Kolose

Folasaga

Na aoao mai le Aposetolo o Paulo e uiga i le silisiliese o Iesu Keriso (silisili, maoae, po o le lelei) ma lapatai mai e faasaga i aoaoga faavae sese. Sa ia uunaia le Au Paia i Kolose ia latou fiafia i mea faalelagi ma atiina ae uiga o Keriso. Sa faatonuina foi i latou e Paulo ina ia agalelei ma atamamai i a latou fegalegaleaiga ma isi.

Kolose 1–2

Ua aoao mai Paulo i le silisiliese o Iesu Keriso ma lapatai mai e faasaga i aoaoga faavae sese

Vaaifaalemafaufau i ni laau se lua e tutusa o la tetele—o le tasi e papau ona aa ae o le isi e loloto ona aa. Afai e oo mai se matagi afa malosi, o le fea o na laau e ono pau? Aisea?

Faitau le faamatalaga lenei mai ia Elder Neil L. Andersen o le Korama a Aposetolo e Toasefululua, ma vaavaai mo le ituaiga o asiosio e tatau ona tatou nofouta i ai: “O mea e sili atu ona popole i ai nai lo o mafuie ma taua sa valoia [o aso amuli], o asiosio faaleagaga e mafai ona seieseina oe mai lou faavae faaleagaga ma tuuina lou agaga i tulaga e te le i mafaufauina e mafai, ma o nisi taimi e te tau lei iloaina ua sii ese mai ai oe [mai lou faavae faaleagaga]” (“O Asiosio Faaleagaga,” Ensign po o le Liahona, Me 2014, 18).

O a nisi o faataitaiga o asiosio faaleagaga e mafai ona seiina pe vavaeeseina i tatou mai lo tatou faatuatua ia Iesu Keriso?

Aisea e avea ai nei asiosio faaleagaga ma mea e sili atu ona faigata nai lo o luitau faaletino, e pei o mafuie po o taua?

Mafaufau loloto mo se taimi po o a asiosio faaleagaga e te ono aafia ai.

Sa tusi e le Aposetolo o Paulo se tusi i tagata o le Ekalesia i Kolose ina ua ia iloa faatosinaga ma aoaoga sese iina, sa taufaamatau e aveesea i latou mai lo latou faatuatua ia Iesu Keriso. Ao e suesue i le Kolose, vaavaai mo auala na saili ai Paulo e faamalosia faatuatua o tagata o le Ekalesia ia Keriso, ma mo faamanuiaga o le mauaa lelei o le faatuatua ia Keriso.

O Kolose o se nofoaga o loo i Take i aso nei. Vaavaai i Faafanua o le Tusi Paia, nu. 13, “O Malaga Faafaifeautalai a le Aposetolo o Paulo,” ma sue ai le aai o Laotikaia i le faafanua. O Kolose sa tusa ma le 11 maila (17.7 kilomita) i saute sasae o Laotikaia.

E pei ona tusia i le Kolose 1:1–11, sa faafeiloai e Paulo le Au Paia i Kolose ma faafetaia lo latou faamaoni. Sa ia faamalamalama atu o le talalelei e aumaia fua, po o faamanuiaga, i olaga o i latou o e talia ma ola ai. Ona aoao atu lea o Paulo i le Au Paia e uiga ia Iesu Keriso.

Faitau le Kolose 1:12–19, ma vaavaai mo upumoni na aoao atu e Paulo e uiga ia Iesu Keriso. Atonu e te manao e faailoga pe tusi i au tusitusiga paia mea e te maua. O le fuaitau “aumaia i tatou” i le fuaiupu 13 o lona uiga “suia i tatou”; o le upu e le vaaia i le fuaiupu 15 o lona uiga “e le iloa atu.”

O le Kolose 1:12–19 ua aoao mai ai le upumoni lenei e uiga ia Iesu Keriso: O Iesu Keriso o le Togiola, o le ulumatua o fanau agaga a le Tama Faalelagi, o le Foafoa o mea uma, o le faaao o le Ekalesia, ma le uluai [tagata] ua toetu.

Tali fesili nei i lau api talaaga mo le suesueina o tusitusiga paia:
1. Aisea e te manatu e taua ai ona tatou iloa ma talitonu i nei upumoni e uiga ia Iesu Keriso?
2. E mafai faapefea e le iloaina ma le talitonu i nei upumoni ona faamalosia lo tatou faatuatua ia te Ia?

Na aoao mai Paulo o Iesu Keriso o lo tatou Togiola (tagai Kolose 1:14). Faitau le Kolose 1:20–22, ma vaavaai mo le mea na aoao atu e Paulo i le Au Paia i Kolose e uiga i lo latou manaomia o se Togiola.

E tusa ai ma le fuaiupu 21, e faapefea ona aveesea pe vavaeese se tagata mai le Atua?

O le upu lelei (tagai Kolose 1:20–21) o lona uiga o le aumaia i se maliega po o le autasi. E tusa ai ma le Kolose 1:20–22, na faapefea ona faalelei e Iesu Keriso i tatou i le Atua? (O le fuaitau “ia lelei i le toto o lona satauro” [fuaiupu 20] e faatatau i le Togiola a Iesu Keriso.)

O le faamanuiaga o le lelei i le Atua e i ai tuutuuga. Faitau le Kolose 1:23, ma vaavaai mo le mea e manaomia ina ia lelei ai i le Atua.

Ina ia “tutumau i le faatuatua, o faavaeina ma mausali” (Kolose 1:23) o lona uiga ia tumau mausali i lo tatou faatuatua ia Iesu keriso e ala i le tausia o Ana poloaiga ma salamo i a tatou agasala. Mai le Kolose 1:20–23 ua tatou aoao ai i le upumoni lenei: E mafai ona tatou lelei i le Atua e ala i le Togiola a Iesu Keriso pe afai tatou te faaauau pea ona faavaeina ma mausali i lo tatou faatuatua.

Toe mafaufau i le tulaga o laau e lua mai le amataga o lenei lesona. Ona tali lea o fesili nei, i lau api talaaga mo le suesueina o tusitusiga paia:
1. O ai e te iloa ua pei o le laau e loloto ona aa—ua faavaeina ma mausali i lona faatuatua ia Keriso?
2. O faapefea ona avea lana faataitaiga ma se faamanuiaga ia te oe?

Mafaufau i le asiosio sa luluina na laau e lua. Faitau le Kolose 2:4, 8, ma vaavaai mo asiosio faaleagaga sa tau faamatau e seieseina le Au Paia i Kolose.

I lena taimi sa i ai nisi o filosofia ma tu ma aga sa aoaoina e nisi o tagata o e sa taumafai e tuuitiitia le taua o Iesu Keriso. O isi filosofia sese faalelotu sa lauiloa o le, o agelu o faufautua mo le Atua lea e tatau ona tapuai i ai, ma le manatu e faapea o le tino e leaga (tagai Kolose 2:16–23).

Aisea o le a faigofie ai ona seieseina faaleagaga se tagata e talitonu i aoaoga sese, e aofia ai aoaoga e tuuitiitia ai le taua o Iesu Keriso?

Faitau le Kolose 2:6–7, ma vaavaai mo le fautuaga na tuuina mai e Paulo e fesoasoani ai i le Au Paia ia aloese mai le taitaieseina e filosofia ma tu ma aga a le lalolagi.

Mai nei fuaiupu ua tatou aoao ai le upumoni lenei: O le mauaa ma le atiina ae ia Iesu Keriso, e mafai ai ona tatou aloese mai le taitaieseina e filosofia ma tu ma aga a le lalolagi.

Tali fesili nei i lau api talaaga mo le suesueina o tusitusiga paia:
1. O le a lou talitonuga o le mea e tasi e sili ona taua e mafai ona tatou faia ina ia mauaa ai ma atiina ae i luga o Iesu Keriso?
2. Aisea e te talitonu ai o lena mea faapitoa ua sili ona taua?

Mafaufau i le saunoaga lenei mai ia Elder Andersen ao faaauau lana saunoaga e uiga i asiosio faaleagaga:

“O asiosio sili ona leaga o faaosoosoga ia a le fili. E avea pea le agasala ma se vaega o le lalolagi, ae e lei matua faigofie lava ona oo i ai, faigofie tele ona faamalieina, ma ua matua taliaina lava. O le mea moni, o loo i ai se malosiaga mamana o le a sao ai mai asiosio o le agasala. Ua ta’ua o le salamo.

E le o asiosio uma o le olaga e mafua mai ona o au amioga. E oo mai nisi o asiosio ona o filifiliga sese a isi, ma o nisi e oo mai ona o le olaga faaletino lenei. …

“E mafai faapefea ona e saunia mo au asiosio? ‘Ia manatua, o luga lava o le papa o lo tatou Togiola, o le o Keriso lea, le Alo o le Atua, e ao ina oulua atinae ai lo oulua faavae; ina ia pe a auina mai e le tiapolo ana matagi malolosi, … ana ufanafana i le asiosio, … pe a pesi mai ia te oulua ana uatoa uma ma lana afa malosi, o le a leai sona mana i luga o oulua e toso ifo ai oulua i lalo … ona o le papa lea ua oulua atinae ai i luga’ [Helamana 5:12]. O lou saogalemu lea i le asiosio” (“O Asiosio Faaleagaga,” 18–19).

Toe mafaufau i na asiosio patino faaleagaga sa e mafaufau i ai i le amataga o lenei lesona. I lau api talaaga mo le suesueina o tusitusiga paia, tusi ai mea o le a e faia e tumau ai le mauaa ma le atiina ae i luga o Iesu Keriso, ma ia aloese ai mai le seiina ese e asiosio faaleagaga.

Kolose 3–4

Ua uunaia e Paulo ia Kolose ia latou fiafia i mea faalelagi ma ia atamamai

E pei ona tusia i le Kolose 3–4, sa uunaia ai e le Aposetolo o Paulo le Au Paia i Kolose ia tuu lo latou amioletonu ae atiina ae uiga o Keriso Sa ia uunaia foi i latou ia agaga tatalo ma ia atamamai, ae maise lava i a latou fegalegaleaiga ma i latou o e sa le o ni Kerisiano. Ona ia molimoli atu lea o alofaaga o nisi o ona uso a auauna, e aofia ai Luka.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Kolose ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lou faiaoga: