1 Timoteo

Folasaga

Sa tusi atu le Aposetolo o Paulo ia Timoteo, o se taitai perisitua i Efeso, ma fautuaina o ia ia mautinoa na aoaoina atu aoaoga faavae moni. Sa ia tuuina atu agavaa mo epikopo ma tiakono ma fautuaina Timoteo ia avea ma faataitaiga o e talitonu. Na apoapoai atu Paulo i le Au Paia ia tausia e matitiva ma fafine ua oti a latou tane. Na ia faaiuina lana tusi i le aoao atu “o le manao i tupe, o le pogai lea o mea leaga uma lava” (1 Timoteo 6:10).

1 Timoteo 1–3

Ua aoao e Paulo ia Timoteo e uiga i ona tiutetauave i le vaaiga o le Ekalesia

Faitau atu le faamatalaga lenei mai ia Peresitene Thomas S. Monson. “Ua ou manatua ai se mea na ou oo i ai i le tele o tausaga ua mavae, a o avea a’u ma se epikopo. I le taimi o le sauniga amata o la matou fonotaga a le au perisitua i le taeao o se tasi Aso Sa, sa matou sauniuni e faauu se alii talavou i le tofi o le ositaulaga. Sa asiasi mai i lo matou uarota i lena aso se fautua maualuga, sa galue foi o sē fai galuega i le malumalu. A o ou sauni e faanofo i lalo le alii talavou e faasaga i le faalapotopotoga ina ia mafai ona matou faia le faauuga, sa taofi au e le fautua maualuga ma fai mai, ‘Epikopo, e masani lava ona ou faafaasagaina i le malumalu i latou o le a faauuina.’ Sa ia toe faatulagaina le nofoa ina ia mafai ai ona faasaga le alii talavou i le itu e tu ai le malumalu. Sa vave ona ou iloaina le faiga e lei faamaoniaina” (“Saunoaga Amata” [fonotaga o le aoaoga faaleautaitai i le lalolagi atoa, Nov. 2010], lds.org/broadcasts).

I le avea ai ma epikopo, o Peresitene Monson, ae le o le fautua maualuga, sa faatagaina e pulefaamalumalu i le galuega a le Alii i lana uarota. O le a se mea e te manatu e tatau ona faia e se epikopo i se tulaga faapea? (O le vaega o loo totoe o le saunoaga a Peresitene Monson, o le a faaalia mulimuli mai i le lesona lenei.)

Sa tusi atu e le Aposetolo o Paulo se tusi ia Timoteo, o se taitai perisitua talavou i Efeso. I le paranesi a le Ekalesia sa ia pulefaamalumalu ai, sa feagai ai Timoteo ma luitau na talitutusa ma luitau sa feagai ma Peresitene Monson i le tala na e faitau i ai.

Faitau le 1 Timoteo 1:3–7, ma vaavaai po o le a le tiutetauave na tuuina atu e Paulo ia Timoteo.

O le upu tala o le vavau (fuaiupu 4) e faatatau i aoaoga sese; faalogo i “gafa e leai ni ona gataaga” (fuaiupu 4) e faatatau i tu ma aga sese e faapea e nao i latou o le fanau filifilia a Aperaamo e maua le faaolataga, o e sa masani ona iloa i lo latou gafa umi pe e le gata; ae o “upu le aoga” (fuaiupu 6) e faatatau i talanoaga e leai se aoga (tagai 1 Timoteo 1:6, vaefaamatalaga i).

E tusa ai ma le 1 Timoteo 1:6–7, aisea na taua ai ia Timoteo ona faataunuu le tiutetauave na tuuina atu e Paulo ia te ia?

Mai aoaoga a Paulo ua tatou aoao ai ua i ai i taitai perisitua le tiutetauave ia mautinoa o loo aoao atu aoaoga faavae sao ma faiga masani sao.

