Folasaga i le 2 Peteru
Aisea e Suesue ai Lenei Tusi?
Sa saunoa le Perofeta o Iosefa Samita, “Sa tusia e Peteru le gagana e aupito sili ona tamalii o soo se isi o aposetolo” (i le History of the Church, 5:392). O le tamalii o lona uiga o le faaeaina i manatu, e maoae le taua, ma e matele ina faaosofia ai le faamemelo.
I le avea ai o se molimau vaaitino i le liuaina o Iesu Keriso (tagai 2 Peteru 1:16–18), na timai ai e Peteru lana au faitau ia tuputupu a’e i lo latou malamalama i le Faaola ma ia saili ia maua uiga faaleatua ina ia mafai ona latou tofo ai i le “amio atua” (tagai 2 Peteru 1:4–8). Sa ia tautino atu i ana au faitau o lenei tuputupu a’e faaleagaga o le a fesoasoani ia i latou ia “faamauina lo [latou] valaauina ma lo [latou] filifilia” (2 Peteru 1:10). “Ua toe faamautu mai e Peteru e faapea, o le a afio mai le Alii mai le lagi i le mamalu sili ma le faamasinoga i luga o le fogaeleele” (Bible Dictionary, “Peter, Epistles of”). O le suesueina o le tusi e lua a Peteru, e mafai ai ona e atiina a’e se faatuatua sili atu ia Iesu Keriso ma maua faatonuga ma musumusuga e mafai ona fesoasoani ia te oe e avea atili ai e pei o Ia.
O Ai na Tusia Lenei Tusi?
O le tusitala o le Tusi Lona Lua Faalauaitele a Peteru o Simona Peteru, le Aposetolo sinia a Iesu Keriso (tagai 2 Peteru 1:1).
O Anafea ma o Fea na Tusia ai?
Tatou te le iloa tonu pe o anafea na tusia ai le tusi lenei. E masani ona faapea sa tusia e Peteru i Roma, ina ua uma le tusi ua ta’ua o le 1 Peteru, lea atonu na tusia i se vaitaimi o le T.A. 64 (tagai Bible Dictionary, “Peter, Epistles of”).
O Ai Na Faatatau i ai le Tusiaina ma Pe Aisea Foi?
Fai mai Peteru sa ia tusia “e ua maua le faatuatua e tusa lona lelei ma lo matou” (2 Peteru 1:1). O lenei mea e ono faaalia ai o le au faalogologo a Peteru o le au Kerisiano nuuese lava ia na mauaina le tusi muamua (tagai 2 Peteru 3:1). O anomea o le 2 Peteru 1:12–15 ua faaalia ai sa fuafuaina e Peteru lenei tusi o se savali faamavae i lana au faitau.
E le pei o le Tusi Muamua a Peteru, lea sa fesoasoani i le Au Paia e taulima ai o latou sauaga mai fafo, o le tusi lona lua a Peteru na tautalagia ai le liliu ese mai totonu lea sa lamatia ai le lumanai o le Ekalesia. Sa faasalalau solo e perofeta ma a’oa’o pepelo ni “vaevaega e fano ai [aoaoga pepelo], ma latou faafiti i le Alii na ia faatau mai ia te i latou” (2 Peteru 2:1). Sa tusia e Peteru le tusi lenei e uunaia ai le Au Paia ia tuputupu ae i lo latou malamalama i le Alii ma ia “faamauina lo [latou] valaauina ma lo [latou] filifilia” (2 Peteru 1:10).
O A Nisi o Vaaiga Iloga o Lenei Tusi?
“O le tusi lona lua sa mautinoa lava le talanoa atu i ekalesia lava ia e pei o le muamua (3:1). Sa tusia ina o le a lata ina oti (1:14) ma ua ta’i atu i le puipuiga e faasaga i le liliuese” (Bible Dictionary, “Peter, Epistles of”). O loo i ai foi nisi o upu e sili ona mamana ma molimau faaiu a Peteru.
O se autu taatele i le 2 Peteru o le taua o le maua o le malamalama e uiga ia Iesu Keriso. Sa folafola atu e Peteru i lana au faitau, afai latou te saili i uiga faaleatua ma atiina a’e se amio atua, o le a latou “le paie a’o e fua mai le iloa lelei o lo tatou Alii o Iesu Keriso” (2 Peteru 1:8) ma o le a “faamauina lo [latou] valaauina ma lo [latou] filifilia” (2 Peteru 1:10).
Sa faatusa e Peteru le malamalama moni e uiga ia Iesu Keriso ma le malamalama ma aoaoga pepelo sa faasalalau e tagata liliuese (tagai 2 Peteru 2). I le faaiuga o lenei tusi, sa tuuina mai ai e Peteru se valaaulia faaiu mo le Au Paia ina ia “tutupu …i le alofa tunoa ma le poto i lo tatou Alii o lo tatou Faaola lea o Iesu Keriso” (2 Peteru 3:18).
Otootoga
2 Peteru 1. Ua faamalamalama mai e Peteru, o folafolaga a Iesu Keriso e mafai ai e le Au Paia ona “tofusia faatasi …i le amio atua” (2 Peteru 1:4). Ua ia uunaia i latou ina ia “faamauina lo [latou] valaauina ma lo [latou] filifilia” (2 Peteru 1:10). Na ta’ua e Peteru lana aafiaga i le Mauga o Liua, ina ua ia molimau vaaitino i le Keriso faamamaluina ma faalogo i le siufofoga o le Tama. Fai mai Peteru “o loo ia i tatou foi le upu o le valoaga e sili lona mausali” (2 Peteru 1:19).
2 Peteru 2. Ua lapatai e Peteru tagata o le Ekalesia e uiga i perofeta ma a’oa’o pepelo o e o le a o mai ia i latou e taumafai e taitai ese le Au Paia. O nei a’oa’o amioleaga o le a faafitia le Alii ma upuleaga ai “le ala o le upumoni” (2 Peteru 2:2). Ua a’oa’o mai Peteru e sili atu le le talia o le talalelei nai lo o le osi feagaiga ae le ola ai i ia feagaiga.
2 Peteru 3. Ua toe faamanatu mai e Peteru lena mea mautinoa e faapea, o le a afio mai Keriso i Lona lava taimi, e faamama le lalolagi i le afi, faatamaia e amioleaga, ae laveai e filiga ma faamaoni. Ua uunaia e Peteru le Au Paia e “tutupu …i le alofa tunoa ma i le poto ia …Iesu Keriso” (2 Peteru 3:18).