Faatomuaga i le Efeso
Aisea e Suesue ai Lenei Tusi?
Na aoao mai Elder Bruce R. McConkie o le Korama a Aposetolo e Toasefululua e faapea “O Efeso o se tusi mo le lalolagi atoa, mo Iutaia ma Nuuese, mo le tane ma le ava, mo le matua ma le tamaitiiti, mo le matai ma le auauna. O le mafaufau ma le finagalo o le Atua i aso o Paulo; o le leo o le musumusuga i o tatou aso; o se tusi o le valaau ma faatatau i le atulaulau atoa.
“… O loo i ai nisi o tusitusiga sili ona lelei a Paulo, ma o se pepa faamatalaga e taulima ai mea faavae autu, ma le talalelei a le Atua i lona mamalu faaolaina atoa” (Doctrinal New Testament Commentary, 3 vols. [1965–73], 2:489).
O le suesueina o le Tusi ia Efeso e mafai ona musuia ai oe e faataatiaese mea o lenei lalolagi, ma e mafai ona fesoasoani e te tuputupu ae ai faaleagaga, ma aoao ia auai atoatoa atili i le autasi ma le faaaumea o le Ekalesia.
O Ai na Tusia Lenei Tusi?
O le Aposetolo o Paulo na tusia le Tusi i Efeso (tagai Efeso 1:1).
O Anafea ma o Fea na Tusia ai?
Fai mai Paulo sa avea o ia ma se pagota i le taimi na ia tusia ai le Tusi i Efeso (tagai Efeso 3:1; 4:1; 6:20). Atonu na tusia le Efeso i le taimi o le faafalepuipuiina muamua o Paulo i Roma, i se vaitaimi o le T.A. 60–62 (tagai Taiala i Tusitusiga Paia, “Pauline Epistles,” scriptures.lds.org). I le taimi lenei, sa taofia ai Paulo i lona lava fale, ae sa ia maua le saolotoga e maua ai tagata e asiasi atu ma aoao atu le talalelei (tagai Galuega 28:16–31).
O Ai Na Tusia i Ai ma Aisea?
I le Lomiga a King James o le Tusi Paia, fai mai le Efeso 1:1 o le Tusi i Efeso ua faatatauina “i le au paia o i Efeso.” Ae peitai, o tusiga anamua a Efeso e le o i ai upu “o i Efeso.” O lenei mea ua fautuaina mai ai atonu e lei fitoitonu ona tusi atu e Paulo le tusi i Efeso ae i nai isi au lotu o le Au Paia, e aofia ai ma i latou i Efeso. O Efeso sa avea ma ofisa tutotonu o Paulo i le taimi o lana malaga lona tolu faafaifeautalai (tagai Galuega 19:9–10; 20:31), ma sa alofa tele o ia i nei tagata (tagai Galuega 20:17, 34–38).
I le tusi lenei, sa talanoa atu ai Paulo i tagata nuuese o le Ekalesia (tagai Efeso 2:11) o e atonu o ni tagata fou liliu mai (tagai Efeso 1:15). Sa ia tusi atu e fesoasoani e atiina ae le faaleagaga ma molimau a i latou o e ua avea ma tagata o le ekalesia. O ona faamoemoega autu lava, ia fesoasoani i nei tagata liliu mai ia tuputupu ae i o latou malamalama faaleagaga e uiga i le Atua ma le Ekalesia (tagai Efeso 1:15–18; 3:14–19); ia faalauiloa atu le lotogatasi, ae maise lava i le va o le Au Paia nuuese ma Iutaia (tagai Efeso 2:11–22; 4:1–16; 5:19–6:9); ma ia uunaia le Au Paia ia tetee atu i mana o le amioleaga (tagai Efeso 4:17–5:18; 6:10–18). E toatele le Au Paia i Efeso sa lava lo latou ola amiotonu ina ia faamauina ai i le ola e faavavau (tagai Efeso 1:13; Bruce R. McConkie, Doctrinal New Testament Commentary, 2:493–94).
O A Nisi o Vaaiga Iloga o Lenei Tusi?
O le Efeso o loo i ai le tele o aoaoga ma manatu ua masani ai le Au Paia o Aso e Gata Ai, e aofia ai le muaifaauuina, o tisipenisione o le atoaga o taimi, o le Agaga Paia o Folafolaga, o le taua o perofeta ma aposetolo, o le manatu e uiga i le Ekalesia moni e tasi ma tuufaatasi, ma tofi, valaauga, ma faatinoga eseese i totonu o le faalapotopotoga o le Ekalesia. O le tusi lenei o loo i ai foi nisi o aoaoga e sili ona matagofie i le aiga ua maua i soo se mea i tusitusiga paia.
Otootoga
Efeso 1:1–4:16. Ua tusi foi Paulo e uiga i le muaifaauuina o le Au Paia ia maua le talalelei; o le tisipenisione o le atoaga o taimi; faamauga e ala i le Agaga Paia o Folafolaga; faaolataga e ala i le alofa tunoa; o le tuufaatasia o le Au Paia o nuuese ma Iutaia i le Ekalesia; e tasi le Alii, tasi le faatuatua, tasi le papatisoga; o le faamoemoega o le Ekalesia; ma le faatulagaga o le Ekalesia i luga o se faavae o perofeta ma aposetolo, ma Iesu Keriso o le maatulimanu autu. Ua aoao mai Paulo o le a faapotopoto faatasi e le Atua mea uma ia Keriso i le tisipenisione o le atoaga o taimi.
Efeso 4:17–6:24. Ua uunaia e Paulo le Au Paia e faaaoga aoaoga faavae moni i o latou olaga i aso taitasi. Ua ia uunaia foi i latou e tuuese le tagata tuai (a latou agasala sa faia muamua) ae oofu i le tagata fou ua avea ai i latou e ala ia Keriso. Ua ia tuuina atu le fautuaga i ava, tane, tamaiti, matua, auauna, matai, ma aulotu. Ua ia uunaia le Au Paia ia “oofu i le ofutau atoatoa o le Atua” (Efeso 6:11).