Faitau le vaega na totoe o le tala e uiga ia Peresitene Monson, ma vaavaai mo le auala na tali atu ai o ia i le mea na faia e le fautua maualuga: “Sa ou iloa le faamoemoe mo lea faiga [o le faafaasaga o le tagata i le malumalu] ia faapea ona iloa tele ai lea faiga masani. E ui lava ina sa ou laitiiti tele nai lo le fautua maualuga, ae sa ou iloaina le mea e tatau ona fai. Sa ou toe liliuina le nofoa ina ia toe faasaga ai i le faalapotopotoga ma ou fai atu ia te ia, ‘I lo matou uarota, matou te faasaga i le faalapotopotoga’” (“Saunoaga Amata,” lds.org/broadcasts).

I lau api talaaga mo le suesueina o tusitusiga paia, tusi e uiga i auala ua faamanuiaina ai tagata o le Ekalesia e taitai perisitua o e galulue ia mautinoa o loo aoaoina aoaoga faavae moni ma faiga masani sao i le Ekalesia.

I le 1 Timoteo 1:8–11 ua tatou iloa ai sa lapatai atu Paulo e uiga ia i latou o e mananao e avea ma faiaoga o le tulafono a le Atua, ae sa lei i ai se malamalamaaga sao o le tulafono. Faitau le 1 Timoteo 1:12–16, ma vaavaai mo le pogai na faaalia ai e Paulo le agaga faafetai ia Iesu Keriso.

E tusa ai ma fuaiupu 15–16, e faapefea ona avea Paulo “ma faataitai” mo i latou uma o e talitonu ia Iesu Keriso?

I le 1 Timoteo 1:17–2:15 sa fautuaina ai e Paulo ia Timoteo ia taofimau i lona faatuatua, ma sa ia aoao atu o Iesu Keriso o lo tatou Fautua. Sa apoapoai atu foi Paulo i tamaitai ia tauagafau i o latou laei. I le 1 Timoteo 3 tatou te faitau ai i aoaoga a Paulo e uiga i tulaga e agavaa ai mo epikopo ma tiakono. Ia manatua o nei tiakono i le Ekalesia anamua, sa le o ni alii talavou e tai 12- pe 13 tausaga le matutua, e pei ona masani ai i aso nei.

1 Timoteo 4–5

Ua faamatala e Paulo uiga o se faifeau faamaoni o Iesu Keriso

I le 1 Timoteo 4:1–11 tatou te faitau ai i le valoaga a le Aposetolo o Paulo e faapea “i tausaga amuli” (fuaiupu 1) o le a o ese ai nisi o tagata o le Ekalesia mai le faatuatua ma mulimuli atu i aoaoga ma faiga masani sese, e pei o le faasaina ona faaipoipo. Sa apoapoai atu Paulo ia Timoteo ina ia faafailele le Au Paia i aoaoga faavae moni.

Faitau le 1 Timoteo 4:12, ma vaavaai mo le mea na fautuaina e Paulo ia Timoteo e avea ai. O le upu upu i le fuaiupu 12 e faatatau i le amio po o amioga (tagai 1 Timoteo 4:12, vaefaamatalaga i).

O le a lou manatu i le uiga o le ia avea “ma faaaoao i e ua faatuatua”?

O a ni auala na fautuaina ai e Paulo ia Timoteo ia avea ma faaaoao i e ua faatuatua?

Mafaufau i auala na fautuaina ai e Paulo ia Timoteo ina ia avea ma se faaaoao i e ua faatuatua (tagai 1 Timoteo 4:12). Filifili se tolu o na auala, ma i lau api talaaga mo le suesueina o tusitusiga paia, tusi ai ni auala e mafai e se tagata ona avea ma se faaaoao o e ua faatuatua i na auala taitasi.

Faitau le 1 Timoteo 4:13–16, ma vaavaai mo fautuaga faaopoopo na tuuina atu e Paulo ia Timoteo o le a fesoasoani ia te ia e avea ai ma se faataitaiga i e ua faatuatua.

E pei ona tusia i le 1 Timoteo 5, sa faatonuina e Paulo ia Timoteo i auala e ao ona tausia ai e le Au Paia i latou o e matitiva, e aofia ai ma tina ua maliliu a latou tane.

1 Timoteo 6

Ua apoapoai e Paulo ia Timoteo e fesoasoani i isi e saili oa e faavavau

Pe e te manatu e mafai e le i ai o ni tupe se tele ona taitai atu i le faateleina o le leaga po o le lelei? Aisea?

I le 1 Timoteo 6, tatou te faitau ai i le fautuaga a Paulo ia Timoteo e uiga i tupe. Faitau le 1 Timoteo 6:6–10, ma vaavaai mo le mea na aoao ma lapatai atu ai Paulo e uiga i le oa.

O le a lou manatu i le uiga o le fuaitau “o le manao i tupe o le pogai lea o mea leaga uma” (1 Timoteo 6:10)?

O se upumoni e tasi tatou te aoao mai le aoaoga a Paulo, o le manao i tupe e oo atu ai i le le amiotonu ma le liliuese.

E taua le malamalama o le manao i tupe nai lo o le tupe lava ia e oo atu ai i le le amiotonu. Mafaufau pe faapefea ona usitaia e tagata uma le lapataiga a Paulo—mai le tagata mativa e oo i le tagata mauoa.

I lau api talaaga mo le suesueina o tusitusiga paia, faamatala ai pe faapefea e le manao i tupe (nai lo le tupe lava ia) ona oo atu ai i le le amiotonu.

Faitau le saunoaga lenei a Elder Dallin H. Oaks o le Korama a Aposetolo e Toasefululua:

“E leai se mea e mauaa le leaga e uiga i le tupe. Sa faaaoga e le Samaria Agalelei na lava tupe e auauna atu ai i lona uso a tagata, lea sa faaaoga foi e Iuta e faalata ai le Matai. O ‘le manao i tupe [o le] pogai lea o mea leaga uma.’(1 Tim. 6:10; ua faaopoopo le faamamafa.) O le eseesega taua lava o le maualuga o le faaleagaga tatou te faaaoga e vaai, iloilo, ma pulea ai mea o lenei lalolagi ma o tatou aafiaga i ai.

“Afai e faatagaina e avea ma se mea e tapuai i ai pe faamuamua, e mafai e le tupe ona faia i tatou ia manatu faapito ma faamaualuga, ‘faafefeteina i luga i mea lē aoga o le lalolagi.’ (Alema 5:37.) E ese mai, pe a faaaogaina mo le faataunuuina o o tatou tiute faalemalo ma mo le totogiina o a tatou sefuluai ma taulaga, e mafai e le tupe ona faaalia le faamaoni ma atiina ae le le manatu faapito. O le faateleina o le faaleagaga e faaaoga ai meatotino e mafai ona fesoasoani e saunia ai i tatou mo le tulafono maualuga atu o le malo selesitila” (“Spirituality,” Ensign, Nov. 1985, 63).

Faitau le 1 Timoteo 6:11–12, 17–19, ma vaavaai po o le a le fautuaga na tuuina atu e Paulo ia Timoteo ma i latou o e mauoa.

Mafaufau pe mafai faapefea ona fesoasoani le fautuaga a Paulo ia i tatou ia maua le uiga faaalia sao i le sailiga o oa ma le faaaogaina o tupe ma isi ituaiga o tamaoaiga faaletino.

E tusa ai ma le 1 Timoteo 6:19, afai e faatuatua le Au Paia i le Atua ma sa mauoa i galuega lelei, o le a le mea na fai mai Paulo e mafai ona latou “fetagofi atu” i ai?

O se tasi o upumoni e mafai ona tatou aoao mai le fautuaga a Paulo o le afai tatou te faatuatua i le Atua soifua ma mauoa i galuega lelei, ona mafai lea ona tatou fetagofi atu i le ola e faavavau.

Tali le fesili lenei, i lau api talaaga mo le suesueina o tusitusiga paia: Afai o le faatuatua i le Atua ma le mulimuli atu i le amiotonu, o mea aupito sili ia ona tatou faamuamuaina, e mafai faapefea ona aafia ai le ala tatou te vaai, sailia ai, ma faaaoga ai tupe?

Ao e faatuatua i le Atua ma avea le mulimuli atu i le amiotonu ma mea e aupito sili ona ave i ai lau faamuamua, e mafai ona e maua oa moni o le ola e faavavau.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le 1 Timoteo ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lou faiaoga: