Potutusi
Folasaga i le 2 Korinito

Folasaga i le 2 Korinito

Aisea e Suesue ai Lenei Tusi?

O le tusi lenei a le Aposetolo o Paulo i tagata o le Ekalesia i Korinito e tulaga ese lava ona o lona autu o le faamafanafanaga i le lotolotoi o mafatiaga, malosiaga i le lotolotoi o vaivaiga (e pei ona faaaoao mai e Paulo lava ia), ma le iloatino o aoaoga moni mai aoao pepelo. O le faataitaiga a Paulo ma aoaoga o loo tusia i le 2 Korinito e mafai ona musuia ai oe e tumau faamaoni ma le faatuatua i feagaiga e faavavau na osia ma le Atua, le Tama e Faavavau, tusa lava po o a tulaga po o taunuuga.

O Ai na Tusia Lenei Tusi?

Na tusia e Paulo lenei tusi i le Au Paia i Korinito (tagai 2 Korinito 1:1).

O Anafea ma o Fea na Tusia ai?

E lei leva ona tusia e Paulo le tusi ua i ai nei o le 1 Korinito, ae tulai mai se vevesi i Efeso e tetee atu ai i ana aoaoga (tagai Galuega 19:23–41), ma sa malaga atu i Maketonia (tagai Galuega 20:1; 2 Korinito 2:13; 7:5). E foliga mai a o iai o ia i Maketonia, sa ia tusia le 2 Korinito, pe tusa o le T.A. 55–57 (tagai Bible Dictionary, “Pauline Epistles”; Taiala i Tusitusiga Paia, “Pauline Epistles,” scriptures.lds.org).

O Ai Na Faatatau I Ai le Tusiaina o Lenei Tusi ma Pe Aisea Foi?

O le tusi o loo i ai nei o le 2 Korinito sa tusia i tagata o le Ekalesia i Korinito. A o i ai Paulo i Maketonia i le taimi o lana malaga lona tolu faafaifeautalai, sa aumaia e Tito ia te ia se tala mai Korinito e faapea, o le tusi na ia auina atu muamua na talia lelei lava e le Au Paia iina (tagai 2 Korinito 7:6–13). O le lala o le Ekalesia i Korinito sa alualu i luma, ae sa aoaoina foi e Paulo e i ai aoao pepelo iina sa faapiopioina ia mataupu mama a Keriso. I se taimi ina ua uma le asiasiga muamua a Paulo i Korinito ma atonu ma se asiasiga lona lua (tagai 2 Korinito 1:15–16), ina ua peiseai ua ia aoaia nisi o le Au Paia (tagai 2 Korinito 2:1; 12:21), o e folafola mai Ierusalema na o mai i Korinito ma amata aoao atu le Au Paia faapea e tatau ona latou mulimuli i faiga faa-Iutaia, e feteenai ma aoaoga a Paulo. O le tele o le 2 Korinito o loo talanoaina ai faafitauli na matuaia e nei aoao pepelo.

O le tusi a Paulo o loo talanoaina ai i latou o e sa mananao atili i ana upu (tagai 2 Korinito 1–9) ma i latou sa mumusu e talia ana aoaoga (tagai 2 Korinito 10–13). I se tulaga lautele, o le anotusi o le 2 Korinito ua faaali mai ai faamoemoega e tele o lenei tusi:

  • Ia faaali atu ai le loto faafetai ma faamalosia le Au Paia o e sa tali lelei atu i lana tusi muamua.

  • Ina ia lapataia aoao pepelo o e sa faapiopioina mataupu mama a Keriso

  • Ina ia puipuia lana amio patino ma le pule o se Aposetolo a Iesu Keriso (tagai 2 Korinito 10–13)

  • Ina ia uunaia le Au Paia i Korinito e faia ni saofaga tautupe o taulaga mo le Au Paia matitiva i Ierusalema (tagai 2 Korinito 8–9)

O A Nisi Vaaiga Iloga o Lenei Tusi?

E ui o le tele o tusi a Paulo e taulai atu i le aoaoga faavae, ae o le tele o lenei tusi o loo faamamafa ai lana sootaga ma le Au Paia i Korinito ma lona alofa ma le popolega mo i latou. E ui ina sa mausali Paulo i lona tetee atu i faitioga, ae i le 2 Korinito atoa ua tatou vaaia ai o ia o se taitai perisitua agamalu, e manatu mo le fiafia ma le soifua manuia o le Au Paia. Sa ia faasoa mai foi nisi o auiliiliga patino o lona soifua ma tusia i ona “mea matuitui i le tino” (2 Korinito 12:7).

I se aafiaga paia o loo tusia i le 2 Korinito 12:2–4, na faamatala ai e Paulo ia lava o “se tagata o Keriso” o le sa “segia i le lagi tuatolu,” lea na ia vaai ai ma faalogo i mea e le tatau ona tautala i ai. O lenei faaaliga, e tali faatasi ma lana faamatalaga faaleaoaoga faavae talu ai e faatatau i eseesega i le mamalu o tino toetutu (tagai 1 Korinito 15:35–44), e mafai ona vaaia o se faatusaga faatusipaia i le faaaliga o loo tusia i le Mataupu Faavae ma Feagaiga 76.

Otootoga

2 Korinito 1–5. Ua molimau atu Paulo e faamafanafana e le Atua Ana fanau i o latou puapuaga uma. Ua ia luiina le Au Paia ia alolofa ma faamagalo e le tasi le isi. O le talalelei ma galuega a le Agaga o le Alii e sili atu ona viia nai lo le mataitusi o le tulafono a Mose. Ua faamalosiau atu Paulo i lana aufaitau i o latou taimi o mafatiaga ma faamanatu ia i latou le natura e faavavau o le alofa ma le mamalu o le Atua. Ua fesoasoani o ia i le aufaitau ia malamalama i le manaomia ona latou faalelei ma le Atua e ala i le Togiola a Iesu Keriso.

2 Korinito 6–13. A o feagai ai ma faitioga ma le tetee mai aoao pepelo, sa puipuia e Paulo lona faamaoni o se auauna a le Alii ma valaaulia lana aufaitau ina ia tuuese mai le lalolagi. Ua ia aoao atu e uiga i le “tiga faaleatua” (tagai 2 Korinito 7:10). Ua faafetai atu Paulo i le Au Paia i Korinito mo la latou saofaga i le au matitiva i Ierusalema ma fautuaina i latou e faaauau pea ona foai atu ma le matamau. Ua ia tautala malosi e faasaga i “aposetolo pepelo” (2 Korinito 11:13). Ua ia vivii atu i le Alii ma faasoa mai auiliiliga o ia lava i ona mafatiaga ma le faatuatua ia Iesu Keriso. Ua ia tusia e uiga i lana faaaliga o le lagi tuatolu, ma ua ia valaaulia le Au Paia e suesue ifo ia i latou lava ma ia faamaonia i latou lava o faamaoni.