Folasaga i le 3 Ioane
Aisea e Suesue ai Lenei Tusi?
I lenei tusi puupuu, na viia ai e le Aposetolo o Ioane ia Kaio, o se tagata o le Ekalesia sa faamaoni i le taimi o fouvalega e faasaga i taitai o le Ekalesia. O aoaoga a Ioane e mafai ona fesoasoani ia te oe e malamalama atili ai i le liliuese lea na tupu i le Ekalesia i le Feagaiga Fou ma e mafai ona musuia ai oe ia tumau lou faamaoni i taitai o le Ekalesia e ui lava i feteenaiga.
O Ai na Tusia Lenei Tusi?
Na faailoa mai e le tusitala o ia lava o “le toeaina” (3 Ioane 1:1) ma o se malamalamaaga masani o le Aposetolo o Ioane.
O Anafea ma o Fea na Tusia ai?
E le o mailoa tonu lava po o anafea ma o fea foi na tusia ai le 3 Ioane. Afai e sao le tala anamua e uiga i le umi ona nofo Ioane i Efeso, atonu na ia tusia lenei tusi mai iina i le va o le T.A. 70 ma le 100.
O Ai Na Faatatau i ai le Tusiaina ma Pe Aisea Foi?
O le Tusi lona Tolu a Ioane sa tusi atu ia Kaio, o se tagata faamaoni o le Ekalesia lea sa viia e Ioane mo le faaalia o lona tuuto le manatu faapito i le faamoemoe o Keriso e ala i le tuuina atu o apitaga mo auauna femalagaai a le Atua (tagai 3 Ioane 1:5–8).
Sa lapataia foi e Ioane ia Kaio e uiga i se tagata na igoa ia Tioterifi, o le atonu na umia se tofiga faaleautaitai i le Ekalesia i le lotoifale. Na teena faaaliali e Tioterifi le Aposetolo o Ioane ma isi au mautofi o le Ekalesia ma sa ia taofia foi tagata o le Ekalesia i le lotoifale o e sa mananao e talia i latou, mai le auai atu i sauniga a le Ekalesia (tagai 3 Ioane 1:9–10). Sa faamalosiau atu Ioane ia Kaio ina ia faaauau pea i le amiotonu ma sa ia faapea atu, o le a ia asiasi atu ia Kaio i se taimi latamai (tagai 3 Ioane 1:11–14).
O A Nisi o Vaaiga Iloga o Lenei Tusi?
I le 3 Ioane tatou te vaaia ai atugaluga o Ioane e uiga i faatosinaga o le liliuese i totonu o le Ekalesia. Tatou te vaaia ai foi lona alofa mo isi ma le olioli na ia lagonaina mo i latou sa filifilia se olaga usiusitai (tagai 3 Ioane 1:4).
Otootoga
3 Ioane. Ua viia e Ioane ia Kaio mo lona faamaoni ma lapataia o ia e faasaga i se taitai sa tetee ia Ioane ma isi taitai o le Ekalesia.