I Kana, sa faia ai e le Faaola le uluai vavega i nofoaga faitele i Lana galuega i le lalolagi ina ua Ia faaliliuina le vai i le uaina. Na maliu atu o Ia i Ierusalema mo le uluai Paseka o Lana galuega i le lautele, ma sa Ia faamamaina le malumalu mo le uluai taimi e ala i le tutuli ese o le au faatau tupe o e sa faaleagaina le maota o Lona Tama.
Mafaufau e uiga i “uluai” nei atonu na tutupu i lou olaga: o lou uluai aso i le aoga, o lau uluai galuega, po o le uluai taimi na e manatua ai le lagonaina o le Agaga Paia. O a isi uluai na e oo i ai e taua ia te oe?
Aisea tatou te tuu ai le taua i nisi taimi i “uluai” i o tatou olaga?
I sina taimi faatoa uma ona papatiso Iesu, sa auai atu ai o Ia ma Ona soo i se faaipoipoga i Kana, o se nuu e lata ane i le nuu o Iesu o Nasareta. O Kana lea na faia ai e Iesu lana uluai vavega na tusi faamaumauina.
Faitau le Ioane 2:1–3, ma vaavaai mo se faafitauli na tulai mai i le taimi o le taumafataga o le faaipoipoga.
O le uaina o se meainu masani i se taumafataga o le faaipoipoga. O nisi taimi e tele aso e faaauau ai taumafataga o faaipoipoga. O le uma o le uaina o se mea e maasiasi ai le au talimalo o tausamaaga. Na faliu atu le tina o Iesu, o Maria, ia Iesu mo se fesoasoani ia toe faatumu le uaina. Tatou te le o mautinoa pe o le a le matafaioi a Maria i le taumafataga o le faaipoipoga, ae e manino lava sa ia lagona e i ai sona tiutetauave ina ua uma le uaina.
O le Faaliiuga a Iosefa Samita ua fesoasoani tatou te malamalama ai i le tali a Iesu i Lona tina: “Funa e, se a ea launa ou te faia mo oe? o le a ou faia; aua e lei oo mai lo’u ituaso” (Faaliliuga a Iosefa Samita, Ioane 2:4 [i le Ioane 2:4, vaefaamatalaga a]). I ona po o Iesu o le faalaniga “funa e” o se ala alofa ma le faaaloalo e faaigoa ai se tina o se tasi.
Faitau le Ioane 2:5, ma vaavaai po o le a le mea na fai atu ai Maria i auauna. Mafaufau po o le a le mea ua aoao mai e faatonuga a Maria i auauna ia i tatou e uiga i lona faatuatua ia Iesu.
Faitau le Ioane 2:6–7, ma vaavaai po o a mea na faatonu e Iesu ia auauna e fai.
Ata
utu maamora
O utu maamora mai le vaitau o le Feagaiga Fou i Isaraelu
O le fasifuaitau “faamamaina o Isaraelu” i le fuaiupu 6 e faasino i aga a Iutaia o le fufuluina faalesauniga o o latou vae ma lima i le vai a o lei talisua. O utu vai maa tetele na tuu ai vai sa faaaoga i sauniga e pei o lenei. “O se ’paita’ pe tusa o le iva kalone (34 lita), o lona uiga o utu e ono e mafai ona ofi ai le 100 i le 160 kalone (pe tusa ma le 380 i le 600 lita)” (Tusi Lesona a le Tagata Aoga o le Feagaiga Fou [Church Educational System manual, 2014], 207). Matau i le Ioane 2:7 pe o le a le tutumu sa i ai nei utu.
Faitau le Ioane 2:8, ma vaavaai po o le a le mea na faatonu e Iesu ia auauna e sosoo ona fai.
Pe ana o oe o se tasi o auauna, mata o a ni ou mafaufauga po o ni lagona a o e aveina atu se ipu ua tumu i lenei suavai i le pule o le tausamaaga?
Faitau le Ioane 2:9–10, ma vaavaai mo mea na fai atu ai le pule o le tausamaaga ina ua uma ona tofo i le meainu na avatu ia te ia.
O le a le mea na tupu i le vai?
Ina ia malamalama i le tala a le pule o le tausamaaga, e ono fesoasoani ia te oe le iloa o le uaina sili sa tele ina faaaoga i le amataga o le tausamaaga, a o le uaina e le lelei tele sa faaaoga i le taufaaiuiuga o le tausamaaga.
E lei aumaia e Iesu se faaliliuga patino o le uiga po o le faatusa o lenei uluai vavega na tusi faamaumauina o Lana galuega i le olaga nei. Peitai, e tele upumoni taua e mafai ona tatou aoao mai lenei tala i le uluai vavega a Iesu ua tusi faamaumauina.
I lau api talaaga mo le suesueina o tusitusiga paia, lisi mai upumoni e mafai ona e faailoa mai mai le Ioane 2:1–10 e uiga ia Iesu Keriso, o Lana sootaga ma lona tina, ma Lona mana.
O se tasi o upumoni na e faailoa mai le Ioane 2:1–10 e ono tutusa ma ia: E ia Iesu Keriso le mana e pulea ai elemene faaletino.
Faitau le Ioane 2:11, ma vaavaai po o a aafiaga le au soo o Iesu i lenei vavega.
Ua ta’u mai i le Faaliliuga a Iosefa Samita e faapea, “sa faamalolosia le faatuatua o ona soo ia te ia” (Faaliliuga a Iosefa Samita, Ioane 2:11).
Tali fesili nei i lau api talaaga mo le suesueina o tusitusiga paia:
E faamalosia faapefea lou faatuatua ia Iesu Keriso ona o lou malamalama i lenei vavega, ma le malamalama o Iesu Keriso o le Foafoa o le lagi ma le lalolagi ma o loo i ai le mana e pulea ai elemene faaletino?
O a isi tala i le Feagaiga Fou o loo faapupula mai ai foi e ia Iesu Keriso le mana e pulea ai elemene faaletino?
Mafaufau i se taaloga iloga i fafo sa e taalo ai a o e laitiiti. E ui ina taumamaina ma malie le taaloga, mata e te maua se lagona toafilemu pe a e taalo ai i lotoa o le malumalu paia? Aisea?
I le uluai tausaga o le galuega a Iesu, sa malaga o Ia i Ierusalema e faamanatu ai le Paseka. Faitau le Ioane 2:12–17, ma vaavaai pe o le a le mea na tupu i le malumalu ina ua taunuu Iesu.
Ata
O Iesu o loo faamamaina le malumalu
Aisea e te manatu na le fiafia ai Iesu i le mea sa tupu i le malumalu? Matau le mea na faia e Iesu e faasao ai le faafitauli.
E fiaafe tagata asiasi na o mai i Ierusalema mo le faamanatuina o le Paseka na mananao e faatau ni manu e ofo atu ai taulaga i totonu o le malumalu o se vaega o la latou tapuaiga. Sa faafesuiai e le au faatau tupe ia tupe Roma mo tupe o le malumalu ina ia mafai ai ona faatau ia manu, ma sa faatau ai e le au fai oloa ia manu sa manaomia. E ui ina sa tatau ai le fefaatauaiga, ae o le faia o ia ituaiga o pisinisi i lotoa o le malumalu e matua le faaaloalo lava ma le migao. E le gata i lea, o nei faatautupe sa matua taugata tau o manu, ona sa saili ia tele a latou tupe faasili.
Ata
Elder Bruce R. McConkie
Na faamatala e Elder Bruce R. McConkie o le Korama a Aposetolo e Toasefululua lea vaaiga: “A o ulufale atu Iesu i lotoa i fafo o le malumalu, … sa i ona luma laulau faatau o oti, o pa o mamoe, o fata lupe, faatasi ai ma le au faatau matapeapea ua ofoina atu tau e matua faia ma le le mafaufau [soona faataugata] mo faamoemoega e fai ai taulaga. Sa feoma’i solo ia laulau a le au faatau tupe o e, sa faafesuiaia tupe Roma ma isi tupe i tupe a le malumalu ina ia mafai ai ona faatau manu e osi ai taulaga, mo se tupe faasili” (Faamatalaga o Aoaoga Faavae o le Feagaiga Fou, 3 vols. [1965–73], 1:137–38).
E ala i Ana taga ma upu, na aoao atu ai e Iesu le paia o le maota o Lona Tama.
Matau i le Ioane 2:16 na fetalai ai Iesu, o le malumalu o le maota o Lona Tama. Mai lenei mea ua tatou aoao ai le upumoni lenei: O le malumalu o le maota o le Atua.
O malumalu o maota o le Atua aua o nofoaga e mafai ona afio mai i ai le Atua. O sauniga e faatatau i le faaolataga o fanau a le Atua e faatino i totonu o malumalu, ma o i latou e o mai i le malumalu e mafai ona lagonaina le Agaga o le Alii iina. Talu ai o le malumalu o “le Maota o le Alii,” e pei ona tusia i fafo, e mafai lava e le Alii lava Ia ona i ai iina i nisi taimi. O malumalu o nofoaga e silisili ona paia e tapuai ai i le lalolagi.
Faitau le saunoaga lea a Peresitene Howard W. Hunter, ma vaavaai pe aisea na tutuliese ai e Iesu ia le au faatau tupe ma le au faatau oloa mai le malumalu:
Ata
Peresitene Howard W. Hunter
“I le gasologa o le fai ifo o le ola mama, o le migao o se tasi lea o uluai amioatua e mou atu. … O le fiafia i tupe ua milosia ai loto o le toatele o tagatanuu o Iesu. Ua latou ano tele i mea latou te maua nai lo le Atua. Afai e le popole i le Atua, aisea la o le a latou popole ai fua i lona malumalu? Sa latou faaliliuina lotoa o le malumalu e fai ma maketi ma ua le lagona ai tatalo ma salamo a le au faatuatua i a latou fefaatauaiga matapeapea o tupe ma le fetagisi o mamoe taumamaina. E lei i ai se taimi na faaalia ai e Iesu se agimalosi tele atu o lagona nai lo le faamamaina o le malumalu. …
“O le mafuaaga o le agimalosi e taoto i na o nai upu lava e ono: ’O le Fale o Lo’u Tama.’ E le na o se fale e masani ai; o le maota o le Atua. Sa faatuina e tapuai ai i le Atua. O se fale mo le loto migao. Sa faamoemoe e avea o se fale o le filemu mo faanoanoaga ma faafitauli, o le faitotoa lava o le lagi. ’Ave ese ia nei mea’ na ia fetalai ai, ’aua le faia le fale o lo’u Tama ma fale faatau oa.’ (Ioane 2:16.) O Lona tuuto atu i Le Silisiliese na faamumu ai se afi i lona loto ma avatu ana upu i le malosi na tuia ai e na faatausuai e faapei o se pelu” (“Ia Paia Lou Suafa,” Ensign, Nov. 1977, 52–53).
I lau api talaaga mo le suesueina o tusitusiga paia, tusi ai le faamatalaga lea: E mafai ona ou faaalia le migao mo le malumalu e ala i le … Ona lisi lea o ni auala uma e mafai ona faamaea ai lenei faamatalaga i le lua minute. Manatua e mafai ona e faaalia le migao mo le malumalu tusa lava pe e te le o i ai i le malumalu.
Filifili se manatu se tasi o i lau lisi, ma faaaoga e faatu ai se sini e faaalia ai le migao mo le malumalu.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Ioane 2 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: