Iunite 31: Aso 1
Faaaliga 1–3
Folasaga
Ao i ai i le motu o Patamo, na tusia e le Aposetolo o Ioane se tusi faamalosiau i aulotu e fitu o le Ekalesia. I totonu o lea tusi na ia faamatala ai faaaliga na ia maua. Na molimau Ioane i mea na tuuina atu ia te ia mai se agelu ma mai ia Iesu Keriso. Sa ia folafola atu foi upu faaviivii, faasao, ma lapataiga a le Alii i le Au Paia.
Faaaliga 1:1–11
Ua molimau Ioane i lana faaaliga
Ia tuu se faailoga faasao i vaega o mea na tutupu e te fiailoa atili:
____ Muai olaga
____ O aso mulimuli
____ O Le Afio Mai Faalua o Iesu Keriso
____ O Le Meleniuma
____ O Le Faamasinoga Mulimuli
O le tusi a Faaaliga ua “taua foi o le Apokalipe, mai le upu Eleni o lona uiga ua faalia mai po o le faailoa mai ” (Bible Dictionary, “Faaaliga a Ioane”). I lenei tusi na faamaumau ai e le Aposetolo o Ioane upumoni na faaali atu ia te ia e uiga i le muai olaga, o Iesu Keriso ma Lana matafaioi i le ata o le faaolataga a le Tama Faalelagi, o mea e tutupu e tau atu ai i le Afio Mai Faalua, o le Meleniuma, ma le Faamasinoga Mulimuli.
Vaai mo upumoni e uiga i nei autu ao e suesue i le tusi o Faaaliga.
Faitau le Faaliliuga Iosefa Samita, Faaaliga 1:1–3 (i le faaopoopoga Tusi Paia), ma vaavaai mo mea na aoao mai e Ioane e uiga i le faaaliga na ia maua. Atonu e te manao e maka pe faailoga po a mea na manao Ioane i le Au Paia e fai.
Na taua e le Aposetolo o Ioane i latou o e faitau i ana upu ma i latou o e faalogo i ana upu. I le vaitaimi o Ioane e toatele le Au Paia e leiloa faitau, ae na latou masani i ana tusitusiga i le tusi o Faaaliga e ala i le faalogo i isi a o faitau leotele.
E faavae i aoaoga a Ioane i le Faaaliga 1:3, e mafai ona tatou aoao mai ai le mataupu faavae lenei: A o tatou faitau, saili ia malamalama, ma usitai i afioga a le Alii, o le a faamanuiaina i tatou. O se tasi o faamanuiaga na aoao mai e Ioane o le a tatou maua o le saunia lea mo le Afio Mai Faalua o Iesu Keriso.
O le Faaliliuga a Iosefa Samita ua faamanino mai ai na tusi atu le tusi a Ioane “i auauna e toafitu o e o loo vaaia ekalesia e fitu i Asia” (Faaliliuga Iosefa Samita, Faaaliga 1:4 [i le faaopoopoga o le Tusi Paia]). O lenei mea ua fesoasoani ia i tatou e malamalama ai “o ekalesia e fitu i Asia” e faatatau i aulotu e fitu o le Ekalesia, e pei o uarota ma paranesi i aso nei, lea sa i ai i le vaega ua taua nei o le eria i sisifo o Take i aso nei.
Faitau le Faaliliuga Iosefa Samita, Faaaliga 1:5–8 (i le faaopoopoga o le Tusi Paia), ma vaavaai mo mea na manao Ioane ia iloa e aulotu e fitu e uiga ia Iesu Keriso.
Ia matau, na faamalamalama mai e Ioane, e mafai ona “faamama [i tatou] … mai a tatou agasala” ma mama e ala i le toto, po o le Togiola, a Iesu Keriso ma avea ma “tupu ma faitaulaga i le Atua” (Faaaliga 1:5–6).
-
Tali fesili ia i totonu o lau api talaaga mo le suesueina o tusitusiga paia: O a fuaitau e uiga i le Faaola i le Faaaliga 1:5–8 e faapitoa ona anoa ia te oe? Aisea?
Faitau le Faaaliga 1:9–11, ma vaavaai po o fea na i ai Ioane i le taimi na ia mauaina ai lenei faaaliga ma o fea na i ai ekalesia e fitu. Matau mea o loo i ai nei aai i luga o le faafanua ua auina atu faatasi ai.
Na maua e Ioane lenei faaaliga i se vaitaimi faigata mo tagata o le Ekalesia. Sa matuai malosi sauaga e faasaga i le Au Paia, e aofia ai le fasioita o nisi o i latou, faapea foi ma le liliuese ma le fevaevaeai o tagata o le Ekalesia. Ma le isi, na fasiotia uma Aposetolo sei vagana ai Ioane. O le tusi o Faaaliga atonu na tusia i le vaitaimi o le nofoaiga a le tupu o Roma o Tominika (T.A. 81–96), lea sa toefaatuina le tapuai i le tupu i le malo atoa o Roma ma faaaunuua pe fasiotia i latou sa le tapuai i atua na faataga mai e le malo o Roma. O le tele o tagata na talitonu o le mafuaaga lea na faaaunuua ai Ioane i le motu o Patamo.
Na maua e Ioane se faaaliga a o i ai i le motu o Patamo.
Ua tatou aoao mai i le Tusi a Mamona sa maua foi e Nifae se faaaliga e taitutusa ma le faaaliga a Ioane. Sa vaai Nifae i mea e tutupu i aso mulimuli (e aofia ai le Afio Mai Faalua o Keriso, o le Meleniuma, ma le faamaeaina o le galuega a le Atua i le lalolagi), ae sa poloaiina o ia e aua nei tusia ia vaega ona ua uma ona vaetofia Ioane e na te faia (tagai 1 Nifae 14:24–29). Manatu i le taua na tuuina e le Alii i faamaumauga a Ioane. Ao faaauau pea ona e suesue i upu a Ioane i le Faaaliga, vaai mo upumoni e uiga i aso mulimuli, o le Afio Mai Faalua, o le Meleniuma, ma le faamaeaina o le galuega a le Atua i le lalolagi.
Faaaliga 1:12–20
Sa vaai Ioane ia Iesu Keriso i se faaaliga
Mafaufau i ni kamupani se tolu e te masani i ai. E faaaoga e se isi o nei kamupani ni faailoga e faailoa ai i latou?
Aisea e te manatu e faaaoga ai e kamupani ia faailoga?
I le tusi a Faaaliga na faaaoga e le Aposetolo o Ioane ia faailoga ma faatusa e aoao atu ai ni savali taua e uiga i le talalelei. O faailoga e mafai ona avea ma meafaigaluega mamana e aoao atu ai ona e mafai ona fesootai atu i tagata o augatupulaga ma aganuu eseese ma i ni tulaga se tele. E mafai foi ona latou fesootai atu ni savali eseese se tele.
Faitau le Faaaliga 1:12–18, ma vaavaai mo faailoga na vaai ma faaaoga e Ioane e faamatala ai lana faaaliga. Atonu e te manao e maka ma faailoga mea ua e maua.
-
|
Faailoga |
Uiga e ono faatatau i ai |
|---|---|
|
|
|
|
|
|
|
|
|
|
E faatatau i le savali na faaali mai e le Alii i Lana Au Paia e ala mai ia Ioane, e tasi se upumoni tatou te aoao ai, E puipui ma tausia e Iesu Keriso ia Ona soo faamaoni.
-
-
Aisea na ono taua ai mo tagata o le Ekalesia i ona po o Ioane ona iloa o loo faaauau pea ona puipui ma tausia i latou e Iesu Keriso?
-
Aisea e taua ai ona tatou manatua lenei upumoni e tasi?
-
Mafaufau i se taimi na e lagona ai na puipuia ma tausia oe e le Atua. Mafaufau pe ua faapefea ona faamanuiaina oe e lena aafiaga.
Matau i le Faaaliga 1:17–18 na ta’u atu ai e le Faaola ia Ioane, o loo Ia umia ki o seoli ma le oti. Mai nei fuaiupu e mafai ona tatou aoao ai o, Iesu Keriso o se tagata toetu faamamaluina o le o loo i ai le mana i le oti ma seoli.
Mafaufau po le a le mea ua aoao mai e lenei aoaoga faavae i le taunuuga mulimuli o le taua i le va o le lelei ma leaga lea o loo i ai i le laueleele.
Mafaufau loloto pe faapefea e lenei faamatalaga ona faatatau i le mana o Iesu Keriso i luga o le oti ma seoli: “O le savali a Faaaliga e tutusa lava ma isi mau uma: o le a iu ina i ai se manumalo o le Atua i le tiapolo, i luga o le fogaeleele; o se manumalo tumau o le lelei i le leaga, o le Au Paia i o latou au faaoosala, o le malo o le Atua i malo o tagata ma Satani” (Bible Dictionary, “Revelation of John”).
Ona ua tatou iloa e iu lava ina manumalo le lelei i le leaga, o le mea o loo totoe e le i vaai i ai, o le po o fea le itu tatou te filifilia e i ai—Satani po o le Atua.
Na saunoa mai Peresitene Ezra Taft Benson: “O aso taitasi e maua ai lava e au a le leaga ma au o le lelei ni tagata fou. O aso taitasi tatou te faia ai ni filifiliga se tele e faaalia ai le itu o le a alu i ai la tatou lagolago. E mautinoa lava le iuga—o le a iu lava ina manumalo au o le amiotonu. O le mea o loo totoe e le i vaaia o le, po o fea o le a tatou tutu ai taitoatasi, i le taimi nei ma i le lumanai, i lenei taua—ma po o le a le maualuga o le a tatou tutu ai. Pe o le a tatou faamaoni ea ia tatou misiona i aso amuli na muai faauuina ai [ai i tatou]?” (“In His Steps” [faeasaite a le Iunivesite a Polika Iaga, Mat. 4, 1979], 1, speeches.byu.edu).
