E Faafeiloai Atu le Feagaiga Fou

O Le A le Feagaiga Fou?

O le Feagaiga Fou o loo i ai tusitusiga a uluai Aposetolo ma soo anamua a Iesu Keriso o e na tusia i lalo o musumusuga a le Agaga Paia. O loo i ai Evagelia e fa, o molimau ia a Mataio, Mareko, Luka ma Ioane e uiga ia Iesu Keriso o le Mesia na folafolaina—o le Faaola ma le Togiola—ma o le Alii toetu. O loo faamatala mai e Evagelia e fa vaega o le soifuaga o Iesu ma o ni faamaumauga o le tele o Ana aoaoga. O le Feagaiga fou o loo i ai aoaoga faavae ma mataupu faavae na aoao mai e le Faaola ma Ona Aposetolo, e fesoasoani ai i isi ia aoao i auala e toe foi atu ai e nonofo faatasi ma le Atua le Tama ma maua le ola e faavavau. Mo le Au Paia o Aso e Gata Ai, o le Tusi Paia e tutu faatasi ma le Tusi a Mamona, Mataupu Faavae ma Feagaiga, ma le Penina Tau Tele o ni tusitusiga paia (tagai Mataupu Faavae o le Faatuatua 1:8).

Na aotele e Elder Bruce R. McConkie (1915–85) o le Korama a Aposetolo e Toasefululua ia anotusi o le Feagaiga Fou: “O le Feagaiga Fou … o loo tusia ai le faataunuuga o folafolaga anamua; o loo taua ai le fanau mai ma le galuega ma le taulaga togiola a Le na Folafola Mai; o loo auiliili mai ai aoaoga faavae faaola o lana talalelei e faavavau; o loo tusia ai le tuputupu ae ma le faalauteleina o le faamoemoega o le talalelei i le taulotoaiga o aso; o loo valoia mai ai le liliuese tele mai le faatuatua sa tuuina atu i le au paia; o loo folafola mai ai se toefuataiga mamalu o le talalelei i aso amuli; ma muai tau mai ai, se ata faatusa ma le maoae, o mea e tutupu i luma atu, o le i ai, ma le pe a mavae le Afio Mai Faalua o le Atalii o le Tagata. O lona faamoemoega autu lava o le tuuina atu o le molimau ia Keriso” (A New Witness for the Articles of Faith [1985], 392).

Aisea e Taua ai le Suesueina o le Feagaiga Fou?

E pei o tusitusiga paia uma, o le Feagaiga Fou o loo aoao mai ma molimau mai e uiga ia Iesu Keriso ma e uiga i Lona paia. Sa ta’ua e Ioane faapea, o lona faamoemoega mo le tusiaina o lenei tusi o le tauanauina o isi e ”talitonu o Iesu o le Keriso, o le Alo o le Atua, ma o lena talitonu e mafai ai ona maua le ola e ala i Lona suafa” (Ioane 20:31). O le suesueina o le Feagiaga Fou, o le a e aoao ai e uiga i le fanauga maoae o le Faaola, molimau i Ana vavega ma faamalologa, faalogo i upumoni maotua o Lana talalelei, ma toe faamanatu aso o Lana taulaga togiola, faasatauroga, ma le toetu mamalu. A o e suesue i le soifuaga ma aoaoga a le Faaola, o le a e aoao ai i auala e alu atu ai ia te Ia ina ia maua le faamoemoe, faamagaloga, toafilemu, ma le fiafia e faavavau. O se suesuega faamaoni o le Feagaiga Fou e mafai ona faamalosia ai lou faatuatua ia Iesu keriso ma fesoasoani e te faalagolago ai i Ana aoaoga ma le Togiola.

Sa ta’ua e Elder L. Tom Perry o le Korama a Aposetolo e Toasefululua e faapea o le Feagaiga Fou “o le totonugalemu lea o le talafaasolopito faatusipaia, e faapei lava ona tatau ai ona avea le Faaola lava Ia ma totonugalemu o o tatou olaga. E tatau ona tatou tuuto atu i tatou lava i le suesueina ma le teufatuina!

“O loo i ai maataua anagata o le poto e ao ona maua mai i a tatou suesuega o le Feagaiga Fou” (“O Le Sapati ma le Faamanatuga,” Ensign po o le Liahona, Me 2011, 6).

O nisi nei o maataua anagata o le upumoni ma le poto o loo maua i le Feagaiga Fou:

O Iesu Keriso o “le ala, le upumoni, ma le ola,” ma e ala atu ia te Ia o le a mafai ai ona e iloa le Tama Faalelagi (tagai Ioane 14:6–7).
O le Agaga Paia o “le Fesoasoani, … [o le] na te aoao ia te outou i mea uma lava, e faamanatu mai foi o ia ia te outou i mea uma” (Ioane 14:26).
Ua i ai i soo o Iesu Keriso le tiutetauave o le folafola atu o le talalelei i le lalolagi atoa (tagai Mataio 28:19).
E faaauau pea ona taitai e le Faaola Lana Ekalesia e ala i faaaliga i Ana auauna filifilia (tagai Galuega 1:2).
O outou o le fanau, po o le atalii/afafine o le Atua (tagai Galuega 17:28–29).
Ona o le toetu o le Faaola, o le a manumalo ai tagata uma i le oti ma toe ola ai (1 Korinito 15:21–26).
Afai e leai sou poto e mafai ona e ole i le Atua i le tatalo, ma o le a Ia tali mai (tagai Iakopo 1:5–6).
O le Au Paia faamaoni o e faatolilaloina le leaga o le a maua le ola e faavavau (tagai Faaaliga 3).

O se aafiaga i le soifuaga o le Perofeta o Iosefa Samita ua tuuina mai ai se faataitaiga o le auala e mafai ai e le suesueina o le Feagaiga Fou ona faatosina ma aafia ai lou olaga. A o talavou, sa tauivi ai Iosefa i le faigata o le iloaina e ia lava po o le fea o lotu ua sao. Sa liliu atu o ia i le Tusi Paia, ma i se tasi o aso sa ia faitau ai i le fuaitau i le Iakopo 1:5. Sa ia tusia mulimuli ane: “E leai lava se mau o tusitusiga paia na oo mai i le loto o se tagata ma le mana tele nai lo o lenei mau i loʼu loto i lea taimi. Sa foliga ua ulu mai ma se mana tele i lagona uma o loʼu loto. Sa oo ina ou mafaufau pea lava i ai” (Iosefa Samita—Talafaasolopito 1:12).

Ina ua uma ona faitau ma mafaufau pea i na upu mai le Feagaiga Fou, sa filifili loa Iosefa e faatino le upumoni na ia aoaoina ma ole atu i le Atua, e pei ona sa aoao mai o Iakopo. O lana faaiuga na iu ai i lenei Uluai Faaaliga mataina. A o e suesue ma le filiga i le Feagaiga Fou, o le a e lagonaina foi le pai atu o le Agaga Paia i lou loto ma fesoasoani ia e iloa auala e faaaoga ai aoaoga faavae ma mataupu faavae o le talalelei i lou olaga.

A o e suesue ma le agaga tatalo i le Feagaiga Fou, ia faatino uunaiga a le Agaga Paia. O le faia o lenei mea, e mafai ai ona e liua atoatoa atili i le Alii. E tupu le liua moni ao faaauau pea ona outou galulue i aoaoga faavae tou te iloa e moni ma tausi poloaiga, i lea aso ma lea aso, i lea masina ma lea masina, mo aso o totoe o tou olaga.

E Uiga i le Feagaiga Fou

O le Tusi Paia e le o se tusi e tasi. O se tuufaatasiga o ni tusi. O le upu Eleni e sau mai ai le upu bible o lona uiga “o tusi.” “O le Tusi Paia a Kerisiano e lua ona vaega, ua iloa e le toatele o le Feagaiga Tuai ma le Feagaiga Fou” (Guide to the Scriptures, “Bible,” scriptures.lds.org). O le upu sa faaliliuina o le testament [feagaiga] e mafai foi ona faaliliuina o le covenant [feagaiga]. O lea la o le Feagaiga Fou o le feagaiga [maliliega] fou.

I se anotusi o le talalelei, o se feagaiga o se maliega faapitoa i le va o le Alii ma se tagata po o se vaega. O le Feagaiga Tuai, po o le feagaiga [maliliega] tuai, o le tulafono a le Alii na tuuina atu i Lona nuu anamua. “Ina ua afio mai le Faaola i le ogatotonu o taimi, sa Ia toefuataiina mai le talalelei i tagata Iutaia i Palesitina. Talu ai ona sa latou se ese, na faapea foi mai le tulafono a Mose, sa o se feagaiga fou lea ia i latou” (Bible Dictionary, “Bible”).

O le Feagaiga Fou ua masani ona vaevaeina i Evagelia, o Galuega a le Au Aposetolo, o tusi a Paulo, o tusi faalauaitele, ma le tusi o Faaaliga.

O Evagelia. O tusi a Mataio, Mareko, Luka ma Ioane ua taua o Evagelia, ma ua faaigoaina ia tusi taitasi i le tagata na tusia. O le upu evagelia o lona uiga o le “tala e lelei.” E ui ina eseese ia Evagelia e fa i ni nai faamatalaga ma vaaiga, ae ua latou tusia uma lava ia mea na tutupu i le soifuaga o le Faaola ma le galuega i le lalolagi i Iutaia. O loo aoao ma molimau uma Evagelia e fa o Iesu Keriso o le Alo o le Atua ma le Faaola o le lalolagi. “O faamaumauga a Mataio, Mareko, ma Luka o loo aumaia ai se aofaga talitutusa o mea ma i ai le mau fuaitau e tutusa, faapea foi manatu autu talitutusa, ma o nisi taimi e faaigoa ai o ‘Evagelia Uigatutusa’ (o lona uiga ‘o vaaiga-tutusa’). E ui i lea, e tofu tulaga ese i latou taitoatasi, ma e tele foi auiliiliga e le o maua e isi. E fai si ese o faamaumauga a Ioane mai le isi toatolu i le vaogagana, fasifuaitau, ma le faatinoga mai o mea na tutupu” (Bible Dictionary,“Evagelia”
O Galuega a le Au Aposetolo O Galuega a le Au Aposetolo sa tusia e Luka, ma o se tala o le tuputupu ae o le Ekalesia i lalo o le taitaiga a Peteru ma isi Aposetolo (tagai Bible Dictionary, “Acts of the Apostles”).
O tusi a Paulo. O tusi [pupuu] po o tusi, a Paulo ua faailogaina mo le paranesi o le Ekalesia po o le tagata po o le vaega na tusia i ai le tusi. O tusi a Paulo o loo faatulagaina “i le uumi, i le faasologa agai i lalo mai le [tusi] aupito umi (Roma) i le [tusi] aupito puupuu (Filemoni). O le tulaga lea vagana ai ia tusi i Eperu, lea sa tuu faamulimuli ona sa fesiligia e nisi pe na tusia e Paulo pe leai” (Bible Dictionary, “Pauline Epistles”).
O tusi faalauaitele. O tusi o Iakopo e oo ia Iuta e masani ona taua o tusi faalauaitele ona, e vagana ai le Ioane 2 ma le 3 , e le o faatatau tonu atu i se tagata po o se paranesi patino o le Ekalesia. Ua faaigoaina mo o laua tusitala. (Tagai Bible Dictionary, “General Epistles.”)
O le tusi o Faaaliga. O le tusi o Faaaliga (lea e taua i nisi o taimi o le Apokalifa) sa tusia e le Aposetolo o Ioane, o le na tusia foi le Evagelia ma tusi o loo faaigoa i lona igoa. O le tala a Ioane e uiga i se faaaliga na ia mauaina mai le Alii. (Tagai Bible Dictionary, “Revelation of John.”)

O le Faaliliuga a Iosefa Samita ma le Iosefa Samita–Mataio

Na poloaiina e le Alii le Perofeta o Iosefa Samite e fai se faaliliuga, po o se toe faatonutonuina, o le Lomiga o le King James o le Tusi Paia. O le Faaliliuga a Iosefa Samita (o nisi taimi e faapuupuu ai o le FIS) e le o se faaliliuga o le Tusi Paia mai se gagana se tasi i se isi. Nai lo o lena, o loo i ai suiga na musuia ai e le Alii le Perofeta e fai i le anotusi o le Tusi Paia.

Na amata e Iosefa Samita lana faaliliuga ia Iuni 1830 ae na faamaeaina ia Iulai 1833, e ui lava sa faaauau ona ia faia ni suiga i le tusiga seia oo i se taimi na lei mamao ae maliu i le 1844 (tagai Bible Dictionary, “Joseph Smith Translation”). E ui ina sa lomia ni vaega o le faaliliuga a le Perofeta o Iosefa Samita i le aluga o lona soifuaga, ae o lana faaliliuga musuia na faamaeaina o le Tusi Paia sa lomiaina mo le taimi muamua i le 1867 e le Ekalesia a Iesu Keriso o le Au Paia o Aso e Gata Ai Toefaatulagaina (lea ua taua nei o le Faapotopotoga a Keriso). Talu mai le 1979 ua i ai i le lomiga a le Au Paia o Aso e Gata Ai, le Lomiga a King James o le Tusi Paia i le FaaPeretania, le faitau selau o fuaitau taua faaleaoaoga faavae mai le Faaliliuga a Iosefa Samita i vaefaamatalaga ma le faaopoopoga. (Tagai Robert J. Matthews, “Joseph Smith’s Efforts to Publish His Bible ‘Translation,’” Ensign, Jan. 1983, 57–64; Bible Dictionary, “Joseph Smith Translation.”) Talu mai le 2009 ua i ai foi i le lomiga a le Au Paia o Aso e Gata Ai, o le Tusi Paia i le faaSipaniolo, le lomiga o le Reina-Valera ni fuaitau i le vaefaamatalaga ma le faaopoopoga. I le 2015 na lomiaina ai i le FaaPotukale le lomiga a le Au Paia o Aso e Gata Ai o le Tusi Paia.

O le Iosefa Samita—Mataio, i le Penina Tau Tele, o se vaega na aveese mai mai le Faaliliuga a Iosefa Samita (Faaliliuga a Iosefa Samita, Mataio 23:39–24:56). O le faaliliuga musuia lea o le Mataio 23:39–24:55.

O le Faaliliuga a Iosefa Samita ua saofaga i lo tatou malamalamaaga o le Feagaiga Fou, e ala i le toefuatai mai o nisi o upumoni manino ma taua ia na leiloloa mai le Tusi Paia (tagai 1 Nifae 13:20–41) ma faaopoopo i ai talaaga ma faamaninoga a le Alii.