Faatomuaga i le 1 Timoteo

Aisea e Suesue ai Lenei Tusi?

I le 1 Timoteo tatou te faitau ai, na fautuaina e le Aposetolo o Paulo ia Timoteo, o se taitai o le Ekalesia i Efeso, ia mautinoa sa aoaoina ia aoaoga faavae sao ma ia le faatagaina mea sese ua masani ai e faalavelave mai aoaoga o le talalelei. Sa ia aoaoina Timoteo e uiga i tofi o le epikopo ma le tiakono, ma talanoaina tulaga manaomia mo i latou o e auauna atu i nei tofiga. Sa toe taua foi e Paulo lona faafetai loloto mo le alofa mutimutivale sa ia maua mai ia Iesu Keriso ina ua liliu mai o ia. O le suesueina o le 1 Timoteo e mafai ona fesoasoani e faateleina ai lou nofouta i le taua o le aoaoina atu o aoaoga faavae sao i le Ekalesia. E mafai foi ona faaloloto ai lou talisapaia o le alofa mutimutivale o le Faaola ma mo le matafaioi taua o epikopo ma isi taitai o le Ekalesia.

O Ai na Tusia Lenei Tusi?

O Paulo na tusia le 1 Timoteo (tagai 1 Timoteo 1:1).

O Anafea ma o Fea na Tusia ai?

O le Tusi Muamua a Paulo ia Timoteo atonu sa tusia i se taimi i le va o le T.A. 64 ma le 65, atonu ao i ai Paulo i Maketonia (tagai Guide to the Scriptures, “Pauline Epistles,” scriptures.lds.org; 1 Timoteo 1:3). Ao lei tusia le tusi lenei, na tatalaina mai Paulo mai le faafalepuipuiina mo le lua tausaga (faasala e nofo i le fale) i Roma, ma atonu sa matele lava ina malaga solo, e asiasi i risone sa ia faatuina muamua ai paranesi o le Ekalesia (tagai Bible Dictionary, “Pauline Epistles”).

O Ai na Faatatau i ai le Tusiaina o lenei tusi, ma pe Aisea foi?

Sa tusia e Paulo le tusi lenei ia Timoteo, o le sa auauna atu faatasi ma Paulo i le taimi o lana malaga lona lua faafaifeautalai (tagai Galuega 16:1–3). Ina ua uma le la misiona, sa faaauau ona avea Timoteo ma se faifeautalai faamaoni ma se taitai o le Ekalesia (tagai Galuega 19:22; Filipi 2:19) ma se tasi o aumea faatuatuaina a Paulo (tagai 1 Korinito 4:17). Sa taua e Paulo ia Timoteo o lona “lava atalii i le faatuatua” (1 Timoteo 1:2). O le tama o Timoteo o se Eleni Nuuese, ae sa i ai sona tina ma se tinamatua Iutaia amiotonu o e na aoaoina o ia ma fesoasoani ia ona iloa tusitusiga paia (tagai Galuega 16:1; 2 Timoteo 1:5; 3:15).

I le taimi na tusia ai lenei tusi, sa auauna atu Timoteo o se taitai o le Ekalesia i Efeso (tagai 1 Timoteo 1:3). Sa faaiteite mai Paulo e faapea, sa masalosalo nisi o le au paia i gafatia faaletaitai a Timoteo ona o lona laitiiti (tagai 1 Timoteo 4:12). Sa fuafua Paulo e asiasi atu o ia lava ia Timoteo, ae sa le mautinoa e ia pe o le a mafai ona ia faia o lea mea (tagai 1 Timoteo 3:14; 4:13). Sa tusi atu e Paulo lenei tusi ia Timoteo e fesoasoani ai i le taitai talavou o le Ekalesia ia malamalama lelei i ona tiute.

O A Nisi o Vaaiga Iloga o Lenei Tusi?

O tusi a Paulo ua taua o le 1 Timoteo, 2 Timoteo, ma Tito e masani ona taua o tusi faafaifeau ona o loo aofia ai fautuaga a Paulo i faifeau, po o taitai i le Ekalesia (tagai Bible Dictionary, “Pauline Epistles”). O leFaifeau e sau mai le upu Latina mo le “leoleo mamoe.”

Sa fautuaina atu e Paulo ni taiala e fesoasoani ai ia Timoteo e iloa ai ni tagata agavaa e avea ma epikopo po o tiakono (tagai 1 Timoteo 3). O ana taiala na fesoasoani e faamamafa ai le tiutetauave o taitai o le Ekalesia ia tuuina atu mea e manaomia faaletino ma faaleagaga e le au paia (tagai 1 Timoteo 5). Sa taua foi e Paulo le manatu sese taatele o le matuai faasaina—o le talitonuga e faapea, e mafai ona maua le faaleagaga sili atu e ala i le matuai faasaina [o le tagata lava ia] mai le faia o se mea. Mo se faataitaiga, sa ia lapatai atu, o le a liliuese nisi o tagata o le Ekalesia ma faalauiloa atu talitonuga e faapea, e tatau ona faasaina faaipoipoga (tagai 1 Timoteo 4:1–3). Ina ia taofia lenei mea ma isi aafiaga leaga ma le liliuese, na tuuina atu ai e Paulo ni faatonuga ia Timoteo e aoao atu aoaoga faavae sao (tagai 1 Timoteo 1:3–4, 10; 4:1–6, 13, 16).

Otootoga

1 Timoteo 1. Ua lapatai atu Paulo e uiga i aoaoga sese. E fiafia o ia i le Alii o Iesu Keriso, o le na faasafuaina mai le alofa mutimutivale tele e laveai ai o ia. Sa taua e Paulo o ia lava ua “sili musa” (1 Timoteo 1:15), pe sili ona leaga, o tagata agasala, ua faatatau i lona sauaina o tagata Kerisiano ao lei liua o ia. Sa faamautinoa atu e Paulo i isi, o le a fesoasoani foi le alofa mutimutuvale o Keriso ia i latou.

1 Timoteo 2–3. Ua aoao mai Paulo i le manaomia o le tatalo ma le tapuai lelei. Ua ia aoao mai o Iesu Keriso o le tau mo tagata uma ma o lo tatou Fautua i le Tama. Ua ia faatonuina alii ma tamaiti i auala e amio ai i taimi o tapuaiga. Ua ia faailoa mai tulaga e agavaa ai mo epikopo ma tiakono. Ua ia faamalamalama mai, o mealilo o le faaleatua o le afio ifo o Iesu Keriso, Lona soifuaga atoatoa i luga o le fogaeleele, ma Lona Afio Ae i le mamalu.

1 Timoteo 4. Ua lapatai e Paulo ia Timoteo, o nisi o tagata o le a faaseseina i aoaoga sese e uiga i le faaipoipoga ma faiga masani o le tipiina o le ai. Sa talanoa o ia i le taua o le faaipoipoga ma le mauaina ma le agaga faafetai o foafoaga a le Atua. Ua aoao e Paulo ia Timoteo i le auala e taulima ai aoaoga sese o ona vaitaimi ma mea na o le a oo mai.

1 Timoteo 5–6. Ua tuuina atu e Paulo ia Timoteo ni tala e fesoasoani ia te ia i le auauna atu i manaoga o matua matutua, tagata talavou, fafine ua oti a latou tane, tagata matutua, ma pologa. Ua ia faamatalaina faiaoga sese. Ua ia lapatai mai, “o le manao i tupe o le pogai lea o mea leaga uma lava” (1 Timoteo 6:10) ma faatonuina Timoteo e uiga i auala e mafai ona maua ai e le Au Paia le ola e faavavau.