Iunite 30: Aso 4

Iuta

Folasaga

Sa apoapoai atu Iuta i tagata o le Ekalesia e “faamalolosi ona finau mo le faatuatua” (Iuta 1:3) e faasaga i aoao pepelo. Na ia faamatala mai aoao pepelo ma fautua mai i le Au Paia e atinae o latou olaga i luga o le talalelei a Iesu Keriso.

Iuta 1:1–19

Sa apoapoai atu Iuta i tagata o le Ekalesia e finau ma le malosi mo le faatuatua e faasaga i aoao pepelo

1. I lau api talaaga mo le suesueina o tusitusiga paia, lisi ai ni auala eseese e mafai ona e tali atu ai i tulaga taitasi o loo i lalo:

   1. I se saite o faasalalauga faaagafesootai, na tuu ai e se uo se faamatalaga e faitio ai i le tulaga o le Ekalesia i faaipoipoga o itupa tutusa.

   2. Ua iloa e se tuaoi o oe o se tagata o le Ekalesia. Ua ia fai atu ia te oe ua ia faitauina le Tusi a Mamona ma e manatu o se tusi faagaeetia ae e le o se afioga a le Atua.

   3. I le taimi o se talanoaga i le vasega i le aoga, sa finau mai ai se tasi o lau tupulaga e faapea, e le leaga le matamata i ponokalafi ma e le tatau ona fautuaina e tuu.

O le tusi a Iuta i Kerisiano faamaoni na oo atu i se taimi na feagai ai tagata o le Ekalesia ma feteenaiga ogaoga. Faitau le Iuta 1:3–4, ma vaavaai mo le mea na fautuaina e Iuta tagata o le Ekalesia e fai i le feagai ai ma feteenaiga.

Matau na faamalosiau atu Iuta i le Au Paia e “faamalolosi ona finau mo le faatuatua” (fuaiupu 3). O lona uiga na tatau ona latou totoa e puipui, aoao, ma molimau atu e uiga i le talalelei. Na oo atu [tagata] “e faalematau i latou” (fuaiupu 4) ma faamoemoega leaga ma oo i tulaga o le Ekalesia. Sa faalauiloa e nei tagata o le Ekalesia mea piopio, faiga le mama e ala i le aoao atu e faapea, o le aoaoga faavae o le alofa tunoa ua maua ai se faatagaga atoatoa i le agasala aua o le a faamagaloina ma le alofa mutimutivale e le Atua. Na latou teenaina foi nisi o upumoni e uiga i le Tama Faalelagi ma Iesu Keriso.

O se tasi o upumoni e mafai ona tatou aoaoina mai i aoaoga a Iuta o le, o soo o Iesu Keriso e tatau ona finau malosi mo le talalelei a Iesu Keriso e faasaga i aoaoga pepelo ma faiga piopio.

O le finau mo le talalelei e le faapea o o tatou agaga e faafinau. E tatau ona tatou agalelei ma totoa ae le o le fiamalosi a o tatou puipui ma molimau atu e uiga i le upumoni (tagai Alema 38:12; 3 Nifae 11:29). Ina ia maua se iuga lelei o le finau atu mo le talalelei—e puipui, aoao, ma molimau—o lona uiga foi, e tatau ona tatou iloa po o a aoaoga ma mataupu faavae sao o le talalelei.

2. Tali fesili nei i lau api talaaga mo le suesueina o tusitusiga paia:

   1. E faapefea ona tatou finau mo le talalelei e aunoa ma le faafinau?

   2. Toe tomanatu i tulaga na tuuina atu i le galuega atofaina 1. I nei tulaga ma isi tulaga faapea, o a nisi o auala e mafai ona tatou finau ai mo le talalelei e faasaga i aoaoga sese ma faiga piopio?

Sa faasoa mai e Elder Neil L. Andersen o le Korama a Aposetolo e Toasefululua, se tala i se tamaitai talavou sa finau mo le talalelei:

“Talu ai nei, sa ou talanoa ai i se [tamaitai o le] Lora mai le Iunaite Setete. Ou te sii mai i lana imeli:

“‘O le tausaga ua mavae atu nei sa amata ai ona tusia e nisi o au uo i luga o le Facebook o latou manatu e uiga i le faaipoipoga. Sa toatele na lagolagoina le faaipoipoga o itupa tutusa, ma e feololo nai talavou o le AAG sa faailoaina lo latou “fiafia” i tusiga. Sa leai sa’u faamatalaga na faia.

“‘Sa ou filifili loa e tau atu lou talitonuga e uiga i le faaipoipoga ua masani ai i se ala magafagafa lelei.

“‘I lo’u ata i lou talaaga otooto, sa ou faaopoopo i ai le faamatalaga, “Ou te talitonu i le faaipoipoga i le va o se alii ma se tamaitai.” Sa lei pine ae amata ona ou mauaina ni feau. “E te manatu faapito.” “E te tusitusilima.” Sa faatusaina au e se tasi o se pule o pologa. Ma sa ou mauaina le tusiga lenei mai se uo lelei lava o se tagata malosi o le Ekalesia, ‘E ao ona faafou ou manatu. Ua suia ia mea ma ua tatau foi ona e [sui].”

“‘Ou te le i toe finau i ai,’ o lana tala lea, ‘ae ou te le i aveesea lau faamatalaga [mai la’u itulau].’

Sa ia faaiuina e faapea: “O nisi taimi, e pei ona saunoa mai Peresitene Monson, ‘E tatau ai ona e tu na o oe.’ E faamoemoe i le avea ai o ni talavou, o le a tatou tutu faatasi i le faamaoni i le Atua ma i aoaoga a Ana perofeta soifua’” (“Asiosio Faaleagaga,” Ensign po o le Liahona, Me 2014, 19–20).

Mafaufau i se taimi na e finau ai, pe na finau atu ai se tasi e te iloa mo le talalelei a Iesu Keriso. Mafaufau po o a nisi mea e mafai ona e faia e puipuia ma tu atu ai mo le upumoni. Tuuto e te mulimuli i soo se musumusuga e te maua.

I le Iuta 1:5–7 na faatusa e Iuta tagata tetee o le Ekalesia ia i latou o e sa le faamaoni i Isaraelu anamua lea na taitai ese i fafo o le laueleele o Aikupito; o i latou na tetee i le Atua i lo “latou mamalu [muamua]” (Iuta 1:6; tagai foi i le Aperaamo 3:22–26), po o le muai olaga; ma tagata amioleaga i totonu ma faataamilo i Sotoma ma Kumoro ia na faaumatiaina .

E pei ona tusia i le Iuta 1:8–16, sa faamatalaina e Iuta le tele o uiga o le a fesoasoani i tagata o le Ekalesia e iloa ai i latou na faasalalauina filosofia ma faiga piopio i le Ekalesia. Mo se faataitaiga, na ia faamatalaina i latou o ni “ao … e le o i ai se vai, ua feleleaiina i matagi” ma “o laau ua malili o latou lau, ua le fua” (Iuta 1:12). E faapefea e pei aoao pepelo o ao e le o i ai se vai ma laau ua le fua?

Atonu na faatatau Iuta ia ana tusi i faamatalaga o loo maua i tusi apokalifa o le Tusi a Mose ma le Tusi a Enoka. O le Tusi a Mose o loo faamatala mai ai “Mekaeli le agelu silisili … ua finau ma le tiapolo … e uiga i le tino o Mose” (Iuta 1:9). O loo tau mai i le tusi na iu lava ina malo Mekaeli, ma sa liua Mose i le iuga o lona soifua (tagai Alema 45:19). O le tusi a Enoka o loo i ai se valoaga mai ia Enoka e uiga i le Afio Mai Faalua (tagai Iuta 1:14–15). Sa faailoa mai e le Alii o le tele o mea o loo i totonu o tusi apokalifa e sao, ma o i latou e faamalamalamaina e le Agaga e mafai ona manuia i le faitau i ai. Ae ui i lea, o nisi tusi ua i ai ni faaopoopoga ua faaleagaina ai uluai anotusi (tagai MF&F 91). (Mo nisi faamatalaga e uiga i le Apokalifa, tagai i le Bible Dictionary, “Apokarifa.”)

Faitau le Iuta 1:8, 10, 14–19, ma vaavaai mo uiga faaopoopo o aoao sese. Atonu e te manao e maka pe faailoga mea ua e maua. I le siata o loo auina atu faatasi ai, faatumu avanoa e tusa ma mea e te aoaoina mai fuaiupu. Ua tuuina atu nisi o faamatalaga i le siata e fesoasoani ia e malamalama ai i tuisitusiga a Iuta. (Matau o le “aso e gata ai” [fuaiupu 18] e faatatau i le periota o taimi lea na ola ai Iuta faapea foi i aso mulimuli o loo tatou ola ai.)

Uiga o Aoao Pepelo

Faaleaga o latou tino i le ola le mama (fuaiupu 8) taufaatauvaa i taitai ma talanoa ____________________ e uiga i e mamalu, po o taitai o le Ekalesia (fuaiupu 8) Upu leaga i mea latou te le [iloa] ____________________ (fuaiupu 10). Faaleaga i latou lava e ala i le ola i le poto faaletuinanau o loo ia i latou (fuaiupu 10) Faia o amioga faalematau (fuaiupu 15) Tautala i upu faatautala e faasaga (fuaiupu 15). Muimui ma faameo (fuaiupu 16)

Mulimuli ma faia o latou [tuinanau] fuaiupu 16. Faasausili (fuaiupu 16) Faaali atu o le faaneenee i isi mo le maua mai ai o ni mea (fuaiupu 16) ____________________ o le Ekalesia a le Alii ma ona tulaga faatonuina (fuaiupu 18) Vavae ese mai i latou lava mai tagata talitonu (fuaiupu 19) Mafaufau ma amio faaletino,(fuaiupu 19) Ua le i ai le ____________________ (fuaiupu 19).

Aisea e taua ai le iloa o uiga o aoao pepelo?

E le o tagata uma e i ai se uiga se tasi pe sili atu o nei uiga o se aoao pepelo. Po o tagata uma o e aoao atu se mea e le sao o se aoao pepelo. Atonu latou te sasi ma le le iloa i lo latou malamalamaga i se mataupu. E ui i lea, o le iloaina o nei uiga e mafai ona fesoasoani tatou te iloa ai aoao pepelo, o a latou faamoemoega o le faavaivaia o le faatuatua ma le usiusitai o isi e ala i le faaseseina o i latou ma faalauiloa atu le leaga.

I le Iuta 1:17, matau o loo faamanatu mai e Iuta i le Au Paia na lapatai mai Aposetolo a le Alii i tagata o le Ekalesia e uiga i aoao pepelo. Mai le fuaiupu lenei ua tatou aoao ai, o aposetolo ma perofeta e lapatai mai ia i tatou ma fesoasoani ia tatou iloa i latou o e saili e faavaivaia o tatou faatuatua ma o tatou usiusitai.

O loo faaauau e perofeta ma aposetolo i aso nei ona lapataia i tatou e uiga i aoao pepelo.

Na saunoa mai Elder M. Russell Ballard o le Korama a le Au Aposetolo e Toasefululua: “I le avea ai ma Aposetolo a le Alii o Iesu Keriso, o lo tatou tiute le avea ma leoleo i luga o le olo, e lapatai atu i tagata o le Ekalesia e nofouta i perofeta pepelo ma faiaoga pepelo o e faatalitali e maileia ma faatamaia le faatuatua ma le molimau. O le aso, matou te lapataia outou o loo i ai ni perofeta pepelo ma ni faiaoga pepelo ua tulai mai; ma afai tatou te le faaeteete, e oo lava ia i latou o tagata faamaoni o Le Ekalesia a Iesu Keriso o le Au Paia o Aso e Gata Ai, o le a afaina i a latou taufaasese”(“Beware of False Prophets and False Teachers,” Ensign, Nov. 1999, 62).

O a nisi o aoao pepelo po o aoaoga pepelo ua lapatai mai ai perofeta ma aposetolo o aso nei?

Mafaufau i mea ua e aoaoina mai le tusi a Iuta, aisea e taua ai le suesue i upu a aposetolo ma perofeta?

Iuta 1:20–25

Ua fautua atu Iuta i le Au Paia e atiae o latou olaga i luga o le talalelei a Iesu Keriso ma fesoasoani e laveai isi

Faitau le Iuta 1:20–21, ma vaavaai po o a mea na apoapoai atu ai Iuta i le Au Paia e fai ina ia tumau faamaoni ai i le faatuatua. O le fuaitau ”o le Agaga Paia [tou te] tatalo ai” i le fuaiupu 20 o lona uiga ia tatalo ma le fesoasoani a musumusuga mai le Agaga Paia.

Faaaoga ia upumoni na e aoao mai i nei fuaiupu e faauma ai le upumoni nei: E mafai ona tatou faamaoni i le faatuatua e ala i le .

3. Tali fesili nei i lau api talaaga mo le suesueina o tusitusiga paia:

   1. Aisea e taua ai soo se taumafaiga e tumau faamaoni i le faatuatua?

   2. Na faapefea ona fesoasoani le ola ai i le fautuaga a Iuta ia te oe po o isi e te iloa e tumau faamaoni ai i le faatuatua?

4. I se isi fasi pepa, tusi ai se auala se tasi e mafai ona e faaleleia i le mulimuli ai i le fautuaga a Iuta, ma tuu le pepa i se mea e te vaai soo i ai o se faamanatu ia faaaoga mea na e tusia. A maea ona e faia lenei mea, tusi le Faamaeaina i lau api talaaga mo le suesueina o tusitusiga paia.

E pei ona tusia i le Iuta 1:22–25, sa apoapoai atu Iuta i tagata faamaoni o le Ekalesia e fesoasoani i isi sa tauivi faaleagaga, e masalo ona o faatosinaga a aoao pepelo. Na ia avatu foi le viiga i le Atua.

5. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Iuta ma faamaeaina lenei lesona i le (aso).

   O fesili, mafaufauga, ma manatu faaopoopo ou te fia faasoa atu i lo’u faiaoga: