Iunite 2: Aso 1
Mataio 1–2
Folasaga
Na tuuina mai e Mataio le gafa o Iesu Keriso, ma sa tautino atu e se agelu ia Iosefa le mamalu faamatua o Iesu. Sa malaga atu le Au Makoi mai Sasae e sue ma ifo atu i le tamaitiiti. Na ta’u atu ia Iosefa i se miti e ave lona aiga i Aikupito ona sa manao Herota e fasioti ia Iesu.
Mataio 1:1–17
Ua tuuina mai e Mataio le gafa o Iesu
Vaavaai i le ata o ou matua, ma vaai pe mafai ona e faailoa maia soo se uiga faaletino po o isi na e maua mai ia i la’ua. I laina o i lalo ifo, lisi ai ni nai uiga (e pei o mata, lanu, lanu o le lauulu, maualuga, uiga patino, po o le atamai):
A o e suesueina le Mataio 1–2, vaavaai mo upumoni e uiga i matua o le Faaola—Tama Faalelagi ma Maria—ma uiga na Ia maua mai ia i la’ua.
Mataio 1:1–17 o loo lisi mai ai tuaa o le Faaola. Fuaiupu 1 o loo ta’ua ai faapea o Iesu Keriso o se e tupuga mai ia Tavita (o le na fasiotia Koliata ma avea mulimuli ane ma tupu o Isaraelu) ma Aperaamo (o le ua lauiloa o le tama o le nuu o le feagaiga a le Atua).
Tupu o Tavita, Aperaamo
“O loo valoia mai e le Feagaiga Tuai o le Mesia e tupuga mai ia Tavita (tagai 2 Samuelu 7:12–13; Isaia 9:6–7; Ieremia 23:5–6) ma o se fanau a Aperaamo o le a manuia ai ‘atunuu uma o le lalolagi’ (Kenese 22:18; tagai foi Aperaamo 2:11)” (Tusi lesona Feagaiga Fou a le Tagata Aoga [Church Educational System manual, 2014], 12). Na tusi patino atu Mataio i se aufaitau Iutaia ma sa manao ia i latou ia iloa o Iesu na faataunuu ai valoaga o le Feagaiga Tuai e faatatau i le Mesia. O le gafa o loo tuuina mai i le Mataio 1:1–17 ua faailoa mai ai o Iesu o le Mesia folafolaina ma o le suli moni i le nofoalii o Tavita. A o e suesue i le tusi a Mataio, vaavaai mo isi faataitaiga pe na faapefea ona faataunuu e Iesu Keriso ia valoaga o le Feagaiga Fou e faatatau i le Mesia.
Faitau le Mataio 1:16, ma vaavaai mo se faalaniga na tuu atu ia Iesu.
O le upu Keriso o se upu Eleni ma o le upu Aramaika, Mesia,o lona uiga “o le ua faauuina.” I le muai olaga, sa faauuina ai Iesu Keriso e le Tama Faalelagi e avea ma o tatou “Perofeta, Faitaulaga, Tupu, ma Le Laveai” (Taiala i Tusitusiga Paia, “Le Laveai,” “Mesia,” scriptures.lds.org).
Mataio 1:18–25
Ua tautino mai e se agelu ia Iosefa le mamalu faamatua o Iesu
I le Mataio 1:16, i le faaiuga o le gafa o Iesu, o loo ta’ua ai e Mataio o Maria o le ava a Iosefa. Mataio 1:18–25 o loo ta’u mai ai mea na tutupu e oo atu i la la’ua faaipoipoga ma le soifua mai o Iesu.
E pei ona tusia i le Mataio 1:18, sa faamatala ai e Mataio sa faufautane Maria ia Iosefa. O lona uiga sa faamau i la’ua ma fusia faatasi ai faaletulafono o le tasi i le isi ae e lei nonofo faatasi o se tane ma se ava. Peitai, a o lei oo i le faaipoipoga, sa iloa e Iosefa ua to Maria.
Faitau le Mataio 1:19, ma vaavaai mo le mea na fuafua Iosefa e fai.
“E faatea lemu ia te ia” o lona uiga sa fuafua Iosefa e foia le mataupu e uiga i le to a Maria e aunoa ma le faamalosia o ia e faamaasiasia i luma o tagata.
O le a le mea ua aoao mai e lenei fuaiupu ia i tatou e uiga ia Iosefa ma lona alofa mo Maria?
Faitau le Mataio 1:20, ma vaavaai mo le mea na tupu a o mafaufau Iosefa e faamuta loa le la mafutaga (faamau aloaia) ia Maria.
Aisea na ta’u atu ai e le agelu ia Iosefa e aua le fefe e faataunuu pea lona faaipoipo atu ia Maria?
Na tusia e Elder Bruce R. McConkie o le Korama a Aposetolo e Toasefululua le mea lenei e uiga i le mauaina e Iosefa o lana lava molimau i lenei upumoni:
“Sa mafaufau loloto ma tatalo Iosefa. Pe na to Maria i le mana o le Agaga Paia pe o se isi ala? E tusa ai ma le tama moni o le tamaitiiti e lei fanau mai, na iloa e Maria; na iloa e Elisapeta; na iloa foi e Sakaria. Sa latou maua uma a latou molimau e ala i faaaliga, ma o lea ua aoaoina nei Iosefa mo ia lava i le ala lava lea e tasi. …
”Atonu e mafai ona tatou faapea na ta’u e Maria ia Iosefa lona tulaga sa i ai; ona alu ai lea o ia ia Elisapeta; sa tauivi Iosefa ma lona faafitauli pe tusa ma le tolu masina, ua matuai tofotofoina lava; na aumaia e Kaperielu le upu; na auina atu e Iosefa le tala ia Maria e uiga i lona liuaina; na toe foi vave atu o ia ma le fiafia; ma sa faatino ai le vaega lona lua o le sauniga o le faaipoipoga” (The Mortal Messiah: From Bethlehem to Calvary, 4 vols. [1979–81], 1:332–33).
Ina ia malamalama i le uiga o le fasifuaitau “to … mai le Agaga Paia” (Mataio 1:20), faitau le saunoaga lea a Elder McConkie: “E faapei ona avea Iesu ma Alo moni o Maria, e faapena foi ona avea o Ia ma alo totino moni o le Atua le Tama e Faavavau. … O le faamatalaga a Mataio ’o lana to mai le Agaga Paia,’ atonu sa faaliliuina e tatau ona faapea, ’ na iloa ua to o ia e ala i le mana o le Agaga Paia.’ (Mata. 1:18.) O le tala a Luka (Luka 1:35) o loo tusia sa’o ai le mea na tupu. Ua faamatala atoatoa foi e Alema le maitaga ma le soifua mai e ala i le valoaga: O Keriso ’o le a fanaua o ia e Maria, … o ia foi o le taupou, o le ipu filifilia ma le taua, e faamamaluina ma to o ia i le mana o le Agaga Paia, e fanau mai foi se tama tane, ioe, o le Alo lava o le Atua.’ (Alema 7:10.) Na faapena foi ona tautala Nifae ina ua ia ta’ua le taimi o lona maitaga, Na ’aveina [Maria] e le Agaga,’ ma le taunuuga na fanau mai ia te ia le tama ’o le Tamai Mamoe a le Atua, ioe, o le Alo lava o le Tama e Faavavau.’ (1 Ni. 11:19–21.)” (Doctrinal New Testament Commentary, 3 vols. [1965–73], 1:82–83).
O nei aoaoga ua faamautu ai le aoaoga faavae lenei: O Iesu Keriso o le Alo paia o le Tama Faalelagi ma Maria. Fuafua e tusia lenei mataupu faavae i autafa o le Mataio 1:18–25 i le laina tuaoi o au tusitusiga paia.
Toe manatu i le ata na e tilotilo i ai o ou matua ma le lisi na e tusia o uiga na e maua mai ia i la’ua. Ona faitau lea o le saunoaga lea a Elder James E. Talmage o le Korama a Aposetolo e Toasefululua, ma vaavaai pe aisea e taua ai le malamalama o Iesu o le Alo paia o le Tama Faalelagi ma Maria: “O lena Tamaitiiti o le a fanaua e Maria o le alo pele o Elohima, le Tama e Faavavau. … I Lona natura o le a tuufaatasia ai mana o le tulaga Faale-Atua ma le mana ma avanoa o le olaga faitino. … O le Tamaitiiti o Iesu sa tatau ona ia mauaina uiga faaletino, faalemafaufau, ma faaleagaga, manaoga, ma mana na iloa ai Ona matua—o le tasi e faavavau ma faamamaluina—le Atua, o le isi o le tagata—le fafine” (O Iesu le Keriso, 3rd ed. [1916], 81).
O le a le mea na maua e Iesu mai Lona Tama? O le a le mea na Ia maua mai Lona tina?
Talu ai o Iesu o le Alo o se Tama e tino ola pea ma se tina i le tino, sa ia maua le mana e ola ai e faavavau pe afai Na te filifilia, e faapea foi le tulaga e mafai ona maliu ai. O lenei natura paia na faaagavaaina ai o Ia ia mafai ona mafatia mo a tatou agasala, maliu i luga o le satauro, ma toetu (tagai Alema 34:9–10).
-
Manatu faapea ua e maua se avanoa e fesoasoani ai i se uo e le Kerisiano, ia malamalama pe o ai Iesu Keriso. E faapefea ona e faamatala atu le natura paia o Iesu Keriso i lea uo? Tusi au tali i lau api talaaga mo tusitusiga paia.
Mataio 2:1–12
Ua taitai atu le Au Makoi ia Iesu
O ai na avatu ni meaalofa i le Faaola ina ua fanau mai o Ia?
O le Evagelia a Mataio ona pau lea o le Evagelia o loo aofia ai le tala i le Au Makoi. Tusi au tali i fesili nei e uiga i le Au Makoi i le avanoa i le itu taumatau o le fesili.
|
O le a se mea ua e iloa e uiga i le Au Makoi? | |
|---|---|
|
Na faapefea ona iloa e le Au Makoi ua fanau mai le Mesia? | |
|
Aisea na mananao ai le Au makoi e saili le Mesia? | |
|
Na faapefea ona iloa e faitaulaga sili ma le au tusiupu le mea o le a fanau mai ai le Mesia? | |
|
O le a le mea na manao Herota i le Au Makoi e fai pe a latou mauaina le Mesia? | |
|
O le a le mea na fai e le Au Makoi nai lo lena? | |
Faitau laia o le Mataio 2:1–12, ma vaavaai mo tali i fesili nei. Faasa’o pe fetuunai au tali pe a manaomia ai.
Pe na e aoaoina se mea fou e uiga i le Au Makoi? Afai na i ai, tusi se fetu i autafa o fesili na e aoaoina ai se mea fou.
“Pe o ai nei tagata e le o ta’u maia, ae e mautinoa o i latou e le na o ni tagata faatauvaa. Sa latou maua le avanoa faapitoa e saili ai le Alo o le Atua ma tuuina atu ia te Ia ni meaalofa, ma sa latou nofouta faaleagaga ma i ai le faautautaga, e ta’u mai ai o i latou moni o ni perofeta i se feau paia” (Bible Dictionary, “Wise Men of the East”).
O le Au Makoi na “taitai e le Agaga, e vaai i le Alo o le Atua ma … sa toe foi i o latou tagata e tuu atu le molimau e moni lava ua fanau mai le tupu o Emanuelu i le tino” (Bible Dictionary, “Magi”).
E tele ina manatu tagata faapea na asiasi atu le Au Makoi i le Faaola i le po na soifua mai ai o Ia, faatasi ai ma le au leoleo mamoe. Peitai, o le Mataio 2:11 o loo ta’u mai ai o se taimi mulimuli ane, i le va o le tasi ma le lua tausaga (na maua ai e le Au Makoi ia Iesu i se fale, ae le o se moega vaovao, ma o Ia o se “tamaitiiti,” ae le o se pepe). Ia matau foi o le mafuaaga na manao ai Herota i le Au Makoi e lipoti atu ia te ia pe a latou maua le Mesia, ina ia mafai ai ona ia fasioti ia te Ia (tagai Mataio 2:13).
Na faapefea ona iloa e le Au Makoi le mea e maua ai le Mesia?
O le faataitaiga o le Au Makoi ua fesoasoani tatou te malamalama ai i le mataupu faavae lenei: Afai tatou te saili ma le loto faamaoni i le Faaola, o le a taialaina i tatou ia te Ia.
-
Ina ua maua e le Au Makoi le Faaola, sa latou tuuina atu loa a latou meaalofa ia te Ia. O se tasi o faamoemoe o lenei mea, o le ifo atu lea ma faaneenee atu ia te Ia. O le a se mea e mafai ona tatou aoao mai le faataitaiga a le Au Makoi i le tuuina atu o meaalofa ia Iesu?
Ina ia malamalama pe mafai faapefea ona tatou ofoina atu ni meaalofa taua i le Faaola, faitau le saungoa lea a Elder D. Todd Christofferson o le Korama a Aposetolo e Toasefululua:
“I aso anamua, pe a mananao tagata e tapuai i le Alii ma saili Ana faamanuiaga, e masani ona latou aumaia se meaalofa. …
“Pe o i ai ea se mea ia te oe poo lou olaga e le o mama, pe le o agavaa? Pe a mafai ona e lafoa’ia lena mea, o se meaalofa lena i le Faaola. Pe o i ai ea se mausa lelei po o se uiga tausaafia e le o maua i lou olaga? afai e te faia o lea ma avea ma se vaega o lau amio, o loo e tuuina atu se meaalofa i le Alii. O nisi taimi e faigata ona fai lenei mea, ae pe taua au meaalofa o le salamo ma le usiusitai pe afai e leai se tau e te faatauina ai? Aua e te fefe i le taumafaiga o loo manaomia. Ma manatua, e te le tau faia na o oe. O le a fesoasoani Iesu Keriso ia faia oe lava o se meaalofa taua“ (“A Liua Mai Oe,” Ensign, May 2004, 12).
-
I le saunoa ai e uiga i uluai tausaga o le soifuaga faaaletino o Iesu Keriso, na tuu mai ai e Elder Bruce R. McConkie le vaaiga aoao lea:
“E ui i le faasologa tonu o femalagaaiga ma auga o uluai tausaga o lo tatou Alii e le o matua manino mai, ae o mea nei e foliga mai e matuai mautinoa lelei:
“(1) I le taimi o la la’ua faamau ma le faaipoipoga, sa nonofo Iosefa ma Maria i Nasareta i le itu i sasae o le itumalo o Kalilaia. (Luka 1:26–35; 1 Ni. 11:13.)
“(2) Na taialaina i le mana mai le lagi, sa la malaga ai i Peteleema, le aai o Tavita, lea na fanau ai Iesu i se falemanu. ( Luka 2:1–7.)
“(3)–I le aso lona valu, a o i ai i laua i Peteleema, sa peritomeina ai Iesu. (Luka 2:21.)
“(4) Ina ua mavae aso o le faamamaina o Maria, o se umi e fasefulu-aso (Lev. 12), na malaga atu le aiga paia i Ierusalema lea na tuuina atu ai Iesu i le malumalu, o iina na molimau atu ai Simeona ma Ana i lona tulaga paia o le Alo. (Luka 2:22–38.)
“(5) O lea, ina ua uma ona ’faatinoina mea uma e tusa ai ma le tulafono a le Alii,’ sa latou o atu loa lava i Nasareta. (Luka 2:39.) Ua iloatino ai e lei oo mai lava ia le au makoi e ifo atu i lo latou Tupu, aua na sosoo la latou asiasiga ma le solaaga i Aikupito. O lona uiga sa le mafai ona latou o i Aikupito ma toe foi atu i Peteleema i le umi e fasefulu aso ma ua manino lea (a) ona o la sa latou i ai i Aikupito i le taimi o le maliu o Herota, lea e lei tupu vagana pe ua tusa ma le lua tausaga talu ona fanau mai, ma (e) aua sa latou toe foi mai Aikupito i Nasareta, ae le o Peteleema.
“(6) O le isi, mo se mafuaaga e le mailoa ma e le o tusia, na toe foi Iosefa ma Maria ma le tama i Peteleema, ma maua ai se fale iina, ma sa avea o se vaega o le olaga i le nuu ina ua taunuu atu ia le au makoi. (Mata. 2:1–12.)
“(7) Na lapataia e le Atua, ma o lea ua sosola nei le aiga i Aikupito mo se malaga e le iloa le umi, masalo pe na o ni nai vaiaso po o masina. (Mata. 2:13–15.)
“(8) Ina ua mavae le oti o Herota sa latou toe foi mai ma le faamoemoega manino e toe nonofo i Peteleema, i le mea atonu na lava se mea e nonofo ai. Peitai ona o le fefe ia Arekilao, le atalii o Herota, o lea na le o ai i le itumalo o Iutaia mo le saogalemu sili atu o Kalilaia. O lea na latou toe foi ai ma nonofo i Nasareta. (Mata. 2:19–23.)
“(9) Mai i lena taimi seia oo ina amata lana galuega aloaia, o se vaitaimi pe a ma le luasefulufitu pe luasefuluvalu tausaga, sa nofo ai pea lo tatou Alii i Nasareta. (Luka 2:51–52; I. V. Mata. 3:22–26.)” (Faamatalaga Faaleaoaoga Faavae o le Feagaiga Fou, 1:108--9).
Mataio 2:13–23
Ua sosola Iosefa, Maria, ma Iesu i Aikupito
E pei ona tusia i le Mataio 2:13–23, na oo ina ua ita Herota ina ua o le Au Makoi ”i lo latou nuu” (Mataio 2:12) e aunoa ma le faailoa atu ia te ia le mea sa iai le Mesia. O le faamoemoe ia fasiotia le Mesia, na ia poloaiina ai ia fasiotia tamaiti uma e tailua tausaga ma laiti ifo i Peteleema ma nuu tuaoi.
Faitau le Mataio 2:13–14, ma vaavaai pe na faapefea ona iloa e Iosefa le mea e fai ina ia saogalemu ai lona aiga.
O fea na ave i ai e Iosefa ia Maria ma Iesu?
Sa nonofo Iosefa, Maria, ma Iesu i Aikupito seia oo ina maliu Herota. E pei ona tusia i le Mataio 2:19–23, na faatonuina e le Atua ia Iosefa e ala i miti e toe ave lona aiga i Iutaia, ma sa latou nonofo ai i le aai o Nasareta.
Na faapefea ona faamanuiaina olaga o isi ona o le nofouta o Iosefa i mea faaleagaga?
Faamaea le fasifuaitau lea e fatu mai ai se mataupu faavae e mafai ona tatou aoao mai ia Iosefa: Afai tatou te nofouta i le Agaga, ona .
-
E ui ina laitiiti se mea o tusia e uiga i le soifua faatamaitiiti o Iesu ma lona talavou, ae o loo faaopoopo mai e le Faaliliuga a Iosefa Samita ia fuaiupu e tolu o le a sosoo ma le Mataio 2:23 i le Fatuga a King James o le Tusi Paia. O nei fuaiupu ua maua mai ai ni faamatalaga e oo mai i le taimi nei i le soifuaga o le Faaola. A o e faitauina le faaopoopoga lea mai le Faaliliuga a Iosefa Samita, mafaufau i le lotomaualalo o Iesu a o talavou:
“Ma sa oo ina faapea ona tupu ae Iesu faatasi ma ona uso, ma ua faateleina lona malosi, ma sa faatalitali i le Alii i le oo mai o le taimi o lana galuega.
“Ma sa auauna atu o ia i lalo o lona tama, ma sa le tautala o ia e pei o isi tagata, sa le mafai foi ona aoaoina o ia; aua sa le manaomia e ia soo se tagata e aoaoina o ia.
“Ma ina ua mavae tausaga e tele, sa oo mai ai le itula o lana galuega” (Faaliliuga a Iosefa Samita, Mataio 3:24–26 [i le faaopoopoga i le Tusi Paia]).
-
Ua ou suesueina le Mataio 1–2 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: