Potutusi
Faatomuaga i le Kalatia

Faatomuaga i le Kalatia

Aisea e Suesue ai Lenei Tusi?

O le Tusi a Paulo le Aposetolo i Kalatia sa tusi atu ai i le Au Kerisiano Iutaia o e sa o ese mai le Alii ma toe faalagolago atu i galuega o le tulafono a Mose. Sa saili le Aposetolo o Paulo e faasao lenei faafitauli i le faamamafa atu o le eseesega i le va o le mamafa o le“amo” o le tulafono a Mose, lea sa taitai atu ai i le pologa faaleagaga, ma le talalelei a Iesu Keriso, lea e taitai atu ai i le saoloto faaleagaga. O le suesueina o le tusi lenei, e fesoasoani e te talisapaia lelei ai le saolotoga ua ofoina mai e ala i le talalelei a Iesu Keriso.

O Ai na Tusia Lenei Tusi?

O le Aposetolo o Paulo na tusia le Kalatia (tagai Kalatia 1:1).

O Anafea ma o Fea na Tusia ai?

Atonu na tusia e Paulo lana Tusi i Kalatia ao malaga i Maketonia i le taimi o lana malaga lona tolu faafaifeautalai i le pe a o le T.A. 55–57 (tagai Bible Dictionary, “Pauline Epistles”).

O Ai na Tusi i Ai, ma Aisea?

“E i ai ni vaega e le o mautinoa pe o a ekalesia sa taua i lenei tusi. A le o Kalatia i matu, o le itu lea sa avea ai Ancyra ma laumua, po o le itu i tuaoi o Ferukia ma Kalatia lea sa asiasi i ai Paulo i lana uluai malaga faafaifeautalai. I soo se tulaga, sa mautinoa lava le asia o ekalesia i Kalatia e Paulo i ana malaga lona lua (Galuega 16:6) ma le lona tolu (Galuega 18:23)” (Bible Dictionary, “Pauline Epistles”).

Sa tusi atu Paulo i le Au Paia i Kalatia ona sa matuai popole o ia ona sa latou o ese mai le Alii e ala i le mulimuli atu i aoaoga a nisi sa saili e “faaliliueseina le talalelei a Keriso” (tagai Kalatia 1:6–7). Sa aoaoina e le Au Kerisiano Iutaia le Au Kerisiano nuuese i aoaoga faavae sese e faapea, e tatau ona peritomeina i latou ma tausia mea e manomia o le tulafono a Mose ina ia faaolaina ai (tagai Kalatia 6:12; tagai foi Galuega 15:1). Sa talia e nisi o le Au Paia i Kalatia aoaoga a nei tagata (tagai Kalatia 4:10)

O faamoemoega autu lava o Paulo i le tusia o nei tusi na aofia ai le:

  1. Puipuia o ia lava e faasaga i tuuaiga a nei faiaoga sese o e na tetee ia te ia.

  2. Aoao atu o tagata uma, po o Iutaia po o Nuuese, ua laveaiina e le Togiola a Iesu Keriso e ala i le tuu o o latou faatuatua ia Iesu Keriso nai lo o le faalagolago i galuega o le tulafono a Mose.

  3. Faamaninoina o le matafaioi o le tulafono a Mose i le fuafuaga a le Atua.

  4. Eseesega i le va o le feagaiga tuai a le Atua na faia e ala mai ia Mose ma le feagaiga fou ia Keriso.

  5. Valaau atu i le Au Paia e ola i le Agaga.

O A Nisi o Vaaiga Iloga o Lenei Tusi?

O le tusi a Kalatia e tulaga ese ona o le tusi e sili ona ootia a Paulo, lea sa ia tuuina atu ai se aoaiga malosi i tagata o le Ekalesia o e sa se ese ma i faiaoga sese o e sa taitaiseseina i latou. O le Kalatia o loo i ai le aoaoga muamua lava a Paulo na tusia e uiga i le aoaoga faavae o le tauamiotonuina—e le tauamiotonuina i tatou i galuega o le tulafono a Mose ae e ala i le faatuatua ia Iesu Keriso. O le tusi o loo faatusatusa ai “galuega a le tino” ma “le fua o le Agaga” (tagai Kalatia 5:16–25).

Otootoga

Kalatia 1–2. Ua tusi atu Paulo i le Au Paia i Kalatia ona ua latou o ese mai le Alii ma talia aoaoga sese. Ua ia puipuia lona valaauga o se Aposetolo e ala i le toe faamatalaina o lona tetee muamua i le Ekalesia ma lona liua. Ua ia faamamafa atu sa ia maua sao mai le faaaliga mai le Atua ma faamanino atu o lana auaunaga i Nuuese sa faamaoniaina e le Au Aposetolo. Ua ia taua sa i ai se taimi sa le au ai ia Peteru e faatatau i le Au Paia i nuuese. Ua ia aoao mai e le tauamiotonuina tagata e ala i galuega o le tulafono a Mose ae e ala i le faatuatua ia Iesu Keriso.

Kalatia 3–4. Ua puipuia e Paulo le savali o le talalelei. Ua ia aoao atu o Aperaammo o se faataitaiga o se tagata sa tauamiotonuina e ala i le faatuatua ae e le o galuega o le tulafono a Mose. E ala i le Togiola, ua faaolaina ai e Iesu Keriso tagata uma mai le malaia o le tulafono. O le faamoemoega o le tulafono a Mose o le avea ma se “taitaiina i tatou ia Keriso” (Kalatia 3:24). E ala i le faatuatua ma le papatisoga, e maua ai e le Au Paia faamanuiaga o le Togiola, ulu atu i feagaiga o le talalelei, avea ma tofi o le Atua e ala ia Keriso, ma e le toe avea ma auauna ae o fanau a le Atua.

Kalatia 5–6. Ua valaau atu Paulo i le Au Paia ia tumau mausali i feagaiga o le talalelei na ofoina mai e Keriso. Ua faatusatusa e Paulo le olaga o se tagata e aafia i “galuega a le tino” (Kalatia 5:19) ma se tasi e fiafia i “fua o le Agaga” (Kalatia 5:22). Ua ia aoao mai e tatau i le Au Paia ona tauave avega a le tasi ma le isi, ma aua le faavaivai i le faia o mea lelei. Tatou te selesele i mea tatou te totoina.