Mafaufau po o le a se mea e mafai ona e faia e atili filifili atoa ai ia [e] i ai i le itu a le Atua. Ia galue i soo se uunaiga atonu e te maua.
Faaaliga 2–3
Ua tusi atu e Ioane afioga a Iesu Keriso i taitai o ekalesia e fitu
O le Faaaliga 2:1–3:13 o loo aofia ai le savali a le Alii mo ekalesia patino i Asia Laititi. Faitau nei fuaiupu, ma vaavaai mo apoapoaiga ma folafolaga na tuuina atu e le Alii i ia tagata o le Ekalesia.
O le fea o nei folafolaga e te manao e te mauaina?
Faitau le Faaaliga 3:14–17, ma vaavaai mo se tulaga na manaomia e tagata o le ekalesia i Laotikaia ona manumalo mai ai ina ia maua le faaeaga. I le fuaiupu 14, “o le Amene” e faatatau ia Iesu Keriso.
-
-
O le a lou manatu o le uiga e faapea, o nei tagata o le Ekalesia sa “le maalili pe vevela” (Faaaliga 3:15) ae o ni soo faaleogolua [le mautonu] o Iesu Keriso?
-
I lou lava manatu, o a ni mea e ono faia ma le faia e soo faaleogolua a Iesu Keriso?
-
Mafaufau e uiga i mea na e faia e mulimuli ai ia Iesu Keriso i nai aso ua tea, ma pe e te ono avea ma se soo vevela, maalili, pe faaleogolua a Iesu Keriso.
Faitau le Faaaliga 3:19, ma vaavaai pe aisea na fetalai mai ai le Alii, sa Ia aoaia le Au Paia i Laotikaia. Atonu e te manao e maka pe faailoga mea ua e maua.
Faitau le fuaitau muamua o le Faaaliga 3:20, ma vaavaai mo le mea na fetalai mai le Faaola sa Ia faia.
O a ni auala eseese e ono tali atu ai tagata pe ana latou iloa na tu’itu’i atu le Faaola i faitotoa o a latou fale?
Mafaufau e uiga i ni ou lagona e ono i ai pe ana e faalogoina se tu’itu’i i le faitotoa o lou fale ma e iloa ane o le Faaola. Pe e te tatalaina le faitotoa?
Faitau uma le Faaaliga 3:20, ma vaavaai mo faamanuiaga na ofo atu e le Alii i le Au Paia i Laotikaia ma mea na manaomia ona latou faia e maua ai.
E faavae i le savali a le Faaola i le Au Paia i Laotikaia, e mafai ona tatou aoaoina mai ai le mataupu faavae lenei : A tatou tatalaina le faitotoa i le Faaola, o le a afio mai o Ia i totonu ma tatou talisua faatasi.
I le aganuu anamua e Latalata i Sasa’e, o le aai faatasi ma se isi o se faailoga lea o le faamasani. E ta’u mai ai, sa i ai se fusi o le faauo ma le filemu ia pe na ofoina atu foi i ai.
O le a sou manatu i le mea e faatusa i ai le faitotoa na taua i le Faaaliga 3:20?
Mafaufau e uiga i le faatusa o le faitotoa a o e faitau i le saunoaga lea a Peresitene Spencer W. Kimball:
“I se tasi aso na faaali atu ai e [se tusi ata na igoa ia Holman Hunt] lana ata o ‘Keriso o loo Tuitui le Faitotoa’ i sana uo ma sa faafuasei lava ona faapea mai lana uo: ‘E tasi lava le mea e sese ai lau ata.’
“‘O le a lena mea?’ o le fesili lea a le alii tusi ata.
“‘E leai se au o le faitotoa o loo tuitui ai Iesu,’ o le tali lea a lana uo.
“‘Oi,’ sa tali atu le Susuga a Hunt, ‘e le o se mea sese lena mea. Vaai foi oe, o le faitotoa lenei i le loto o le tagata. E na o totonu lava e mafai ona tatala mai ai.’
“Ma o le tulaga lena. E mafai ona tu Iesu ma tuitui, ae e filifili i tatou taitoatasi pe tatala pe leai” (O Le Vavega o le Faamagalo Atu [1969], 212).
Mafaufau po o le a se mea e mafai ona e faia e tatala ai lou loto i le Faaola.
Faitau le Faaaliga 3:21–22, ma vaavaai mo folafolaga ma apoapoaiga a le Alii i le Au Paia.
E tusa ma le fuaiupu 22, o le a le apoapoaiga na tuuina atu e le Alii?
Taumafai e “faalogo mai…ia i le mea ua fetalai mai ai le Agaga” (Faaaliga 3:22) e ala i le toe tomanatu i mea na e aoaoina mai i le lesona. Faatino soo se uunaiga e te maua.
-
Ua ou suesueina le Faaaliga 1 3 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: