Iunite 24: Aso 1
2 Korinito 8–9
Folasaga
Na tusi atu le Aposetolo o Paulo i le Au Paia i Korinito, e faamatala i ai tagata o le Ekalesia i Maketonia sa latou foai e i latou lava i e o manaomia le fesoasoani. Sa ia fautuaina le Au Paia i Korinito ia latou mulimuli foi i le faataitaiga a le Faaola e ala i le foai atu i e matitiva. Na aoao atu Paulo e uiga i faamanuiaga e maua e i latou o e foai atu ma le fiafia i e matitiva.
2 Korinito 8
Ua fautuaina e Paulo le Au Paia ia tausia e matitiva
Faitau le saunoaga lea a Elder Jeffrey R. Holland o le Korama a Aposetolo e Toasefululua, ma vaai po o le a le upu o loo misi ia moni ai lenei saunoaga: “I le talafaasolopito atoa, ____________________ o le mativa ua mafaufauina o se tasi o faafitauli silisili ma sili ona taatele i tagata. O ona mafatiaga manino lava e masani ona faaletino, ae o faatamaiaga faaleagaga ma faalelagona na te aumaia atonu e sili atu ona faataumaoi” (“Are We Not All Beggars?” Ensign po o le Liahona, Nov. 2014, 40).
Tusi le upu mativai luga o le laina, ma toe faitau le saunoaga a Elder Holland ma mafaufau pe o le a le uiga.
O le mativa o le tulaga o le le lava o punaoa e manaomia, lea e mafai ona aofia ai tupe, oloa, po o mea e lagolago ai. Aisea ua mafai ai ona avea le mativa o se luitau faigata?
Mafaufau i tagata e te iloaina o e ono manaomia se fesoasoani o soo se ituaiga, e aofia ai le fesoasoani faaletino, faalelagona, faaleagafesootai, po o le faaleagaga. A o e suesueina le 2 Korinito 8–9, vaavaai mo upumoni e mafai ona fesoasoani e te malamalama ai ma faataunuu lau matafaioi e fesoasoani ai i isi o e manaomia.
I le 2 Korinito 8:1–8 na tau atu ai e le Aposetolo o Paulo i le Au Paia i Korinito na foai atu e le Au Paia Maketonia ma le limafoai i e matitiva i o latou manaoga faaletino (tagai Faafanua o le Tusi Paia, nu. 13, “O Malaga Faafaifeautalai a le Aposetoloo Paulo”). Sa ia faamatala atu sa faia e tagata o le au paia i Maketonia ona sa latou mananao e faia le finagalo o le Atua. Sa fautuaina e Paulo le Au Paia i Korinito e mulimuli i lenei faataitaiga o le saunia o mea mo e manaomia, mai lo latou lava alofa faamaoni.
-
Tusi se laina mai luga i lalo i le ogatotonu o se pepa e leai se mea o i ai, i lau api talaaga mo le suesueina o tusitusiga paia, e fai ai ni koluma se lua. Tusi le upuMauoa i le pito i luga o le tasi koluma, ae tusi le upu Mativa i le pito i luga o le koluma lona lua.
Faitau le 2 Korinito 8:9, ma vaavaai po o a mea na fai mai Paulo sa faia e Iesu Keriso mo le Au Paia. Ona tali lea o fesili nei, tusi lau tali i lau api talaaga mo le suesueina o tusitusiga paia i lalo o upuTamaoaiga ma le Mativa.
-
Na faapefea ona tamaoaiga Iesu Keriso i le muai olaga?
-
Na faapefea ona mafaufau faapea sa mativa o Ia i Lona soifua ai i le olaga nei?
-
O le a sou manatu o le a le uiga i le fuaiupu 9 faapea o i tatou “e faatamaoaigaina e ala i le mativa [o le Faaola]”?
-
Mafaufau a o lei fanau mai Iesu Keriso, o Ia o se tasi o le Aigaatua, ma sa tu o Ia i pito i le Tama Faalelagi i le pule, mana, ma le mamalu. Ona sa faamaualaloina Iesu Keriso, pe lotomaualalo ma tuu ifo ia te Ia lava i lalo, mai Lona nofoalii i le muai olaga ae afio mai i le lalolagi e auauna mai, fai le faataitaiga, ma faatino le Togiola, ua mafai ai ona tatou maua ia oa o le ola e faavavau (tagai 1 Nifae 11:26–28).
Pe tusa ma se tausaga ua mavae, sa tautino atu ai le Au Paia i Korinito o le a latou faia ni saogamea o oloa mo le Au Paia matitiva i Ierusalema. Faitau le 2 Korinito 8:10–11, ma vaavaai mo mea na fautuaina e Paulo le Au Paia e fai i le taimi lena. O fasifuaitau “ia fai” ma le “ia faapea ona outou faia” e faasino i le apoapoaiga a Paulo ia tulitatao e le Au Paia la latou tautinoga talu ai e foai atu mea latou te mafaia i le Au Paia matitiva, e faapei ona sa tuuina atu e le Faaola oa o le faavavau ia i latou.
O le mataupu faavae e tasi e mafai ona tatou aoaoina e faapeaa o tatou malamalama i mea uma ua tuuina mai e le Faaola ia i tatou, o le a sili atu ona tatou naunau e foai atu a tatou mea i isi.
Mafaufau pe mafai faapefea e le iloaina o le anoanoai o meaalofa a le Faaola mo i tatou ona faaosofia ai i tatou e foai atu i e e manaomia le fesoasoani.
-
Faitau le 2 Korinito 8:12–15, ma vaavaai mo se isi upumoni na aoao atu e Paulo i tagata e uiga i le taua o le felagolagomai o le tasi ma le isi i itu faaletino.
O se upumoni e tasi e mafai ona tatou aoao mai le 2 Korinito 8:12–13 o le e finagalo le Atua tatou te naunau e foai atu tusa lava pe leai sa tatou mea e foai atu.
Ina ia malamalama atili i le uiga o lenei upumoni, faitau le saunoaga lea a Elder Holland ona mafaufau lea i fesili o loo sosoo ai: “Mauoa pe matitiva, e tatau ona tatou ‘fai le mea ua tatou mafai’ pe a i ai nisi e le tagolima” (“E le o I tatou uma Ea o ni Tagata Aisi?” 41).
-
O le a se mea e mafai ona tatou faia mo isi pe afai e leai sa tatou mea faitino e foai atu ia i latou?
-
Aisea e tatau ai ona tatou faia o mea uma tatou te mafaia mo isi?
-
E tusa ai ma le 2 Korinito 8:14–15, o ai e manuia pe a foai atu e le Au Paia uma e le aunoa a latou mea ua tele?
Mafaufau i ni nai auala e manuia ai tagata uma pe a tatou naunau uma e foai atu.
Faitau le saunoaga lea a Elder Holland, ma vaavaai pe mafai faapefea e le Alii ona fesoasoani ia tatou tali atu ai ma le mutimuti alofa i e matitiva. “Ou te le iloa tonu pe o le a se tulaga e tatau ona outou faataunuu ai a outou matafaioi ia i latou o e e le fesoasoani pe ua le mafai ona fesoasoani ia i latou lava. Ae ou te iloa o loo silafia e le Atua, ma o le a Ia fesoasoani ma taiala outou i ni galuega agaalofa faalesoo pe afai o outou mananao ma le lotofuatiaifo ma tatalo ma saili mo ni auala e tausi ai se poloaiga ua Ia tuuina mai pea lava pea ia i tatou” (“E le o i tatou uma ea o ni Tagata Aisi?” 41).
Matau na saunoa Elder Holland e tatau ona tatou “mananao ma le lotofuatiaifo ma tatalo ma saili mo ni auala” e fesoasoani ai i e matitiva ma e le tagolima. O taulaga anapogi, o galuega faatino o le auauna atu i le lotoifale, ma avanoa e fesoasoani ai i tagata lautele o ni nai ala ia ua faatuina e le Ekalesia ina ia mafai ai ona tatou fesoasoani e faafetaiaia manaoga o e matitiva. Pe mafai ona e mafaufau i nisi ala e mafai ona tatou faia ai lenei mea?
-
Pei ona tusia i le 2 Korinito 8:16–24, sa tautala atu Paulo i le Au Paia i Korinito e uiga ia Tito ma isi uso e toalua o e sa auina atu e ao mai foai alofa mo le Au Paia i Ierusalema. Sa tautala Paulo e uiga i lona talitonuga mautinoa i le Au Paia i Korinito ma faamatala atu ai o lo latou foai atu ma le matamau o le a avea ma faamaoniga o lo latou alolofa i isi.
2 Korinito 9
Ua aoao atu Paulo e uiga i faamanuiaga o se tagata limafoai faamaoni
Sa viia pea e Paulo le Au Paia i Korinito (tagai 2 Korinito 9:1–5). Na ia tau atu ia te i latou e faapea na ia auina atu Tito ma isi e faamautu lo latou naunau e foai atu mai o latou loto fuatiaifo i e matitiva.
Mafaufau pe na e tuuina atu se mea i se tasi pe faia se mea mo se tasi ma le tomumu, po o le musua. Aisea e faigata ai i nisi taimi ona matafiafia e uiga i le ofoina atu o lou taimi, tupe, po o isi punaoa e fesoasoani ai i isi?
Faitau le 2 Korinito 9:6–7, ma vaavaai mo le faatusatusaga na faaaoga e Paulo e aoao atu ai i tagata o le Ekalesia i Korinito e uiga i le foai atu ma le lotomalie.
O le lulu o lona uiga o le totoina o fatu. O ai tagata o i lenei faatusatusaga?
Mafaufau pe faapefea ona pei le foai atu i isi o le luluina o fatu i se fanua. O le a le mea e tupu pe afai e na ona tatou lulu na o ni nai taimi? O le a le mea e tupu pe a tatou saga lulu?
E tusa ai ma le 2 Korinito 9:7, o faapefea ona faamoemoe le Alii ia tatou lulu, pe foai atu?
Mai le 2 Korinito 9:6–7 ua tatou aoao ai le upumoni lenei: Afai tatou te foai atu ma le loto fiafia ia i latou o e le tagolima, o le a faamanuiaina i tatou e le Atua ma le mataalofa.
E mafai faapefea e lo tatou foai atu i isi ma se uiga fiafia ona taitai ai i tatou e maua tele atili ai?
Faitau le 2 Korinito 9:8–10, ma vaavaai mo faamanuiaga na fai mai Paulo o le a oo mai i le Au Paia pe afai latou te foai atu ma se loto fiafia. Maka pe faailoga i au tusipaia ni nai fasifuaitau sa faaaoga e Paulo e faamatala ai pe faapefea ona faamanuia e le Alii i latou o e foai atu ma se loto fiafia.
Matau ia fasifuaitau sa faaaoga e Paulo e faamatala ai faamanuiaga a le Alii e tau mai ai o le a tatou maua le alofa tunoa o le Alii, lea e aofia ai faamanuiaga i le tino e lava ma totoe mo mea tatou te manaomia.
E tusa ai ma le 2 Korinito 9:10, o ai “le ua foai tele mai saito i le ua lulu ai”? E mafai faapefea e le manatua po o fea e sau ai le fatu ona fesoasoani tatou te foai atu ai ma le fiafia?
Faitau le 2 Korinito 9:11–15, ma vaavaai mo mea na aoao atu e Paulo e uiga i na Au Paia o e foai atu ma taliaina ma le fiafia.
-
Mafaufau e tusi le upumoni lea i autafa o le 2 Korinito 9:11–15i au tusi paia: O le iloaina o le agalelei o le Atua i le faamanuiaina o i tatou e mafai ona fesoasoani tatou te lagonaina ai le lotofaafetai ia te Ia.
-
Ina ia fesoasoani e faaaoga lenei lesona,mafaufau i ni ala e mafai ai ona e fesoasoani i se tasi e le tagolima i lenei vaiaso (atonu o se tasi i lou aiga.) Faatu se sini patino e fesoasoani i lena tagata, ma tusi i se fasipepa.
-
Ua ou suesueina le 2 Korinito 8–9 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lou faiaoga: