Mataio 26:31–75

Folasaga

I le Faatoaga o Ketesemane, sa amata ai e Iesu ona tauaveina i Ona lava luga ia agasala a tagata uma e avea o se vaega o Lana Togiola. Sa faalataina e Iuta ia Iesu i taitai Iutaia. Ona faamasinoina ai lea o Iesu ma le le tonu i luma o Kaiafa, le faitaulaga sili, lea na faia ai ni moliaga sese e faasaga ia te Ia. O le taimi lea na faafitia faatolu ai e Peteru le Faaola ma le iloa, ia i latou o e sa faailoa atu o ia o se tasi o soo o Iesu Keriso.

Mataio 26:31–46

Sa mafatia Iesu i le Faatoaga o Ketesemane

Mafaufau i tulaga nei: Talu mai lava lona tamaitiiti, sa aoaoina se alii talavou o le tiutetauave o le perisitua le avea ma faifeautalai faamisiona. O se talavou, sa ia manatu ai e tatau ona faamisiona, ae o loo tauivi ma le tautino atu e alu. E sili atu lona fiafia i isi avanoa ma popolega faapea o le a fai le misiona ma mea e taofia ai o ia mai le maua o na poto masani.

O a isi tulaga e ono ese ai manaoga o alii talavou ma tamaitai talavou mai mea e finagalo ai le Tama Faalelagi latou te faia?

Mafaufau i taimi atonu e te iloa ai ua faigata ona gauai atu lou loto i le finagalo o le Tama Faalelagi. A o e suesueina le Mataio 26, vaavaai mo mataupu faavae e mafai ona fesoasoani ia te oe pe a e tauivi e fai mea e poloai mai ai le Tama Faalelagi ia te oe.

Toe mafaufau i le Mataio 26:1–30, na ta’u mai ai sa talisua le Alii ma Ana Aposetolo i le Paseka ma sa faatuina ai le faamanatuga. Faitau le Mataio 26:31–35, ma vaavaai mo mea na valoia e Iesu o le a tutupu i Ana Aposetolo.

I lea talaaga o le upu tausuai o lona uiga o le pauu ese atu pe ua tuulafoaiina.

Matau pe a faapefea ona tali atu Peteru ma isi Aposetolo i le fetalaiga a le Faaola.

Faitau le Mataio 26:36–38, ma vaavaai po o fea na o i ai Iesu ma Aposetolo ina ua maea le talisuaga o le Paseka.

Tagai i ata o le Mauga o Olive ma le Faatoaga o Ketesemane i Ata o le Tusi Paia, nu. 11 ma le nu. 12. O Ketesemane o se togalaau o olive, e ola e lata i le Mauga o Olive, i tuapa o Ierusalema. “O le upu ketesemane o lona uiga o le ‘soliga vine’” (Taiala i Tusitusiga Paia, “Ketesemane,” scriptures.lds.org).

Maka fasifuaitau i le Mataio 26:36–38 o loo faamatala ai lagona o Iesu ina ua Ia ulu atu i Ketesemane.

Faitau le Mataio 26:39, ma vaavaai mo mea na faia e Iesu ina ua “faalatalata atu i luma” i le faatoaga.

O le ipu na faasino i ai le Faaola o se faaupuga faafaatusa mo le oona o mafatiaga na Ia oo i ai o se vaega o le Togiola. I Ketesemane, sa amata ai e Iesu ona tauaveina i Ona lava luga ia agasala ma mafatiaga o tagata uma o se vaega o Lana taulaga togiola maoae.

Na faamatala e Elder Jeffrey R. Holland o le Korama a Aposetolo e Toasefululua, le mea na ole atu ai Iesu i le Tama ina ua Ia faatoga atu e aveese le ipu mai ia te Ia: “O le mea moni, na fetalai le Alii, ’Afai e i ai se isi ala, e sili pe a ou ui i lena. Afai e i ai se isi ala — soo se isi lava ala — ou te talia ma le fiafia. … Peitai i le iuga, e lei aveesea le ipu” (“Aoaoga, Talaiga, Faamalologa,” Ensign, Jan. 2003, 41).

Atonu e te manao e maka le fasifuaitau “ae ui o lea ia aua nei faia lo’u loto, a o lou finagalo“ (Mataio 26:39; tagai foi MF&F 19:19).

E ui ina sa Ia ole atu mo se isi auala ese e faataunuu ai faamoemoega o le Tama, ae sa gauai atu e Iesu Keriso Lona loto i le finagalo o le Tama e faataunuu ai le Togiola.

Mafaufau pe o a mea o mafai ona tatou aoao e uiga ia Iesu mo Lona naunau e gauai atu i le finagalo o le Tama Faalelagi e ui o lona uiga o le a Ia onosaia se mafatiaga ogaoga ma iu ai ina maliu.

Faauma faamatalaga o upumoni nei e faavae i luga o mea ua e aoaoina mai le Mataio 26:39: Tatou te mulimuli i faataitaiga a Iesu Keriso pe a tatou .

Toe iloilo le tulaga ma mea na e lisia i le amataga o le lesona. Ona tali lea o fesili nei i lau api talaaga mo le suesueina o tusitusiga paia: E mafai faapefea ona faamalolosia i tatou i nei tulaga ona o le faataitaiga a le Faaola?
Mafaufau i taimi na ese ai ou manao ma le finagalo o le Tama Faalelagi ae na iu lava ina e filifili e mulimuli i Lona finagalo. Tusi e uiga i se tasi o ou aafiaga i lau api talaaga mo le suesueina o tusitusiga paia pe afai e le patino a′ia′i, ma faamatala pe aisea na e faia ai lena filifiliga ma pe o a foi ou lagona e uiga i ai.

Faailoa mai se ala patino o le a e mulimuli ai i le faataitaiga a Iesu Keriso e ala i le gauai atu o lou loto i le finagalo o le Tama Faalelagi. Mafaufau e faatu se sini e galue ai i mea sa e faailoa mai.

Toeiloilo le Mataio 26:37–38, ma vaavaai mo faatonuga a le Faaola ia Peteru, Iakopo, ma Ioane i Ketesemane.

O le faatonuga ia “mataala faatasi ma au” i le fuaiupu 38 o lona uiga ia ala, ia nofouta, pe ia matau lelei. Ina ia malamalama atili pe aisea na ono moomia ai e le au soo le faatonuga a le Faaola e mataala faatasi ma Ia, manatua le Faaliliuga a Iosefa Samita o loo faaopoopo mai ai le faamatalaga faapea ina ua oo mai le au soo i le faatoaga, sa latou “amata ona tau ofo, ma mamafatu, ma muimui i o latou loto, ma faapea ifo poo le Mesia ea lenei” (Faaliliuga a Iosefa Samita, Mareko 14:36 [i le Bible appendix]). O le faatonuina o le au soo e mataala faatasi ma Ia, sa lapataia ai e Iesu ina ia matau lelei ona o le faatuatua ia te Ia o le a tofotofoina.

Faitau le Mataio 26:40, ma vaavaai mo mea na silafia e Iesu faapea “o Peteru ma atalii e toalua o Sepetaio [Iakopo ma Ioane]” (Mataio 26:37) sa faia ao tatalo o Ia.

O le Faaliliuga a Iosefa Samita o le Luka 22:45 o loo ta’u mai ai sa momoe, “aua sa faatumulia i le faanoanoa.”

Faitau le Mataio 26:41, ma vaavaai mo mea na ta’u atu e Iesu ia i latou e fai.

O se mataupu faavae lea ua tatou aoao mai faatonuga a le Faaola i nei Aposetolo: Afai tatou te matau ma tatalo e le aunoa, o le a tatou maua le malosi e teena ai faaosoosoga.

O le a sou manatu i le fasifuaitau “ua manao i ai le loto, ae o le tino ua vaivai” (Mataio 26:41)?

O se tasi o faauigaga na mananao ai le au soo e usitai i le Faaola, ae sa latou faatagaina lo latou manaoga faaletino mo le moe e faatoilalo lo latou manaoga faaleagaga e mataala ma tatalo. Mafaufau pe faapefea e le malamalama i lenei fasifuaitau ona fesoasoani tatou te teena ai tofotofoga.

Ina ua uma ona sii mai le Mataio 26:41, sa saunoa ia Peresitene Henry B. Eyring: “O le lapataiga a [le Faaola] ia Peteru e mo i tatou uma foi. O le luko o le a faaumatia le mamoe o le a mautinoa lava lona saeia foi o le leoleo mamoe. O lea e tatau ai ona tatou vaavaaia i tatou lava faapea foi ma isi” (“Matamata Ma A′u,” Ensign, Me 2001, 39).

Toe manatu i le “mataala” o lona uiga o le ala, nofouta, ma matau lelei. Mafaufau e uiga i le matau ma tatalo faaleagaga e mafai ona fesoasoani tatou te faatoilaloina ai o tatou vaivaiga ma teena ai faaosoosoga.

Mafaufau pe na e faamatuu atu i faaosoosoga ona e te lei tatalo ma mataala. Mafaufau pe faapefea ona aafia oe ona o lena filifiliga. O le isi, mafaufau i taimi na e teena ai faaosoosoga e ala i le tatalo ma mataala. O le a se mea na fesoasoani ia te oe e te tumau ai i le mataitu faaleagaga ma le tatalo?

I se isi fasipepa poo se kata, tusi ai se mea se tasi o le a sili atu lou faia e matau ma tatalo ai e le aunoa. Mafaufau e alu ma ave lea pepa e faamanatu atu ai ia te oe lau sini.

Manatua le Mataio 26:42–46 o loo tusia ai na tatalo faatolu Iesu i le Faatoaga o Ketesemane. O taimi taitasi e faaalia ai Lona naunautai e usitai i le finagalo o Lona Tama.

Mataio 26:47–75

Ua puefaapagotaina Iesu Keriso ma faamasinoina i luma o Kaiafa

Ua taupulepule faitaulaga ma le au tusiupu e fasiotia Iesu Keriso. O la latou taupulepulega leaga na aofia ai le faalataina o Iuta, tuuina atu molimau pepelo, faatauemu, e oo lava i le faatigainaina o Iesu. Na faia faamalosi le Faaola e feagai ma faamasinoga aloaia e lua: Muamua o se faamasinoga muamua o Iutaia i luma o le au Saneterini sili o Ierusalema—o se potopotoga e toa 71 sui, e aofia ai sa Levi, o le au faitaulaga sili, au tusiupu, Faresaio, Satukaio, ma i latou o isi tulaga faaupufai, e pulefaamalumalu uma ai le faitaulaga sili, o ia lea o Kaiafa i lona taimi. O le lona lua o se faamasinoga a Roma i luma o Pilato. I le taimi o le faamasinoga o Iesu e Iutaia sa tuuaia i le upuleaga (e ulagia, faitio, pe tausalaina le Atua) aua na Ia ta’ua Ia lava o le Alo o le Atua (tagai Mataio 26:64–65). Talu ai o le upuvale o se mataupu tau i Iutaia ma e leai se afaina i tagata Roma, o lea sa suia ai e taitai Iutaia le moliaga i le fouvale, ina ua latou auina atu Iesu ia Pilato. Sa taumafai taitai Iutaia e faatauanau ia Roma faapea o Iesu sa taumafai e fai o Ia lava o se tupu, ma le faamoemoe o le a faasalaina o Ia i le oti faapea o se taufaaoleole ia Kaisara. Peitai, i le taimi o le faamasinoga a Roma na maua ai e Pilato e leai se sese o Iesu. Ae, i le iuga na faatagaina ai e Pilato le fasiotiga o Iesu ina ia faamalie ai taitai Iutaia.

Faitau le saunoaga lea a Gerald N. Lund, o le na avea mulimuli ane ma se tasi o Fitugafulu: “Manatua [Iesu Keriso,] i le Tagata e ona ia le mana, o lona malamalama, o lona mamalu o loo tulaga lelei ai le atulaulau, o le tagata a tulei saunoa ona i ai lea o le malosiaga, aniva, o fetu—a ua tu i luma o tagata amioleaga ma ua faamasinoina e i latou e pei e leai se aoga po o se taua! (“Pe Ete Iloa Ea Le Faamaulalo o le Atua?” i le Mataupu Faavae o le Tusi a Mamona: The 1991 Sperry Symposium, ed. Bruce A. Van Orden and Brent L. Top [1992], 86).

E ui ina sa i ai ia Iesu Keriso le mana e faaumatia ai tagata o e sa fepo ma tuufeanu ia te Ia, ae sa Ia talia ma onosaia ma le naunautai. E lei iloa e taitai ma fitafita Roma le mana e le iu o Iesu semanu e mafai ona Ia faaaogaina pe ana faapea o le finagalo o le Tama ia Na faia.

Sailiili i le Mataio 26:47–68, ma vaavaai pe na faapefea ona faaauau e Iesu Keriso ona pulea ma gauai atu i le finagalo o Lona Tama e tusa lava pe na soona fai ma faamasinoina o Ia e tagata amioleaga (tagai foi 1 Nifae 19:9). Atonu e te manao e faailoga mea ua e maua.

I lau api talaaga mo le suesueina o tusitusiga paia, tusi ai le mea o loo tu matilatila mai ia te oe e uiga i le naunautaiga o le Faaola e faia le finagalo o le Tama Faalelagi e ui lava i tulaga na i ai. Tusi foi pe mafai faapefea ona e mulimuli i le faataitaiga a le Faaola o le usiusitai.

I le Mataio 26:56, manatua o le valoaga a le Faaola e faapea o le a liliuese ia Aposetolo mai ia te ia, na taunuu lava. Peitai, o lea liliuese sa na o sina taimi.

Mataio 26:69–75 o loo tusia ai faapea a o faamasinoina Iesu ina ua uma ona puefaapagotaina o Ia, sa faafiti faatolu Peteru na te le iloa o Ia. (Manatua: O le a auiliiliina atili le faafitiga a Peteru i le lesona o le Luka 22.)

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataio 26:31 75 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: