina mai e lo outou Tama o i le lagi le Agaga Paia i e ole atu ai ia te ia“ (Faaliliuga a Iosefa Samita, Luka 11:14 [in Luka 11:13, vaefaamatalaga a]).
E tusa ai ma le Luka 11:8, aisea na faamamaluina ai e le uo lona lua le talosaga a le uo muamua mo se areto? (O le upu faatauanau i le fuaiupu lea e faasino i le aioi atu pea lava pea o le tagata ia te ia, e ui ina sa muai teena e lana uo lana talosaga.)
O Ana talafaatusa i le Luka 11:5–13, na aoao mai ai e le Faaola e faapea, afai o i tatou e le atoatoa, ae e naunau e to atu ia i latou tatou te alolofa ma manatu i ai, mea latou te aioi mai ai “e le sili ea ona foaiina mai e lo [tatou] Tama faalelagi, … i e ole atu ia te ia“ (Luka 11:13)
O le a le faamoemoega o le tatalo? “O le tatalo o le taga lea e feutagai ai le finagalo o le Tama ma le manao o le tamaitiiti. O le faamoemoega o le tatalo, e le ina ia suia ai le finagalo o le Atua, ae ia faamautu ai mo i tatou lava ma isi ia faamanuiaga ua naunau le Atua e to mai, ae e faalagolago i lo tatou ole atu mo na faamanuiaga. O faamanuiaga e manaomia ai le galue po o se taumafaiga i la tatou vaega, a o lei mafai ona maua mai. O le tatalo o se ituaiga o galuega, ma o se auala ua atofaina mo le mauaina o faamanuiaga e aupito maualuga i lo faamanuiaga uma”(Bible Dictionary, “Tatalo”).
Mai mea ua e aoaoina mai i le Luka 11:5–13, faamaea le mataupu faavae lea: Afai tatou te tatalo ma saili ma le faatauanau i faamanuiaga a le Tama Faalelagi i taimi e manaomia ai, ona Ia faia lea i Lana lava taimi ma i Lana lava ala. .
I le malamalama ai i lenei mataupu faavae e tatau ai ona tatou teuina foi i le mafaufau faapea e le o faamanuiaga uma mai le Tama Faalelagi e oo mai i auala tatou te faamoemoe i ai, manao, pe vave foi ona iloaina.
-
Luka 11:14–54 o loo i ai se tala ia Iesu o loo tulieseina se temoni mai se tagata, apoapoai atu i tagata ia faalogo i le upu a le Atua, ma aoai le au Faresaio ma le au tusiupu i lo latou valea faaleagaga ma le amioleaga.
Luka 12
Ua lapataia e le Faaola mai le pepelo ma le matapeapea
Mafaufau i fesili nei: Pe ua i ai se taimi na e matuai manao ai lava i se mea ma sa e mafaufau i ai i taimi uma? O a ni aafiaga leaga e mafai ona oo mai ia i tatou ona o le manao tele i se mea?
Ua tatou faitau i le Luka 12:1–13 e faapea “ina ua faapotopoto mai le motu o tagata e manomano” (Luka 12:1), na aoao atu ai e Iesu Ona so’o ia aloese i le pepelo. Na Ia aoao atu i latou e faapea, o mea uma o loo ufiufitia o le a i ai se aso e faaalia ai ma e silafia e le Atua ma tausia Ana fanau. Na Ia fetalai foi e uiga i le manaomia e Ona so’o ona ta’uta’u atu Lona igoa i luma o tagata, ma e uiga i le agasala o le upu leaga. Ona fesili lea o se tagata i le Faaola pe mafai ona ia fetalai ae i lona uso ma tauanau atu lona uso e vaeluaina ai le tofi ia te ia.
Faitau le Luka 12:14–15, ma vaavaai mo le tali a le Faaola i lea talosaga.
O le a le lapataiga na Ia tuu atu i tagata?
Matapeapea o lona uiga o le soona manao lasi i se mea. Mai le fautuaga a le Alii e mafai ai ona tatou aoao i le upumoni lea: Ua poloaiina i tatou e le Alii e aua nei matapeapea i oa o le lalolagi. Na Ia aoao mai e tele atu mea mo le olaga nai lo mea faaletino tatou te maua ma o le taua o se tagata e le faalagolago i le tele o ana oa.
Ina ua uma ona lapataia e le Faaola Ona so’o e aloese mai le matapeapea, sa Ia tuu atu se faataoto e faapupula ai le taua o lenei poloaiga. Faitau le Luka 12:16–19, ma vaavaai mo le aofaiga o taimi na faaaoga ai e le tagata o i le faataoto ia upu Ou te ma le a’u. Atonu e te manao e faailoga ia mea taitasi.
O le a se mea o aoao atu ia te oe e uiga i popolega o le tagata, i le faaaogaina soo o le Ou te ma le a’u?
O a ni auala e ono faaosoosoina ai i tatou ia faapei o lea tagata?
Faitau le Luka 12:20–21, ma vaavaai mo le tali a le Atua i le faaloloto ma le matapeapea o le tagata.
Fuafua e tusi pe matau le saunoaga lenei mai ia Elder M. Russell Ballard o le Korama a Aposetolo e Toasefululua: “O le mea e sili ona taua e sili atu foi ona umi“ (“O Le Mea e Sili Ona Taua e Sili Atu Foi Ona Umi,” Ensign po o le Liahona, Nov. 2005, 44).
A na fai e iloa e le alii mauoa o i le faataoto o le a oti i le po lena ma e le mafai ona alu ma ave ana oa, o le a sou manatu o le a se mea e ese lona faiga i le aso a o lumanai lona oti? Mafaufau pe faatatau faapefea ia te oe le poloaiga e aua le matapeapea i oa o le lalolagi?
Ua tatou faitau i le Luka 12:22–30 e faapea, sa faamamafaina e le Alii e le i manaomia e Ona so’o ona matuai soona popole i mea faaletino latou te manaomia. O lenei faatonuga na tuu atu i Aposetolo ma i latou na valaauina e auauna atu o ni faifeautalai faamisiona. Faitau le Luka 12:31–32, ma vaavaai mo mea na aoao atu e le Faaola i Ona so’o e sailia nai lo le taulai atu i mea sa latou manaomia ma o latou naunauga (tagai foi Iakopo 2:18–19).
I le Faaliliuga a Iosefa Samita o le Luka 12:31, ua tatou aoao ai na faatonu e le Alii Ona soo, “O le mea lea ia outou saili ia aumaia le malo o le Atua” (Faaliliuga a Iosefa Samita, Luka 12:34 [i le Luka 12:31, vaefaamatalaga a]; faaopoopo le faatusilima). O le “malo o le Atua“ e faasino i le Ekalesia a Iesu Keriso. “O le faamoemoega o le Ekalesia o le saunia lea o ona tagata ia ola e faavavau i le malo selesitila po o le malo o le lagi“ (Taiala i Tusitusiga Paia, “Malo o le Atua po o le Malo o le Lagi,” scriptures.lds.org). Sa folafola atu e le Faaola i Ana Aposetolo ma faifeautalai e faapea, afai latou te saili e aumaia le malo o le Atua, o le a fesoasoani o Ia e tuuina atu mea latou te manaomia ma avatu ia i latou se nofoaga i Lona malo.
-
Mafaufau i nisi o auala e mafai ona e sailia e aumaia ai i luma le malo o le Atua. (A o e mafaufau loloto i lenei mea, toe manatu i le mataupu faavae na faailoa mai i le amataga o le lesona e uiga i le tuuto atu o oe lava i mataupu faaleagaga nai lo popolega faaletino.)
Ua tatou faitau i le Luka 12:35–59 e faapea na aoao atu e le Faaola Ona so’o ina ia sauniuni mo Lona Afio Mai Faalua. Sa Ia fesoasoani ia i latou ia malamalama faapea “o le ua foaiina atu i ai o mea e tele, e sueina atu foi ia te ia o mea e tele“ (Luka 12:48), ma sa Ia faamalamalama atu e faapea, o Lana talalelei o le a afua ai ona tele le fevaevaeaiga o tagata.
-
Ua ou suesueina le Luka 10:38–12:59 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: