Iunite 26: Aso 3
2 Tesalonia
Folasaga
E lei leva ona uma le tusiga o lana tusi muamua i le Au Paia i Tesalonia, ae toe tusi atu le Aposetolo o Paulo ia i latou se tusi lona lua, lea sa ia faamalamalamaina ai nisi upumoni e uiga i le Afio Mai Faalua o Iesu Keriso. Sa ia aoao atu o le a le toe afio mai le Faaola seiiloga e mavae se liliuese. Ona talai atu lea o Paulo e faasaga i le paie ma fautuaina le Au Paia e “aua nei faavaivai i le amio lelei” (2 Tesalonia 3:13).
2 Tesalonia 1–2
Ua uunaia e Paulo le Au Paia e ala i le talai atu e uiga i le Afio Mai Faalua o Iesu Keriso
Sa saunoa Elder Jeffrey R. Holland o le Korama a Aposetolo e Toasefululua: “Faatasi ai ma se faamemelo ma le faamalosiauga mo tagata uma o e o le a manaomia ona tutu mausali i nei aso e gata ai, ou te fai atu i tagata uma aemaise lava i le autalavou o le Ekalesia pe afai tou te lei faia, o le a e oo lava i se tulaga o le a manaomia ai ona e puipuia lou faatuatuaga pe atonu foi o le onosaia o nisi o sauaga faaletagata ona o oe o se tasi o Le Ekalesia a Iesu Keriso o le Au Paia o Aso e Gata Ai. O ia taimi faapea o le a manaomia uma ai le lototele ma le amio solia mai ia te outou” (“O Le Tau—ma Faamanuiaga—o le Avea ma Soo,” Ensign po o le Liahona, Me 2014, 6).
-
I lau api talaaga mo le suesueina o tusitusiga paia, tusi e uiga i se aafiaga i se taimi sa manaomia ai ona e puipuia lou faatuatuaga po o le onosaia o le tetee ona o lou auai i le ekalesia. Ia aofia ai le ala na e tali atu ai i le tulaga. Afai e lei tupu se aafiaga e te puipuia ai lou faatuatuaga pe oo atu foi le tetee ona o lou auai i le Ekalesia, tusi pe mata o le a sau tali atu pe afai e te oo i lenei ituaiga o tulaga.
Sa tusi atu e le Aposetolo o Paulo se tusi lona lua i le Au Paia i Tesalonia ma tautalagia ai nisi o autu, e aofia ai sauaga sa feagai ma le Au Paia. Ao e suesue i le 2 Tesalonia 1, vaavaai mo se mataupu faavae e mafai ona fesoasoani e te onosaia ai mea faafeagai ma tofotofoga e te ono oo i ai i le avea ma se tagata o le Ekalesia.
Faitau le 2 Tesalonia 1:3–5, ma vaavaai pe aisea na viia ai e Paulo le Au Paia i Tesalonia.
Mafaufau e faailoga pe matau i le fuaiupu 5 le taui o le a maua e le Au Paia mo le onosaia o sauaga ma tofotofoga ma le “onosai ma le faatuatua” (2 Tesalonia 1:4).
Mai le 2 Tesalonia 1:3–5 tatou te aoao ai afai tatou te onosaia ma le faamaoni mea faafeagai ma tofotofoga i le onosai ma le faatuatua, e mafai ona faitauina i tatou e agavaa i le malo o le Atua.
Mafaufau i le uiga o le onosai tumau i tofotofoga. Aisea e manaomia ai le faatuatua e onosai tumau ai i mea faafeagai po o tofotofoga?
Faitau le saunoaga lenei a Peresitene Dieter F. Uchtdorf o le Au Peresitene Sili, ma faailoga le uiga o le onosai tumau i tofotofoga: “O le onosai e le o le solomuli e aunoa ma se faamatalaga, pe o le le mafai ona faia se mea ona o lo tatou matau. O le onosai o lona uiga o le faatalitali pea ma le tumau. O lona uiga o le tumau i se mea ma fai mea uma tatou te mafaia—galue, faamoemoe, ma le faaaoga o le faatuatua; onosai o faafitauli ma le malosi, e tusa lava pe ua tolopo manaoga o o tatou loto. O le onosai e le na o le tumau; ae o le tumau lelei ai!” (“Faaauau Pea ma le Onosai,” Ensign or Liahona, Me 2010, 57).
-
Mafaufau i se mea faafeagai po o tofotofoga o loo feagai nei ma oe, ma filifili pe faapefea ona e onosaia nei luitau ma le onosai ma le faatuatua. Mafaufau e tatalo mo se fesoasoani.
Na valoia a Paulo le Afio Mai Faalua o Iesu Keriso. Faitau le 2 Tesalonia 1:6–10, ma vaavaai mo upu ma fuaitau na faaaoga e Paulo e faamatala ai le Afio Mai Faalua. Ao e faitau, matau pe o le a le eseesega o le aafiaga o e amiotonu mai le aafiaga o e amioleaga pe a afio mai le Alii.
O se tasi o upumoni e mafai ona tatou aoao mai nei fuaiupu o le i le Afio Mai Faalua o Iesu Keriso, o le a mapu ai e amiotonu ae o le a faaumatia e amioleaga.
O le a le mea e te manatu o le a mapu mai ai e amiotonu?
E mafai faapefea ona faamafanafanaina e lenei aoaoga faavae i latou o loo onosaia i le taimi nei ia mea faigata ona o lo latou tautinoga ia Iesu Keriso?
Pe sa e mafaufau ea po o afea o le a tupu ai le Afio Mai Faalua o Iesu Keriso? Ua fautua mai i le2 Tesalonia 2:2 atonu na manatu le Au Paia i Tesalonia, o le a toeitiiti tupu pe ua uma ona tupu le Afio Mai Faalua o le Alii. Sa popole Paulo ona sa taitaiseseina i latou.
Faitau le 2 Tesalonia 2:1–3, ma vaavaai mo le mea na fai mai Paulo o le a tupu ao lei oo mai le Afio Mai Faalua. I le fuaiupu 3 o le fuaitau “lena aso” e faasino i le Afio Mai Faalua ae o le fuaitau “tetea ese” o lona uiga o le liliuese, po o le o ese mai le mea moni. (Ia matau o le 2 Tesalonia 2:1–3 o se fuaitau o le mau tauloto. Atonu e te manao e faailoga i se auala e iloagofie ai ina ia fesoasoani i lou sueina i le lumanai.)
Mai le 2 Tesalonia 2:1–3 ua tatou aoao ai ao lei oo i le Afio Mai Faalua o Iesu Keriso, o le a faapea ona tupu ai se liliuese.
I nei fuaiupu, sa fautuaina ai e Paulo e tatau i tagata o le Ekalesia i ona vaitaimi ona popole atu i le liliuese lea sa amata ona tupu ia i latou nai lo le, po o le a le taimi o le a tupu ai le Afio Mai Faalua o le Alii. E mafai ona fesoasoani le faamalamalamaga lenei e te malamalama ai i le Liliuese Tele, lea sa lei leva ona maliliu Paulo ma isi Aposetolo ae tupu loa. Sa iloa e Paulo, o lenei liliuese o le a tupu ao lei Afio Mai Faalua le Alii.
“Ina ua mavae le maliu o Iesu Keriso, sa sauaina e tagata amioleaga ia Aposetolo ma tagata o le Ekalesia ma fasiotia le toatele o i latou. Faatasi ai ma le maliliu o Aposetolo, o ki o le perisitua ma le pule o le perisitua e pulefaamalumalu ai, ua aveeseina mai i le lalolagi. Sa tausia pea e Aposetolo aoaoga faavae manino o le talalelei, ma tausia pea le faatulagaga ma tulaga faatonuina o le agavaa mo tagata o le Ekalesia. Ina ua leai ni Aposetolo, sa faasolo ina faaleagaina ia aoaoga faavae, ma sa faia ni suiga e le’i faatagaina i le faatulagaga o le Ekalesia faapea ma sauniga o le perisitua, e pei o le papatisoga ma le tuuina atu o le meaalofa o le Agaga Paia.
I le leai o ni faaaliga ma le pule o le perisitua, sa faalagolago tagata i le atamai faaletagata e faaliliuina ai tusitusiga paia ma mataupu faavae ma sauniga o le talalelei a Iesu Keriso. O manatu sese na aoaoina o ni upumoni. O le tele o le malamalamaaga i le uiga ma le natura moni o le Atua le Tama, o Lona Alo o Iesu Keriso, ma le Agaga Paia na leiloloa. O aoaoga faavae o le faatuatua ia Iesu Keriso, salamo, papatisoga, ma le meaalofa o le Agaga Paia sa faanenefu pe ua faagaloina. Sa le toe i ai i le lalolagi le pule o le perisitua lea na tuuina atu i Aposetolo a Keriso. O lenei liliuese na oo atu ai lava i le mapuna a’e o le tele o mau lotu” (Talai Lau Talalelei: O Se Taiala mo le Galuega Faafaifeautalai [2004], 35).
A mafaufau i mea ua e aoaoina e uiga i le Liliuese, mafaufau pe aisea e tatau ai mo le talalelei a Iesu Keriso ma Lana Ekalesia ona toefuataiina ao lei afio mai le Alii.
O le “tagata o le agasala” na taua i le 2 Tesalonia 2:3 ua faasino ia Satani. O le Toefuataiga o le talalelei, e aofia ai le oo mai o le Tusi a Mamona, ua faaalia ai le taufaasese a Satani ma ona soo.
Ua tatou faitau i le 2 Tesalonia 2:4–17 na valoia e Paulo, o le a faataga e le Alii ia Satani e faasese tagata e nofoia le lalolagi seia oo i le taimi o le Afio Mai Faalua (tagai Faaliliuga a Iosefa Samita, 2 Tesalonia 2:7–9 [i le faaopoopoga o le Tusi Paia]). Sa uunaia e Paulo le Au Paia ia “tumau” i upumoni sa aoaoina ai i latou (2 Tesalonia 2:15).
Mau Tauloto—2 Tesalonia 2:1–3
-
2 Tesalonia 3
Sa lapatai atu Paulo e uiga ia i latou e le mulimuli i fautuaga a le Alii, ma talai atu e uiga i le faalagolago o le tagata ia te ia lava
I le taimi sa tusia ai e Paulo lana tusi lona lua i Tesalonia, o nisi o tagata o le Ekalesia sa faamiimiie solo, pe paie, ma sa le galulue ina ia faalagolago le tagata ia te ia lava. Sa latou faamoemoe e maua ni mea e ala i galuega a isi.
O a ni faafitauli e ono tulai mai i lenei tulaga?
E tusa ai ma le 2 Tesalonia 3:1–9, sa faafetaia ai e Paulo le Au Paia i Tesalonia o e sa faamaoni ma lapataia i latou e uiga i le fegalegaleai ma i latou o e sa “amio faapiopio” (fuaiupu 6). O le tasi uiga o le upu amio faapiopio o le le amiopulea, ma i le anotusi o le 2 Tesalonia 3 e faatatau i le paie po o le faamiimiie. O tagata o le Ekalesia o e sa amio faapiopio, o i latou o e sa mafai ona galulue e tausi i latou lava ae na mumusu e fai na mea. Sa faailoa atu e Paulo sa latou faia ma ana soa se faataitaiga o le faalagolago o le tagata ia te ia lava, e ala i le galulue e tausi i latou lava.
Faitau le 2 Tesalonia 3:10–13, ma vaavaai mo le mea na faatonuina e Paulo le Au Paia e fai e uiga ia i latou o e sa mumusu e galulue.
Sa fautuaina foi e Paulo le Au Paia ia “aua nei faavaivai outou i le amio lelei” (2 Tesalonia 3:13). Sa ia faatonuina i latou ia faaleleia i latou lava i itu uma ma ia fesoasoani i isi (tagai foi i le MF&F 64:33).
Mai faatonuga a Paulo ua tatou aoao ai ua poloaiina i tatou e taumafai ia faalagolago le tagata ia te ia lava ma ia fesoasoani atu i isi.
Faitau le faamatalaga lenei, ma vaavaai po o le a le uiga o le faalagolago o le tagata ia te ia lava:
“O se tasi o faamanuiaga o le galue o le atiina ae lea o le ola faalagolago o le tagata ia te ia lava ia. Pe a e faalagolago ia te oe lava ia, ua e faaaogaina faamanuiaga ma tomai ua tuuina mai e le Atua ia te oe e tausia ai oe lava ia ma lou aiga ma maua ai vaifofo mo ou lava faafitauli. O le ola faalagolago ia te oe lava ia e le faapea e tatau ona e faia na o oe mea uma lava. Ina ia ola faalagolago moni ia te oe lava ia, e tatau ona e aoao e galulue faatasi ma isi ma liliu atu i le Alii mo Lana fesoasoani ma le malosi.
“Ia manatua o loo i ai se galuega taua a le Atua mo oe e fai. O le a Ia faamanuiaina oe i au taumafaiga e faataunuu lena galuega” (Mo le Malosi o le Autalavou [tamaitusi, 2011], 41).
Mafaufau i se mea e tasi e mafai ona e faia ia atili faalagolago ai ia te oe lava i le taimi nei ma le lumanai. Seti se sini, ma saili le fesoasoani a le Alii i le ausiaina o lenei sini.
E pei ona tusia i le 2 Tesalonia 3:14–18, sa faaiu e Paulo lana tusi i le faamalosiauina o le Au Paia e fesoasoani ia i latou o e sa faamiimiie ia atili faalagolago le tagata ia te ia lava e ala i le “aua foi le feoai ma” i latou, pe o le o ese mai ia i latou (fuaiupu 14). Ae peitai, sa ia uunaia le Au Paia, e aua le faia tagata paie o ni fili ae o ni uso ma tuafafine i le talalelei.
-
Ua ou suesueina le 2 Tesalonia ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lou faiaoga: