Na aoao mai le Aposetolo o Paulo, o i latou o e maua le perisitua e ao ona valaauina e le Atua ma o Iesu Keriso sa “taua e le Atua [e avea o se] faitaulaga sili, e uiga faatasi ma Mekisateko” (Eperu 5:10). Na uunaia e Paulo tagata o le Ekalesia ina ia filiga, faatuatua, onosai, ma faamoemoe i le mauaina o folafolaga a le Atua.
Ua aoao mai Paulo o i latou o e maua le perisitua e tatau ona valaauina e le Atua.
Vaai faalemafaufau e faapea, ua tusi e se tagata e masani ai le faalagiga Fomai i se pepa ma faapipii i lona ofutino. E ui lava o le a ia ofuina se igoa e faailoa atu ai le faalagiga talafeagai, ae o a ni popolega e ono i ai ia te oe pe afai e taumafai lenei tagata e fai sou taotoga ina ua e aafia i se faalavelave? O a ni ou popolega e i ai pe afai na te ofuina se igoa e faaali atu ai le faalagiga Tagata e Puipuia le Tulafono ma taumafai e avatu sau sala ona o le faia o se mea sese?
Aisea o le a e musu ai e talitonu i lenei tagata e faataunuu ia galuega e faatatau i faalagiga ua ia tauaveina mo ia lava?
E ui lava ina ofu i se faailoga ma le faalagiga talafeagai, o le a le i ai lava i lenei tagata le pule e manaomia ma le tomai e faatino ai na galuega. E pei lava ona faatuina e sosaiete ia auala e maua ai le pule e faataunuu ai ni tiutetauave faapitoa, ua faatuina foi e le Atua se ala e maua ai Lana pule e fai ai tiutetauave faapitoa i Lana Ekalesia. Ao e suesue i le Eperu 5, vaavaai mo le mamanu ua faatuina e le Atua e maua ai Lana pule.
Na faamatala e le Aposetolo o Paulo le Faaola o “le faitaulaga silisili” (Eperu 4:14). Faitau le Eperu 5:1–3, ma vaavaai mo le mea na aoao mai e Paulo e uiga i le matafaioi o le faitaulaga sili i totonu o Isaraelu i lalo o le tulafono a Mose.
“I lalo o le tulafono a Mose, o le taitai pulefaamalumalu o le Perisitua Arona sa ta’ua o le faitaulaga sili. O le tofi sa tuufaasolo ma na sau mai i le ulumatua i totonu o le aiga o Arona, o Arona lava ia o le uluai faitaulaga sili i le tofi faaArona.” O le faitaulaga sili e masani lava ona auauna atu mo le taimi atoa o totoe o lona soifua, ae o lenei tofi sa iu ina faoa faamalosi e tagata amioleaga. “Sa tofia ma le faaletatau ia faitaulaga sili ma faamaloloina pe a loto i ai Herota faapena foi ma tagata Roma. Sa nofoia le tofi e ni alii eseese e 28 i le va o le 37 T.L.M. ma le T.A. 68” (Bible Dictionary, “High priest”).
Faitau le Eperu 5:4, ma vaavaai pe na faapefea ona filifilia ia faitaulaga sili.
Ina ia malamalama i le ala na “filifilia [ai Arona] e le Atua” (Eperu 5:4), faitau le Esoto 28:1, lea o loo tusia ai se feutagaiga na faia i le va o le Atua ma Mose i le Mauga o Sinai.
Mafaufau pe aisea na taua ai le faaalia e le Atua o le valaauga o Arona ia Mose nai lo o Arona lava ia po o se isi tagata. O Mose o le perofeta ma, o lea la, na faatagaina ai e maua faaaliga faapena ma ia pulea ai le faaaogaina o le perisitua i luga o le fogaeleele.
Mai faatonuga a Paulo i le Eperu 5:4, ua tatou iloa ai o i latou o e ua faauuina i le perisitua e ao ona valaauina e le Atua e ala i faaaliga e ala mai i Auauna faatagaina. I le Ekalesia i aso nei, o taitai perisitua ua faatagaina e tatau ona faatalanoaina sui taitasi mo le faauuga ma saili le taitaiga a le Agaga Paia e iloa ai le saunia ma le agavaa o se sui ina ia faauuina i le perisitua.
E faapefea ona faatatau lenei upumoni i le faagasologa o le valaauina o tagata e auauna i isi tofiga i le Ekalesia?
Faitau le Mataupu Faavae o le Faatuatua 1:5, ma vaavai mo auala o loo atagia ai le upumoni muamua autu o loo faailoa mai i le Eperu 5:4 ma le “filifilia e le Atua, e faapei o Arona” i le mea na tusia e le Perofeta o Iosefa Samita. Ia matau o le valoaga e faatatau i faaaliga.
E tusa ai ma le mataupu faavae o le faatuatua lona lima, faatasi ai ma le “valaauina e le Atua, e ala i le valoaga,” o le a le isi mea e tatau ona tupu ina ia faatagaina ai se tagata “e talai atu le Talalelei ma faia [ona] sauniga”?
Ata
Ua Valaau e Mose ia Arona i le Galuega
O loo tusia i le Feagaiga Tuai ma le Feagaiga Fou e faapea, na maua e perofeta, e e umia le perisitua, ma faiaoga o le talalelei o latou valaauga e ala i le faaee atu o lima o se ua faatagaina o loo umia le perisitua (tagai Numera 27:18–23; Galuega 6:5–6;13:2–3; 1 Timoteo 4:14).
Tali se fesili se tasi po o fesili uma nei i lau api talaaga mo le suesueina o tusitusiga paia:
O a auala o atagia i le faagasologa o le valaauina o tagata i tofiga o le Ekalesia i aso nei le mamanu sa faavaeina i tusitusiga paia?
Aisea e taua ai le iloa e na o le pau lenei o le auala e mafai ona maua ai le pule o le perisitua?
Faitau le Eperu 5:5–6, ma vaavaai po o ai na tuuina atu i le Faaola Lana pule.
E tusa ai ma nei fuaiupu, o le Tama Faalelagi na tuuina atu le perisitua i Lona Alo, o Iesu Keriso. E avea o Ia “o le faitaulaga …e faavavau, e uiga faatasi ma Mekisateko” (Eperu 5:6).
O se tofi i le Perisitua Mekisateko, o le tofi o le faitaulaga sili, “e faatatau ia Iesu Keriso o le Faitaulaga Silisili. O Atamu ma peteriaka uma o ni faitaulaga sili foi. O aso nei, e toatolu faitaulaga sili pulefaamalumalu ua faia ai le Au Peresitene o le Ekalesia ma pulefaamalumalu ia i latou uma o loo umia le perisitua ma tagata o le Ekalesia. O isi tamalii agavaa faaopoopo e faauuina o ni faitaulaga sili pe a talafeagai ai i le Ekalesia aoao i aso nei” (Guide to the Scriptures, “High Priest,” scriptures.lds.org).
Faitau le Eperu 5:7–10, ma mafaufau e faailoga i le fuaiupu 9 le tulaga na avea ai Iesu Keriso. O fuaiupu 7–8 e faatatau ia Mekisateko, o se perofeta ma se tupu na soifua i le vaitaimi o Aperaamo.
Ata
Elder Bruce R. McConkie
Na aoao mai Elder Bruce R. McConkie o le Korama a Aposetolo e Toasefululua, o nei fuaiupu “e faatatau uma ia Mekisateko ma Iesu Keriso, aua o Mekisateko o se faailoga o Keriso ma o le galuega a se perofeta e faatusa ma muai faaataata ai le galuega a lo tatou Alii” (Doctrinal New Testament Commentary, 3 vols. [1965–73], 3:157).
Tali le fesili lenei i lau api talaaga mo le suesueina o tusitusiga paia: E faapefea ona avea Iesu Keriso ma “tupuga o le ola e faavavau” (Eperu 5:9) ia i latou uma o e usitai ia te Ia?
E pei ona tusia i le Eperu 5:11–14, sa faailoa atu e Paulo se manao e aoao atili atu e uiga i lenei mataupu, ae fai mai, sa le i ai i tagata le malamalama faaleagaga ma le matua e malamalama ai i aoaoga e loloto atu.
Ua uunaia le Au Paia ina ia filiga, faatuatua, onosai, ma faamoemoe i le maua o folafolaga a le Atua.
Ua folafola mai e le Atua i Ana fanau faamanuiaga e pei o le filemu, fiafia, faamagaloga, tali i talosaga, faamanuiaga o loo aofia i faamanuiaga faapeteriaka, toetu, ma le ola e faavavau. O nisi o nei faamanuiaga e fuafua lea i a tatou filifiliga.
O le a se faamanuiaga folafolaina se tasi o loo e tulimatai atu i ai ia maua?
E pei ona tusia i le Eperu 6, na uunaia e Paulo le Au Paia e aua le fati i le taumafai atu mo faamanuiaga folafolaina a le Alii. A’o e faitau i lenei mataupu, vaavaai mo ni upumoni e mafai ona fesoasoani e te maua ai faamanuiaga ua folafolaina mai e le Atua.
Faitau le Eperu 6:1–3, ma vaavaai mo le mea na aoao atu e Paulo i le Au Paia e galulue agai i ai. Ia matau o le Faaliliuga a Iosefa Samita, o le Eperu 6:1 (i le Eperu 6:1, vaefaamatalaga a) o loo faapea mai, “O le mea lea, ina tatou le tuua ai ia mataupu faavae muamua a Keriso” (ua faaopoopo le faatusilima). O le Faaliliuga a Iosefa Samita, o le Eperu 6:3 (i le pito i tua o le Tusi Paia) o loo faapea mai, “Tatou te oo atu ai i le atoatoaga pe a finagalo i ai le Atua.”
Ina ia atoatoa o lona uiga ia matua pe atoatoa faaleagaga (tagai Guide to the Scriptures, “Perfect,” scriptures.lds.org). Tatou te faitau i le Eperu 6:1–2 o uluai mataupu faavae ma sauniga o le talalelei ua faia ai le faavae e tatau ona tatou atina’e ai i luga a’o tatou galulue agai atu i le atoatoaga po o le matua faaleagaga.
E pei ona tusia i le Eperu 6:4–8, na faamatalaina e Paulo i latou o e o loo ta’ua o atalii o le malaia—o e o loo i ai le malamalama uma ma atoatoa o Iesu o le Keriso, ae toe liliu ese mai lenei upumoni ma fai ma fili i le Atua. Sa faatusaina e Paulo nei tagata taitasi i le Au Paia o e sa ia tusia atu i ai lenei tusi, o e sa galulue i le suafa o Keriso (tagai Eperu 6:9–10).
Faitau le Eperu 6:11–15, ma vaavaai mo le mea na uunaia e Paulo le Au Paia e fai a’o latou galulue agai atu i le mauaina o faamanuiaga folafolaina a le Atua. Atonu e aoga le iloa o le fuaitau “faaali mai lea lava filiga, ina ia mautinoa le faamoemoe e oo i le gataaga” i le fuaiupu 11 e faatatau i le filiga seia oo ina tatou maua faamanuiaga folafolaina a le Atua.
Sa faamatala e Paulo ia Aperaamo o se faataitaiga o le filiga, faatuatua, ma le onosai i le sailiga o faamanuiaga folafolaina a le Atua. Sa 75 tausaga o le soifua o Aperaamo i le taimi na folafola atu ai e le Atua ia te ia se fanau, ona ia faatalitali lea ma le faatuatua mo le 25 tausaga mo le faataunuuga o lenei folafoalga e ala i le fanau mai o Isaako. Mai le aoaoga a Paulo ua tatou aoao ai e ala i le filiga seia oo i le iuga, faatuatua ia Iesu Keriso, ma le onosai, e mafai ai ona tatou maua faamanuiaga ua folafolaina mai e le Atua.
Tali fesili nei i lau api talaaga mo le suesueina o tusitusiga paia:
Aisea e te manatu e taua ai le filiga, faatuatua ia Iesu Keriso, ma le onosai a’o tatou saili ia maua faamanuiaga folafolaina a le Atua?
O le a se taimi na e maua ai se faamanuiaga folafolaina e ala i le filiga, faatuatua ia Iesu Keriso, ma le onosai?
E pei ona tusia i le Eperu 6:16–18, na aoao mai Paulo o le a tausia e le Atua Ana folafolaga ma e le pepelo lava. O le mea lea, e mafai ona tatou maua le faamoemoe i Ana folafolaga ma ia mautinoa lava lo latou faataunuuga.
Faitau le Eperu 6:19–20, ma vaavaai pe faapefea ona aafia o tatou olaga i lo tatou faamoemoe i folafolaga a le Atua.
O se tasi o upumoni e mafai ona tatou iloa i le Eperu 6:19 o le, o lo tatou faamoemoe i folafolaga a le Atua o se taula faaleagaga mo o tatou agaga. O le faamoemoe “o le faalagolago i le faamoemoe ma moomooga i faamanuiaga folafolaina o le amiotonu” (Taiala i Tusitusiga Paia, “Faamoemoe,” scriptures.lds.org).
I lau api talaaga mo le suesueina o tusitusiga paia, tusi ai se siata o se taula. Mafaufau po o le a le mea a le taula e fai i se vaa. Tusi pe o faapefea ona avea lou faamomeoe i folafolaga a le Atua o se taula faaleagaga ia te oe.
Mafaufau pe mafai faapefea ona e atiina a’e atoatoa le filiga, faatuatua, onosai, ma le faamoemoe. Atonu e te manao e tusi musumusuga e te maua i lau api talaaga.
Tusi le mea lenei i lalo o le galuega atofaina o le aso, i lau api talaaga mo le suesueina o tusitusiga paia:
Ua ou suesueina le Eperu 5–6 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: