Sa vaai le Aposetolo o Ioane i le faaaliga vaaia le aso o le meleniuma ma le Faamasinoga Mulimuli. Na ia vaaia foi se “lagi fou ma le lalolagi fou” (Faaaliga 21:1) ma le aai selesitila o le Atua lea o le a faatuina i le lalolagi. Sa faaiuina e Ioane lana faamaumauga i se talosaga mo le Alii ia toe foi mai i le lalolagi.
Ua vaai Ioane i le aso o le meleniuma ma le Faamasinoga Mulimuli
Ata
O le Faamasinoga Mulimuli
I le avea ai ma se vaega o le ata o le faaolataga a le Tama Faalelagi, o tagata uma na ola i le lalolagi o le a tutu i luma o le Atua ina ia faamasinoina. Vaaifaalemafaufau pe o le a faapei le Faamasinoga Mulimuli.
I lau api talaaga mo le suesueina o tusitusiga paia, tusi ai pe o le a se mea e te faamoemoe e te mafaufau i ai ma lagona i le taimi e te tu ai i luma o le Atua ina ia faamasinoina.
E pei ona tusia i le Faaaliga 20:1–11, sa vaai Ioane o le a saisaia Satani i le taimi o le Meleniuma ma o le a toetutu mai e amiotonu o se vaega o le Uluai Toetu. Na ia vaaia foi ia Satani o le a “tatalaina [mo] ni nai aso” i le faaiuga o le Meleniuma (Faaaliga 20:3). A uma ona tau mo le taimi mulimuli ia Satani ma lana vaega faasaga i le Au Paia, o le a “lafoina o ia i le lepa afi ma le teio … e faavavau” (Faaaliga 20:10). Ona faia loa lea o le Faamasinoga Mulimuli.
Faitau le Faaaliga 20:12, ma vaavaai pe o le a faapefea ona faamasino i tatou e le Atua. O le (Faaaliga 20:12 o se fuaitau o le mau tauloto. Atonu e te manao e faailoga i se ala e iloagofie ai ina ia faigofie ona e mauaina i le lumanai.)
Faauma le aoaoga faavae lea na tatou aoaoina mai i lenei fuaiupu : O le a faamasinoina i tatou e le Atua mai le e tusa ma .
O tusi o loo faatatau i ai i le Faaaliga 20:12 e aofia ai tusitusiga paia, faamaumauga a le Ekalesia lea e faamaumau ai sauniga faaola, ma le tusi o le ola.
Faitau le faamalamalamaga lenei o le tusi o le ola: “I se tasi faauigaina o le tusi o le ola o le aofaiga atoa o ou manatu ma faatinoga—o faamaumauga o lona olaga. E ui i lea, ua faailoa mai e tusitusiga paia o loo tausia se faamaumauga faalelagi o e faamaoni, ua tusia ai o latou igoa, faapea ma se tala i a latou galuega amiotonu (MF&F 88:2; 128:7)” (Bible Dictionary, “Book of life”).
Faitau le Faaliga 20:13, ma vaavaai po o le a le mea o le a tupu ao lumanai le faamasinoga mulimuli.
O e amioleaga ma le salamo o le a toetutu i le Toetutu mulimuli, i le faaiuga o le Meleniuma, ma o le a tutu foi e faamasinoina e tusa ma a latou galuega (tagai i le MF&F 76:85).
Mafaufau i le aoaoga faavae o loo muamua atu na e faailoaina mai (O le a faamasino i tatou e le Atua mai tusi ua tusia e tusa ma a tatou galuega). Ona tali lea o le fesili lenei i lau api talaaga mo le suesueina o tusitusiga paia: E mafai faapefea e lou malamalama ma lou talitonuga i lenei aoaoga faavae ona aafia ai a tatou galuega i aso nei ma o tatou olaga atoa? Mafaufau foi po o le a se mea e mafai ona e faia lelei i lou olaga e saunia ai mo le Faamasinoga Mulimuli ma maua ai lou igoa o tusia i le tusi o le ola.
Faaaoga meafaigaluega e suesue ai tusitusiga paia e pei o vaefaamatalaga, o le Taiala i Tusitusiga Paia (scriptures.lds.org), ma le Topical Guide e sue ai ni mau faaopoopo o aoao mai e uiga i le Faamasinoga Mulimuli. Fatu se lisi o mau fesootai i lau api talaaga mo le suesueina o tusitusiga paia. Atonu e te manao foi e tusi pe faailoga nei mau fesootai i totonu o au tusitusiga paia i talane o le Faaaliga 20:12. Tusi i lau api talaaga mo le suesueina o tusitusiga paia po o a ni upumoni faaopoopo e uiga i le Faamasinoga Mulimuli na e aoaoina mai i nei mau fesootai.
Ua vaai Ioane i se lagi fou ma se lalolagi fou ma le aai selesitila o le Atua
Ata
o se tamaitai talavou o loo uumau e ona lima lona ulu
Mafaufau i se taimi o lou olaga na e oo ai i se aafiaga faanoanoa po o le tiga tele.
Lisi ni mea i lenei olaga e mafai ona mafua ai lo tatou faanoanoa po o le tiga tele:
A o e suesue i le Faaaliga 21, vaavaai mo se upumoni e mafai ona fesoasoani e aumaia le mafanafana ia te oe i taimi faigata.
O le Faaaliga 21–22 o se faaauauga o le faaaliga vaaia a le Aposetolo o Ioane e uiga i mea o le a tutupu i le maea ai o le Afio Mai Faalua o Iesu Keriso.
Faitau le Faaaliga 21:1–2, ma vaavaai po o le a le mea sa vaai i ai Ioane o le a tupu.
O le faatatauga a Ioane i le “lagi fou ma le lalolagi fou” (Faaaliga 21:1) e mafai ona faatatau i se mea o le a tupu i le Afio Mai Faalua o le Alii, pe a liua le lalolagi i le tulaga faaparataiso lea na fiafia ai a o lei Pau Atamu ma Eva. E ono faatatau foi Ioane i le suiga o le a tupu i le faaiuga o le Meleniuma, pe a suia le lalolagi i lona tulaga faaselesitila (tagai MF&F 29:22–24).
Faitau le Faaaliga 21:3–4, ma vaavaai mo mea o le a faia e le Atua mo Lona nuu.
Mai nei fuaiupu tatou te aoao ai, O le a nonofo faatasi le Atua ma faamafanafana i Lona nuu, ma o le a latou le toe oo i le oti, faanoanoa, po o le tiga.
Ata
Elder Joseph B. Wirthlin
Na faamalamalama mai e Elder Joseph B. Wirthlin o le Korama a Aposetolo e Toasefululua e faapea, o le a tauia e le Atua e amiotonu mo faanoanoaga ma tiga faaletino uma: “E tauia e le Alii e e faamaoni mo mea mea uma e toesea. O le mea e faapea ona aveesea mai ia i latou o e alolofa i le Alii, o le a faaopoopoina atu ia i latou i Lana lava ala. Atonu o le a le oo mai i le taimi tatou te mananao ai, ae o le a iloa e tagata faamaoni, o loimata uma lava i le taimi nei, o le a iu ina toe faafoi mai sautuaselau i loimata o le olioli ma le agaga faafetai” (“Ia Tuu Po o le A Lava se Mea e Tupu, Ia Fiafia Pea,” Ensign po o le Liahona, Nov. 2008, 28).
Tali fesili nei i lau api talaaga mo le suesueina o tusitusiga paia: E mafai faapefea i le iloa o le a faamafanafana e le Atua Lona nuu ma tauia i latou mo o latou faanoanoaga ma tiga ona fesoasoani ia i tatou pe a tatou aafia i luitau i le taimi nei?
Faitau le Faaaliga 21:7, ma vaavaai po o a folafolaga a le Alii mo i latou o e faatoilaloina [luitau] ma le faamaoni.
E faavae i mea ua e aoaoina mai le tusi o Faaaliga e uiga i luitau ma faafitauli o aso amuli, o a ituaiga mea e tatau ona tatou faatoilaloina ina ia mafai ona tatou mafuta ma le Atua?
O le Faaaliga 21:8 o loo faamatala mai ai le tulaga o e fouvale ma le salamo. O le “oti faalua” o se oti faaleagaga, po o le vavaeese mai le Atua, lea o le a aafia ai i latou e fouvale ma le loto i ai e faasaga i le malamalama ma le upumoni.
Faitau le Faaaliga 21:9–21, ma vaavaai mo le faamatalaga a Ioane o le aai selesitila a le Atua.
Faitau le Faaaliga 21:22–27, ma vaavaai pe o le a faapei le afioaga o le Tama Faalelagi ma Iesu Keriso mo i latou e nonofo i lenei aai.
Ua faaiuina e Ioane faamaumauga o lana faaaliga vaaia
I le Faaaliga 22 tatou te faitau atili ai i le faamatalaga a le Aposetolo o Ioane e uiga i le aai paia o le Atua. O se vaega o lana faamatalaga, na taua ai e Ioane se nofoalii (tagai Faaaliga 22:1).
Ata
ata tusi o le nofoalii
Faitau le Faaaliga 22:1–2, ma tusi le ata o nisi mea na vaaia e Ioane e faaopoopo atu i le nofoalii.
Ia matau na iloa e Ioane o le laau na fuaina tele mai ni fua i taimi uma ma o ona lau e mafai ona faamalolo ai atunuu. O le Tusi a Mamona o loo tusia ai sa vaai uma Liae ma Nifae i se faaaliga vaaia o le laau o le ola. Na iloa e Nifae o le laau ma le punavai o vai ola e faatusa i le alofa o le Atua (tagai 1 Nifae 11:25). O le faaaliga maoae o le alofa o le Atua o le Togiola a Iesu Keriso (tagai Ioane 3:16; 1 Ioane 4:9). O fua o le laau e mafai foi ona faatusa i faamanuiaga o le Togiola, e pei o le ola e faavavau (tagai MF&F 14:7).
I le Faaaliga 22:3–12, tatou te faitau ai, e faaopoopo atu i le vaaia o lenei aai o selesitila, na maua foi e Ioane se molimau mai le agelu o le na tauina atu ia te ia o mea na faaali atu ia te ia ua moni. Sa vaai foi Ioane o le a tauia e le Faaola tagata uma e tusa ma a latou galuega.
Faitau le Faaaliga 22:14, ma vaavaai po o a mea e tatau ona tatou faia ina ia faatagaina e ulufale atu i le malo selesitila.
O le “ina ia taga ia i latou le laau o le ola” (Faaaliga 22:14) o lona uiga ia agavaa e maua uma faamanuiaga o le Togiola a Iesu Keriso, e aofia ai le ola e faavavau.
Mai lenei fuaiupu tatou te aoao mai ai afai tatou te tausia poloaiga a le Alii, ona mafai lea ona tatou maua faamanuiaga uma o le Togiola a Iesu Keriso ma ulufale atu i le malo selesitila. O le tausia o Ana poloaiga e aofia ai le mauaina o sauniga uma e tatau mo le ulufale atu i le malo selesitila.
E ui o isi faamanuiaga o le Togiola—e pei o le meaalofa o le toetutu—e tuuina atu saoloto i fanau uma a le Atua, a o isi faamanuiaga—e pei o le ola e faavavau—e avanoa mo na o i latou lava e saili ma le filiga e faatino le faatuatua ia Iesu Keriso, salamo, ma mulimuli i Ana poloaiga.
I le Faaaliga 22:15–19 tatou te faitau ai, o i latou e le tausia poloaiga a le Alii o le a le mafai ona ulu atu i le aai o selesitila. Sa molimau mai Iesu Keriso e faapea, na Ia tuuina atu lenei faaaliga ia Ioane, ma na valaaulia e Ioane tagata uma ia o mai e feinu saoloto i le vai o le ola. Sa lapataia e Ioane lana au faitau e aua nei suia le savali o le tusi na ia tusia.
Faitau le Faaaliga 22:20, ma vaavaai mo le talosaga a Ioane i le Faaola.
E faavae i mea na e aoaoina mai i lenei tusi o Faaaliga, aisea e te manatu na matuai manao ai lava Ioane ia afio mai le Alii?
Faamalo atu mo le faamaeaina o lenei kosi seminare o le Feagaiga Fou. Mafaufau i mea ua e aoaoina ma lagonaina i lenei tausaga, ma faaalu sina taimi e tusi ai i lau api talaaga mo le suesueina o tusitusiga paia, nisi o aoaoga i le Feagaiga Fou ua sili ona faagaeetiaina ai oe i lenei tausaga. Tusi foi pe ua faapefea ona aafia lau molimau e ala i au suesuega i le seminare. Vaavaai mo se avanoa e aoao atu ma molimau atu ai i mea ua e aoaoina.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Faaaliga 20–22 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu ma lou faiaoga: